ທ່ານ ນາ​ຍົກ​ລັດ​ຖ​ະ​ມົນ​ຕີ ແຫ່ງ ສ​ ປ​ ປ ລາວ ລົງ​ເຄື່ອນ​ໄຫວຢ້ຽມ​ຢາມ ເມືອງວັງ​ວຽງ

​ໃນ​ວັນ​ທີ 8 ສິງ​ຫາ 2019 ຜ່ານ​ມາ​ນີ້ ທ່ານ ທອງ​ລຸນ​ ສີ​ສຸ​ລິດ ນາ​ຍົກ​ລັດ​ຖະ​ມົນ​ຕີ ແຫ່ງ ສ ປ ປ ລາວ ພ້ອມ​ດ້ວຍ​ຄະ​ນະ​ລັດ​ຖະ​ບານ​ຈຳ​ນວນ​ໜຶ່ງ ໄດ້​ລົງ​ມາ​ເຮັດ​ວຽກ​ເຄື່ອນ​ໄຫວ​ຢ້ຽມ​ຢາມ​ເມືອງວັງ​ວຽງ. ພິ​ທີ​ຕ້ອນ​ຮັບ​ໄດ້​ຈັດ​ຂຶ້ນ​ຢູ່​ທີ່​ສະ​ໂມ​ສອນ​ໃໝ່​ຂອງ​ເມືອງ, ໂດຍ​ການ​ຕ້ອນ​ຮັບ​ຂອງ​ທ່ານ ຄຳ​ພັນ ສິດ​ທິ​ດຳ​ພາ ກຳ​ມະ​ການ​ສູນ​ກາງ​ພັກ ເລ​ຂາ​ພັກ​ແຂວງ ເຈົ້າ​ແຂວງໆ​ວຽງ​ຈັນ, ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ມີ​ບັນ​ດາ​ທ່ານ​ຄະ​ນະ​ການ​ນຳ​ຂອງ​ເມືອງ, ຫົວ​ໜ້າ​ຫ້ອງ​ການ, ຄະ​ນະ​ຫ້ອງ​ການ, ພະ​ນັກ​ງານຫຼັກ​ແຫຼ່ງ, ພະ​ນັກ​ງານ​ອາ​ວຸ​ໂສ​ບຳ​ນານ, ອຳ​ນາດ​ການ​ປົ​ກ​ຄອງ​ບ້ານ, ນັກ​ທຸ​ລະ​ກິດ​ຜູ້​ປະ​ກອບ​ການ​ຕະຫຼອດ​ຮອດ​ພະ​ນັກ​ງານ-ລັດ​ຖະ​ກອນ​ຈາກ​ຂະ​ແໜງ​ການ​ຕ່າງໆ ອ້ອມ​ຂ້າງ​ເມືອງກ​ໍ​ໄດ້​ເຂົ້າ​ຮ່ວມ​ເປັນ​ຈຳ​ນວນຫຼວງຫຼາຍ.

ພາຍຫຼັງ ທີ່​ມີ​ການ​ຕ້ອນ​ຮັບ​ດ້ວຍ​ບັນ​ຍາ​ກາດ​ອັນ​ອົບ​ອຸ່ນ​ແລ້ວ ທ່ານ ເຈົ້າ​ເມືອງໆ​ວັງ​ວຽງ​ໄດ້​ລາຍ​ງານ​ສະ​ພາບ​ຂອງ​ການ​ພັດ​ທະ​ນາ​ເສ​ດ​ຖະ​ກິດ-ສັງ​ຄົມ​ໃນ​ໄລ​ຍະ 6 ເດືອນ​ຕົ້ນ​ປີ​ຂອງ​ເມືອງ​ພ້ອມ​ດ້ວຍ​ທິດ​ທາງ​ແຜນ​ການ​ທີ່​ຈະ​ໄດ້​ສຸມ​ໃສ່​ໃນ 6 ເດືອນ​ທ້າຍ​ປີ 2019 ໂດຍ​ຍົກ​ໃຫ້​ເຫັນ​ຂໍ້​ສະ​ດວກ ແລະ ຂໍ້​ຫຍຸ້ງ​ຍາກ​ຕ່າງໆ ພ້ອມ​ທັງ​ໄດ້​ສະ​ເໜີ​ບັນ​ຫາ​ຈຳ​ນວນ​ໜຶ່ງ​ເພື່ອ​ໃຫ້​ລັດ​ຖະ​ບານ​ໄດ້​ຊ່ວຍ​ເພື່ອ​ຊຸກ​ຍູ້​ຊີ້​ນຳ ແລະ ແກ້​ໄຂ​ໃນ​ຕໍ່​ໜ້າ.

