ກອງ​ປະ​ຊຸມ​ສະຫຼຸບ​ການ​ຈັດ​ຕັ້ງ​ປະ​ຕິ​ບັດ​ງົບ​ປະ​ມານ ປີ 2018 ແລະ ທິດ​ທາງ​ແຜນ​ການ​ປີ 2019

ຕອນ​ເຊົ້າ​ຂອງວັນ​ທີ 12 ມີ​ນາ 2019 ນີ້ ຫ້ອງ​ການໆ​ເງິນ​ເມືອງວັງ​ວຽງ ໄດ້​ຈັດ​ກອງ​ປະ​ຊຸມ​ສະຫຼຸບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ງົບ​ປະ​ມານ​ປະ​ຈຳ​ປີ 2018 ແລະ ທິດ​ທາງ​ແຜນ​ການ​ປີ 2019 ຂອງ​ເມືອງ​ຂຶ້ນ​ຢູ່​ທີ່​ສະ​ໂມ​ສອນ​ໃຫຍ່​ຂອງ​ເມືອງ, ໂດຍ​ການ​ເປັນ​ປະ​ທານ​ຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ເຂົ້າ​ຮ່ວມກອງ​ປະ​ຊຸມ​ດັ່ງ​ກ່າວ​ມີ ທ່ານ ສົມ​ບູນ ລັດ​ຕະ​ນະ​ພອນ ຮອງ​ຫົວ​ໜ້າ​ພະ​ແນກ​ການ​ເງິນ​ແຂວງວຽງ​ຈັນ​ພ້​ອມ​ດ້ວຍ​ຄະ​ນະ, ທ່ານ ກວຽນ​ທອງ ເທບ​ທິ​ດາ ກຳ​ມະ​ການ​ພັກ​ເມືອງ ຫົວ​ໜ້າ​ຫ້ອງ​ການໆ​ເງິນ​ເມືອງ, ມີ​ບັນ​ດາ​ຫົວ​ໜ້າ​ຫ້ອງ​ການ​ຕ່າງໆ ອ້ອມ​ຂ້າງ​ເມືອງ, ນາຍ​ບ້ານ​ແຕ່​ລະ​ບ້ານ​ໃນ​ທົ່ວ​ເມືອງ ພ້ອມ​ດ້ວຍ​ພະ​ນັກ​ງານ​ລັດ​ຖະ​ກອນ​ຫ້ອ​ງ​ການໆ​ເງິນ​ເມືອງ​ເຂົ້າ​ຮ່ວມ​ຢ່າງ​ພ້ອມ​ພຽງ.

ທີ່​ປະ​ຊຸມ ທ່ານ ກວຽນ​ທອງ ເທບ​ທິ​ດາ ຫົວ​ໜ້າ​ຫ້ອງ​ການໆ​ເງິນ​ເມືອງ ໄດ້​ຂຶ້ນ​ຜ່ານ​ບົດ​ສະຫຼຸບ​ການ​ຈັດ​ຕັ້ງ​ປະ​ຕິ​ບັດ​ງົບ​ປະ​ມານ​ການ​ເງິນ​ປະ​ຈຳ​ປີ 2018 ແລະ ຜ່ານ​ທິດ​ທາງ​ແຜນ​ການ​ປະ​ຈຳ​ປີ 2019 ໂດຍ​ຍົກ​ໃຫ້​ເຫັນ​ຜົນ​ງານ​ການ​ຈັດ​ເກັບ​ລາຍ​ຮັບ​ເຂົ້າ​ງົບ​ປະ​ມານ​ຂອງ​ເມືອງ​ໃນ​ໜຶ່ງ​ປີ​ຜ່ານ​ມາ ເຊີ່ງ​ຕົວ​ເລກ​ທີ່​ແຂວງມອບ​ໃຫ້​ເມືອງ​ແມ່ນ 11,653,590,000 