ພິທີປະກາດການຈັດຕັ້ງຫ້ອງການ ຍທຂ ເມືອງວັງວຽງ

ໃນມື້ວັນທີ 27 ເມສາ 2022 ຢູ່ທີ່ຫ້ອງປະຊຸມຊັ້ນ 1 ສຳນັກງານປົກຄອງເມືອງວັງວຽງ ໄດ້ມີພິທີປະກາດແຕ່ງຕັ້ງຫົວໜ້າຫ້ອງການ ແລະ ຫົວໜ້າໜ່ວຍງານຂອງຫ້ອງການໂຍທາທິການ ແລະ ຂົນສົ່ງເມືອງວັງວຽງຂື້ນ ພາຍໃຕ້ການເປັນປະທານຮ່ວມຂອງທ່ານ ສຸວຽງທອງ ວົງຈຳປາ ຮອງເລຂາພັກເມືອງ, ທ່ານນາງ ຄຳຫຼ້າ ບັນນະວົງ   ຫົວໜ້າຂະແໜງຈັດຕັ້ງ-ພະນັກງານ ພະແນກໂຍທາທິການ ແລະ ຂົນສົ່ງແຂວງວຽງຈັນ, ທ່ານ ບຸນຊຽນ ພົງທະດີ ຮອງຫົວໜ້າຫ້ອງການພາຍໃນເມືອງວັງວຽງ, ມີບັນດາທ່ານໃນຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ຄະນະຫ້ອງການ ແລະ ພະນັກງານພາຍໃນຫ້ອງການໂຍທາທິການ ແລະ ຂົນສົ່ງເມືອງເຂົ້າຮ່ວມ.

ໃນພິທີ ທ່ານ ກີດໂຕ໋ ນັນທະວົງ ຮັກສາການຫົວໜ້າຫ້ອງການໂຍທາທິການ ແລະ ຂົນສົ່ງເມືອງໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດວຽກງານໃນໄລຍະ 1 ປີຜ່ານມາ ແລະ ທິດທາງແຜນການໃນຕໍ່ໜ້າ. ຈາກນັ້ນ ທ່ານ ບຸນຊຽນ ພົງທະດີ ກໍໄດ້ຂື້ນຜ່ານຂໍ້ຕົກລົງຂອງທ່ານເຈົ້າເມືອງໆວັງວຽງ ວ່າດ້ວຍ: ການແຕ່ງຕັ້ງຫົວໜ້າຫ້ອງການ ແລະ ຫົວໜ້າໜ່ວຍງານຂອງຫ້ອງການໂຍທາທິການ ແລະ ຂົນສົ່ງເມືອງວັງວຽງ ເຊີ່ງໃນນັ້ນ ໄດ້ແຕ່ງຕັ້ງ ທ່ານ ກີດໂຕ໋ ນັນທະວົງ ຮັກສາການຫົວໜ້າຫ້ອງການ ຂື້ນເປັນຫົວໜ້າຫ້ອງການໂຍທາທິການ ແລະ ຂົນສົ່ງເມືອງວັງວຽງ, ແຕ່ງຕັ້ງ ທ່ານ ສູນທອນ ກອງຈັນສະຫວັດ ເປັນຫົວໜ້າໜ່ວຍງານຂົວທາງ ແລະ ເຄຫາຜັງເມືອງ, ທ່ານ ກົງສີນ ບ່າວອີນ ເປັນຫົວໜ້າໜ່ວຍງານຂົນສົ່ງ.

ໃນຕອນທ້າຍພິທີ ຍັງໄດ້ຮັບຟັງການໂອ້ລົມຈາກທ່ານ ສຸວຽງທອງ ວົງຈຳປາ ຮອງເລຂາພັກເມືອງ ເພື່ອເປັນທິດເຍືອງທາງໃນການສືບຕໍ່ຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າອີກດ້ວຍ. ພິທີດັ່ງກ່າວໄດ້ດຳເນີນໄປເປັນເວລາ 1 ຕອນ ແລະ ຫຼັງຈາກນັ້ນ ຢູ່ທີ່ຫ້ອງການໂຍທາທິການ ແລະ ຂົນສົ່ງເມືອງວັງວຽງ ບໍລິສັດ ວັນເດີຟູນ ສຳຫຼວດອອກແບບ ແລະ ກໍ່ສ້າງ ຍັງໄດ້ມອບກະໂລຈຳນວນ 126 ແກັດ ລວມມູນຄ່າ 8,190,000 ກີບໃຫ້ຫ້ອງການໂຍທາທິການ ແລະ ຂົນສົ່ງເພື່ອສ້ອມແປງຫ້ອງການອີກດ້ວຍ.