ເມືອງວັງວຽງ ຈັດ​ພິ​ທີປ່ອຍປາສູ່ແມ່ນ້ຳຊອງ

ເນື່ອງໃນໂອກາດ ວັນອະນຸລັກສັດນ້ຳ-ສັດປ່າ ແຫ່ງຊາດ 13 ກໍລະກົດ ທີ່ໜູນວຽນມາອີກວາລະໜຶ່ງ ໃນວັນທີ 13 ກໍລະກົດ 2022 ທີ່ຜ່ານມາ, ຢູ່ທີ່ວັງສະຫວນ ຖ້ຳລົມ ບ້ານພູດິນແດງ ເມືອງວັງວຽງ ແຂວງວຽງຈັນ. ຫ້ອງການກະສິກຳ ແລະ ປ່າໄມ້ເມືອງວັງວຽງ ສົມທົບກັບພະແນກະສິກຳ ແລະ ປ່າໄມ້ແຂວງ, ກຸ່ມນັກທຸລະກິດຜູ້ປະກອບການທີ່ຕິດພັນກັບສາຍນໍ້າຊອງ ແລະ ອົງການຈັດຕັ້ງບ້ານພູດິນແດງ ຈື່ງໄດ້ຈັດພິທີ ປ່ອຍປາໃນວັນປ່ອຍປາແຫ່ງຊາດຂຶ້ນ. ໂດຍການໃຫ້ກຽດເຂົ້າຮ່ວມຂອງທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ, ມີທ່ານ ບຸນຈັນ ມາລາວົງ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີທ່ານ ສົມອົກ ໜໍ່ຈະເລີນ ຫົວຫນ້າພະແນກກະສິກຳແລະປ່າໄມ້ແຂວງວຽງຈັນ, ມີບັນທ່ານຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການອ້ອມຂ້າງເມືອງ, ບັນດາບໍລິສັດ ກຸ່ມນັກທຸລະກິດ ຜູ້ປະກອບການຕະຫລອດຮອດການຈັດຕັ້ງບ້ານ ແລະ ພະນັກງານວິຊາການ ເຂົ້າຮ່ວມຢ່າງພ້ອມພຽງ.

ທ່ານ ບຸນທັນ ເຮີຈູ່ຕູ່ ກຳມະການພັກເມືອງ ຫົວໜ້າຫ້ອງການກະສິກຳ ແລະ ປ່າໄມ້ເມືອງວັງວຽງ ໄດ້ລາຍງານສະພາບ ແລະ ການຈັດຕັ້ງປະຕິບັດວຽກງານການປ່ອຍປ່າ​ໃນປີນີ້ວ່າ: ເພື່ອປະຕິບັດແຜນງານຜະລິດສະບຽງອາຫານ ແລະ ການຜະລິດເປັນສິນຄ້າ ພ້ອມທັງການເພີ່ມທະວີ ການສະກັດກັ້ນ ການລັກລອບຈັບປາ ລ່າເນື້ອ ສັດນ້ຳ-ສັດປ່າ ໃນຍາມແຜ່ພັນຂອງສັດ ເປັນການຊຸກຍູ້ສົ່ງເສີມວັນອະນຸລັກ ສັດນ້ຳ-ສັດປ່າ ໃຫ້ທົ່ວສັງຄົມໄດ້ຮັບຮູ້ ແລະ ມີສ່ວນຮ່ວມ ເພື່ອແນ່ໃສ່ສ້າງຄວາມສົມດູນໃຫ້ທຳມະຊາດ ເຮັດໃຫ້ແມ່ນ້ຳມີຄວາມອຸດົມສົມບູນດ້ານສະບຽງອາຫານ ແລະ ເປັນການ ສົ່ງເສີມການ ລ້ຽງປາ ໂດຍສະເພາະລ້ຽງແບບຄອບຄົວ, ແບບຟາມໃຫ້ແຜ່ຫຼາຍ ເຮັດໃຫ້ເມືອງວັງວຽງມີສະບຽງອາຫານທີ່ພຽງພໍ ແລະ ກາຍເປັນສິນຄ້າຫຼາຍຂື້ນ.

ໃນໂອກາດດັ່ງກ່າວ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ໄດ້ມີຄຳເຫັນ ແລະ ທິດຊີ້ນຳຕໍ່ພິທີປ່ອຍປາຄັ້ງນີ້ ໂດຍທ່ານ ກ່າວວ່າ: ການອະນຸລັກຮັກສາສັດນ້ຳ- ສັດປ່າ ເປັນວຽກງານທີ່ມີບົດບາດສໍາຄັນທີ່ທຸກໆຄົນຕ້ອງມີສ່ວນຮ່ວມໃນການສ້າງ ຫຼື ຜະລິດສະບຽງອາຫານໃຫ້ພໍ ແລະ ໃຫ້ເປັນຂະບວນການກວ້າງຂວາງ ໃນການລ້ຽງໃຫ້ກາຍເປັນສິນຄ້າ ພ້ອມນີ້ ທ່ານຍັງໄດ້ຮຽກຮ້ອງມາຫ້ອງການກ່ຽວຂ້ອງ, ອົງການປົກຄອງ ຕະຫລອດຮອດພໍ່ແມ່ປະຊາຊົນ ຈົ່ງເປັນເຈົ້າການເອົາໃຈໃສ່ຕິດຕາມກວດກາ ປະກົດການຫຍໍ້ທໍ້ຕ່າງໆ ເຊັ່ນການຫາປາບໍ່ຖືກຕ້ອງຕາມລະບຽບກົດໝາຍ, ການຄ້າຂາຍສັດນ້ຳ-ສັດປ່າ ແລະ ບັນຫາອື່ນໆທີ່ບໍ່ຖືກຕ້ອງກັບລະບຽບກົດໝາຍໃຫ້ໝົດໄປ.

ຕອນທ້າຍພິທີ ທ່ານ ບຸນຈັນ ມາລາວົງ ເຈົ້າເມືອງໆວັງວຽງ ຍັງໄດ້ໃຫ້ກຽດຂື້ນຮັບລູກປາຈາກ ທ່ານເຈົ້າແຂວງວຽງຈັນ, ຫົວຫນ້າພະແນກກະສິກຳ ແລະ ປ່າໄມ້ແຂວງວຽງຈັນ, ທ່ານ ໂພທິສັກ ແລະ ນາງ ດາວີ, ປະທານບໍລິສັດ LB ແລະ ທ່ານ ນາງ ຈັນສະໄໝ ລວມທັງໝົດ 21,500 ໂຕໃນນັ້ນມີປາປະເພດ ປານິນ, ປາໄນ ແລະ ປາປາກ. ໃຫ້ກຽດມອບໃບຍ້ອງຍໍຜູ້ທີ່ຊ່ວຍເຫຼືອ ແລະ ອຸປະຖຳລູກປາໃນຄັ້ງນີ້ໂດຍທ່ານ ບຸນທັນ ເຮີຈູ່ຕູ່ ກຳມະການພັກເມືອງ ຫົວໜ້າຫ້ອງການກະສິກຳ ແລະ ປ່າໄມ້ເມືອງວັງວຽງ. ຫລັງຈາກນັ້ນບັນດາທ່ານກໍ່ໄດ້ຮ່ວມປ່ອຍປາຕື່ມອີກ.

ເນື້ອ​ໃນຂ່າວ ແລະ ຮູບ​ພາບ​ຈາກ: ເມືອງວັງ​ວຽງ​ວັນ​ນີ້