ເສັ້ນ​ທາງ​ໃນ​ເທດ​ສະ​ບານ​ເມືອງວັງ​ວຽງ ພວມ​ຂຸ້ນ​ຂ້ຽວ​ການ​ປູ​ຢາງ

​ເລີ່ມ​ແຕ່​ຕົ້ນ​ເດືອນ​ ພຶດ​ສະ​ພາ 2019 ເປັນ​ຕົ້ນ​ມາ ເສັ້ນ​ທາງ​ສາຍ​ຕ່າງໆ ຢູ່​ໃນ​ຂອບ​ເຂດ​ເທດ​ສະ​ບານ​ເມືອງວັງ​ວຽງ​ລວມ​ທັງ​ເສັ້ນ​ທາ​ງ​ຊອຍ​ຢູ່​ໃນ​ແຕ່​ລະ​ຄຸ້ມ​ບ້ານ​ຕ່າງ​ກໍ​ໄດ້​ຮັບ​ການ​ລົງ​ມື​ສ້ອມ​ແປງ​ຍົກ​ລະ​ດັບ​ຂຶ້ນ​ໃຫ້​ເປັນ​ເສັ້ນ​ທາງ​ທີ່​ໄດ້​ມາດ​ຖານ ແລະ ເລີ່ມ​ປູ​ຢາງ​ແລ້ວ.

ຕາມ​ການ​ເປີດ​ເຜີຍ​ຂອງ​ທ່ານ ສີ​ສົມ​ພູ ພິມ​ເມືອງ ຫົວ​ໜ້າ​ຫ້ອງ​ການ​ໂຍ​ທາ​ທິ​ການ ແລະ ຂົນ​ສົ່ງ ເມືອງວັງ​ວຽງ ໃຫ້​ຮູ້​ວ່າ: ການ​ກໍ່​ສ້າງ ແລະ ສ້ອມ​ແປງ​ເສັ້ນ​ທາງ​ປູ​ຢາງ​ຢູ່​ເຂດ​ເທດ​ສະ​ບານ​ເມືອງວັງ​ວຽງ​ໄດ້​ຮັບ​ທຶນ​ຈາກ​ງົບ​ປະ​ມານ​ຂອງ​ລັດ ມູນ​ຄ່າ 3,099,912,711 ກີບ (ສາມ​ຕື້​ເກົ້າ​ສິບ​ເກົ້າ​ລ້ານກວ່າ​ກີບ) ໂດຍ​ແມ່ນ​ພະ​ແນກ​ໂຍ​​ທາ​ທິ​ການ ແລະ ຂົນ​ສົ່ງ​ແຂວງວຽງ​ຈັນ​ເປັນ​ເຈົ້າ​ຂອງ​ໂຄງ​ການ ໂດຍ​ມອບ​ໃຫ້​ບໍ​ລິ​ສັດ ບຸນ​ມີ​ໄຊ​ກໍ່​ສ້າງ​ຂົວ-ທາງ ຈຳ​ກັດ​ຜູ້​ດຽວ ເປັນ​ຜູ້​ຮັບ​ເໝົາ​ກໍ່​ສ້າງ ເຊີ່ງ​ໜ້າ​ວຽກ​ທີ່​ໄດ້​ເຮັດ​ແມ່ນ​ການ​ຕາບ​ຂຸມ​ດ້ວຍ​ຢາງ​ຕາມ​ເສັ້ນ​ທາງ​ສາຍຫຼັກ​ຂອງ​ຕົວ​ເມືອງ, ຂຸດ​ຮື້ ແລະ ປູ​ໜ້າ​ທາງ, ຖົມ​ດິນ​ຊັ້ນ​ພື້ນ​ທາງ​ດ້ວຍ​ຫີນ​ຂົບ, ວາງ​ທໍ່​ລະ​ບາຍ​ນ້ຳ​ຂ້າມ​ທາງ ແລະ ປູ​ຢາງ 2 ຊ​ັ້ນ​ຕາມ​ເສັ້ນ​ທາງ​ຊອຍ​ທີ່​ເປັນ​ທາງ​ດິນ​ແດງຢູ່​ໃນ​ແຕ່​ລະ​ຄຸ້ມ​ບ້ານ​ຜ່ານ​ມາ, ຄາດ​ວ່າ​ຈະ​ໃຫ້​ສຳ​ເລັດ​ກ່ອນ​ເຂົ້າ​ສູ່​ລະ​ດູ​ຝົນ​ໃນ​ທ້າຍ​ເດືອນ​ມີ​ຖຸ​ນາ​ນີ້.

ພາຍຫຼັງ​ສຳ​ເລັດ​ການ​ກໍ່​ສ້າງ​ເສັ້ນ​​ທາງ​ປູ​ຢາງ​ໃນ​ເທດ​ສະ​ບານ​ເມືອງ​ແລ້ວ ຈະ​ເຮັດ​ໃຫ້​ການ​ສັນ​ຈອນ​ໄປ​ມາ​ມີ​ຄວາມ​ສະດວກ​ດີ​ຂຶ້ນ, ຕົວ​ເມືອງ​ມີ​ຄວາມ​ເປັນ​ລະ​ບຽບ​ຮຽບ​ຮ້ອຍ​ສວຍ​ງາມ​ຂຶ້ນ​ຕື່ມ ເພື່ອ​ອຳ​ນວຍ​ຄວາມ​ສະ​ດວກ​ໃຫ້​ແກ່​ແຂກ​ຄົນ, ນັກ​ທ່ອງ​ທ່ຽວ​ທັ​ງ​ພາຍ​ໃນ ແລະ ຕ່າງ​ປະ​ເທດ ໂດຍ​ສະ​ເພາະ​ປີ​ທ່ອງ​ທ່ຽວ​ລາວ​ຈີນ 2019 ນີ້ ເປັນ​ການ​ດຶງ​ດູດ​ເອົາ​ແຂກ​ຄົນ​ໃຫ້ເດີນ​ທາງ​ເຂົ້າ​ໄປ​ທ່ອງ​ທ່ຽວ​ຢູ່​ເມືອງວັງ​ວຽງ​ໃຫ້ຫຼາຍ​ຂື້ນ.