​ເປີດກອງ​ປະ​ຊຸມ​ໃຫຍ່​ສະ​ຫະ​ພັນ​ນັກ​ຮົບ​ເກົ່າ​ເມືອງວັງ​ວຽງ ຄັ້ງ​ທີ IV

ກອງ​ປະ​ຊຸມໃຫຍ່​ຄັ້ງ​ທີ IV ຂອງ​ສະ​ຫະ​ພັນ​ນັກ​ຮົບ​ເກົ່າ​ເມືອງວັງ​ວຽງ ໄດ້​ເປີດ​ຂຶ້ນ​ໃນ​ວັນ​ທີ 28 ກຸມ​ພາ 2019 ນີ້ ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ ໂດຍ​ການ​ເຂົ້າ​ຮ່ວມ​ເປັນ​ປະ​ທານ​ຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ ປະ​ທານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ​ເມືອງ, ທ່ານ ພັ​ທ ຄຳ​ພອນ ຈະ​ເລີນ​ສຸກ ຮອງ​ປະ​ທານ​ສະ​ຫະ​ພັນ​ນັກ​ຮົບ​ເກົ່າ​ແຂວງວຽງ​ຈັນ, ທ່ານ ພັ​ຕ ແພງ​ສະ​ຫວັດ ອິນ​ປັນ​ຍາ ປະ​ທານ​ສະ​ຫະ​ພັນ​ນັກ​ຮົບ​ເກົ່າ​ເມືອງ​ວັງ​ວຽງ ນອກ​ນີ້​ຍັງ​ມີ​ບັນ​ດາ​ທ່ານ​ໃນ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ພະ​ນັກ​ງານ​ປະ​ຕິ​ວັດ​ອາ​ວຸ​ໂສ​ບຳ​ນານ, ຫົວ​ໜ້າ​ຫ້ອງ​ການ​ອ້ອມ​ຂ້າງ​ເມືອງ, ແຂກ​ຖືກ​ເຊີນ ແລະ​ ຜູ້​ແທນກອງ​ປະ​ຊຸມ​ຕົວ​ແທນ​ໃຫ້​ແກ່​ນັກ​ຮົບ​ເກົ່າ​ຈາກ​ໜ່ວຍ​ຕ່າງໆ ໃນ​ທົ່ວ​ເມືອງ​ເຂົ້າ​ຮ່ວມ​ຢ່າງ​ພ້ອມ​ພຽງ.

ທີ່​ປະ​ຊຸມ​ໄດ້​ຮັບ​ຟັງ​ການ​ຜ່ານ​ບົດ​ລາຍ​ງານ​ການ​ເມືອງ​ທັງ​ສອ​ງ​ພາກ ເຊີ່ງ​ສະ​ເໜີ​ໂດຍ​ສະ​ຫາຍ ພັ​ຕ ບຸນ​ຈັນ ອິນ​ປະ​ເສີດ ຮອງ​ປະ​ທານ​ສະ​ຫະ​ພັນ​ນັກ​ຮົບ​ເກົ່າ​ເມືອງວັງ​ວຽງ. ບົດ​ລາຍ​ງານ​ໄດ້​ຕີ​ລາ​ຄາ​ຜົນ​ຂອງ​ການ​ຈັດ​ຕັ້ງ​ປະ​ຕິ​ບັດ​ມະ​ຕິ​ກອງ​ປະ​ຊຸມ​ໃຫຍ່​ຄັ້ງ​ທີ III ຂອງ​ຄະ​ນະ​ບໍ​ລິ​ຫານ​ງານ​ສະ​ຫະ​ພ​ັນ​ນັກ​ຮົບ​ເກົ່າ​ເມືອງ​ແຕ່​ປີ 2014-2018 ຜ່ານ​ມາ ໂດຍ​ຍົກ​ໃຫ້​ເຫັນ​ດ້ານ​ດີ, ດ້ານ​ອ່ອນ-ຂໍ້​ຄົງ​ຄ້າງ ແລະ ບົດ​ຮຽນ​ທີ່​ຖອດ​ຖອນ​ໄດ້​ໃນ​ການ​ເຄື່ອນ​ໄຫວ​ວຽກ​ງານ​ໃນ​ແຕ່​ລະ​ດ້ານ. ສະ​ຫະ​ພັນ​ນັກ​ຮົບ​ເກົ່າ​ເມືອງວັງ​ວຽງ ມີ​ສະ​ມາ​ຊິກ​ທັງ​ໝົດ 475 ສະ​ຫາຍ, ຍິງ 53 ສ​ະ​ຫາຍ ເປັນ​ພະ​ນັກ​ງານ​ອາ​ວຸ​ໂສ​ບຳ​ນານ 86 ສະ​ຫາຍ, ຍິງ 3 ສະ​ຫາຍ, ນັກ​ຮົບ​ເກົ່າ​ເສຍ​ອົງ​ຄະ 41 ສະ​ຫາຍ, ຍິງ 4 ສະ​ຫາຍ. ໄດ້​ຮັບ​ອຸດ​ໜູນ​ແລ້ວ 88 ສະ​ຫາຍ, ຍິງ 8 ສ​ະ​ຫາຍ ເຊີ່ງ​ໃນ​ນີ້​ມາ​ຈາກ​ທະ​ຫານ​ມີ 451 ສະ​ຫາຍ, ຍິງ 52 ສະ​ຫາຍ, ມາ​ຈາກ​ຕຳຫຼວດ​ມີ 21 ສະ​ຫາຍ, ຍິງ 0. ຊັ້ນ ພຈວ ມີ 1 ສະ​ຫາຍ, ຊັ້ນພັ​ທ ມີ 10 ສະ​ຫາຍ, ພັ​ຕ 19 ສະ​ຫາຍ, ຮອ ມີ 28 ສະ​ຫາຍ, ຮ​ທ ມີ 31 ສະ​ຫາຍ, ຮ​ຕ ມີ 61 ສະ​ຫາຍ, ຊັ້ນ​ນາຍສິບມີ 317 ສະ​ຫາຍ. ໄດ້​ຮັບ​ບັດ​ນັກ​ຮົບ​ເກົ່າ​ແລ້ວ​ມີ 464 ສະ​ຫາຍ, ຍິງ 8 ສະ​ຫາຍ.

​ຕະຫຼອດ​ໄລ​ຍະ 5 ປີ​ຜ່ານ​ມາ ໄດ້​ປະ​ຕິ​ບັດ​ນະ​ໂຍ​ບາຍ​ຕໍ່​ພະ​ນັກ​ງານ​ບຳ​ນານ ແລະ ນັກ​ຮົບ​ເກົ່າ​ຜູ້​ທີ່​ມີ​ຜົນ​ງານ ແລະ ຄຸນ​ງາມ​ຄວາມ​ດີ​ຕໍ່​ປະ​ເທດ​ຊາດ​ໄດ້ ດັ່ງ​ນີ້: ໄດ້​ຮັບຫຼຽນ​ກຽດ​ຕິ​ຄຸນກອງ​ທັບ​ປະ​ຊາ​ຊົນ​ລາວ ຈຳ​ນວນ 36 ສະ​ຫາຍ, ໃບ​ຍ້ອງຍ​ໍ​ຜົນ​ງານ 5 ປີ​ຂອງ​ສະ​ຫະ​ພັນ​ນັກ​ຮົບ​ເກົ່າ​ແຫ່ງ​ຊາດ​ລາວ 17 ສະ​ຫາຍ, ໃບ​ຍ້ອງຍ​ໍ​ເຈົ້າ​ແຂວງໆ​ວຽງ​ຈັນ 5 ໃບ, ໃບ​ຍ້ອງ​ຍໍ​ທ່ານ​ເຈົ້າ​ເມືອງ​ໆ​ວັງ​ວຽງ 25 ສະ​ຫາຍ, ໃບ​ຢັ້ງ​ຢືນ 3 ດີ 6 ຮັກ​ສາ ຂອ​ງ​ສະ​ຫະ​ພັນ​ນັກ​ຮົບ​ເກົ່າ​ແຫ່ງ​ຊາດ​ລາວ​ມີ 25 ສະ​ຫາຍ, ໃບ​ຢັ້ງ​ຢືນ 3 ດີ 6 ຮັກ​ສາ ຂອງ​ສະ​ຫະ​ພັນ​ນັກ​ຮົບ​ເກົ່າ​ແຂວງວຽງ​ຈັນ​ໃຫ້​ແກ່ 4 ໜ່ວຍ ຈຳ​ນວນ 159 ສະ​ຫາຍ ແລະ ຫຼຽນ​ກາ​ລະ​ນຶກ 70 ປີ​ຂອງກອງ​ທັບ​ປະ​ຊາ​ຊົນ​ລາວ​ຈຳ​ນວນ 86 ສະ​ຫາຍ. ນອກ​ນີ້ ຍັງ​ໄດ້​ປະ​ຕິ​ບັດ​ນະ​ໂຍ​ບາຍ​ຕໍ່​ຜູ້​ເສຍ​ຊີ​ວິດ​ຈຳ​ນວນ 16 ສະ​ຫາຍ, ຜູ້​ເຈັບ​ເປັນ​ປິ່ນ​ປົວ​ນອນ​ໂຮງ​ໝໍ 93 ສະ​ຫາຍ ໂດຍ​ໄດ​້​ສ້າງ​ຕັ້ງ​ກອງ​ທຶນ​ສະ​ຫະ​ພັນ​ນັກ​ຮົບ​ເກົ່າ​ຂັ້ນ​ເມືອງ​ຂຶ້ນ.

