ມອບຮັບຕຶຶກອາຄານເຮືອນພັກສະຫະພັນກຳມະບານເມືອງ

ພິ​ທີ​ມອບ​ຮັບ​ຕຶກ​ອາ​ຄານ​ເຮືອນ​ພັກ​ສະ​ຫະ​ພັນ​ກຳ​ມະ​ບານເມືອງວັງ​ວຽງ​ ຈັດ​ຂື້ນ​ໃນ​ຕອນ​ບ່າຍຂອງວັນ​ທີ 29  ພຶດ​ສະ​ພາ ​ນີ້ ໂດຍ​ການ​ເຂົ້າ​ຮ່ວມ​ເປັ​ນ​ປະທານຂອງ ທ່ານ ເທບ​ພະ​ໄທ ແກ້ວ​ເຂັມ​ເພັ​ດ ປະ​ທານສະ​ຫະ​ພັນ​ກຳ​ມະ​ບານ​ແຂວງວຽງ​ຈັນ, ທ່ານ​ ບຸ​ນ​ຈັນ​ ມາ​ລາ​ວົງ ຮອງ​ເລ​ຂາ​ພັກ​ເມືອງ ຮອງ​ເຈົ້າ​ເມືອງໆວັງ​ວຽງ, ມີບັນ​ດາ​ທ່າ​ນ​ຄະ​ນະການ​ນຳຂອງ​ເມືອງ, ຫົວ​ໜ້າ​ຫ້ອງ​ການອ້ອມ​ຂ້າງ​ເມືອງ, ຄະນະບໍ​ລິ​ຫານ​ງານ​ສະຫະ​ພັນ​ກຳ​ມະ​ບາ​ນ​ເມືອງ, ພະ​ນັກ​ງານ​ອາ​ວຸ​ໂສ​ບ​ຳນານອະ​ດີດການ​ນຳ​ຂອງ​ສະ​ຫະ​ພັນ​ກຳ​ມະ​ບານ​ເມືອງ​ຕະ​ຫຼອດຮອ​ດ​ພະ​ນັກ​ງານ​ລັດ​​ຖະ​ກອນ​​ພາຍ​ໃນ​ຫ້ອງ​ການ​ກຳ​ມະ​ບານ​ເມືອງ​ທັງ​ໝົດ​ເຂົ້າ​ຮ່ວມ.

ຕຶກ​ອາ​ຄານ​ເຮືອນ​ພັກ​ສະ​ຫະ​ພັນ​ກຳ​ມະ​ບານ​ເມືອງວັງ​ວຽງ ​ຕ​ັ້ງຢູ່ບ້ານ​ຫ້ວ​ຍ​ສະ​ເຫງົ້າ ​ເມືອງ​ວັ​ງວຽງ​​ ໄດ້​ລົງ​ມື​ກໍ່​ສ້າງ​ມາ​ແຕ່​ທ້າຍ​ປີ 2018 ດ້ວຍ​ທຶນ​ຂອງ​ຫ້ອງ​ການ​ກຳ​ມະ​ບານ​ເມືອງ ເຊີ່ງ​ເປັນຕຶກອາ​ຄານ 2 ຊັ້ນ, ສ້າງ​ດ້ວຍເບ​ຕົງເສີມເຫຼັກ ລວມມີ 14 ຫ້ອງນອນ ແລະ 14 ຫ້ອງ​ນ້ຳ​ຕິດ​ກັນ, ແຕ່​ລະຫ້ອງຕິດແອເຢັນ, ມີລະບົບໄຟຟ້າ, ນ້ຳປະປາຄົບຊຸດ ລວມມູນຄ່າກໍ່ສ້າງທັງ​ໝົດ 1,700,000,000 ກວ່າກີບ ໂດ​ຍໃຊ້ໄລຍະເວລາກໍ່ສ້າງເປັນເວລາ 6 ເດືອນ. ຕາງ​ໜ້າ​ບໍ​ລິ​ສັດເພັດປະ​ເສີດກ​ໍ່ສ້າງ ຈຳກັດ​ ຜູ້ຮັບ​ເໝົາ​ກໍ່ສ້​າງ​ໄດ້ແກ່ທ່ານ ​ຄຳ​ເຄືອງ ແສງວົງ​ເດືອນ ​ເປັນຜູ້​ກ່າວມອບ, ກ່າວ​ຮັບ​ໂດຍ ທ່ານ ບຸນ​ທັນ ເຮີ​ຈູ່​ຕູ່ ປະ​ທານ​ສະ​ຫະ​ພັນ​ກຳ​ມະ​ບານ​ເມືອງ ໂດຍ​ສ່ອງ​ໜ້າ​ແຂກ​ທີ່​ເຂົ້າ​ຮ່ວມ.

