ອົງ​ການ​ກາ​ແດງ​ແຂວງວຽງ​ຈັນ ລົງ​ເຄື່ອນ​ໄຫວ​ຮັບ​ການ​ບໍ​ລິ​ຈາກ​ເລືອດ

​ໃນ​ວັນ​ທີ 20 ມີ​ນາ 2019 ນີ້​ ອົງ​ການ​ກາ​ແດງ ແຂວງວຽງ​ຈັນ ໄດ້​ລົງ​ໄປ​ເຄື່ອນ​ໄຫວ​ໂຄ​ສະ​ນາ ເພື່ອ​ຮັບ​ການ​ບໍ​ລິ​ຈາກເລືອດ​ຈາກ​ສັງ​ຄົມ​ຢູ່​ເມືອງວັງ​ວຽງ ໂດຍ​ການ​ນຳ​ພາ​ຂອງ​ທ່ານ ບຸນ​ນຳ ຮອງ​ຫົວ​ໜ້າອ​ົງ​ການ​ກາ​ແດງ​ແຂວງວຽງ​ຈັນ. ຕະຫຼອດ​ໄລຍະ 2-3 ວັນ​ຜ່ານ​ມາ​ໄດ້​ມີ​ພະ​ນັກ​ງານ ແລະ ພະ​ສົງ​ສຳ​ມະ​ເນນ​ຢູ່​ພາຍ​ໃນ​ເມືອງ​ໄດ້​ຕື່ນ​ຕົວ​ສະ​ມັກ​ໃ​ຈ​ໄປ​ບໍ​ລິ​ຈາກ​ເລືອດ​ຂອງ​ຕົນ​ໂດຍ​ບໍ່​ໄດ້​ຮຽກ​ຫາ​ສິ່ງ​ຕອບ​ແທນ​ແຕ່​ຢ່າງ​ໃດ ຄື​: ພະ​ນັກ​ງານ​ຈາກ​ສຳ​ນັກ​ງານ​ປົກ​ຄອງ​ເມືອງວັງ​ວຽງ​ມີ 10 ສະ​ຫາຍ ໄດ້​ເລືອດ 10 ຖົງ, ກອງ​ບັນ​ຊາ​ການ ປ​ທ​ສ ເມືອງ ມີ 4 ສະ​ຫາຍ ໄດ້​ເລືອດ 4 ຖົງ, ໂຮງ​ຮຽນ​ມັດ​ທະ​ຍົມ​ຕອນ​ຕົ້ນ​ສົງ ມີ​ພະ​ສົງ 10 ອົງ​ ໄດ້​ເລືອດ 10 ຖົງ. ປະ​ຈຸ​ບັນ​ທີມ​ງານ​ດັ່ງ​ກ່າວ​ຍັງ​ສືບ​ຕໍ່​ລົງ​ໂຄ​ສະ​ນາ​ເຄື່ອນ​ໄຫວ​ການ​ຮ​ັບ​ບໍ​ລິ​ຈາກ​ເລືອດ​ຢູ່​ຕາມ​ໂຮງ​ຮຽນ​ມັດ​ທະ​ຍົມ ມ​ສ ແຫ່ງ​ຕ່າງໆ ຢູ່​ພາຍ​ໃນ​ເມືອງ​ຕື່ມ​ອີກ.

ພາຍຫຼັງ ສຳ​ເລັດກໍ​ຈະ​ໄດ້​ນຳ​ເອົາ​ເລືອດ​ທີ່​ໄດ້​ຈາກ​ການ​ບໍ​ລິ​ຈາກ​ດັ່ງ​ກ່າວ​ໄປ​ເກັບ​ມ້ຽນ​ໄວ້​ທີ່​ຄັງ​ເລືອດ​ຂອງ​ແຂວງ ເພື່ອ​ກຽມ​ຄວາມ​ພ້ອມ​ໃນ​ກາ​ນ​ສະໜອງ​ເລືອດ​ຊ່​ວຍ​ເຫຼືອ​ຄົນ​ເຈັບ​ທີ່​ມີ​ຄວາມ​ຈຳ​ເປັນ​ຕ້ອງ​ການ​ເລືອດນອນ​ປິ່ນ​ປົວ​ຢູ່​ຕາມ​ໂຮງ​ໝໍ​ແຫ່ງ​ຕ່າງໆ ພາຍ​ໃນ​ແຂວງ​ໃຫ້​ຫາຍ​ດີ​ເປັນ​ປົກ​ກະ​ຕິ.