ກີບ ສາ​ມາດ​ປະ​ຕິ​ບັດ​ໄດ້​ຕົວ​ຈິງ 11,914,657,269 ກີບ ເທົ່າ​ກັບ 102,4% ຂອງ​ແຜນ​ການ​ປີ. ດ້ານ​ລາຍ​ຈ່າຍ​ຕາມ​ແຜນ​ການ​ທີ່​ແຂວງມອບ​ໃຫ້​ແມ່ນ 15,302,090,000 ກີບ ໄດ້​ຈັດ​ຕັ້ງ​ປະ​ຕິ​ບັດ​ຕົວ​ຈິງ 14,735,128,434 ກີບ ເທົ່າ​ກັບ 96,29%. ສຳ​ລັບ​ທິດ​ທາງ​ແຜນ​ການ​ປີ 2019 ຄາດ​ໝາຍ​ລາຍ​ຮັບ 11,050,970,000 ກີບ, ແຜນ​ລາຍ​ຈ່າຍ 17,110,970,000 ກີບ. ເຊີ່ງ​ເມືອງວັງ​ວຽງ​ຍັງ​ບໍ່​ທັນ​ກຸ້ມ​ຕົນ​ເອງ​ໄດ້​ທາງ​ດ້ານງ​ົບ​ປະ​ມານ ອາ​ໃສ​ງົ​ບ​ປະ​ມານ​ຂ​ອງ​ແຂວງ​ເປັນ​ຜູ້​ດູນ​ດ່ຽງ​ໃຫ້.

ຈາກ​ນັ້ນ ທີ່​ປະ​ຊຸມ​ຍັງ​ໄດ້​ຮັບ​ຟັງ​ການ​ເຜີຍ​ແຜ່​ເຊື່ອມ​ຊຶມ​ເອ​ກະ​ສານ​ນິ​ຕິ​ກຳ​ຈຳ​ນວນ​ໜຶ່ງ ເຊັ່ນ​: ບົດ​ແນະ​ນຳ​ຂອງ​ທ່ານ​ເຈົ້າ​ແຂວງໆ​ວຽງ​ຈັນ ເລກ​ທີ 142/ຈ​ຂວ​ຈ ວ່າ​ດ້ວຍ​ການ​ຈັດ​ຕັ້ງ​ປະ​ຕິ​ບັດ​ແຜນ​ງົບ​ປະ​ມານ​ແຫ່ງ​ລັດ​ປະ​ຈຳ​ປີ 2019, ແຈ້ງ​ການ ເລກ​ທີ 1984/ກງ ຂອງ​ກະ​ຊວງ​ການ​ເງິນ ກ່ຽວ​ກັບ​ການ​ແຈ້ງ​ສຳ​ລະ​ພາ​ສີ​ທີ່​ດິນ​ຜ່ານ​ລະ​ບົບ​ທະ​ນາ​ຄານ, ກົດ​ໝາຍ ວ່າ​ດ້ວຍ​ການ​ຈັດ​ຊື້ ແລະ ຈັດ​ຈ້າງ​ດ້ວຍ​ທຶນ​ຂອງ​ລັດ ເລກ​ທີ 30/ສ​ພ​ຊ ແລະ ຂໍ້​ຕົກ​ລົງ ຂ​ອງ​ທ່ານ​ລັດ​ຖະ​ມົນ​ຕີ​ກະ​ຊວງ​ການ​ເງິນ ເລກ​ທີ 4000/ກງ ວ່າ​ດ້ວຍ ການ​ກຳ​ນົດ​ກົດ​ໝາຍ​ໃຊ້​ຈ່າຍ​ງົບ​ປະ​ມານ. ຫຼັງ​ຈາກ​ນັ້ນ ປະ​ທານກອ​ງ​ປະ​ຊຸມ​ກໍ​ໄດ້​ເຈາະ​ຈີ້ມໃຫ້​ພາກ​ສ່ວນ​ຕ່າງໆ ປະ​ກອບ​ຄຳ​ຄິດ​ຄຳ​ເຫັນ ພ້ອມ​ຊີ້​ແຈງ​ແກ້​ໄຂ​ຂໍ້​ຂ້ອງ​ໃຈ.
