ມອບ-ຮັບ​ສະ​ໂມ​ສອນ​ເມືອງວັງ​ວຽງຫຼັງ​ໃໝ່

ໃນ​ຕອນ​ເຊົ້າ​ຂອງວັນ​ທີ 15 ກໍ​ລະ​ກົດ 2019 ນີ້ ຢູ່​ທີ່​ສຳ​ນັກ​ງານ​ປົກ​ຄອງ​ເມືອງວັງ​ວຽງ ໄດ້​ມີ​ພິ​ທີ​ມອບ​ຮັບ​ສະ​ໂມ​ສອນຫຼັງ​ໃໝ່​ລະ​ຫວ່າງ​ຫ້ອງວ່າ​ການ​ປົກ​ຄອງ​ເມືອງວັງ​ວຽງ (ເຊີ່ງ​ເປັນ​ເຈົ້າ​ຂອງ​ໂຄງ​ການ) ກັບ​ ບໍ​ລິ​ສັດ​ສີ​ສະ​ເກດກ​ໍ່​ສ້າງ​ຂົວ​ທາງ​ຊົນ​ລະ​ປະ​ທານ ຈຳ​ກັດ (ໃນ​ນາມ​ຜູ້​ຮັບ​ເໝົາ​ກໍ່​ສ້າງ), ໂດຍ​ການ​ເຂົ້າ​ຮ່ວມ​ຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວ​ັງ​ວຽງ, ມີ​ບັນ​ດາ​ຄະ​ນະ​ການ​ນຳ​ຂອງ​ເມືອງ, ຫົວ​ໜ້າ​ຫ້ອງ​ການ, ພະ​ນັກ​ງານ​ອາ​ວຸ​ໂສ​ບຳ​ນານ, ຕົວ​ແທນ​ນັກ​ທຸ​ລະ​ກິດ​ຜູ້​ປະ​ກອບ​ການ​ຕະຫຼອດ​ຮອດ​ພະ​ນັກ​ງານ​ລັດ​ຖະ​ກອນ​ພາຍ​ໃນ​ສຳ​ນັກ​ງານ​ປົກ​ຄອງ​ເມືອງວັງ​ວຽງ​ ກໍ​ໄດ້​ເຂົ້າ​ຮ່ວມ​ຢ່າງ​ພ້ອມ​ພຽງ.

