ເມືອງວັງວຽງ ຈັດງານສະເຫຼີມສະຫຼອງວັນສິ່ງແວດລ້ອມໂລກ ແລະ ວັນປູກຕົ້ນໄມ້ແຫ່ງຊາດ

   ໃນຕອນເຊົ້າຂອງວັນທີ 05 ມີຖຸນາ 2018 ຜ່ານມານີ້ ຢູ່ທີ່ເດີ່ນສະໂມສອນໃຫຍ່ເມືອງວັງວຽງ ໄດ້ຈັດງານສະເຫຼີມສະຫຼອງວັນສິ່ງແວດລ້ອມໂລກ ແລະ ວັນປູກຕົ້ນໄມ້ແຫ່ງຊາດຂຶ້ນ.
   ໂດຍການໃຫ້ກຽດເຂົ້າຮ່ວມຂອງທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ທ່ານ ປອ ອາລຸນ ບຸນມີໄຊ ຫົວໜ້າກົມພັດທະນາທ່ອງທ່ຽວ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ຄຳຟອງ ບົວທອງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງວຽງຈັນ, ນອກນີ້ຍັງມີບັນດາທ່ານຄະນະການນຳຂອງເມືອງ, ຫົວໜ້າຫ້ອງການ, ຄະນະຫ້ອງການ, ພະນັກງານວິຊາການ, ນັກທຸລະກິດຜູ້ປະກອບການຕະຫຼອດຮອດອຳນາດການປົກຄອງບ້ານພ້ອມດ້ວຍປະຊາຊົນໃນເທດສະບານເມືອງກໍໄດ້ເຂົ້າຮ່ວມເປັນຈຳນວນຫຼວງຫຼາຍ.
   ໃນພິທີ ທ່ານ ປອ ອາລຸນ ບຸນມີໄຊ ໄດ້ຂຶ້ນກ່າວລາຍງານກ່ຽວກັບຄວາມເປັນມາຂອງວັນສິ່ງແວດລ້ອມໂລກຄົບຮອບ 46 ປີ ແລະ ວັນປູກຕົ້ນໄມ້ແຫ່ງຊາດ ເຊີ່ງໄດ້ຕິດພັນກັບປີທ່ອງທ່ຽວລາວ ພາຍໃຕ້ຄຳຂວັນ “ຫຼຸດຜ່ອນປາລາສະຕິກ ແລະ ຫຼຸດຜ່ອນມົນລະຜິດ” ເພື່ອປຸກຈິດສຳນຶກໃຫ້ແກ່ທຸກຄົນຢູ່ໃນສັງຄົມໄດ້ມີສ່ວນຮ່ວມເປັນເຈົ້າການນຳກັນສ້າງຊີວິດທີ່ສົດໃສໃຫ້ແກ່ຕົນເອງ.
   ຈາກນັ້ນ ທ່ານ ຄຳຜອງ ດວງວິໄລ ເຈົ້າເມືອງໆວັງວຽງ ກໍໄດ້ຂຶ້ນກ່າວເປີດໄຂງານຢ່າງເປັນທາງການ. ໃນໂອກາດດຽວກັນນີ້ທາງກົມສົ່ງເສີມການທ່ອງທ່ຽວ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຍັງໄດ້ມອບຖັງໃສ່ຂີ້ເຫຍື້ອຈຳນວນ 30 ໜ່ວຍໃຫ້ແກ່ເມືອງວັງວຽງ ເພື່ອນຳໄປຮັບໃຊ້ການເກັບມ້ຽນໃສ່ຂີ້ເຫຍື້ອຢູ່ຕາມສາທາລະນະຕ່າງໆ ໃນຕົວເມືອງ.
   ພາຍຫຼັງ ສຳເລັດພິທີແລ້ວ ກໍໄດ້ຈັດຕັ້ງການປູກຕົ້ນໄມ້ປະດັບ ແລະ ເຮັດອະນາໄມທຳຄວາມສະອາດຢູ່ຕາມເສັ້ນທາງໃນເທດສະບານເມືອງຢ່າງເປັນຂະບວນຟົດຟື້ນ.
error: Content is protected !!