ຕອນ​ທ້າຍ​ຂອງກອງ​ປະ​ຊຸມ​ຍັງ​ໄດ້​ຮັບ​ຟັງການ​ໂອ້​ລົມ​ຂອງ​ທ່ານ ຄຳ​ຜອງ ດວງວິ​ໄລ ເຈົ້າ​ເມືອງໆ​ວັງ​ວຽງ ປະ​ທານກອງ​ປະ​ຊຸມ​ຕື່ມ​ອີກ. ເຊີ່ງ​ກ່ອນ​ອື່ນ​ທ່ານ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ມາ​ຍັງ​ອຳ​ນາດ​ການ​ປົກ​ຄອງ​ທຸກ​ຂັ້ນ, ຂະ​ແໜງ​ການ​ເສດ​ຖະ​ກິດ ແລະ ພາກ​ສ່ວນ​ທຸ​ລະ​ກິດ​ຕ່າງໆ ຢູ່​ພາຍ​ໃນ​ເມືອງ​ທີ່​ໄດ້​ພ້ອມ​ກັນ​ສູ້​ຊົນ​ຈັດ​ຕັ້ງ​ປະ​ຕິ​ບັດ​ແຜນ​ງົບ​ປະ​ມານ​ການ​ເກັບ​ລາຍ​ຮັບ​ໃນ​ໜຶ່ງ​ປີ​ຜ່ານ​ມາ​ໄດ້​ຕາມ​ລະ​ດັບ​ຄາດ​ໝາຍ ແລະ ລື່ນ​ຄາດ​ໝາຍ. ພ້ອມ​ນັ້ນ ທ່ານ​ຍັງ​ໄດ້​ເນັ້ນ​ໜັກ​ໃຫ້​ທຸກ​ຂະ​ແໜງ​ການ​ເສດ​ຖະ​ກິດ​ໃຫ້​ລົງ​ເລິກ​ຂຸດ​ຄົ້ນ​ທ່ານ​ແຮງ​ດ້ານ​ລາຍ​ຮັບ​ຢູ່​ຂະ​ແໜງ​ການ​ຂອ​ງ​ຕົນ​ທີ່​ຍັງ​ບົ່ມ​ຊ້ອນ​ຄືນ ເພື່ອ​ເຮັດ​ໃຫ້​ການ​ເກັບ​ລາຍ​ຮັບ​ໃນ​ປີ 2019 ໃຫ້​ທົ່ວ​ເຖິງ​ມີ​ຕົວ​ເລກ​ເພີ່ມ​ຂຶ້ນ. ພ້ອມ​ທັງ​ຮຽກ​ຮ້ອງ​ມາ​ຍັງ​ການ​ຈັດ​ຕັ້ງ​ທຸ​ກ​ພາກ​ສ່ວນ​ຈົ່ງ​ຍົກ​ສູງ​ນ້ຳ​ໃຈ​ຄວາມ​ຮັບ​ຜິດ​ຊອບ​ຂອງ​ຕົນ​ຂຶ້ນ ພ້ອມ​ກັນ​ສູ້​ຊົນ​ຜ່ານ​ຜ່າ​ສະ​ພາບ​ວິ​ກິດ​ການ​ທາງ​ດ້ານ​ການ​ເງິນ​ໃນ​ປະ​ຈຸ​ບັນ ສຸມ​ໃສ່​ການ​ຈັດ​ເກັບ​ລາຍ​ຮັບ​ໃນ​ປີ 2019 ໃຫ້​ໄດ້​ຕາມ​ແຜນ​ການ ແລະ ລື່ນ​ຄາດ​ໝາຍ.