ກອງ​ປະ​ຊຸມ​ເຜີຍ​ແຜ່​ການ​ນຳ​ໃຊ້​ລະ​ບົບ​ຂ່າວ​ສານ TaxRis ຄຸ້ມ​ຄອງ​ການ​ເກັບ​ລາຍ​ຮັບ​ສ່ວຍ​ສາ​ອາ​ກອນ

​ກອ​ງ​ປະ​ຊຸມ​ໄດ້​ຈັດ​ຂຶ້ນ​ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ ໃນ​ຕອນ​ເຊົ້າ​ຂອງວັນ​ທີ 3 ເມ​ສາ 2019 ນີ້, ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ບຸນ​ຈັນ ມາ​ລາ​ວົງ ຮອງ​ເຈົ້າ​ເມືອງໆ​ວ​ັງ​ວຽງ ຜູ້​ຊີ້​ນຳ​ວຽກ​ງານ​ເສດ​ຖະ​ກິດ​ຂອງ​ເມືອງ, ມີ​ທ່ານ ຄຳ​ເຫຼັກ ທອງ​ສະ​ຫວັນ ຫົວ​ໜ້າ​ພ​ະ​ແນກ​ການ​ເງິນ​ແຂວງວຽງ​ຈັນ, ທ່ານ ກວຽນ​ທອງ ເທບ​ທິ​ດາ ຫົວ​ໜ້າ​ຫ້ອງ​ການໆ​ເງິນ​ເມືອງວັງ​ວຽງ, ນອກ​ນີ້ ຍັງ​ມີ​ບັນ​ດາ​ຫົວ​ໜ້າ​ຫ້ອງ​ການ​ກຸ່ມ​ເສດ​ຖະ​ກິດ ແລະ ຜູ້​ປະ​ກອບ​ການ​ຫົວ​ໜ່ວຍ​ທຸ​ລະ​ກິດ​ຕ່າງໆ ໃນ​ທົ່ວ​ເມືອງ​ເຂົ້າ​ຮ່ວມ.

ພາຍຫຼັງ​ປະ​ທານກອງ​ປະ​ຊຸມ​ໄດ້​ກ່າວ​ເປີດ​ໄຂ​ການ​ປະ​ຊຸມ​ຢ່າງ​ເປັນ​ທາງ​ການ​ແລ້ວ ທ່ານ ຂັນ​ທອງ ພະ​ລາ​ກອນ ຫົວ​ໜ້າ​ສ່ວຍ​ສາ​ອາ​ກອນ ແຂວງວຽງ​ຈັນ​ ໄດ້​ຜ່ານ​ແຈ້ງ​ການ​ຂອງ​ທ່ານລັດ​ຖະ​ມົນ​ຕີ​ກະ​ຊວງ​ການ​ເງິນ ໃນ​ການ​ຈັດ​ຕັ້ງປະ​ຕິ​ບັດ​ການ​ເກັບ​ລາຍ​ຮັບ​ສ່ວຍ​ສາ​ອາ​ກອນ​ຜ່ານ​ລະ​ບົບ​ຂໍ້​ມູນ​ຂ່າວ​ສ​ານ ເອ​ເລັກ​ໂຕຼ​ນິກ​ທີ່​ທັນ​ສະ​ໄໝ. ຈາກ​ນັ້ນ ທາງ​ວິ​ຊາ​ການ​ຈາກ​ພະ​ແນກ​ສ່ວຍ​ສາ​ອາ​ກອນ ແລະ​ ຄັງ​ເງິນ​ແຫ່ງ​ຊາດ​ປະ​ຈຳ​ແຂວງວຽງ​ຈັນ ກໍ​ໄດ້​ພັດ​ປ່ຽນ​ກັນ​ຂຶ້ນ​ແນະ​ນຳ​ກ່ຽວ​ກັບ​ຂັ້ນ​ຕອນ​ໃນ​ການ​ເຂົ້າ​ສະ​ມັກ​ການ​ເສຍ​ອາ​ກອນ​ຜ່ານ​ລະ​ບົບ TaxRis ດ້ວຍ​ການ​ເຂົ້າ​ຫາ​ເວັບ​ໄຊ www.taxservice.mof.gov.la ແລະ ແນະ​ນຳ​ກ່ຽວ​ກັບ​ການ​ຊຳ​ລະ Easy Tax ຜ່ານ​ລະ​ບົບ​ທະ​ນາ​ຄານ​ການ​ຄ້າ​ຕ່າງ​ປະ​ເທດ​ລາວ​ມະ​ຫາ​ຊົນ​ຕາມ​ແຕ່​ລະ​ຂັ້ນ​ຕອນ.

