ພິທີຮັບຮອງເອົາບ້ານນາເລົາເປັນບ້ານພົ້ນທຸກບ້ານສຸດທ້າຍຂອງ ເມືອງວັງວຽງ

   ພິທີດັ່ງກ່າວໄດ້ຈັດຂຶ້ນຢູ່ທີ່ໂຮງຮຽນປະຖົມບ້ານນາເລົາ ເມືອງວັງວຽງ ໃນຕອນເຊົ້າຂອງວັນທີ 04 ພຶດສະພາ 2018, ໂດຍການເຂົ້າຮ່ວມເປັນປະທານຂອງ ທ່ານ ບຸນສອນ ເພັດລາວັນ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ, ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີບັນທ່ານຄະນະການນຳຂອງແຂວງ, ຕາງໜ້າການນຳເມືອງອ້ອມຂ້າງ, ຄະນະການນຳຂອງເມືອງວັງວຽງ, ຫົວໜ້າຫ້ອງການຂະແໜງການຕ່າງໆ ອ້ອມຂ້າງເມືອງ, ວິສາຫະກິດ, ອຳນາດການປົກຄອງບ້ານພາຍໃນກຸ່ມບ້ານນາມອນຕະຫຼອດຮອດປະຊາຊົນທັງໝົດຢູ່ພາຍໃນບ້ານນາເລົາກໍໄດ້ເຂົ້າຮ່ວມຢ່າງພ້ອມພຽງ.
   ໃນພິທີ ທ່ານ ຊົງໄຊ ລັດຕະນະຄຳເພັດ ກຳມະການພັກເມືອງ ຫົວໜ້າຫ້ອງການກະສິກຳ ແລະ ປ່າໄມ້ ເມືອງວັງວຽງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດການລົບລ້າງຄວາມທຸກຍາກຂອງປະຊາຊົນຢູ່ເມືອງວັງວຽງໄລຍະຜ່ານມາ ເພື່ອປະຕິບັດຕາມແຜນຍຸດທະສາດຂອງພັກ ແລະ ລັດຖະບານ ໃນການລົບລ້າງຄວາມທຸກຍາກຂອງປະຊາຊົນໃຫ້ສຳເລັດໃນປີ 2020. ສຳລັບເມືອງວັງວຽງ ມາຮອດປະຈຸບັນຖືວ່າໄດ້ສຳເລັດການລົບລ້າງບ້ານທຸກຍາກໃນທົ່ວເມືອງ ເຊີ່ງບ້ານນາເລົາເປັນບ້ານສຸດທ້າຍຂອງເມືອງໃນການຈັດຕັ້ງປະຕິບັດ. ໂດຍໄດ້ຍົກຍ້າຍປະຊາຊົນຈຳນວນ 119 ຫຼັງຄາເຮືອນ, ພົນລະເມືອງ 543 ຄົນ ຈາກບ້ານເດີມທີ່ບໍ່ມີເສັ້ນທາງຄົມມະນາຄົມສາມາດທ່ຽວເຂົ້າຫາບ້ານໄດ້ທຸກສອງລະດູມາຕັ້ງຖິ່ນຖານຢູ່ບ່ອນໃໝ່ທີ່ມີເງື່ອນໄຂສະດວກກວ່າ ໂດຍໃຊ້ງົບປະມານໃນການຈັດສັນພູມລຳເນົາໃຫ້ແກ່ປະຊາຊົນທັງໝົດ 4,9 ຕື້ກວ່າກີບ, ເຊີ່ງວຽກທີ່ໄດ້ເຮັດແມ່ນໄດ້ບຸກເບີກເນື້ອທີ່ດິນຈັດສັນທີ່ຢູ່ອາໃສໃຫ້ແກ່ປະຊາຊົນ, ສ້າງຕາຄ່າຍໄຟຟ້າ, ເອົາໄຟຟ້າເຂົ້າເຮືອນໃຫ້ປະຊາຊົນ, ສ້າງໂຮງຮຽນປະຖົມ 1 ແຫ່ງ ແລະ ສ້າງລະບົບນ້ຳລິນໃຫ້ແກ່ປະຊາຊົນພ້ອມທັງຍົກຍ້າຍປະຊາຊົນຈາກບ້ານເດີມມາຢູ່ບ້ານຈັດສັນໃໝ່. ເຊີ່ງໂຄງການດັ່ງກ່າວໄດ້ເລີ່ມຈັດຕັ້ງປະຕິບັດມາແຕ່ປີ 2012-2016 ກໍໄດ້ສຳເລັດ ໂດຍແມ່ນງົບປະມານຂອງລັດຖະບານ 100%. ຜ່ານການປະເມີນຜົນຕາມເງື່ອນໄຂມາດຖານຂອງຄອບຄົວ ແລະ ບ້ານພົ້ນທຸກມາຮອດປະຈຸບັນສາມາດຕີລາຄາໄດ້ດັ່ງນີ້: ຕີລາຄາຄອບຄົວພົ້ນທຸກຕາມ 6 ມາດຖານ ປະຕິບັດໄດ້ 95%, ບ້ານພົ້ນທຸກຕາມ 8 ມາດຖານ ປະຕິບັດໄດ້ 99%. ແຕ່ປີ 2017 ເປັນຕົ້ນມາ ພື້ນຖານທາງດ້ານເສດຖະກິດຂອງບ້ານໄດ້ສືບຕໍ່ຂະຫຍາຍຕົວຢ່າງຕໍ່ເນື່ອງ ສະເລ່ຍລາຍຮັບໃສ່ຫົວຄົນໄດ້ 16,200,000 ກີບ ຫຼື 1,975 ໂດລາຕໍ່ຄົນ, ສະເລ່ຍເຂົ້າກິນໄດ້ 494 kg/ຄົນ.
