ເມືອງວັງວຽງ ຈັດຕັ້ງການເຮັດອະນາໄມທຳຄວາມສະອາດແມ່ນ້ຳຊອງ

   ເພື່ອເປັນການປົກປັກຮັກສາສະພາບແວດລ້ອມຂອງນ້ຳຊອງໃຫ້ມີຄວາມຍືນຍົງຄົງຕົວ ສະອາດຈົບງາມໃນສາຍຕາຂອງແຂກຄົນ, ນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ເດີນທາງເຂົ້າໄປທ່ອງທ່ຽວຢູ່ເມືອງວັງວຽງ.
   ໃນວັນທີ 15 ພຶດສະພາ 2018 ຜ່ານມານີ້ ເມືອງວັງວຽງ ໄດ້ຈັດໃຫ້ມີຂະບວນການເຮັດອະນາໄມທຳຄວາມສະອາດຕາມສາຍນ້ຳຊອງຂື້ນ ໂດຍການນຳພາເຂົ້າຮ່ວມຂອງ ທ່ານ ບຸນຈັນ ມາລາວົງ ຮອງເລຂາພັກເມືອງ ຮອງເຈົ້າເມືອງໆວັງວຽງ, ມີບັນດາທ່ານໃນຄະນະການນຳຂອງເມືອງ, ຫົວໜ້າຫ້ອງການ,​ ຄະນະຫ້ອງການ, ພະນັກງານວິຊາການ ແລະ ຜູ້ປະກອບການຈາກຫົວໜ່ວຍທຸລະກິດການທ່ອງທ່ຽວຕ່າງໆ ຢູ່ພາຍໃນເມືອງເຂົ້າຮ່ວມເປັນຈຳນວນຫຼວງຫຼາຍ. ຂະບວນການເຮັດອະນາໄມທຳຄວາມສະອາດຕາມສາຍນ້ຳຊອງໃນຄັ້ງນີ້ ໄດ້ມອບໝາຍໃຫ້ກຸ່ມບໍລິການກົງເບັງຂອງເມືອງເປັນເຈົ້າການ, ໂດຍມີການຈັດແບ່ງຄວາມຮັບຜິດຊອບໃຫ້ແຕ່ລະຫົວໜ່ວຍບໍລິການທີ່ຕິດພັນກັບການທ່ອງທ່ຽວໄດ້ເຂົ້າມີສ່ວນຮ່ວມ. ເຊີ່ງຂອບເຂດການເຮັດອະນາໄມໄດ້ເລີ່ມແຕ່ນ້ຳຊອງທ່າບ້ານວຽງສະໄໝ ລົງຮອດ ເຂດຣີສອດຖ້ຳຈັງ ບ້ານເມືອງຊອງ ເຊີ່ງແຕ່ລະຄົນໄດ້ພາກັນເກັບເສດຂີ້ເຫຍື້ອທີ່ຕົກຄ້າງຢູ່ຕາມແຄມຝັ່ງ ແລະ ສາຍນ້ຳຊອງອອກ ໂດຍມອບໃຫ້ກຸ່ມເຮືອຈັກຫາງຍາວນຳທ່ຽວ ເປັນຜູ້ຮັບຂົນສົ່ງຂີ້ເຫຍື້ອນຳໄປວາງໄວ້ຕາມຈຸດທີ່ໄດ້ກຳນົດໄວ້. ຂະບວນການດັ່ງກ່າວ ໄດ້ດຳເນີນໄປເປັນເວລາເຄີ່ງວັນຈຶ່ງສຳເລັດ. ຖືວ່າໃນທຸກໆປີ ກ່ອນຈະເຂົ້າລະດູຝົນທາງເມືອງໄດ້ຈັດຕັ້ງຂະບວນການເຮັດອະນາໄມທຳຄວາມສະອາດຕາມສາຍນ້ຳຊອງຂອບເຂດບໍລິການທ່ອງທ່ຽວຂອງເມືອງເປັນປົກກະຕິ.

error: Content is protected !!