ຕອນ​ທ້າຍ​ຂອງກອງ​ປະ​ຊຸມ ທ່ານ ຄຳ​ເຫຼັກ ທອງ​ສະ​ຫວັນ ຫົວ​ໜ້າ​ພະ​ແນກ​ການ​ເງິນ​ແຂວງວຽງ​ຈັນ ກ​ໍ​ໄດ້​ມີ​ຄຳ​ເຫັນ​ເພື່ອ​ແນະ​ນຳ​ໃຫ້​ບັນ​ດາ​ພະ​ນັກ​ງານ​ຂະ​ແໜງ​ສ່ວ​ຍ​ສາ​ອາ​ກອນ​ຂອງ​ເມືອງ​ເອົາ​ໃຈ​ໃສ່​ປະ​ສານ​ສົມ​ທົບ​ກັບ​ຫ້ອງ​ການ​ອຸດ​ສາ​ຫະ​ກຳ​ການ​ຄ້າ​ເມືອງ ໃນ​ການ​ເກັບ​ກຳ​ຂໍ້​ມູນ​ຂອງ​ລະ​ຫັດ​ວິ​ສາ​ຫະ​ກິດ​ຕ່າງໆ ຢູ່​ພາຍ​ໃນ​ເມືອງ​ໃຫ້​ຖືກ​ຕ້ອງ​ສອດ​ຄ່ອງ ເພື່ອ​ສ້າງ​ເປັນ​ຖານ​ຂໍ້​ມູນ​ໃນ​ການ​ຈັດ​ເກັບ​ລາຍຮັບ​ສ່ວຍ​ສາ​ອາ​ກອນ​ຜ່ານ​ລະ​ບົບ​ເອ​ເລັກ​ໂຕຼນິກ​ທີ່​ທັນ​ສະ​ໄໝ​ໃຫ້​ໄດ້​ຮັບ​ຜົນ​ດີ. ພ້ອມ​ທັງ​ຮຽກ​ຮ້ອງ​ມາ​ຍັງ​ຜູ້​ເຂົ້າ​ຮ່ວມກອງ​ປະ​ຊຸມ​ຈົ່ງ​ໄດ້​ຮ່ວມ​ກັນ​ໂຄ​ສະ​ນາ​ເຜີຍ​ແຜ່​ໃຫ້​ທົ່ວ​ສັງ​ຄົມ​ໄດ້​ຮັບ​ຮູ້ ແລະ ເຂົ້າ​ໃຈ​ໃນ​ການ​ຈັດ​ເກັບ​ລາຍ​ຮັບ​ແບບ​ໃໝ່ ເພີ່ມ​ຄວາມ​ຮັບ​ປະ​ກັນ​ເງິນ​ທຸກ​ກີບ​ທຸກ​ອັດ​ເຂົ້​າ​ສູ່​ຄັງ​ເງິນ​ແຫ່ງ​ຊາດ​ຢ່າງ​ຖືກ​ຕ້ອງ ຫຼີກ​ເວັ້ນ​ການ​ຮົ່ວ​ໄຫຼ ແລະ ສຽງ​ວິ​ພາກວິ​ຈານ​ຈາກ​ສັງ​ຄົມ​ຄື​ທີ່​ຜ່ານ​ມາ.