ກອງ​ປະ​ຊຸມ​ໃຫຍ່​ຄັ້ງ​ທີ IX ສະ​ຫະ​ພັນ​ກຳ​ມະ​ບານ ເມືອງວັງ​ວຽງ

​ໃນ​ວັນ​ທີ 10 ຕຸ​ລາ 2019 ນີ້​ຢູ່​ທີ່​ສະ​ໂມ​ສອນ​ໃຫຍ່ ສຳ​ນັກ​ງານ​ປົກ​ຄອງ​ເມືອງວັງ​ວຽງ ໄດ້​ເປີດກອງ​ປະ​ຊຸມ​ໃຫຍ່​ສະ​ຫະ​ພັນ​ກຳ​ມະ​ບານ​ເມືອງວັງ​ວຽງ ຄັ້ງ​ທີ IX ຂຶ້ນ. ໂດຍ​ການ​ໃຫ້​ກຽດ​ເຂົ້າ​ຮ່ວມ​ເປັນ​ປະ​ທານ​ຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ທ່ານ ເທບ​ພະ​ໄທ ແກ້ວ​ເຂັມ​ເພັດ ກ​ຳ​ມະ​ການ​ພັກ​ແຂວງ ປະ​ທານ​ສະ​ຫະ​ພັນ​ກຳ​ມະບານແຂວງວຽງ​ຈັນ, ມີ​ບັນ​ດາ​ອົງ​ການ​ຈັດ​ຕັ້ງ​ທີ່​ກ່ຽວ​ຂ້ອງ​ຂອງ​ເມືອງ, ປະ​ທ​ານ​ສະ​ຫະ​ພັນ​ກຳ​ມະ​ບານ​ເມືອງ​ອ້ອມ​ຂ້າງ, ບັນ​ດາ​ຫົວ​ໜ້າ​ຫ້ອງ​ການ​ອ້ອມ​ຂ້າງ​ເມືອງ, ວິ​ສາ​ຫະ​ກິດ, ໂຮງ​ຮຽນ, ໂຮງ​ໝໍ​ທັງ​ພາກ​ລັດ ແລະ ເອ​ກະ​ຊົນ​ທີ່​ມີ​ອົງ​ການ​ຈັດ​ຕັ້ງ​ກຳ​ມະ​ບານ​ສັງ​ກັດ​ຕະຫຼອດ​ຮອດ​ຕົວ​ແທນ​ຈາກ​ຮາກ​ຖານ​ກຳ​ມະ​ບານ​ໜ່ວຍ​ຕ່າງໆ ໃນ​ທົ່ວ​ເມືອງ​ທີ່​ເປັນ​ຜູ້​ແທ​ນ​ສົມ​ບູນ​ເຂົ້າ​ຮ່ວມ​.

ທ່ານ ບຸນ​ທັນ ເຮີ​ຈູ່​ຕູ່ ປະ​ທານ​ສະ​ຫະ​ພັນ​ກຳ​ມະ​ບານ​ເມືອງວັງ​ວຽງ ໄດ້​ຂຶ້ນ​ຜ່ານ​ບົດ​ລາຍ​ງານ​ການ​ເມືອງ ການ​ເຄື່ອນ​ໄຫວ​ວຽກ​ງານ​ກຳ​ມະ​ບານ​ຢູ່​ເມືອງວັງ​ວຽງ ໄລ​ຍະ 5 ປີ ຜ່ານ​ມາ​ແຕ່​ປີ 2014-2019. ຜ່ານ​ການ​ຕີ​ລາ​ຄາ​ເຫັນ​ວ່າ​ອົງ​ການ​ຈັດ​ຕັ້ງ​ກຳ​ມະ​ບານ​ເມືອງວັງ​ວຽງ ໄດ້​ມີ​ອັນ​ພົ້ນ​ເດັ່ນຫຼາຍ​ດ້ານ, ທາງ​ດ້ານ​ການ​ຈັດ​ຕັ້ງ​ສະ​ມາ​ຊິກ​ກຳ​ມະ​ບານ​ໄດ້​ເພີ່ມ​ຂຶ້ນ​ຢ່າງ​ຕໍ່​ເນື່ອງ. ປະ​ຈຸ​ບັນ​ມີ 55 ຮາກ​ຖານ ແລະ 12 ໜ່ວຍ, ມີ​ສະ​ມາ​ຊິກ​ກຳ​ມະ​ບານ​ທັງ​ໝົດ 