ປາ​ຖະ​ກະ​ຖາ​ລະ​ນຶກວັນ​ເກີດ​ປະ​ທານ​ ສຸ​ພານຸ​ວົງ ຄົບ​ຮອບ 110 ປີ

​ໃນ​ຕອນ​ເຊົ້າ​ຂອງວັນ​ທີ 26 ກໍ​ລະ​ກົດ ຜ່ານ​ມາ​ນີ້ ຢູ່​ທີ່​ສະ​ໂມ​ສອນ​ໃໝ່​ ສຳ​ນັກ​ງານປົກ​ຄອງ​ເມືອງວັງ​ວຽງ ໄດ້​ຈັດ​ຕັ້ງ​ໃຫ້​ມີ​ພິ​ທີ​ປາ​ຖະ​ກະ​ຖາ​ລະ​ນຶກວັນ​ຄ້າຍ​ວັນ​ເກີດ​ຂອງ​ອະ​ດີດ​ປະ​ທານ ສຸ​ພາ​ນຸ​ວົງ ຄົບ​ຮອບ 110 ປີ. ເປັນ​ກຽດ​ເຜີຍ​ແຜ່​ເອ​ກະ​ສານ​ຂອງ​ທ່ານ ບຸນ​ປັນ ພົມ​ມະ​ວົງ ຮອງ​ເລ​ຂາ​ພັກ​ເມືອງ ປ​ະ​ທານ​ແນວ​ລາວ​ສ້າງ​ຊາດ​ເມືອງ ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງວຽງ​ຈັນ ໂດຍ​ການ​ເຂົ້າ​ຮ່ວມ​ຮັບ​ຟັງ​ຂອງ​ບັນ​ດາ​ສະ​ຫາຍ​ໃນ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ຫົວ​ໜ້າ​ຫ້ອງ​ການ, ຄະ​ນະ​ຫ້ອງ​ການ, ພະ​ນັກ​ງານຫຼັກ​ແຫຼ່ງ​ຈາກ​ບັນ​ດາ​ຫ້ອງ​ການ, ກົມ​ກອງ, ໂຮງ​ຮຽ​ນ​ອ້ອມ​ຂ້າງ​ເມືອງ ແລະ ອຳ​ນາດ​ການ​ປົກ​ຄອງ​ບ້ານ​ໃນ​ເທດ​ສະ​ບານ​ເມືອງ​ເຂົ້າ​ຮ່ວມ.