ໃນ​ພິ​ທີ​ທ່ານ​ ເທບ​ພະ​ໄທ ແກ້ວ​ເຂັມ​ເພັດ ປ​ະ​ທານ​ສະ​ຫະ​ພັນ​ກຳ​ມະ​ບານ​ແຂວງວຽງ​ຈັນ ໄດ້​ມີ​ຄຳ​ຄິດ​ຄຳ​ເຫັນ ກ່ອນ​ອື່ນ​ທ່ານ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ ແລະ ຮູ້​ບຸນ​ຄຸນ​ມາ​ຍັງ​ການ​ນຳ​ອະ​ດີດ​ສະ​ຫະ​ພັນ​ກຳ​ມະ​ບານ​ເມືອງ​ໃນ​ລຸ້ນ​ກ່ອນ​ທີ່​ໄດ້​ສ້າງ​ພື້ນ​ຖານ​ເສດ​ຖະ​ກິດ​ໄວ້​ໃຫ້​ສະ​ຫະ​ພັນ​ກຳ​ມະ​ບານ​ເມືອງ ໃນ​​ລຸ້ນປະ​ຈ​ຸ​ບັນ​ເປັນ​ຕົ້ນ​ແມ່ນ​ໄດ້​ຊື້​ດິນ 1 ຕອນ ເພື່ອ​ຈະ​ສ້າງເປັນ​ສວນ​ປູກ​ໄມ້​ຂອງ​ສະ​ຫະ​ພັນ​ກຳ​ມະ​ບານ​ເມືອງ. ມາ​ຮອດ​ປະ​ຈຸ​ບັນ​ຍ້ອນ​ຄວາມ​ຮຽກ​ຮ້ອງ​ຕ້ອງ​ການ​ຂອງ​ກາ​ນ​ສ້າງ​ສາ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ເມືອງ​ໄດ້​ຂະ​ຫຍາຍ​ຕົວ​ໄວ​ໄດ້​ມີ​ນັກ​ທຸ​ລະ​ກິດ​ທັງ​ພາຍ​ໃນ ແລະ ຕ່າງ​ປະ​ເທດ​ເຂົ້າ​ໄປ​ລົງ​ທຶນ​ພັດ​ທະ​ນາ​ສະ​ຖານ​ທີ່​ທ່ອງ​ທ່ຽວ​ຢູ່​ພາຍ​ໃນ​ເມືອງ​ເປັນ​ຈຳ​ນວນຫຼວງຫຼາຍ, ທາງ​ສະ​ຫະ​ພັນ​ກຳ​ມະ​ບານ​ເມືອງ​ຈຶ່ງ​ໄດ້​ຫັນດິນ​ຕອນ​ດັ່ງ​ກ່າວ​ມາ​ເ​ປັນ​ທຶນ ເພື່ອ​ປຸກ​ສ້າງ​ເປັນ​ຕຶກ​ອາ​ຄານ​ເຮືອນ​ພັກ​ຂຶ້ນ. ນອກ​ນັ້ນ​ທ່ານ​ຍັງ​ໄດ້​ແລກ​ປ່ຽນ​ບົດ​ຮຽນ​ກ່ຽວ​ກັບ​ການ​ບໍ​ລິ​ຫ​ານ ແລະ ການ​ບໍ​ລິ​ການ​ເຮືອນ​ພັກ​ດັ່ງ​ກ່າວ​ເພື່ອ​ເຮັດ​ໃຫ້​ທຸ​ລະ​ກິດ​ເດີນ​ແລ່ນ​ສະ​ດວກ​ມີ​ຜົນ​ກຳ​ໄລ ແລະ ຍຶນ​ຍົງ​ຄົງ​ຕົວ​ສາ​ມາດ​ສ້າງ​ລາຍ​ຮັບ​ຊຸກ​ຍູ້​ການ​ເຄື່ອນ​ໄຫວ​ວຽກ​ງານ​ຂອງ​ອົງ​ການ​ຈັດ​ຕັ້ງ​ກຳ​ມະ​ບານ​ຢູ່​ເມືອງ​ໄດ້​ຢ່າງ​ຍຶນ​ຍົງ​ມີ​ປະ​ສິດ​ທິ​ຜົນ​ສູງ. ຈາກ​ນັ້ນ ທ່ານ​ກໍ​ໄດ້​ຮ່ວມ​ກັບ​ຄະ​ນະ​ການ​ນຳ​ຂອງ​ເມືອງ​ເປີດ​ປ້າຍ, ປ່ອຍ​ປູມ​ເປົ້າ​ເປີດເຮືອນ​ພັກ ແລະ ທ່ານ ບຸນ​ຈັນ ມາ​ລາ​ວົງ ຮອງ​ເຈົ້າ​ເມືອງໆ​ວັງ​ວຽງ ໃຫ້​ກຽດ​ລັ່ນ​ຄ້ອງ 9 ບາດ ເພື່ອ​ເປັນ​ສິ​ຣິ​ມຸງ​ຄຸນ ແລະ ເຂົ້າ​ສູ່​ພິ​ທີ​ທາງ​ສາ​ສະ​ໜາ​ຕາມ​ຮີດ​ຄອງ​ປະ​ເພ​ນີ. ນອກ​ຈາກ​ການ​ກໍ່​ສ້າງ​ຕຶກ​ອາ​ຄາ​ນ​ເຮືອນ​ພັກ​ແລ້ວ ບໍ​ລິ​ສັດ​ເພັດ​ປະ​ເສີດ​ກໍ່​ສ້າງ​ຈຳ​ກັດ ຍັງ​ໄດ້​ມອບ​ເຄື່ອງ​ຄອມ​ພິວ​ເຕີ 1 ຊຸດ ແລະ ລົດ​ຈັກ 1 ຄັນ​ໃຫ້ແກ່​ຫ້ອງ​ກາ​ນ​ສະ​ຫະ​ພັນ​ກຳ​ມະ​ບານ​ເມືອງ ເພື່ອ​ຮັບ​ໃຊ້​ເຂົ້າ​ໃນ​ການ​ເຄື່ອນ​ໄຫວ​ວຽກ​ງານ​ຕື່ມ​ອີກ.