1,533 ສະ​ຫາຍ, ຍິງ 750 ສະ​ຫາຍ. ໄລ​ຍະ 5 ປີ​ຜ່ານ​ມາສະ​ມາ​ຊິກ​ເພີ່ມ​ຂຶ້ນ 96.6%, ວຽກ​ງານ​ປົກ​ປ້ອງ​ສິດ​ຜົນ​ປະ​ໂຫຍດ​ອັນ​ຊອບ​ທຳ​ຂອງ​ກຳ​ມະ​ກອນ ແລະ ຊາວ​ຜູ້​ອອກ​ແຮງ​ງານ, ໄດ້​ປະ​ສານ​ສົມ​ທົບ​ກັບ​ຫົວ​ໜ່ວຍ​ແຮງ​ງານ ແລະ ຜູ້​ປະ​ກອບ​ການ​ຕ່າງໆ ຢູ່​ພາຍ​ໃນ​ເມືອງ​ສ້າງ​ຕັ້ງ​ຕົວ​ແທນ​ຜູ້​ອອກ​ແຮງ​ງານ​ໄດ້ 22 ຫົວ​ໜ່ວຍ, ເຮັດ​ສັນ​ຍາ​ແຮງ​ງານ​ລວມ​ໝູ່​ລະ​ຫວ່າງ​ຜູ້​ໃຊ້​ແຮງ​ງານ ແລະ ຜູ້​ອອກ​ແຮງ​ງານໄດ້ 22 ຄັ້ງ, ໄດ້​ແກ້​ໄຂ​ຂໍ້​ຂັດ​ແຍ່ງ​ແຮງ​ງານ 3 ຄັ້ງ ທວງ​ເງິນ​ຄືນ​ໃຫ້​ພະ​ນັກ​ງານ, ກຳ​ມະ​ກອນ​ໄດ້ 231,950,000 ກີບ, ໄດ້​ປະ​ກາດ​ຮັບ​ຮອງ​ສະ​ຫະ​ພັນ​ກຳ​ມະ​ບານ​ເມືອງ 2 ດີ 5 ເປັນ​ເຈົ້າ 3 ສະ​ໄໝ, ໃນ​ນີ້ ມີ​ຮາກ​ຖານ​ກົມ​ກອງ​ດີ​ເດັ່ນ​ 56 ກົມ​ກອງ, ບຸກ​ຄົນ 5 ເປັນ​ເຈົ້າ​ປະ​ເພດ 1 ມີ 1,324 ສະ​ຫາຍ ນອກ​ນີ້​ຍັງ​ໄດ້​ຮັບ​ການ​ຍ້ອງ​ຍໍ ແລະ ຫຼຽນ​ກາ-ຫຼຽນ​ໄຊ​ຂັ້ນ​ຕ່າງໆ ລວມ​ທັງ​ໝົດ 151 ກົມ​ກອງ, ມີ​ຈຳ​ນວນ​ຜູ້​ໄດ້​ຮັບ​ 7,123 ສະ​ຫາຍ.

ວຽກ​ງານກອງ​ທຶນ​ຊ່ວຍ​ເຫຼືອ​ເຊີ່ງ​ກັນ ແລະ ກັນ ແລະ ກອງ​ທຶນ​ທະ​ນຸ​ເຄາະ​ມາ​ຮອດ​ປະ​ຈຸ​ບັນ​ມີ​ສະ​ມາ​ຊິກກອງ​ທຶນ 2,197 ຄົນ ເພີ່ມ​ຂຶ້ນ 618 ຄົນ. ສາ​ມາດ​ລະ​ດົມ​ທຶນ​ຈາກ​ສະ​ມາ​ຊິກ​ໄດ້​ທັງ​ໝົດ 643,558,000 ກີບ. ໄລ​ຍະ 5 ປີ​ຜ່ານ​ມາ ໄດ້​ປະ​ຕິ​ບັດ​ນະ​ໂຍ​ບາຍ​ຊ່ວຍ​ເຫຼືອ​ສະ​ມາ​ຊິກ​ເວ​ລາ​ເຈັບ​ເປັນ​ນອນ​ໂຮງ​ໝໍ, ເກີດ​ລູກ, ເສຍ​ຊີ​ວິ​ດ ແລະ ອື່ນໆ ຕາມ​ລະ​ບຽບ​ການ​ຂອງກອງ​ທຶນ​ລວມ​ທັງ​ໝົດ​ຈຳ​ນວນ 1,279 ຄົນ ເປັນ​ເງິນ 620,463,000 ກີບ.