ໃນ​ພິ​ທີ ທ່ານ ຄຳ​ຜາຍ​ ສີ​ສະ​ເກດ ຮອງ​ອຳ​ນວຍ​ການບໍ​ລິ​ສັດ​ສີ​ສະ​ເກດກ​ໍ່​ສ້າງ​ຂົວ​ທາງ​ຊົນ​ລະ​ປະ​ທານ ຈຳ​ກັດ ໄດ້​ຂຶ້ນ​ລາຍ​ງານ​ກ່ຽວ​ກັບ​ໂຄງ​ການ​ກໍ່​ສ້າງ​ສະ​ໂມ​ສອນ​ເມືອງວັງ​ວຽງ ຫຼັງ​ໃໝ່​ໂດຍ​ໃຫ້​ຮູ້​ວ່າ: ສະ​ໂມ​ສອນ​ເມືອງວັງ​ວຽງຫຼັງ​ໃໝ່ ເປັນ​ອາ​ຄານ​ຊັ້ນ​ດຽວ, ເຮັດ​ດ້ວຍ​ເບ​ຕົງ​ເສີມ​ເຫຼັກ, ໂຄງ​ສ້າງຫຼັງ​ຄາ​ດ້ວຍ​ເຫຼັກ, ມຸງ​ດ້ວຍ​ກະ​ເບື້ອງ, ຝາ​ກໍ່​ດ້ວຍ​ດິນ​ຈີ່, ພື້ນ​ປູ​ດ້ວຍ​ກາ​ໂລ. ເນື້ອ​ທີ່ 21 x 35 ມ, ລວມ​ມູນ​ຄ່າ​ການ​ກໍ່​ສ້າງ 3,120,009,264 ກີບ. ໂດຍ​ໃຊ້​ເວ​ລາ​ກ​ໍ່​ສ້າງ​ເປັນເວ​ລາ 12 ເດືອນຄື ເລີ່ມ​ແຕ່​ເດືອນ ກໍ​ລະ​ກົດ 2018 ຫາ ເດືອນ ກໍ​ລະ​ກົດ 2019​ ຈຶ່ງ​ສຳ​ເລັດ, ພ້ອມ​ທັງ​ກ່າວມອບ​ອາ​ຄານ​ດັ່ງ​ກ່າວ​ໃຫ້​ແກ່​ອຳ​ນາດ​ການ​ປົກ​ຄອງ​ເມືອງ​ຢ່າງ​ເປັນ​ທາງ​ການ. ໂດຍ​ແມ່ນ​ທ່ານ ບຸນ​ຈັນ ມາ​ລາ​ວົງ ຮອງ​ເຈົ້າ​ເມືອງໆ​ວັງ​ວຽງ ເປັນ​ຜູ້​ກ່າວ​ຮັບ​ພ້ອມ​ທັງ​ຢຶນ​ຢັນ​ວ່າ​ຈະ​ນຳ​ໃຊ້​ອາ​ຄານ​ດັ່ງ​ກ່າວ​ນີ້​ເປັນ​ໃຈ​ກາງ​ໃນ​ການ​ເຕົ້າ​ໂຮມ​ຄວາມ​ສາ​ມັກ​ຄີ​ຂອງ​ພະ​ນັກ​ງານ ແລະ ປະ​ຊາ​ຊົນ​ໃນ​ທົ່ວ​ເມືອງ​ໃນ​ການ​ຈັດ​ກອງ​ປະ​ຊຸມ, ສຳ​ມະ​ນາ ແລະ ງານ​ກິດ​ຈະ​ກຳ​ຕ່າງໆ ທີ່​ສຳ​ຄັນ​ຂອງ​ເມືອງ​ໃຫ້​ມີ​ປະ​ສິດ​ທິ​ຜົນ. ສຳ​ລັບ​ງົບ​ປະ​ມານ​ຮັບ​ໃຊ້​ໃນ​ການ​ກໍ່​ສ້າງ​ອາ​ຄານຫຼັງ​ນີ້​ແມ່ນ​ໄດ້​ມາ​ຈາ​ກ​ການ​ຫັນ​ເອົາ​ຊັບ​ສິນ​ຂອງ​ລັດ​ເປັນ​ທຶນ​ ໂດຍ​ໄດ້​ມາ​ຈາກ​ການ​ຍົກ​ຍ້າຍ​ທີ່​ດິນ​ສະ​ໜາມ​ຍິງ​ປືນ​ຂອງກອງ​ພົນ​ທະ​ຫານ​ຮາບ​ທີ 1 ເຊີ່ງ​ຖືກ​ໂຄງ​ການ​ກໍ່​ສ້າງ​ສະ​ຖາ​ນີ​ລົດ​ໄຟ​ ທາງ​ເມືອງ​ໄດ້​ຈັດ​ສັນ​ເອົາ​ດິນ​ບ່ອນ​ໃໝ່​ປ່ຽນ​ແທນ, ສ່ວນ​ດິນ​ຕອນ​ເກົ່າ​ສ່ວນ​ເຫຼືອ​ຈາກ​ການ​ກໍ່​ສ້າງ​ສະ​ຖາ​ນີ​ລົດ​ໄຟ ທາງ​ເມືອງ​ໄດ້​ເປັນ​ເອ​ກະ​ພາບ​ກັບ​ກອງ​ພົນ​ທີ 1 ໄດ້​ຫັນ​ເອົາ​ມາ​ເປັນ​ທຶນ ເພື່ອ​ກໍ່​ສ້າງ​ສະ​ໂມ​ສອນຫຼັງ​ໃໝ່​ຂອ​ງ​ເມືອງ​ຂຶ້ນ​ປ່ຽນ​ແທນ​ສະ​ໂມ​ສອນຫຼັງ​ເກົ່າ ເຊີ່ງ​ຢູ່​​ຫ່າງໄກ​ຈາກ​ສຳ​ນັກ​ປົກ​ຄອງ​ເມືອງ, ​ຫຍຸ້ງ​ຍາກ​ໃນ​ການ​ໄປ​ຈັດ​ກອງ​ປະ​ຊຸມ ແລະ ການ​ຄຸ້ມ​ຄອງ​ບົວ​ລະ​ບັດ​ຮ​ັກ​ສາ.

ຈາກ​ນັ້ນ ກ​ໍ​ໄດ້​ມີ​ການ​ເຊັນ​ບົດ​ບັນ​ທຶກມອບ-ຮັບ​ຢ່າງ​ເປັນ​ທາງ​ການ​ລະ​ຫວ່າງ ທ່ານ ຄຳ​ຜາຍ ສີ​ສະ​ເກດ ຮອງ​ອຳ​ນວຍ​ການບໍ​ລິ​ສັດ​ສີ​ສະ​ເກດກ​ໍ່​ສ້າງ​ຂົວ​ທາງ​ຊົນ​ລະ​ປະ​ທານ ຈຳ​ກັດ ກັບ ທ່ານ ຄຳ​ມີ ສີ​ສະ​ຫວັດ ຫົວ​ໜ້າ​ຫ້ອງວ່າ​ການ​ປົກ​ຄອງ​ເມືອງ ຕາງ​ໜ້າ​ໃຫ້​ແກ່​ຄະ​ນະ​ພັກ​ອຳ​ນາດ​ການ​ປົກ​ຄອງ​ເມືອງ ແລະ ທ່ານ ເຈົ້າ​ເມືອງໆ​ວັງ​ວຽງ ໄດ້​ໃຫ້​ກຽດ​ລັ່ນ​ຄ້ອງ 9 ບາດ ພ້ອມ​ທັງ​ຕັດ​ແຖບ​ຟ້າ​ເປີດ​ປ້າຍ ແລະ ປ່ອຍ​ປູມ​ເປົ້າ​ປ້າຍ​ສັນ​ຍາ​ລັກ​ຂຶ້ນ​ສູ່​ທ້ອງ​ຟ້າ​ສ່ອງ​ໜ້າ​ແຂກ​ຄົນ​ທີ່​ເຂົ້າ​ຮ່ວມ​ພິ​ທີ.