ຈາກ​ນັ້ນ ທ່ານ​ນາ​ຍົກ​ລັດ​ຖະ​ມົນ​ຕີ ໄດ້​ສ​ະ​ເໜີ​ໃຫ້​ລັດ​ຖະ​ມົນ​ຕີ​ກະ​ຊວງ​ທີ່​ກ່ຽວ​ຂ້ອງ​ໄດ້​ມີ​ຄຳ​ເຫັນ ເພື່ອ​ຂຶ້ນ​ຊີ້​ແຈງ ເຊັ່ນ: ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ, ກະ​ຊວງ​ສາ​ທາ​ລະ​ນະ​ສຸກ ແລະ ກະ​ຊວງ​ກະ​ສິ​ກຳ ແລະ ປ່າ​ໄມ້. ໂດຍ​ສະ​ເພາະ​ແມ່ນ​ກ່ຽວ​ກັບ​ໂຄງ​ການ​ກໍ່​ສ້າງ​ທາງ​ລົດ​ໄຟ, ທາງ​ດ່ວນ, ການ​ຊົດ​ເຊີຍ​ຕໍ່​ຜົນ​ກະ​ທົບ, ບັນ​ຫາ​ການ​ລະ​ບາດ​ຂອງ​ໄຂ້​ເລືອດ​ອອກ ແລະ ການ​ລະ​ບາດ​ຂອງ​ພະ​ຍາດ​ອະ​ຫິ​ວາ​ໝູ​ອາ​ຟ​ລ​ິ​ກາ, ວິ​ທີ​ປ້ອງ​ກັນ ແລະ ການ​ສະ​ກັດ​ກັ້ນ ເພື່ອ​ບໍ່​ໃຫ້​ມີ​ການ​ແພ່​ຂະ​ຫຍາຍ. ພາຍຫຼັງ​ທີ່​ທ່ານ​ລັດ​ຖະ​ມົນ​ຕີ​ທັງ 3 ກະ​ຊວງ​ໄດ້​ຊີ້​ແຈງ​ສຳ​ເລັດ, ທ່ານ ນາ​ຍົກ​ລັດ​ຖະ​ມົນ​ຕີ​ກໍ​ໄດ້​ໃຫ້​ກຽດ​ໂອ້ລົມ ກ່ອນ​ອື່ນ​ທ່ານ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ຕໍ່​ຜົນ​ງານ ແລະ ຜົນ​ສຳ​ເລັດ​ໃນ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ເມືອງວັງ​ວຽງ​ໄລ​ຍະ​ຜ່ານ​ມາອັນ​ໄດ້​ເຮັດ​ໃຫ້​ເມືອງວັງ​ວຽງ​ກາຍ​ເປັນ​ເມືອງ​ທ່ອງ​ທ່ຽວ​ທີ່​ມີ​ສະ​ເໜ ສາ​ມາດ​ດຶງ​ດູດ​ເອົາ​ແຂກ​ຄົນ​ນັກ​ທ່ອງ​ທ່ຽວ​ທ​ັງ​ພາຍ​ໃນ ແລະ ຕ່າງ​ປະ​ເທດ​ເຂົ້າ​ມາ​ທ່ອງ​ທ່ຽວ​ເປັນ​ຈຳ​ນວນຫຼວງຫຼາຍ. ໃນ​ໂອ​ກາດ​ນີ້ ທ່ານ​ໄດ້​ເນັ້ງ​ໃຫ້​ທາງ​ເມືອງ​ໄດ້​ເອົາ​ໃຈ​ໃສ່​ມີ​ຄວາມ​ຮັບ​ຜິ​ດ​ຊອບ​ຂຶ້ນ​ຕື່ມ ໂດຍ​ສະ​ເພາະ​ບັນ​ຫາ​ຄວາມ​ສະ​ອາດ, ຄວາມ​ສະ​ຫງົບ, ການ​ຮັກ​ສາ​ສະ​ພາບ​ແວດ​ລ້ອມ, ການ​ສຶກ​ສາ​ແນວ​ຄິດ​ໃຫ້​ປະ​ຊາ​ຊົນ ແລະ ຜູ້​ປະ​ກອບ​ການ​ໄດ້​ເປັນ​ເຈົ້າ​ການ​ຮ່ວມ​ກັນ​ໃນ​ການ​ຕ້ອນ​ຮັບ​ແຂກ​ຄົນ​ທີ່​ມາ​ທ່ອງ​ທ່ຽວ​ເຮັດ​ແນວ​ໃດ​ຈຶ່ງ​ໃຫ້​ເຂົາ​ເຈົ້າ​ຢາກ​ກັບ​ມາ​ອີກ.

ພ້ອມ​ນີ້ ທ່ານ​ຍັງ​ໄດ້​ຍົ​ກ​ໃຫ້​ເຫັນ​ເຫດ​ຜົນ​ຕ່າງໆ ທີ່​ເປັນ​ໜໍ່​ແໜງ​ສາຍ​ເຫດ​ທີ່​ພາ​ໃຫ້​ເກີດ​ມີ​ສຽງ​ວິ​ພາກວິ​ຈານ​ທາງ​ສື່​ສັງ​​ຄົມ​ອອນ​ລາຍ, ຈົດ​ໝາຍ​ສາຍ​ດ່ວ​ນ​ທີ່​ເຂົ້າ​ຫາ​ລັດ​ຖະ​ບານ ແລະ ອື່ນໆ ຕໍ່​ກັບ​ເມືອງວັງ​ວຽງ​ຜ່ານ​ມາ ແລະ ພ້ອມ​ທັງ​ແນະ​ນຳ​ວິ​ທີ​ທາງ​ໃນ​ການ​ປັບ​ປຸງ​ແກ້​ໄຂ​ແຕ່​ລະ​ດ້ານ​ໃນ​ຕໍ່​ໜ້າ ເພື່ອ​ກຽມ​ຄວາມ​ພ້ອມ​ໃນ​ການ​ຮອງ​ຮັບ​ສະ​ພາບ​ຂອງ​ການ​ພັດ​ທະ​ນາ​ທີ່​ຂະ​ຫຍາຍ​ຕົວ ພາຍຫຼັງ​ສຳ​ເລັດ​ໂຄງ​ການ​ກໍ່​ສ້າງ​ທາງ​ລົດ​ໄຟ ແລະ ທາງ​ດ່ວນ ໃນ​ປີ 2021 ເພື່ອ​ສ້າງ​ຄວາມ​ຮັ່ງ​ມີ​ເຂັ້ມ​ແຂງ​ທຸກ​ດ້ານ​ໃຫ້​ແກ່​ເມືອງວັງ​ວຽງ.