ຈາກ​ນັ້ນ ສະ​ຫາຍ ພັ​ຕ ແພງ​ສະ​ຫວັດ ອິນ​ປັນ​ຍາ ປະ​ທານ​ສະ​ຫະ​ພັນ​ນັກ​ຮົບ​ເກົ່າ​ເມືອງ ກ​ໍ​ໄດ້​ຜ່ານ​ບົດ​ສຳຫຼວດ​ການ​ນຳ​ພາ​ລວມ ໂດຍ​ຍົກ​ໃຫ້​ເປັນ​ເຖິງ​ດ້ານ​ດີ ແລະ ຂໍ້​ຄົງ​ຄ້າງ​ໃນ​ການ​ຊີ້​ນຳໆ​ພາ​ວຽກ​ງານ​ຂອ​ງ​ສະ​ຫະ​ພັນ​ນັກ​ຮົບ​ໄລ​ຍະ​ 5 ປີ​ຜ່ານ​ມາ ​ໃຫ້​ຜູ້​ແທນກອງ​ປະ​ຊຸມ​ໄດ້​ປະ​ກອບ​ຄຳ​ຄິດ​ຄຳ​ເຫັນ​ເຂົ້າ​ໃສ່​ ເພື່ອ​ຄວາມ​ເປັນ​ເອ​ກະ​ພາບ​ໃນ​ການ​ຮັບ​ຮອງ​ເອົາ. ຈາກ​ນັ້ນ​ກໍ​ໄດ້​ມີ​ການ​ປ່ອນ​ບັດ​ຄັດ​ເລືອກ​ເອົາ​ຄະ​ນະ​ສະ​ຫະ​ພັນ​ນັກ​ຮົບ​ເກົ່າ​ເມືອງວັງ​ວຽງ​ຊຸດ​ໃໝ່​ປະ​ກອບ​ດ້ວຍ​ຄະ​ນະ​ບໍ​ລິ​ຫານ​ງານ​ທັງ​ໝົດ 14 ສະ​ຫາຍ, ຍິງ 1 ສະ​ຫາຍ. ກອງ​ປະ​ຊຸມ​ໄດ້​ເປັນ​ເອ​ກະ​ພາບ​ແຕ່ງ​ຕັ້ງ​ສະ​ຫາຍ ພັ​ຕ ແພງ​ສະ​ຫວັດ ອິນ​ປັນ​ຍາ ເປັນ​ປະ​ທານ​ສະ​ຫະ​ພັນ​ນັກ​ຮົບ​ເກົ່າ​ເມືອງວັງ​ວຽງ​ອີກ​ສະ​ໄໝ​ໜຶ່ງ, ແຕ່ງ​ຕັ້ງສະ​ຫາຍ ພັ​ຕ ບຸນ​ຈັນ ອິນ​ປະ​ເສີດ ເປັນ​ຮອງ​ຜູ້​ທີ 1, ແຕ່ງ​ຕັ້ງ​ສະ​ຫາຍ ພັ​ທ ທອງວັນ ພຸດ​ທະ​ວົງ ເປັນ​ຮອງ​ທີ 2. ໃນ​ນີ້​ແຕ່ງ​ຕັ້ງ​ສະ​ຫາຍ ພັ​ຕ ບຸນ​ຈັນ ອິນ​ປະ​ເສ​ີດ ເປັນ​ປະ​ທານກວດ​ກາ ແລະ ສະ​ຫາຍ ຮອ ບົວ​ສອນ ພົມ​ມີ​ໄຊ ເປັນ​ຮອງ​ປະ​ທານກວດ​ກາ. ນອກ​ນີ້ ຍັງ​ໄດ້​ປ່ອນ​ບັດ​ຄັດ​ເລືອກ​ເອົາ​ຜູ້​ແທນ​ສົມ​ບູນ ແລະ​ ສຳ​ຮອງ​ເຂົ້າ​ຮ່ວມກອງ​ປະ​ຊຸມ​ໃຫຍ່​ສະ​ຫະ​ພັນ​ນັກ​ຮົບ​ເກົ່າ​ແຂວງວຽງ​ຈັນ 7 ສະ​ຫາຍ ແລະ ສຳ​ຮອງ 2 ສະ​ຫາຍ.

