ເມືອງວັງວຽງ ສ້າງຂະບວນການອະນາໄມນ້ຳຊອງປະຈຳປີ 2019

ກ່ອນ​ເຂົ້າ​ສູ່​ລະ​ດູ​ຝົນ​ໃນ​ແຕ່​ລະ​ປີ ເມືອງວັງ​ວຽງ​ໄດ້​ຈັດ​ຕັ້ງ​ຂະ​ບວນ​ການ​ເຮັດ​ອະ​ນາ​ໄມ ທຳ​ຄວາມ​ສະ​ອາດ​ຕາມ​ສາຍ​ນ້ຳ​ຊອງ. ສະ​ເພາະ​ໃນ​ປີ​ນີ້ ຂະ​ບວນ​ກາ​ນອ​ະ​ນາ​ໄມ​ນ້ຳ​ຊອງ ໄດ້​ຈັດ​ຂຶ້ນ​ໃນ​ມື້​ວັນ​ທີ 24 ພຶ​ດ​ສະ​ພາ 2019 ນີ້ ຢູ່​ທີ່​ແຄມ​ນ້ຳ​ຊອງ​ຫາດເດີ່ນ​ຈູດ​ບັ້ງ​ໄຟ​ຂອງ​ເມືອງວັງ​ວຽງ. ໂດຍ​ການ​ເຂົ້າ​ຮ່ວມຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ​ ເຈົ້າ​ເມືອງໆ​ວ​ັງ​ວຽງ, ມີ​ບັນ​ດາສະ​ຫາຍ​ຄະ​ນະ​ປະ​ຈຳ​ພັກ​ເມືອງ, ​ກຳ​ມະ​ການ​ພັກ​ເມືອງ, ຫົວ​ໜ້າ​ຫ້ອງ​ການ, ຄະ​ນະ​ຫ້ອງ​ການ, ພະ​ນັກ​ງານຫຼັກ​ແຫຼ່ງ​ພ້ອມ​ດ້ວຍ​ຜູ້​ປະ​ກອບ​ການ, ນາຍ​ບ້ານ ແລະ ພໍ່​ແມ່​ປະ​ຊາ​ຊົນ​ພາຍ​ໃນ​ບ້ານ​ທີ່​ຢູ່​ຕິດ​ແຄມ​ນ້ຳ​ຊອງເຂົ້​າ​ຮ່ວມ​ເປັນ​ຈຳ​ນວນຫຼວງຫຼາຍ.

ຈຸດ​ປະ​ສົງ​ໃນ​ການ​ສ້າງ​ຂະ​ບວນ​ການ​ອະ​ນາ​ໄມ​ນ້ຳ​ຊອງ​ໃນ​ຄັ້ງ​ນີ້ ເພື່ອ​ເຮັດ​ໃຫ້​ຂອບ​ເຂດ​ບໍ​ລິ​ເວນ​ສາຍ​ນ້ຳ​ຊອງ​ມີ​ຄວາມ​ເປັນ​ລະ​ບຽບ​ຮຽບ​ຮ້ອຍ, ສະ​ອາດ​ຈົບ​ງາມ ທັງ​ມີ​ຄວາມ​ສະ​ດວກ, ປອດ​ໄພໃນ​ການ​ສ້າງ​ກິດ​ຈະ​ກຳ​ການ​ທ່ອງ​ທ່ຽວ​ຕາມ​ສາຍ​ນ້ຳ​ຊອງ ຕະຫຼອດ​ຮອດ​ການ​ດຳ​ລົງ​ຊີ​ວິດ ທຳ​ມາ​ຫາ​ກິນ​ຂອງ​ພໍ່​ແມ່​ປະ​ຊາ​ຊົນ​ບັນ​ດາ​ເຜົ່າ​ໃນ​ຂອບ​ເຂດ​ເມືອງວັງ​ວຽງ. ພ້ອມ​ກັນ​ນັ້ນ​ກໍ​ເປັນ​ການ​ອະ​ນຸ​ລັກ​ ປົກ​ປັກ​ຮັກ​ສາ ແລະ ການ​ປ້ອງ​ກັນ​ຊັບ​ພະ​ຍາ​ກອນ​ຕ່າງໆ, ຊີ​ວະ​ນາໆ​ພັນ​ລວມ​ໄປ​ເຖິງ​ລະ​ບົບ​ນິ​ເວດ​ວິ​ທະ​ຍາ​ໃນ​ບໍ​ລິ​ເວນ​ນ້ຳ​ຊອງ​ໃຫ້​ມີ​ຄວາມ​ອຸ​ດົມ​ສົມ​ບູນ ແລະ ຍຶນ​ຍົງ​ຕະຫຼອດ​ໄປ.

ຂອບ​ເຂດ​ທີ່​ຈະ​ອະ​ນາ​ໄມ​ໃນ​ຄັ້ງ​ນີ້​ແມ່ນ​ເລີ່ມ​ແຕ່​ບ້ານ​ວຽງ​ສະ​ໄໝ (ບັງ​ກາ​ໂລ​ອີ​ໂກ​ໂລດ) ຫາ ບ້ານ​ຂັນ​ໝາກ ເຊີ່ງ​ໄດ້​ແບ່ງ​ອອກ​ເປັນ 3 ຂອບ​ເຂດ​ການ​ອະ​ນາ​ໄມ​ຄື: ແຕ່​ບ້ານ​ວຽງ​ສະ​ໄໝ (ບັງ​ກາ​ໂລ​ອີ​ໂກ​ໂລດ) ຫາ ບ້ານ​ພູ​ດິນ​ແດງ (ອໍ​ກາ​ນິກ​ຟາມ) ແມ່ນມອບ​ໃຫ້​ກຸ່ມ​ເຮືອ​ກາ​ຍັກ ແລະ ນາຍ​ບ້ານໆ​ວຽງ​ສະ​ໄໝ, ບ້ານ​ປາກ​ເປາະ, ບ້ານ​ພູ​ດິນ​ແດງ ຮັບ​ຜິດ​ຊອບ. ແຕ່​ບ້​ານ​ພູ​ດິນ​ແດງ (ອໍ​ກາ​ນິກ​ຟາມ) ຫາ ບ້ານ​ເມືອງ​ຊອງ (ຣີ​ສອດ​ຖ້ຳ​ຈັງ) ແມ່ນມອບ​ໃຫ້​ກຸ່ມ​ເຮືອ​ຫາງ​ຍາວ, ກຸ່ມ​ກົງ​ເບັງ, ກຸ່ມ​ໂຮງ​ແຮມ​-ເຮືອນ​ພັກ ແລະ ກຸ່ມ​​ຮ້ານ​ອາ​ຫານ​ເປັນ​ຜູ້​ຮັບ​ຜິດ​ຊອບ ແລະ ເຂດ​ບ້ານ​ເມືອງ​ຊອງ (ຣີ​ສອດ​ຖ້ຳ​ຈັງ) ຫາ ບ້ານ​ຂັນ​ໝາກ ແມ່ນມອບ​ໃຫ້​ບໍ​ລິ​ສັດ​ທ່ອງ​ທ່ຽວ​ຜາ​ຂັນ​ໝາກ ເປັນ​ຜູ້​ຮັບ​ຜິດ​ຊອບ​. ຂະ​ບວນ​ດັ່ງ​ກ່າວ​ໄດ້​ດຳ​ເນີນ​ເປັນ​ເວ​ລາ 1 ວັນ.