ສະເຫຼີມສະຫຼອງວັນສ້າງຕັ້ງແມ່ຍິງລາວ ຄົບຮອບ 64 ປີ

ພິທີສະເຫຼີມສະຫຼອງວັນສ້າງຕັ້ງແມ່ຍິງລາວຄົບຮອບ 64 ປີ ຢູ່ເມືອງວັງວຽງ ໄດ້ຈັດຂຶ້ນໃນຕອນເຊົ້າຂອງວັນທີ 17 ກໍລະກົດ 2019 ນີ້ ໂດຍແມ່ນສະຫະພັນແມ່ຍິງແຂວງວຽງຈັນ ຮ່ວມກັບສະຫະພັນແມ່ຍິງເມືອງວັງວຽງ ເປັນຜູ້ຈັດຂຶ້ນ. ຕອນເຊົ້າເວລາ 6 ໂມງ ໄດ້ມີກິດຈະກຳການຍ່າງມາລາທອນເພື່ອສຸຂະພາບ ເຊີ່ງເລີ່ມຈາກໂຮງຮຽນ ມ.ປາຍວັງວຽງ ຫາ ສຳນັກງານປົກຄອງເມືອງ ໂດຍມີເອື້ອຍນ້ອງສະຫະພັນແມ່ຍິງມາຈາກແຂວງວຽງຈັນ ແລະ ເມືອງວັງວຽງ ພ້ອມດ້ວຍການນຳພັກ-ລັດຂອງເມືອງ ຕະຫຼອດຮອດນັກທຸລະກິດພໍ່ຄ້າຊາວຂາຍຢູ່ພາຍໃນເມືອງເຂົ້າຮ່ວມເປັນຈຳນວນຫຼວງຫຼາຍ, ຈາກນັ້ນ ກໍໄດ້ມີກິດຈະກຳຖາມ-ຕອບຄຳຖາມວິທະຍາສາດຈາກຜູ້ເຂົ້າຮ່ວມຍ່າງມາລາທອນຕື່ມອີກ.

ໃນວັນດຽວກັນນີ້ຍັງໄດ້ຈັດໃຫ້ມີການຟັງປາຖະກະຖາຫວນຄືນມູນເຊື້ອວັນສ້າງຕັ້ງສະຫະພັນແມ່ຍິງລາວຄົບຮອບ 64 ປີ (ວັນທີ 20/7/1955-20/7/2019) ຢູ່ທີ່ສະໂມສອນໃໝ່ ສຳນັກປົກຄອງເມືອງວັງວຽງ ໂດຍການເຂົ້າຮ່ວມຮັບຟັງຂອງທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີບັນດາທ່ານທີ່ມາຈາກການນຳຂອງແຂວງ, ການນຳຂອງເມືອງ, ຫົວໜ້າຫ້ອງການອ້ອມຂ້າງເມືອງ, ປະທານສະຫະພັນແມ່ຍິງເມືອງອ້ອມຂ້າງຕະຫຼອດຮອດອົງການຈັດຕັ້ງສະຫະພັນແມ່ຍິງ ແລະ ສະມາຊິກແມ່ຍິງຈາກໜ່ວຍຕ່າງໆ ຢູ່ພາຍໃນເມືອງ ແລະ ມາຈາກແຂວງວຽງຈັນເຂົ້າຮ່ວມ.

ໃນພິທີ ທ່ານ ນ. ຈັນທະບູນ ໂພທິລາດ ກຳມະການພັກແຂວງ ປະທານສະຫະພັນແມ່ຍິງແຂວງວຽງຈັນ ໄດ້ໃຫ້ກຽດຂຶ້ນປະຖະກະຖາ ເຊີ່ງທ່ານໄດ້ຍົກໃຫ້ເຫັນເຖິງມູນເຊື້ອ, ປະຫວັດຄວາມເປັນມາຂອງອົງການຈັດຕັ້ງສະຫະພັນແມ່ຍິງລາວແຕ່ລະໄລຍະນັບແຕ່ມື້ສ້າງຕັ້ງຈົນຮອດປະຈຸບັນ ແລະ ຜົນງານການປະກອບສ່ວນຂອງເອື້ອຍນ້ອງແມ່ຍິງເຂົ້າໃນຂະບວນການຕ່າງໆ ທີ່ສຳຄັນຂອງພັກ, ຂອງຊາດ ເຊັ່ນ: ການເຂົ້າຮ່ວມແຂ່ງຂັນກິລາລະດັບສາກົນ ແລະ ພາກພື້ນຂອງເອື້ອຍນ້ອງແມ່ຍິງທີ່ເປັນຕົວແທນຂອງຊາດ, ການເຂົ້າຮ່ວມການຄົ້ນຄວ້າເຕັກນິກວິທະຍາສາດ ແລະ ຜົນງານອື່ນ…

ນອກນີ້ ຍັງໄດ້ຍົກໃຫ້ເຫັນເຖິງຜົນງານການເຄື່ອນໄຫວຂອງສະຫະພັນແມ່ຍິງແຂວງວຽງຈັນ ໄລຍະຜ່ານມາຕື່ມອີກ. ການຈັດພິທີສະເຫຼີມສະຫຼອງວັນປະຫວັດສາດດັ່ງກ່າວນີ້ໄດ້ດຳເນີນໄປເປັນເວລາເຄີ່ງວັນ.