ສຳ​ລັບ​ທິດ​ທາງ​ແຜນ​ການ​ຕໍ່​ໜ້າ ແຕ່​ປີ 2019-2024 ແມ່ນ​ຈະ​ໄດ້​ສຸມ​ໃສ່​ດ​ັ່ງ​ນີ້: ເອົາ​ໃຈ​ໃສ່​ສຶກ​ສາ​ອົບ​ຮົມ​ທາງ​ດ້ານ​ການ​ເມືອງ​ແນວ​ຄິດ​ໃຫ້​ສະ​ມາ​ຊິ​ກ​ກຳ​ມະ​ບານ​ກຳ​ມະ​ກອນ ແລະ ຊາວ​ຜູ້​ອອກ​ແຮ​ງ​ງານ​ໃຫ້​ມີ​ແນວ​ຄິດ​ອຸ່ນ​ອຽນ​ທຸ່ນ​ທ່ຽງເຊື່ອ​ໝັ້ນ​ຕໍ່​ການ​ນຳ​ພາ​ຂອງ​ພັກ, ມີ​ຄວາມ​ຕື່ນ​ຕົວ​ເຂົ້າ​ຮ່ວມ​ຂະ​ບວນ​ກາ​ນ​ວຽກ​ງານ​ວິ​ຊາ​ສະ​ເພາະ​ຂອງ​ຕົນ​ໃຫ້​ມີ​ຜົນ​ສຳ​ເລັດ, ຊຸກ​ຍູ້​ໃຫ້​ຮາກ​ຖານ​ກຳ​ມະ​ບານ​ຕາມ​ຫົວ​ໜ່ວຍ​ການ​ຜະ​ລິດ​ທຸ​ລະ​ກິດ​ຕ່າງໆ ພັດ​ທະ​ນາ​ສີ​ມື​ແຮງ​ງານ​ຂອງ​ຕົນ​ຫັນ​ເປັນ​ອຸດ​ສາ​ຫະ​ກຳ ແລະ ທັນ​ສະ​ໄໝ, ຂະ​ຫຍາຍ​ອົງ​ການ​ຈັດ​ຕັ້ງ​ກຳ​ມະ​ບານ​ໃນ​ຂົງ​ເຂດ​ບໍ​ລິ​ຫານ​ໃຫ້​ໄດ້ 100%, ຂົງ​ເຂດ​ເອ​ກະ​ຊົນ ແລະ ການ​ລົງ​ທຶນ​ຂອງ​ຕ່າງ​ປະ​ເທດ​ໃຫ້​ໄດ້ 5%, ເຮັດ​ສັນ​ຍາ​ລວມ​ໝູ່​ໃຫ້​ກວມ 10-20% ຂອງ​ຫົວ​ໜ່ວຍ​ແຮງ​ງານ​ໃນ​ທົ່ວ​ເມືອງ, ສືບ​ຕໍ່ປະ​ຕິ​ບັດ​ຂໍ້​ແຂ່ງ​ຂັນ 5 ເປັນ​ເຈົ້າ​ຂອງ​ກຳ​ມະ​ບານ​ຕິດ​ພັນ​ກັບ​ວຽກ​ງານ​ວິ​ຊາ​ສະ​ເພາະ​ຂ​ອງ​ແຕ່​ລະ​ຂະ​ແໜງ​ການໃຫ້​ເປັນ​ຂະ​ບວນ​ຟົດ​ຟື້ນ​ດ້ວຍ​ຄຸນ​ນະ​ພາບ​ທີ່​ແທ້​ຈິງ, ຂະ​ຫຍາຍ​ສະ​ມາ​ຊິກກອງ​ທຶນ​ໃຫ້​ກວ້າງ​ຂວາງ ຄາດ​ໝາຍ​ໃນ 5 ປີ​ຕໍ່​ໜ້າ​ໃຫ້​ເພີ່ມ​ຂຶ້ນ 250 ຄົນ. ທີ່​ປະ​ຊຸມ​ຍັງ​ໄດ້​ຮັບ​ຟັງ​ບົດ​ສຳຫຼວດ​ການ​ນຳ​ພາ​ລວມ ແລະ ແຜນ​ຍຸດ​ທະ​ສາດ​ການ​ພັດ​ທະ​ນາ​ວຽກ​ງານ​ສະ​ຫະ​ພັນ​ກຳ​ມະ​ບານ​ເມືອງວັງ​ວຽງ​ໄລ​ຍະ 5 ປີ​ຕໍ່​ໜ້າ​ເພື່ອ​ໃຫ້​ຜູ້​ແທນກອງ​ປະ​ຊຸມ​ໄດ້​ປະ​ກອບ​ຄຳ​ຄິດ​ຄຳ​ເຫັນ ແລະ ສ້າງ​ຄວາມ​ເປັນ​ເອ​ກະ​ພາບ​ຮັບ​ຮອງ​ເອົາ.

