ເປີດກອງ​ປະ​ຊຸມ​ຫາ​ລື​ກ່ຽວ​ກັບ​ການ​ຄຸ້ມ​ຄອງ​ລາຍຮັບ ແລະ ຊຸກ​ຍູ້​ຖານ​ລາຍ​ຮັບ​ເຂົ້າ​ລະ​ບົບ TaxRis

ໃນ​ວັນ​ທີ 28 ສິງ​ຫາ 2019 ນີ້ ຢູ່​ທີ່​ຫ້ອງ​ປະ​ຊຸມ​​ຫ້ອງ​ການໆ​ເງິນ ເມືອງວັງ​ວຽງ ໄດ້​ຈັດ​ໃຫ້​ມີ​ກອງ​ປະ​ຊຸມ​ປຶກ​ສາ​ຫາ​ລື​ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດການ​ຄຸ້ມ​ຄອງ​ລາຍ​ຮັບ ແລະ ການ​ຊຸກ​ຍູ້​ຫັນ​ເອົາ​ຖານ​ລາຍ​ຮັບ​ເຂົ້າ​ໃນ​ລະ​ບົບ TaxRis, ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ດາວ​ເຮືອງ ນັນ​ທະ​ວົງ ຄະ​ນະ​ປະ​ຈຳ​ພັກ​ແຂວງ ຮອງ​ເຈົ້າ​ແຂວງໆ​ວຽງ​ຈັນ, ໂດຍ​ການ​ເຂົ້າ​ຮ່ວມ​ຂອງ​ທ່ານ ບຸນ​ຈັນ ມາ​ລາ​ວົງ ຮອງ​ເລ​ຂາ​ພັກ​ເມືອງ ຮອງ​ເຈົ້າ​ເມືອງໆ​ວັງ​ວຽງ, ມີ​ບັນ​ດາ​ຫົວ​ໜ້າ​ຫ້ອງ​ການ ແລະ ຮອງ​ຫົວ​ໜ້າ​ພະ​ແນກຂອງ​ພະ​ແນກ​ການ​ຕ່າງໆ ພາຍ​ໃນ​ກຸ່ມ​ເສດ​ຖະກິດ​ຂອງ​ແຂວງວຽງ​ຈັນ ແລະ ເມືອງວັງ​ວຽງ​ເຂົ້າ​ຮ່ວມ, ນອກ​ນີ້​ຍັງ​ມີ​ບັນ​ດາ​ວິ​ສາ​ຫະ​ກິດ, ຫົວ​ໜ່ວຍ​ທຸ​ລະ​ກິດ​ຜູ້​ປະ​ກອບ​ການ​ພ້ອມ​ດ້ວຍ​ພະ​ນັກ​ງານ​ສ່ວຍ​ສາ​ອາ​ກອນ​ປະ​ຈຳ​ເມືອງ​ເຂົ້າ​ຮ່ວມ.

ໃນ​ທີ່​ປະ​ຊຸມ ທ່ານ ຍົມ​ມາ​ລາ ວໍ​ລະ​ຈິດ ຫົວ​ໜ້າ​ສ່ວຍ​ສາອ​າ​ກອນ​ປະ​ຈຳ​ເມືອງວັງ​ວຽງ​ ໄດ້​ລາຍ​ງານ​ການ​ຈັດ​ຕັ້ງ​ປະ​ຕິ​ບັດ​ກ່ຽວ​ກັບ​ການ​ເກັ​ບ​ລາຍ​ຮັບ​ຜ່ານ​ລະ​ບົບ TaxRis ຢູ່​ເມືອງວັງ​ວຽງ​ໃນ​ໄລ​ຍະ​ຜ່ານ​ມາ ໂດຍ​ສັງ​ລວມ​ແລ້ວ​ເຫັນ​ວ່າ​ການ​ເກັບ​ລາຍ​ຮັບ​ໄລ​ຍະ 6 ເດືອນ​ຕົ້ນ​ປີ​ບໍ​່​ສາ​ມາດ​ບັນ​ລຸ​ຕາມ​ແຜນ​ການ​. ຕົວ​ເລກ​ແຜນ​ຈັດ​ເກັບ​ລາຍ​ຮັບ 6 ເດືອນ​ຕົ້ນ​ປີ 5,150,000,000 ກີບ ບັນ​ລຸ​ໄດ້​ພຽງ​ແຕ່ 3,8 ຕື້​ກວ່າ​ກີບ. ສາຍ​ເຫດ​ກໍ​ຍ້ອນ​ຄວາມ​ຮັບ​ຮູ້ ແລະ ເຂົ້າ​ໃຈ​ຂອງ​ບັນ​ດາ​ຜູ້​ປະ​ກອບ​ການ​ຫົວ​ໜ່ວຍ​ທຸ​ລະ​ກິດ​ຕ່າງໆ ຢູ່​ພາຍ​ໃນ​ເມືອງ​ຕໍ່​ກັບ​ການ​ຈັດ​ເກັບ​ລາຍ​ຮັບ​ຜ່ານ​ລະ​ບົບທັນ​ສະ​ໄໝ​ນີ້​ຍັງ​ບໍ່​ທັນ​ເລິກ​ເຊິງ, ຜ່ານ​ການ​ລົງ​ສຳ​ຫຼວດ​ເກັບ​ກຳ​ຂໍ້​ມູນ​ໄດ້​ພົບ​ເຫັນ 600 ກວ່າ ຫົວ​ໜ່ວຍ​ທຸ​ລະ​ກິດ​ທີ່​ບໍ່​ມີ​ໃບ​ອະ​ນຸ​ຍາດ​ຈາກ​ຂະ​ແໜງ​ການ​ທີ່​ກ່ຽວ​ຂ້ອງ ແລະ ຍັງ​ພົບ​ເຫັນ​ອີກຫຼາຍ​ຫົວ​ໜ່ວຍ​ທີ່​ມີ​ໃບ​ອະ​ນຸ​ຍາດແລ້ວ ແຕ່​ບໍ່​ໄດ້​ຂຶ້ນ​ທະ​ບຽນ​ວິ​ສາ​ຫະ​ກິດຖື​ວ່າ​ເປັນ​ການ​ດຳ​ເນີນ​ທຸ​ລະ​ກິດ​ທີ່​ບໍ່​ຖືກ​ຕ້ອງ​ຕາມ​ລະ​ບຽບ​ກົດ​ໝາຍ ເຮັດ​ໃຫ້​ການ​ເກັບ​ລາຍ​ຮັບ​ຜ່ານ​ລະ​ບົບ TaxRis ຈຶ່ງ​ບໍ່​ສາ​ມາດ​ເຂົ້າ​ສູ່​ຄວາມ​ເປັນ​ລະ​ບຽບ​ຮຽບ​ຮ້ອຍ​ໄດ້.