ການ​ຈັດ​ກອງ​ປະ​ຊຸມ​ເຜີຍ​ແຜ່​ປາ​ຖະ​ກະ​ຖາ​ຄັ້ງ​ນີ້ ແມ່ນ​ເພື່ອ​ເຮັດ​ໃຫ້​ພະ​ນັກ​ງານຫຼັກ​ແຫຼ່ງ​ນຳ​ພາ-ຄຸ້ມ​ຄອງ​ຈາກ​ຫ້ອງ​ການ​ຕ່າງໆ ຂອງ​ເມືອງ ແລະ ບ້ານ​ໃນ​ເທດ​ສະ​ບານ​ເມືອງ​ໄດ້​ມີ​ຄວາມ​ຮັບ​ຮູ້​ເຂົ້າ​ໃຈ​ຢ່າງ​ເລິກ​ເຊິ່ງ​ກ່ຽວ​ກັບ​ຊີ​ວິດ​ການ​ເຄື່ອນ​ໄຫວ, ຜົນ​ງານ ແລະ ຄຸນ​ງາມ​ຄວາມ​ດີ​ຂອງ​ທ່ານ​ປະ​ທານ ສ​ຸ​ພາ​ນຸ​ວົງ ທີ່​ໄດ້​ອຸ​ທິດ​ຕົນ​ໃຫ້​ແກ່​ພາ​ລະ​ກິດ​ການ​ປະ​ຕິ​ວັດ ແລະ ປະ​ເທດ​ຊາດ​ໃນ​ໄລ​ຍະ​ຜ່ານ​ມາ. ທ່ານ​ເປັນ​ໜຶ່ງ​ໃນ​ຜູ້​ນຳ​ທີ່​ດີ​ເດັ່ນ ທີ່​ມີ​ຄວາມ​ຮູ້​ຄວາມ​ສາ​ມາດ, ເຮັດ​ແທ້​ທຳ​ຈິງ​ເປັນ​ທີ່​ເຄົາ​ລົບ​ຮັກ​ຂອງ​ປະ​ຊາ​ຊົນ​ລາວ​ບັນ​ດາ​ເຜົ່າ​ເຕັມ​ໄປ​ດ້ວຍ​ນ້ຳ​ໃຈ​ຮັກ​ຊາດ, ມີ​ຄວາມ​ດຸ​ໝັ່ນ​ຂະ​ຫຍັນ​ພຽນ, ນ້ຳ​ໃຈ​ພ​ິ​ລະ​ອາດ​ຫານຍອມ​ເສຍ​ສະຫຼະ​ຕໍ່​ສູ້​ບໍ່​ຍອມ​ຈຳ​ນົນ​ກັບ​ພວກ​ລ່າ​ເມືອງ​ຂຶ້ນ ເພື່ອ​ຍາດ​ເອົາ​ຄວາມ​ເປັນ​ເອ​ກະ​ລາດ​ມາ​ໃຫ້​ແກ່​ປະ​ເທດ​ຊາດ ເພື່ອ​ໃຫ້​ພະ​ນັກ​ງານ ແລະ ສະ​ມາ​ຊິກ​ພັກ​ໄດ້​ຮ່ຳ​ຮຽນ​ເອົາ​ຄຸນ​ສົມ​ບັດ​ສິນ​ທຳ​ປະ​ຕິວັດ, ແບບ​ແຜນ​ການ​ດຳ​ລົງ​ຊີ​ວິດ ແລະ ນ້ຳ​ໃຈ​ປະ​ຕິ​​ວັດ​ຂອງ​ເພິ່ນ.

ນອກ​ຈາກ​ການ​ເຜີຍ​ແຜ່​ລະ​ນຶກວັນ​ຄ້າຍ​ວັນ​ເກີດ​ຂອງ​ປະ​ທານ ສຸ​ພາ​ນຸ​ວົງ ແລ້ວ ຍັງ​ໄດ້​ຈັດ​ຕັ້ງ​ການ​ເຜີຍ​ແຜ່​ເອ​ກະ​ສານ​ວັນ​ເຊັນ​ສົນ​ທິ​ສັນ​ຍາ​ມິດ​ຕະ​ພາບ​ລະ​ຫວ່າງ ສ ປ ປ ລາວ ກັບ ສ.ສ ຫວຽດ​ນາມ ຄົບ​ຮອບ 42 ປີ ໂດຍ​ຍົກ​ໃຫ້​ເຫັນ​ເຖິງ​ມູນ​ເຊື້ອ ແລະ ຜົນ​ງານ​ອັນ​ຍິ່ງ​ໃຫຍ່​ສາຍ​ພົວ​ພັນ​ແບບ​ພິ​ເສດ ແລະ ການ​ຮ່ວມ​ມື​ຮອບ​ດ້ານ​ຂອງ​ສອງ​ຊາດ​ລາວ-ຫວຽດ​ນາມ​ທີ່​ໄດ້​ປະ​ກອບ​ສ່ວນ​ໃຫ້​ແກ່​ຂະ​ບວນ​ການ​ຕໍ່​ສູ້​ກູ້​ຊາດ​ຍາດ​ເອົາ​ຄວາມ​ເປັນ​ເອ​ກະ​ລາດ​ຈາກ​ພວກ​ລ່າ​ເມືອງ​ຂຶ້ນ​ແບບ​ເກົ່າ ແລະ ໃໝ່ ໃນ​ເມື່ອ​ກ່ອນ ແລະ ການ​ປົກ​ປັກ​ຮັກ​ສາ, ສ້າງ​ສາ​ພັດ​ທະ​ນາ​ປະ​ເທດ​ຊາດ​ແຕ່​ລະ​ໄລ​ຍະ​ມາ​ຈົນ​ເຖິງ​ປະ​ຈຸ​ບັນ.