   ຈາກນັ້ນ ກໍໄດ້ຜ່ານຂໍ້ຕົກລົງຂອງທ່ານເຈົ້າແຂວງໆວຽງຈັນ ວ່າດ້ວຍການຮັບຮອງເອົາບ້ານນາເລົາ ເປັນບ້ານພົ້ນທຸກບ້ານສຸດທ້າຍຂອງເມືອງວັງວຽງ ແລະ ມອບໃບຢັ້ງຢືນໃຫ້ແກ່ບ້ານ ໂດຍແມ່ນ ທ່ານ ບຸນສອນ ເພັດລາວັນ ຮອງເຈົ້າແຂວງ ເປັນຜູ້ມອບ ແລະ ທ່ານນາຍບ້ານໆນາເລົາ ເປັນຜູ້ຮັບ ໂດຍສ່ອງໜ້າປະຊາຊົນ ແລະ ແຂກເຂົ້າຮ່ວມ ແລະ ຈາກນັ້ນ ທ່ານ ບຸນສອນ ເພັດລາວັນ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ ໄດ້ໃຫ້ກຽດໂອ້ລົມຕໍ່ພິທີ ເຊີ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄວາມບຸກບືນສູ້ຊົນຂອງຄະນະພັກອຳນາດການປົກຄອງເມືອງ, ອຳນາດການປົກຄອງບ້ານນາເລົາ ແລະ ປະຊາຊົນທັງໝົດຢູ່ພາຍໃນບ້ານທີ່ໄດ້ສຸມໃສ່ເຮັດໃຫ້ບ້ານນາເລົາໄດ້ຫຼຸດພົ້ນອອກຈາກຄວາມທຸກຍາກ, ສ້າງເງື່ອນໄຂໃຫ້ແກ່ເມືອງວັງວຽງ ໄດ້ກາຍເປັນເມືອງພົ້ນທຸກຕາມແນວທາງນະໂຍບາຍຂອງພັກ-ລັດຖະບານ ທີ່ໄດ້ກຳນົດໄວ້ໃນປີ 2020 ໄປຄຽງຄູ່ກັນນີ້ທ່ານຍັງໄດ້ເນ່ງໜັກໃຫ້ແກ່ອຳນາດການປົກຄອງ ແລະ ປະຊາຊົນຢູ່ພາຍໃນບ້ານໄດ້ສືບຕໍ່ພັດທະນາບ້ານຂອງຕົນໃຫ້ກາຍເປັນບ້ານວັດທະນະທຳ, ບ້ານພັດທະນາ,​ ສືບຕໍ່ຜະລິດສິນຄ້າໃຫ້ເປັນຂະບວນກວ້າງຂວາງຕິດພັນກັບການທ່ອງທ່ຽວຂອງເມືອງ ແລະ ເຕົ້າໂຮມຄວາມສາມັກຄີຂອງປະຊາຊົນໃຫ້ໜັກແໜ້ນ,​ ຍົກສູງນ້ຳໃຈຮັກຊາດຮັກບ້ານເກີດເມືອງນອນ ຈັດຕັ້ງປະຕິບັດລະບຽບກົດໝາຍບ້ານເມືອງ ເຮັດໃຫ້ສັງຄົມມີຄວາມສະຫງົບ, ສີວິໄລ ແລະ ຍຸຕິທຳ.
   ຕອນທ້າຍຂອງພິທີ ທ່ານຍັງໄດ້ໃຫ້ກຽດຂຶ້ນລັ່ນຄ້ອງ 9 ບາດ ເພື່ອເປັນສິລິມຸງຄຸນໃຫ້ແກ່ບ້ານນາເລົາ ກາຍເປັນບ້ານພົ້ນທຸກບ້ານສຸດທ້າຍຂອງເມືອງວັງວຽງ ຕື່ມອີກ.
error: Content is protected !!