ວຽກ​ງານ​ອຸດ​ສາ​ຫະ​ກຳ ແລະ ການ​ຄ້າ

1.ການ​ຈັດ​ຕັ້ງ​ປະ​ຕິ​ບັດ​ເຄື່ອນ​ໄຫວ​ວຽກ​ງານ​ໄລ​ຍະ​ 5 ປີ ຜ່ານ​ມາ (ປີ 2015-2019)
ຜ່ານ​ການ​ເຄື່ອນ​ໄຫວ​ວຽກ​ງານ​ທາງ​ດ້ານ​ວິ​ຊາ​ສະ​ເພາະ​ໃນ​ໄລ​ຍະ​ຜ່ານ​ມາ​ທົ່ວ​ເມືອງ ມີ​ໂຮງ​ງານ​ອຸດ​ສາ​ຫະ​ກຳ​ປຸງ​ແຕ່ງ ແລະ ຫັດ​ຖະ​ກຳ​ຈຳ​ນວນ 238 ຫົວ​ໜ່ວຍ, ໃນ​ນັ້ນ ມີ​ໂຮງ​ງານ​ອຸດ​ສາ​ຫະ​ກຳ​ປຸງ​ແຕ່ງ​ຂະ​ໜາດ​ໃຫຍ່ 3 ໂຮງ​ງານ ຂັ້ນ​ແຂວງ ແລະ ສູນ​ກາງ​ຄຸ້ມ​ຄອງ​ເຊັ່ນ: ໂຮງ​ງານ​ຊີ​ມັງ​ລາວ​ວັງ​ວຽງ ຫຼັງ I, ຫຼັງ II, ຫຼັງ III ແລະ ໂຮງ​ງານ​ຂົບ​ຫີນ 7 ໂຮງ ໂດຍ​ແມ່ນ​ຂັ້ນ​ແຂວງ​ຄຸ້ມ​ຄອງ ແລະ ມີ​ບັນ​ດາ​ໂຮງ​ງານ​ປຸງ​ແຕ່ງ​ຂະ​ໜາດ​ກາງ ແລະ ຂະໜາດ​ນ້ອຍ​ທີ່​ພະ​ແນກ​ອຸດ​ສາ​ຫະ​ກຳ ແລະ ການ​ຄ້າ ແຂວງວຽງ​ຈັນ ມອບ​ໃຫ້​ເມືອງ​ຄຸ້ມ​ຄອງ 228 ຫົວ​ໜ່ວຍ. ປີ 2019 ເປັນ​​ຕົ້ນ​ໄປ​ລວມ​ລາຍ​ຮັບ​ຈາກ​ອຸດ​ສາ​ຫະ​ກຳ ແລະ ຫັດ​ຖະ​ກຳ​ບັນ​ລຸ​ໄດ້ 254.14 ຕື້​ກີບ, ທຽບ​ໃສ່ 5 ປີ​ຜ່ານ​ມາ​ມູນ​ຄ່າ​ລາຍ​ຮັບ​ເພີ່ມ​ຂຶ້ນ 40.5%, ມີ​ມູນ​ຄ່າ​ການ​ລົງ​ທຶນ​ທັງ​ໝົດ (ທຶນ​ຄົງ​ທີ່) 1,066,082,834,564 ກີບ, ລວມຍອດ​ຜະ​ລິດ​ຕະ​ພ​ັນ​ລວມ​ທັງ​ໝົດ 696,960,783,526 ກີບ.

2. ທິດ​ທາງແຜນ​ການ 5 ປີ​ຕໍ່​ໜ້າ (2020-2024).
– ສືບ​ຕໍ່​ແນະ​ນຳ​ໃຫ້​ບ​ັນ​ດາ​ຫົວ​ໜ່ວຍ​ທຸ​ລະ​ກິດ​ທີ່​ເກີດ​ຂຶ້ນ​ໃໝ່ ພາຍ​ໃນ​ເມືອງ​ມາ​ແຈ້ງ​ຂຶ້ນ​ທະ​ບຽນ​ວິ​ສາ​ຫະ​ກິດ​ໃຫ້​ໄດ້ 720 ຫົວ​ໜ່ວຍ, ຄາດ​ຄະ​ເນ​ທຶນ​ຈົດ​ທະ​ບຽນ ທັງ​ໝົດ 400,000,000,000 ກີບ, ຕາມ​ແຜນ​ການ​ຄາດ​ຄະ​ເນ​ການ​ຂະ​ຫຍາຍ​ຕົວ​ດ້ານ​ການ​ຄ້າ-ການ​ບໍ​ລິ​ການ ຄິດ​ໄລ່​ເປັນ​ເປີ​ເຊັນ 14-17% ຕໍ່​ປີ ແລະ ຕິດ​ຕາມກວດ​ກາ​ຄຸ​້ມ​ຄອງ​ລາ​ຄາ​ສິນ​ຄ້າ​ໃຫ້​ດີ​ຂຶ້ນ.
– ຕາມ​ທິດ​ທາງ​ແຜນ​ການ​ໃນ​ປີ 2020-2024 ຈະ​ມີ​ບັນ​ດາ​ໂຮງ​ງານ​ອຸດ​ສາ​ຫະ​ກຳ​ປຸງ​ແຕ່ງ​ຂະ​ໜາດ​ກາງ ແລະ ຂະ​ໜາດ​ນ້ອຍ​ຂະ​ຫຍາຍ​ຕົວ​ເກີດ​ຂຶ້ນ​ໃໝ່ ຄິດ​ໄລ່​ເປ​ັນ​ເປີ​ເຊັນ 6-8% ໂດຍ​ການ​ລົງ​ທຶນ​ທັງ​ພາຍ​ໃນ ແລະ ຕ່າງ​ປະ​ເທດ ຈະ​ມີ​ໂຮງ​ງານ​ອຸດ​ສາ​ຫະ​ກຳ​ປຸງ​ແຕ່ງ​ເພີ່ມ​ຂຶ້ນ 50 ໂຮງ​ງານ​ ຄາດ​ຄະ​ເນ​ມູນ​ຄ່າ​ການ​ລົງ​ທຶນ​ທັງ​ໝົດ 48,000,000,000 ກີບ.