ຕອນ​ທ້າຍຂອງກອງ​ປະ​ຊຸມ​ຍັງ​ໄດ້​ຮັບ​ກຽດ​ຟັງ​ການ​ໂອ້​ລົມ​ຂອງ​ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ ປະ​ທານ ປກ​ສ, ປກ​ຊ ເມືອງ​ຕື່ມ​ອີກ. ກ່ອນ​ອື່ນ​ທ່ານ​ໄດ້​ສະ​ແດງ​ຄວາມ​ຍ້ອງຍ​ໍ​ຊົມ​ເຊີຍ​ຕໍ່​ຜົນ​ງານ​ຂອງ​ສະ​ຫະ​ພັນ​ນັກ​ຮົບ​ເກົ່າ​ເມືອງທີ່​ຍາດ​ມາ​ໄດ້​ຕະຫຼອດ​ໄລ​ຍະ 5 ປີ ຜ່ານ​ມາ ພ້ອມ​ນີ້ ທ່ານ​ຍັງ​ໄດ້​ຊີ້​ນຳ​ໃຫ້​ຄະ​ນະ​ຊຸດ​ໃໝ່​ຈົ່ງ​ເພີ່ມ​ທະ​ວີ​ຄວາມ​ຮັບ​​ຜິດ​ຊອບ​ຂອງ​ຕົນ​ໃນ​ການ​ສຶກ​ສາ​ອົບ​ຮົມ​ການ​ເມືອງ​ແນວ​ຄິດ​ໃຫ້​ສະ​ມາ​ຊິກ​ນັກ​ຮົບ​ເກົ່າ​ໃຫ້​ມີ​ຄວາມ​ໜັກ​ແໜ້ນ​ດີ​ຂຶ້ນ, ເສີມ​ຂະ​ຫຍາຍ​ທາດ​ແທ້​ມູນ​ເຊື້ອ​ປະ​ຕິ​ວັດ, ສ້າງ​ຄວາມ​ສາ​ມັກ​ຄີ​ປອງດອງ​ກັນ​ໃນ​ທົ່ວ​ປວງ​ຊົນ​ໃຫ້​ໜ​ັກ​ແໜ້ນ, ເອົາ​ໃຈ​ໃສ່​ສ້າງ​ເສດ​ຖະ​ກິດ​ຄອບ​ຄົວ​ໃຫ້​ຮັ່ງ​ມີ​ເຂັ້ມ​ແຂງ, ສ້າງ​ຄອບ​ຄົວ​ຕົວ​ແບບ​ໃຫ້ຫຼາຍ​ຂຶ້ນ, ປັບ​ປຸງ​ແບບ​ແຜນ​ວິ​ທີ​ເຮັດ​ວຽກ​ນຳ​ພາ​ຂອງ​ສະ​ຫະ​ພັນ​ໃຫ້​ດີ​ຂຶ້ນ, ມີ​ການ​ຕິດ​ຕາມກວດ​ກາ ແລະ ປະ​ສານ​ສົມ​ທົບ​ກັບ​ຂະ​ແໜງ​ການ​ອື່ນ​ເຊັ່ນ: ອົງ​ການ​ພາ​ຄີ ແລະ ອົງ​ການ​ຈັດ​ຕັ້ງ​ມະ​ຫ​າ​ຊົນ​ໃຫ້​ກົມ​ກຽວ​ ເພື່ອ​ປະ​ກອບ​ສ່ວນ​ເຂົ້າ​ໃນ​ການ​ປັບ​ປຸງ​ລະ​ບອບ​ປະ​ຊາ​ທິ​ປະ​ໄຕ ປະ​ຊາ​ຊົນ ໃຫ້​ເຂັ້ມ​ແຂງ. ຈັດ​ຕັ້ງ​ການ​ເຜີຍ​ແຜ່​ເຊື່ອມ​ຊືມ​ມະ​ຕິ​ກອງ​ປະ​ຊຸມ​ໃຫຍ່​​ຄັ້ງ​ທີ IV ຂອ​ງ​ສະ​ຫະ​ພັນ​ນັກ​ຮົບ​ເກົ່າ​ເມືອງ​ໃຫ້​ທົ່ວ​ສັງ​ຄົມ​ໄດ້​ຮັບ​ຮູ້​ເຂົ້າ​ໃຈ​ຢ່າງ​ທົ່ວ​ເຖີງ.