ເມືອງວັງວຽງ ຈັດຕັ້ງການສະເຫຼີມສະຫຼອງວັນແມ່ຍິງສາກົນ ຄົບຮອບ 108 ປີ

   ເພື່ອເປັນການສ້າງຂະບວນການເບີກບານມ່ວນຊື່ນຂ່ຳນັບຮັບຕ້ອນວັນແມ່ຍິງສາກົນ ຄົບຮອບ 108 ປີ. ໃນຕອນເຊົ້າ ຂອງວັນທີ 7 ມີນາ 2018 ຜ່ານມານີ້ ສະຫະພັນແມ່ຍິງ ເມືອງວັງວຽງ ໄດ້ສ້າງຂະບວນການຍ່າງມາລາທອນ ເພື່ອສຸຂະ ພາບຂື້ນ ໂດຍການເຂົ້າຮ່ວມຂອງ ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ທ່ານ ບຸນປັນ ພົມມະວົງ ຮອງເລຂາພັກເມືອງ ປະທານແນວລາວສ້າງຊາດເມືອງ, ມີບັນດາທ່ານໃນຄະນະການນຳຂອງ ເມືອງ, ຄະນະບໍລິຫານງານແມ່ຍິງເມືອງ, ຫົວໜ້າຫ້ອງການຕ່າງໆ ຂອງເມືອງ, ປະທານສະຫະພັນແມ່ຍິງແຕ່ລະໜ່ວຍ ອ້ອມຂ້າງເມືອງ ແລະ ເອື້ອຍນ້ອງແມ່ຍິງຈາກໜ່ວຍຕ່າງໆ ເຂົ້າຮ່ວມເປັນຈຳນວນຫຼວງຫຼາຍ. ພິທີເປີດຂະບວນການຍ່າງມາລາທອນໄດ້ຈັດຂື້ນຢູ່ທີ່ເດ່ີນບິນເມືອງວັງວຽງ ໂດຍແມ່ນທ່ານ ບຸນປັນ ພົມມະວົງ ຮອງເລຂາພັກເມືອງ ປະທານແນວລາວສ້າງຊາດເມືອງ ເປັນຜູ້ກ່າວເປີດໄຂງານ. ຈາກນັ້ນ ຂະບວນການຍ່າງກໍໄດ້ເຄື່ອນທີ່ອອກຈາກຈຸດປ່ອຍຍ່າງອ້ອມເທດສະບານເມືອງແລ້ວກັບມາຫາຈຸດເດີມ ເຊີ່ງມີໄລຍະທາງ 4 ກິໂລແມັດ.
   ພາຍຫຼັງ ຂະບວນການຍ່າງມາລາທອນສິ້ນສຸດລົງ ກໍໄດ້ຈັດໃຫ້ມີພິທີປາຖະກະຖາເລົ່າຄືນປະຫວັດຄວາມເປັນມາ ຂອງວັນແມ່ຍິງສາກົນ ຄົບຮອບ 108 ປີ (ວັນທີ 08 ມີນາ 1910 ຫາ ວັນທີ 08 ມີນາ 2018) ຂື້ນຢູ່ທີ່ສະໂມສອນ ໃຫຍ່ເມືອງວັງວຽງ ໂດຍແມ່ນ ທ່ານ ບຸນປັນ ພົມມະວົງ ຮອງເລຂາພັກເມືອງ ປະທານແນວລາວສ້າງຊາດເມືອງ ເປັນຜູ້ຂື້ນປາຖະກະຖາ ເຊີ່ງທ່ານໄດ້ຍົກໃຫ້ເຫັນເຖິງປະຫວັດຄວາມເປັນມາ ແລະ ຄວາມໝາຍຄວາມສຳຄັນຂອງ ວັນແມ່ຍິງສາກົນໃນການຕໍ່ສູ້ຂອງກຳມະກອນແມ່ຍິງຢູ່ກາຊິໂກປະເທດສະຫະລັດອາເມລິກາ ໃນການທວງເອົາສິດທິ ອັນຊອບທຳໃນການເຮັດວຽກຂອງຕົນເອງ ຈາກຊົນຊັ້ນສັກດີນານາຍທຶນໃນເມື່ອກ່ອນ ເຊີ່ງໄດ້ສືບທອດເຈດຈຳນົງທີ່ ຕ້ອງການໃຫ້ຜູ້ຍິງໄດ້ຮັບການປົກຄອງຄຸ້ມຄອງທາງດ້ານສະຫວັດດີການສັງຄົມ, ຄວາມປອດໄພໃນການເຮັດວຽກ, ຫ້າມໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ແລະ ການສົ່ງເສີມສິດສະເໝີພາບຍິງ-ຊາຍ ຢູ່ໃນສັງຄົມເທົ່າທຽມກັນ ໃນຍຸກປະຈຸບັນ.
   ຕອນທ້າຍ ຂອງພິທີກໍໄດ້ມີການມອບຂອງຂວັນໃຫ້ແກ່ແມ່ປ້າອາວຸໂສ ແລະ ຄະນະບໍລິຫານງານແມ່ຍິງເມືອງ ທີ່ເປັນຕົວແບບທີ່ດີໃຫ້ແກ່ເອື້ອຍນ້ອງແມ່ຍິງລຸ້ນຫຼັງອີກດ້ວຍ.
error: Content is protected !!