ກອງ​ປະ​ຊຸມ​ໄດ້​ປ່ອນ​ບັດ​ຄັດ​ເລືອກ​ເອົາ​ຄະ​ນະ​ບໍ​ລິ​ຫານ​ງານ​ຊຸດ​ໃໝ່ ຈຳ​ນວນ 19 ສະ​ຫາຍ. ໃນ​ນີ້​ໄດ້​ເປັນ​ເອ​ກະ​ພາບ​ຮັບ​ຮອງ​ເອົາ ສະ​ຫາຍ ບຸນ​ທັນ ເຮີ​ຈູ​ຕູ່ ເປັນ​ປະ​ທ​ານ, ສະ​ຫາຍ ພອນ​ແກ້ວ ຂຸນ​ພົນ ເປັນ​ຮອງ​ປະ​ທານ.
ກອງ​ປະ​ຊຸມ​ຍັງ​​ໄດ້​ຮັບ​ຟັງການ​ໂອ​້​ລົມ​ຂອງ​ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ ແລະ ທ່ານ ເທບ​ພະ​ໄທ ແກ້ວ​ເຂັມ​ເພັດ ກຳ​ມະ​ການ​ພັກ​ແຂວງ ປະ​ທານ​ສະ​ຫະ​ພັນ​ກຳ​ມະ​ບານ​ແຂວງວຽງ​ຈັນ​ຕື່ມ​ອີກ. ເຊີ່ງ​ເນື້ອ​ໃນ​ການ​ໂອ້​ລົມ​ຂອງ​ທັງ​ 2 ​ທ່ານ​ສ່ວນ​ໃຫ​ຍ່ກໍ​ໄດ້​ເນັ່ນ​ໃຫ້​ອົງ​ການ​ຈັດ​ຕັ້ງ​ກຳ​ມະ​ບານ​ໄດ້​ສືບ​ຕໍ່​ເສີມ​ຂະຫຍາຍ​ຜົນ​ງານ​ທີ່​ເປັນ​ມູນ​ເຊື້ອ​ຂອງ​ຕົນ, ເອົາ​ໃຈ​ໃສ່​ປັບ​ປຸງ​ລະ​ບົບ​ການ​ຈັດ​ຕັ້ງ​ໃຫ້​ເຂັ້ມ​ແຂງ​ໜັກ​ແໜ້ນ, ສ້າງ​ໃຫ້​ສະ​ມາ​ຊິກ​ກຳ​ມະ​ບານ​, ກຳ​ມະ​ກອນ ແລະ ຊາວ​ຜູ້​ອອກ​ແຮງ​ງານ​ມີ​ນ້ຳ​ໃຈ​ຮັກ​ຊາດ ຮັກ​ບ້ານ​ເກີດ​ເມືອງນອນ​ຕິດ​ພັນ​ກັບ​ຂະ​ບວນ​ການ​ຮັກ​ຊາດ ແລະ ພັດ​ທະ​ນາ​ເຊື່ອມ​ຊືມ ແລະ ເປັນ​ເຈົ້າ​ການ​ໃນ​ການ​ຈັດ​ຕັ້ງ​ຜັນ​ຂະ​ຫຍາຍ​ແນວ​ທາງ​ນະ​ໂຍ​ບາຍ​ຂອງ​ພັກ, ລະ​ບຽບ​ກົດ​ໝາຍ​ຂອງ​ລັດ ກ​ໍ​ຄືເນື້ອ​ໃນ​ຂໍ້​ແຂ່ງ​ຂັນ 5 ເປັນ​ເຈົ້າ​ຂອງ​ສະ​ຫະ​ພັນ​ກຳ​ມະ​ບານ​ວາງ​ອອກ​ໃຫ້​ໄດ້​ຮັບ​ຜົນ​ດີ.