ຈາກ​ນັ້ນ ທ່ານ ຄຳ​ເສັງ ເອ​ກະ​ພັນ ຮອງ​ຫົວ​ໜ້າ​ສ່ວຍ​ສ​າ​ອາ​ກອນ​ປະ​ຈຳ​ເມືອງ​ກໍ​ໄດ້​ຜ່ານ​ລະ​ບຽບ​ກ່ຽວ​ກັບ​ໃບ​ຢັ້ງ​ຢືນ​ການມອບ​ອາ​ກອນ​ຂອງ​ທ່ານ ລັດ​ຖະ​ມົນ​ຕີກະ​ຊວງ​ການ​ເງິນ ສະ​ບັບ​ເລກ​ທີ 1025/ກງ, ລົງ​ວັນ​ທີ 03/04/2019 ຕໍ່​ທີ່​ປະ​ຊຸມ ແລະ ທ່ານ​ປະ​ທານກອ​ງ​ປະ​ຊຸມ​ກໍ​ໄດ້​ຕັ້ງ​ບັນ​ຫາ​ເຈາະ​ຈີ້ມ​ເພື່ອ​ໃຫ້​ຜູ້​ເຂົ້າ​ຮ່ວມ​ໄດ້​ປະ​ກອບ​ຄຳ​ຄິດ​ຄຳ​ເຫັນ​ເພື່ອ​ສ້າງ​ຄວາມ​ເປັນ​ເອ​ກະ​ພາບ.

ຕອນ​ທ້າຍ​ຂອງກອງ​ປະ​ຊຸມ​ທ່ານ ຮອງ​ເຈົ້າ​ແຂວງໆ​ວຽງ​ຈັນ ຍັງ​ໄດ້​ສະ​ຫຼຸບ​ຄືນ​ກ່ຽວ​ກັບ​ຄຳ​ຄິດ​ຄຳ​ເຫັນ​ຕ່າງໆ ຂອງ​ຜູ້​ເຂົ້າ​ຮ່ວມ ພ້ອມ​ທັງ​ໂອ້​ລົມ​ແນະ​ນຳ​ໃຫ້​ບັນ​ດາ​ຂະ​ແໜງ​ການ​ຕ່າງໆ ຂອງ​ລັດ​ພາຍ​ໃນ​ກຸ່ມ​ເສດ​ຖະ​ກິດ​ຂອງ​ແຂວງ ແລະ ເມືອງ​ໃຫ້​ມີ​ການ​ປະ​ສານ​ສົມ​ທົບ​ເຊີ່ງ​ກັນ ແລະ ກັນ ເພື່ອ​ສ້າງ​ຄວາມ​ເປັນ​ເອ​ກະ​ພາບ, ມີ​ການ​ລາຍ​ງານກວດ​ກາ​ວຽງ​ງານ​ຮ່ວມ​ກັນ​ໃຫ້​ເປັນ​ປົກ​ກະ​ຕິ ເພື່ອ​ພ້ອມ​ກັນ​ແກ້​ໄຂ​ບັນ​ຫາ​ຂໍ້​ຄົງ​ຄ້າງ​ຕ່າງໆ, ມີ​ການ​ແບ່ງ​ຂັ້ນ​ຄຸ້ມ​ຄອງ​ໃຫ້​ກັນ ແລະ ກັນ​ລະ​ຫວ່າງ​ແຂວງ ແລະ ເມືອງ​ຄືນ​ໃໝ່​ໃຫ້​ເໝາະ​ສົມ​ ເພື່ອ​ແນ​ໃສ່​ເຮັດ​ໃຫ້​ການ​ຫັນ​ເອົາ​ບັນ​ດາ​ຫົວ​ໜ່ວຍ​ທຸ​ລະ​ກິດ​ຕ່າງໆ ເຂົ້າ​ສູ່​ການ​ເກັບ​ລາຍ​ຮັບ​ຜ່ານ​ລະ​ບົບ TaxRis ໃຫ້​ໄດ້​ຮັບ​ຜົນ​ດີ. ກອງ​ປະ​ຊຸມ​ໄດ້​ດຳ​ເນີນ​ໄປ​ເປັນ​ເວ​ລາ 1 ວັນ​ເຕັມ​ຈຶ່ງ​ປິດ​ລົງ.