– ສືບ​ຕໍ່​ສົ່ງ​ເສີມ​ດ້ານ​ຫັດ​ຖະ​ກຳການ​ຕຳ​ຫູກ, ຕຳ​ສິ້ນ, ແຜ່ນ​ແພ. ຫັດ​ຖະ​ກຳ​ຈັກ​ສານ​ທີ່​ເປັນ​ມູນ​ເຊື້ອ​ເອ​ກະ​ລັກ​ຂອງ​ຊາວ​ບ້ານ​ຂອງ​ທ້ອງ​ຖິ່ນ​ໂດຍ​ຈັດ​ຕັ້ງ​ເປັນ​ກຸ່ມ​ຜະ​ລິດ​ພາຍ​ໃນ​ເມືອງ​ກາຍ​ເປັນ​ສິນ​ຄ້າ ເພື່ອ​ຈຳ​ໜ່າຍ​ເປັນ​ຂອງ​ທີ່​ລະ​ນຶກວາງ​ຂາຍ​ພາຍ​ໃນ​ຫ້າງ​ຮ້ານ, ຕະ​ຫຼາດ ແລະ ສະ​ຖານ​ທີ່​ທ່ອງ​ທ່ຽວ​ດ້ວຍ​ຮູບ​ການ​ລະ​ດົມ​ຊຸກ​ຍູ້​ໃຫ້​ນັກ​ລົງ​ທຶນ​ພາຍ​ໃນ​ ແລະ ຕ່າງ​ປະ​ເທດ 1 ໂຄງ​ການ, ມູນ​ຄ່າ​ການ​ລົງ​ທຶນ 500 ລ້ານ​ກີບ.
– ຊຸກ​ຍູ້​ສົ່ງ​ເສີມ​ອຸດ​ສາ​ຫະ​ກຳ​ປຸງ​ແຕ່ງ​ດ້ວຍ​ຜົນ​ຜະ​ລິດ​ຈາກ​ກະ​ສິ​ກຳ ເຊັ່ນ: ການ​ປຸງ​ແຕ່ງ​ປາ, ປຸງ​ແຕ່ງ​ອາ​ຫານ​ຕ່າງໆ ໃຫ້​ມີ​ການ​ພັດ​ທະ​ນາ ແລະ ປັບ​ປຸງ​ຂອດ​ການ​ຜະ​ລິດ, ການ​ປຸງ​ແຕ່ງ, ການ​ເກັບ​ຮັກ, ການ​ຫຸ້ມ​ຫ​ໍ່ ໃຫ້​ໄດ້​ທັງ​ປະ​ລິ​ມານ-ຄຸນ​ນະ​ພາບ​ທີ່​ດີ​ຂຶ້ນ​ຕື່ມ ແລະ ເຮັດ​ໃຫ້​ມີ​ການ​ຜະ​ລິດ​ຢ່າງ​ຕໍ່​ເນື່ອງ ເພື່ອ​ຮັບ​ຮອງ​ຜະ​ລິດ​ຕະ​ພັນ ແລະ ຕອ​ບ​ສະ​ໜອງ​ການ​ຊົມ​ໃຊ້​ຂອງ​ສັງ​ຄົມ.
– ສືບ​ຕໍ່​ປະ​ສານ​ສົມ​ທົບ​ກັບ​ເຈົ້າ​ຂອງ​ຕະຫຼາດ ເພື່ອ​ປັບ​ປຸງ​ພາຍ​ໃນ​ຂອບ​ເຂດ​ພື້ນ​ທີ່​ຕະຫຼາດ​ໃຫ້​ມີ​ຄວາມ​ສະ​ດວດ ເປັນ​ຕົ້ນ​ແມ່ນ​ສະ​ຖານ​ທີ່​ແລກ​ປ່ຽນ​ການ​ຊື້-ຂາຍ ໃຫ້​ມີ​ຄວາມ​ເປັນ​ລະ​ບຽບ​ຮຽບ​ຮ້ອຍ ແລະ ກາຍ​ເປັນ​ຕະຫຼາດ​ຕົວ​ແບບ.
– ເພື່ອ​ເຮັດ​ໃຫ້​ວຽກ​ງານ​ທີ່​ໄດ້​ວາງ​ແຜນ​ມາ​ຂ້າງ​ເທິງ​ນັ້ນ ຫ້ອງ​ການ​ອຸດ​ສາ​ຫະ​ກຳ ແລະ ການ​ຄ້າ ສະ​ເໜີ​ການ​ລົງ​ທຶນ​ຂອງ​ລັດ​ມີ 1 ແຜນ​ງານ, ມີ​ຈຳ​ນວນ 2 ໂຄງ​ງານ, ມູນ​ຄ່າ​ການ​ລົງ​ທຶນ 146 ລ້ານ​ກີບ.
– ຊຸກ​ຍູ້​ສົ່ງ​ເສີມ​ໃຫ້​ບັນ​ດາ​ນັກ​ລົງ​ທຶນ​ພາຍ​ໃນ ແລະ ຕ່າງ​ປະ​ເທດ​ຄາດ​ວ່າ​ຈະ​ມີ​ການ​ລົງ​ທຶນ​ທັງ​ໝົດ 05 ໂຄງ​ການ, ມູນ​ຄ່າ​ການ​ລົງ​ທຶນ 2,500,000,000 ກີບ.