ເມືອງວັງ​ວຽງ ຈັດ​ສົ່ງ​ເຄື່ອງ​ຊ່ວຍ​ເຫຼືອ​​ບັນ​ເທົາ​ທຸກໃຫ້​ພ​ີ່​ນ້ອງ 4 ແຂວງ​ພາກ​ໃຕ້

​ພາຍຫຼັງ​ທີ່​ໄດ້​ຮັບ​ຂ່າວ​ເກີດ​ອຸ​ໂທກ​ກະ​ໄພ​ນ້ຳ​ຖ້ວມ​ຄັ້ງ​ຍິ່ງ​ໃຫຍ່​ສ້າງ​ຄວາມ​ເສຍ​ຫາຍ​ໃຫ້​ແກ່​ພໍ່​ແມ່​ປະ​ຊາ​ຊ​ົນ​ຢູ່​ທີ່ 4 ແຂວ​ງ​ພາກ​ໃຕ້​ຂອງ​ລາວ. ດ້ວຍ​ຄວາມ​ເປັນ​ຫ່ວງ​ເປັນ​ໃຍ​ຕໍ່​ພີ່​ນ້ອງ​ຮ່ວມ​ຊາດ​ຂອງ​ຕົນ ເມື່ອ​ມີ​ສິ່ງ​ເດືອດ​ຮ້ອນ​ຄົນ​ລາວ​ຕ້ອງ​ເປັນ​ເຈົ້າ​ການ​ຊ່ວຍ​ເຫຼືອ​ຄົນ​ລາວ​ດ້ວຍ​ກັນ, ດັ່ງ​ນັ້ນ ໃນ​ຕອນ​ເຊົ້າ​ຂອງວັນ​ທີ 12 ກັນ​ຍາ 2019 ນີ້​ຢູ່​ທີ່​ສຳ​ນັກ​ງານ​ປົກ​ຄອງ​ເມືອງວັງ​ວຽງ ແຂວງວຽງ​ຈັນ ໄດ້​ຈັດ​ພິ​ທີ​ເພື່ອ​ສົ່ງ​ເຄື່ອງ​ຊ່ວຍ​ເຫຼືອ​ໄປ​ໃຫ້​ພີ່​ນ້ອງ 4 ແຂວງ​ພາກ​ໃຕ້​ຂອງ​ລາວ ໂດຍ​ການ​ເຂົ້າ​ຮ່ວມ​ຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ທ່ານ ບຸນ​ປັນ ພົມ​ມະ​ວົງ ຮອງ​ເລ​ຂາ​ພັກ​ເມືອງ ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງວຽງ​ຈັນ, ມີ​ບັນ​ດາ​ທ່ານ​ຄະ​ນະ​ການ​ນຳ​ຂອງ​ເມືອງ, ຕົວ​ແທນ​ນັກ​ທຸ​ລະ​ກິດ​ໜຸ່ມ​ເມືອງວັງ​ວຽງ ແລະ ພາກ​ສ່ວນ​ທີ່​ກ່ຽວ​ຂ້ອງ​ຂ​ອງ​ເມືອງ​ເຂົ້າ​ຮ່ວມ.

​ເຄື່ອງ​ຊ່ວຍ​ເຫຼືອ​ດັ່ງ​ກ່າວ​ປະ​ກອບ​ມີ​ນ້ຳ​ດື່ມ ແລະ ເຄື່ອງ​ອຸ​ປະ​ໂພກ, ບໍ​ລິ​ໂພກ ລວມ​ມູນ​ຄ່າ​ທັງ​ໝົດ 31,536,000 ກີບ (ສາມ​ສິບ​ເອັດ​ລ້ານ​ຫ້າ​ແສນ​ສາມ​ສິບ​ຫົກ​ພັນ​ກີບ) ໂດຍ​ໄດ້​ແຕ່ງ​ຕັ້ງ​ທີມ​ງານ​ໜຶ່ງ​ນຳ​ເອົາ​ເຄື່ອງ​ດັ່ງ​ກ່າວ​ສົ່ງ​ລຳ​ລຽງ​ໄປ​ໃຫ້​ເຖິງ 4 ແຂວງ ພາກ​ໃຕ້​ຂອງ​ລາວ ແລະ ເລີ່ມ​ອອກ​ເດີນ​ທາງ​ໃນ​ວັນ​ດັ່ງກ່າວ​ນີ້​ດ້ວຍ.