ທ່ານ ສອນ​ໄຊ ສີ​ພັນ​ດອນ ໂອ້​ລົມ​ພະ​ນັກ​ງານຫຼັກ​ແຫຼ່ງ​ຢູ່​ເມືອງວັງ​ວຽງ

​ໃນ​ຕອນ​ເຊົ້າ​ຂອງວັນ​ທີ 10 ກໍ​ລະ​ກົດ 2019 ຜ່ານ​ມາ​ນີ້ ຢູ່​ທີ່​ຫ້ອງ​ປະ​ຊຸມ​ຊັ້ນ III ສຳ​ນັກ​ງານ​ປົກ​ຄອງ​ເມືອງວັງ​ວຽງ ບັນ​ດາ​ພະ​ນັກ​ງານ​ກາ​ນ​ນຳຫຼັກ​ແຫຼ່ງ​ຂອງ​ເມືອງວັງ​ວຽງ​ໄດ້​ເຂົ້າ​ຮ່ວມ​​ຟັງ​ການ​ໂອ້​ລົມ​ຂອງ​ທ່ານ ສອນ​ໄຊ ສີ​ພັນ​ດອນ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ ຮອງ​ນາ​ຍົກ​ລັດ​ຖະ​ມົນ​ຕີ​ແຫ່ງ ສ ປ ປ ລາວ. ໂດຍ​ການ​ເຂົ້າ​ຮ່ວມ​ຮັບ​ຟັງ​ຂອງ​ທ່ານ ຄຳ​ພັນ ສິດ​ທິ​ດຳ​ພາ ກຳ​ມະ​ການ​ສູນ​ກາງ​ພັກ ເລ​ຂາ​ພັກ​ແຂວງ ເຈົ້າ​ແຂວງໆ​ວຽງ​ຈັນ, ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ມີ​ບັນ​ດາ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ຫົວ​ໜ້າ​ຫ້ອງ​ການ, ຄະ​ນະ​ຫ້ອງ​ການຕ່າງໆ ອ້ອມ​ຂ້າງ​ເມືອງ.

ພາຍຫຼັງ ທ່ານ ເຈົ້າ​ເມືອງໆ​ວັງ​ວຽງ ໄດ້​ລາຍ​ງານ​ສະ​ພາບ​ຂອງ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ 6 ເດືອນ​ຕົ້ນ​ປີ​ຂອງ​ເມືອງ ແລະ ຄຳ​ສະ​ເໜີ​ຕ່າງໆ ທີ່​ເປັນ​ຂໍ້​ຫຍຸ້ງ​ຍາກ​ໃຫ້​ແກ່​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຢູ່​ເມືອງວັງ​ວຽງ​ໃຫ້​ແກ່​ທ່ານ​ຮອງ​ນາ​ຍົກ​ຮັບ​ຊາບ​ແລ້ວ. ທ່ານ ສອນ​ໄຊ ສີ​ພັນ​ດອນ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ ຮອງ​ນາ​ຍົກ​ລັດ​ຖະ​ມົນ​ຕີ​ ກໍ​​ໄດ້​ໃຫ້ກຽດ​ໂອ້​ລົມ ເຊີ່ງ​ກ່ອນ​ອື່ນ​ທ່ານ​ໄດ້​ຍົກ​ໃຫ້​ເຫັນ​ສະ​ພາບ​ທີ່​ພົ້ນ​ເດັ່ນ​ຂອງ​ໂລກ, ຂອງ​ສາ​ກົນ, ບັນ​ດາ​ພາກ​ພື້ນ​ອາ​ຊີ​ອາ​ຄະ​ເນ ແລະ ສ​ະ​ພາບ​ພາຍ​ໃນ​ປ​ະ​ເທດ​ຕໍ່​ຜົນ​ສຳ​ເລັດ​ຂອງ​ໂຄງ​ການ​ສ້າງ​ສາ​ພັດ​ທະ​ນາ​ເສດ​ຖະ​ກ​ິດ-ສັງ​ຄົມ 6 ເດືອນ​ຕົ້ນ​ປີ​ຂອງ​ພັກ-ລັດ​ຖະ​ບານ​ແລ້ວ ທ່ານ​ຍັງ​ໄດ້​ຍົກ​ໃຫ້​ເຫັນ​ບັນ​ຫາ​ປະ​ກົດ​ການ​ຫຍໍ້​ທໍ້​ຕ່າງໆ ທີ່​ເກີດ​ຂຶ້ນ​ຢູ່​ໃນ​ສັງ​ຄົມ, ການ​ສວຍ​ໃຊ້​ຂອງ​ກຸ່ມ​ຄົນ​ທີ່​ບໍ່​ຫວັງ​ດີ​ໄດ້​ນຳ​ໄປ​ເປັນ​ເຄື່ອງ​ມື​ໂຄ​ສະ​ນາ ໂດຍ​ສະ​ເພາະ​ແມ່ນ​ສື່​ສັງ​ຄົມ​ອອນ​ລາຍ​ທີ່​ບໍ່​ສ້າງ​ສັນ​ເກີດ​ຂຶ້ນ ​ພ້ອມ​ທັງ​ຊີ້​ນຳ​ຕໍ່​ກັບມາດ​ຕະ​ການ ແລະ ວິ​ທີ​ແກ້​ໄຂ​ໃນ​ຕໍ່​ໜ້າ. ພ້ອມ​ນີ້ ທ່ານ​ຍັງ​ໄດ້​ຊີ້ນ​ຳ​ໃຫ້​ທ​າງ​ເມືອງກວດ​ກາ​ຄືນ​ໂຄງ​ການ​ລົງ​ທຶນ​ຕ່າງໆ ຢູ່​ພາຍ​ໃນ​ເມືອງ ຖ້າ​ເຫັນ​ວ່າ​ໂຄງ​ການ​ໃດ​ບໍ່​ມີ​ປະ​ສິດ​ທິ​ຜົນ, ມ​ີ​ການ​ຍືດ​ເຍື້ອ​ແກ່​ຍາວ​ບໍ່​ໄປ​ຕາມ​ແຜ​ນ​ແມ່​ບົດ ໃຫ້​ຮີບ​ຮ້ອນ​ລາ​ຍ​ງານ​ໃຫ້​ລັດ​ຖະ​ບານ​ກ່ອນ. ຕໍ່​ກັບ​ຄຳ​ສະ​ເໜີ​ຕ່າງໆ ຂອງ​ທາງ​ເມືອງ​ນັ້ນ ທ່ານ​ຈະ​ໄດ້​ນຳ​ໄປ​ພິ​ຈາ​ລະ​ນາ​ເພື່ອ​ຊີ້​ນຳ​ໃຫ້​ກະ​ຊວງ​ທີ່​ກ່ຽວ​ຂ້ອງ​ລົງ​ສົມ​ທົບ​ກັບ​ທາງ​ເມືອງ ເພື່ອ​ຫາ​ວິ​ທີ​ແກ້​ໄຂ​ໃຫ້​ເໝາ​ະ​ສົມ.