ທ່ານ ຄຳ​ພັນ ພົມ​ມະ​ທັດ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ ລົງ​ເຄື່ອນ​ໄຫວ​ຢ້ຽມ​ຢາມ​ເມືອງວັງ​ວຽງ

​ພິ​ທີ​ຕ້ອນ​ຮັບ​ໄດ້​ຈັດ​ຂຶ້ນ​ຢູ່​ທີ່​ຫ້ອງ​ປະ​ຊຸມ​ສະ​ໂມ​ສອນ​ຊັ້ນ II ເມືອງວັງ​ວຽງ ໂດຍ​ການ​ເຂົ້າ​ຮ່ວມ​ຂອງ​ທ່ານ ວິ​ດົງ ໄຊ​ຍະ​ສອນ ກຳ​ມະ​ການ​ສູນ​ກາງ​ພັກ ເລ​ຂາ​ພັກ​ແຂວງ ເຈົ້າ​ແຂວງໆ​ວຽງ​ຈັນ​ພ້ອມ​ດ້ວຍ​ການ​ນຳ​ຂອງ​ແຂວງ, ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ມີ​ບັນ​ດາ​ສະ​ຫາຍ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ຫົວ​ໜ້າ​ຫ້ອງ​ການ​ຕ່າງໆ ພາຍ​ໃນ​ເມືອງ ກໍ​ໄດ້​ເຂົ້າ​ຮ່ວມ​ຢ່າງ​ພ້ອມ​ພຽງ.

ພາຍຫຼັງ ທ່ານ​ເຈົ້າ​ເມືອງໆ​ວັງ​ວຽງ ໄດ້​ກ່າວ​ຕ້ອນຮັບ​ແລ້ວ​ ທ່ານ​ຍັງ​ໄດ້​ລາຍ​ງານ​ສະ​ພາບ​ຂອງ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ ທີ່​ພົ້ນ​ເດັ່ນ​ຂອງ​ເມືອງ​ນັບ​ທັງ​ບັນ​ຫາ​ຂໍ້​ຫຍຸ້ງ​ຍາກ​ຕ່າງໆ ໃຫ້​ທ່ານ ຄຳ​ພັນ ພົມ​ມະ​ທັດ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ ເລ​ຂາ​ທິ​ການ​ສູນ​ກາງ​ພັກ ຫົວ​ໜ້າ​ຫ້ອງວ່າ​ການ​ສູນ​ກາງ​ພັກໄດ້ຮັບຊາບ. ຈາກ​ນັ້ນ ທ່ານ​ກໍ​ໄດ້​ມີ​ຄຳ​ເຫັນ​ເພື່ອ​ເຈາະ​ຈີ້ມ​ໃຫ້​ຜູ້​ເຂົ້າ​ຮ່ວມ​ໄດ້​ແລກ​ປ່ຽນ​ຄຳ​ຄິດ​ຄຳ​ເຫັນ​ຮ່ວມ​ກັນ​ເປັນ​ຕົ້ນ​ແມ່ນ​ກ່ຽວ​ກັບ​ທ່າ​ແຮງ​ທາງ​ດ້ານ​ການ​ທ່ອງ​ທ່ຽວ​ຢູ່​ເມືອງວັງ​ວຽງ ໄດ້​ປະ​ເມີນ​ແນວ​ໃດ? ອັນ​ໃດ​ເປັນ​ແຮງ​ຈູງ​ໃຈ​ດຶງ​ດູດ ເປັນ​ທ່າ​ອ່ຽງ​ເພີ່ມ​ຂຶ້ນ​ໃຫ້​ແກ່​ນັກ​ທ່ອງ​ທ່ຽວ, ການ​ນຳ​ໃຊ້​ນິ​ຕິ​ກຳ​ຄຸ້ມ​ຄອງ ແລະ ການ​ເຮັດ​ໃຫ້​ປະ​ຊາ​ຊົນ​ທຸກ​ຄົນ​ໄດ້​ມີ​ສ່ວນ​ຮ່ວມ​ໄດ້​ຮັບ​ຜົນ​ປະ​ໂຫຍດ​ຈາກ​ການ​ທ່ອງ​ທ່ຽວ ເພື່ອ​ເປັນ​ສິນ​ຄ້າ​ສົ່ງ​ອອກ.

ຈາກ​ນັ້ນ ບັນ​ດາ​ການ​ນຳ​ຂອງ​ແຂວງ ແລະ ເມືອງ​ຕ່າງ​ກໍ​ໄດ້​ພາ​ກັນ​ມີ​ຄຳ​ຄິດ​ຄຳ​ເຫັນ​ເພື່ອ​ແລກ​ປ່ຽນ​ຕາມ​ຄຳ​ເຈາະ​ຈີ້ມ. ຈາກ​ນັ້ນ ທ່ານ ຄຳ​ພັນ ພົມ​ມະ​ທັດ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ​ກໍ​ໄດ້​ມີ​ຄຳ​ຄິດ​ຄຳ​ເຫັນ ເພື່ອຊີ້​ນຳ. ກ່ອນ​ອື່ນ​ທ່ານ​ໄດ້​ເນັ້ນກ່ຽວ​ກັບ​ບັນ​ຫາ​ການ​ພັດ​ທ​ະ​ນາ​ຕ້ອງ​ໄດ້​ຄຳ​ນຶງ​ເຖິງ​ການ​ຮັກ​ສາ​ມໍ​ລະ​ດົກ, ການ​ຂຸດ​ຄົ້ນ​ທ່າ​ແຮງ​ຕ່າງໆ ໃຫ້​ປະ​ເມີນ​ຖືກ​ທິດ, ຕ້ອງ​ຮູ້​ອະ​ນຸ​ລັກ​ຮັກ​ສາ​ສິ່ງ​ທີ່​ເປັນ​ແຮງ​ຈູງ​ໃຈ​ໃນ​ການ​ດຶງ​ດູດ​ການ​ທ່ອງ​ທ່ຽວ​ນັ້ນ​ໄວ້​ໃຫ້​ໝັ້ນ​ຄົງ, ໃຫ້​ກວດ​ຄືນ​ແຜນ​ຍຸດ​ທະ​ສາດ​ຂອງ​ເມືອງ, ແມ່ນ​ອັນ​ໃດ​ທີ່​ຄວນ​ຈະ​ໄດ້​ສຸມ​ໃສ່​ແທ້ ເພື່ອ​ສ້າງ​ແຜນ​ແມ່​ບົດ​ໃຫ້​ຮັດ​ກຸມ​ລະ​ອຽດ ແລະ ຈັດ​ຕັ້ງ​ປະ​ຕິ​ບັດ​ໄປ​ຕາມ​ແຜນ, ການ​ພັດ​ທະ​ນາ​ການ​ທ່ອງ​ທ່ຽວ​ຕ້ອງ​ຕິດ​ພັນ​ກັບ​ຄວາມ​ໝັ້ນ​ຄົງ, ຍືນ​ຍົງ ແລະ ປອດ​ໄພ, ເອົາ​ໃຈ​ໃສ່​ຄຸ້ມ​ຄອງ​ການ​ປຸກ​ສ້າງ ໂດຍ​ແບ່ງ​ຄວາມ​ຮັບ​ຜິດ​ຊອບ​ລະ​ຫວ່າງ​ແຂວງ ແລະ ເມືອງ​ໃຫ້​ລະ​ອຽດ​ຊັດ​ເຈນ. ພ້ອມ​ນີ້​ກໍ​ຕ້ອງ​ໄດ້​ເອົາ​ໃຈ​ໃສ່​ໃນ​ການ​ສ້າງ​ນັກ​ບໍ​ລິ​ຫານ​ການ​ບໍ​ລິ​ການ​ໆ​ທ່ອງ​ທ່ຽວ​ຕິດ​ພັນກັບ​ການ​ສ້າງ​ເປັນ​ໂຄງ​ການຫຼັກ​ສູດ​ຄັກ​ແນ່ ເພື່ອ​ໃຫ້​ບ່ອນ​ອື່ນ​ໄດ້​ນຳ​ໄປ​ແລກ​ປ່ຽນ​ຖອດ​ຖອນ​ບົ​ດ​ຮຽນ​ໃນ​ຕໍ່​ໜ້າ.