ກອງປະຊຸມຄົບຄະນະບໍລິຫານງານພັກເມືອງຄັ້ງທີ 6 ສະໃໝທີ VII

ໃນວັນທີ 11-12 ມັງກອນ 2022 ຢູ່ທີ່ ສະ​ໂມ​ສອນໃຫຍ່ຂອງເມືອງວັງວຽງ ໄດ້ໄຂກອງປະຊຸມຄົບຄະນະບໍລິຫານງານພັກເມືອງຄັ້ງທີ 6 ສະໄໝທີ VII ຂື້ນ ພາຍໃຕ້ການເປັນປະທານຂອງ ສະຫາຍ ບຸນຈັນ ມາລາວັງ ກໍາມະການພັກແຂວງ ເລຂາພັກເມືອງ ເຈົ້າເມືອງໆ ວັງວຽງ, ໂດຍການເປັນກຽດເຂົ້າຮ່ວມຂອງ ສະຫາຍ ດາວເຮືອງ ນັນທະວົງ ຄະ​ນະປະຈຳພັກແຂວງ ຮອງເຈົ້າແຂວງໆວຽງຈັນ, ມີຄະນະຮັບຜິດຊອບຂັ້ນແຂວງ, ຄະນະປະຈຳພັກເມືອງ, ກຳມະການພັກເມືອງ, ເລຂາຄະນະພັກຮາກຖານ, ເລຂາໜ່ວຍພັກ, ຫົວໜ້າຫ້ອງການ, ຮອງຫ້ອງການ ພະນັກງານອາວຸໂສບຳນານເຂົ້າຮ່ວມທັງໝົດ 89 ສະຫາຍ, ຍິງ 12 ສະຫາຍ. ກອງປະຊຸມໃນຄັ້ງນີ້ໄດ້ແບ່ງອອກເປັນ 2 ວາລະຄື: ວາລະພາຍໃນ ແລະ ວາລະເປີດກ້ວາງ, ວັນທີ 11/1/2022 ເປັນວາລະເປີດກ້ວາງ, ໃນວາລະເປີດກ້ວາງຜູ້ເຂົ້າຮ່ວມກອງປະຊຸມຈະໄດ້ພ້ອມກັນຄົ້ນຄວ້າ ແລະ ປະກອບຄຳຄິດຄຳເຫັນຕໍ່ບົດສະຫຼຸບການຈັດຕັ້ງປະຕິບັດແຜນພັດທະນນາເສດຖະກິດ-ສັງຄົມ 1 ປີຜ່ານມາ (ປີ2021) ແລະ ແຜນຈຸດສຸມ 3 ເດືອນຕົ້ນປີ 2022, ບົດສະຫຼຸບວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຕິດພັນກັບວຽກງານ 3 ສ້າງໃນ 1 ປິຜ່ານມາ (2021) ແລະ ແຜນການການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດແຕ່ ປີ 2022-2023

ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2021: ເມືອງວັງວຽງຍັງສືບຕໍ່ມີສະຖຽນລະພາບທາງດ້ານການເມືອງ, ມີຄວາມສະຫງົບເປັນລະບຽບຮຽບຮ້ອຍທາງດ້ານສັງຄົມ, ປະຊາຊົນບັນດາເຜົ່າມີຄວາມເຊື່ອໝັ້ນ ຕໍ່ແນວທາງນະໂຍບາຍ ແລະ ການນຳພາຂອງພັກ, ຕັ້ງໜ້າປະກອບສ່ວນໃນການພັດທະນາເມືອງວັງວຽງຢ່າງເປັນຂະບວນຟົດຟື້ນ ແລະ ໄດ້ຮັບຜົນສຳເລັດຫຼາຍດ້ານ; ສະພາບການພັດທະນາເສດຖະກິດ-ສັງຄົມສືບຕໍ່ຂະຫຍາຍຕົວ ເຖິງວ່າສະພາບດ້ານງົບປະມານ ການລົງທຶນຂອງລັດຫຼຸດລົງ (ບໍ່ມີໂຄງການສະເໜີໃໝ່).

ການພັດທະນາເສດຖະກິດ: ໃນໄລຍະ 1 ປີທີ່ຜ່ານມາເຫັນວ່າຈັງຫວະການຂະຫຍາຍຕົວຂອງເສດຖະກິດມີລັກສະນະບໍ່ຕໍ່ເນື່ອງ ແລະ ບໍ່ບັນລຸຕາມແຜນການ ເນື່ອງຈາກຫຼາຍປັດໄຈຕົ້ນຕໍທີ່ກະທົບໃສ່ ເປັນຕົ້ນແມ່ນການແຜ່ລະບາດຂອງພະຍາດໂຄວິດ-19 ທີ່ມີລັກສະນະແກ່ຍາວ;​ ບັນຫາຄວາມຫຍຸ້ງຍາກ ທາງດ້ານເສດຖະກິດທີ່ລັດຖະບານກຳນົດເປັນວາລະແຫ່ງຊາດ; ການເຄື່ອນໄຫວດຳເນີນທຸລະກິດ ແລະ ການບໍລິການຕ່າງໆ ຖືກຢຸດສະງັກເປັນໄລຍະຍາວນັບແຕ່ເດືອນເມສາ ຈົນຮອດທ້າຍປີ 2021; ຂະບວນການຜະລິດບໍ່ສາມາດສ້າງມູນຄ່າເພີ່ມໄດ້ຕາມແຜນ; ຕົວເລກອັດຕາການຂະຫຍາຍຕົວຂອງລວມຍອດລາຍຮັບພາຍໃນຂອງເມືອງ ຈາກ 11,5%, ຫຼຸດລົງມາເປັນ 6,5%, ມູນຄ່າລວມຍອດລາຍຮັບພາຍໃນເມືອງຈາກ 2.578,48 ຕື້ກີບ, ຫຼຸດລົງມາເປັນ 1.765,24 ຕື້ກີບ, ລວມຍອດລາຍຮັບຕໍ່ຫົວຄົນ (GO) 26.420 ລ້ານກີບ ຫຼືເທົ່າກັບ 3.096 USD, ລາຍລະອຽດມີ ດັ່ງນີ້: ຂະແໜງກະສິກໍາ: ເພີ່ມຂຶ້ນ 5,4%, ກວມເອົາ  24,60% ຂອງ GO. ຂະແໜງອຸດສາຫະກໍາ: ເພີ່ມຂຶ້ນ 7,3%, ກວມເອົາ 27,41% ຂອງ GO. ຂະແໜງການບໍລິການ: ເພີ່ມຂຶ້ນ 6,6%, ກວມເອົາ 47,99% ຂອງ GO.

ເຖິງແມ່ນວ່າລັດຖະບານກໍ່ຄື ຄະນະສະເພາະກິດຂັ້ນຕ່າງໆ ຈະມີມາດຕະການເຝົ້າລະວັງ, ປ້ອງກັນ ແລະ ຄວບຄຸມການແຜ່ລະບາດພະຍາດໂຄວິດ-19 ກໍ່ຕາມ, ແຕ່ມີການຊີ້ນຳຂະບວນການຜະລິດ ການບໍລິການ ແລະ ການດຳລົງຊີວິດແບບໃໝ່ ຫຼື New Normal ແຕ່ກໍຍັງມີຫຼາຍພາກສ່ວນທຸລະກິດ ຫຼາຍກິດຈະການບໍ່ສາມາດດຳເນີນຕາມເປົ້າໝາຍຂອງຕົນ. ເຮັດໃຫ້ອັດຕາການເຕີບໂຕຂອງລວມຍອດລາຍຮັບພາຍໃນ (GO) ສົກປີ 2021 ປະຕິບັດໄດ້ພຽງແຕ່ 5,91% ເທົ່າກັບ 87,79% ຂອງແຜນການປີ, ທຽບໃສ່ປີຜ່ານມາຫຼຸດລົງ -2,74% ລວມຍອດມູນຄ່າລາຍຮັບພາຍໃນທັງໝົດໄດ້ 1.513 ຕື້ກວ່າກີບ; ສະເລ່ຍໃສ່ຫົວຄົນໄດ້ 23,46 ລ້ານກີບ/ຄົນ/ປີ ເທົ່າກັບ 2.309 ໂດລາ; ອັດຕາການຂະຫຍາຍຕົວຕາມຂະແໜງການມີດັ່ງນີ້: ຂະແໜງກະສິກຳປະຕິບັດໄດ້ 452,45 ລ້ານກີບ, ອັດຕາການຂະຫຍາຍຕົວ 3,67% ກວມເອົາ 29,89% ຂອງ GO. ອຸດສາຫະກໍາ ແລະ ກໍ່ສ້າງປະຕິບັດໄດ້ 399,97 ລ້ານກີບ, ອັດຕາການຂະຫຍາຍຕົວ 9,66% ກວມເອົາ 26,42% ຂອງ GO. ຂະແໜງບໍລິການປະຕິບັດໄດ້ 661,30 ລ້ານກີບ, ອັດຕາການຂະຫຍາຍຕົວ 4,4% ກວມເອົາ 43,69% ຂອງ GO.

ການລົງທຶນຂອງລັດ:ປີ 2021 ເມືອງວັງວຽງໄດ້ຮັບອະນຸມັດທັງໝົດ 16 ໂຄງການ, ມູນຄ່າ 919,80 ລ້ານກີບ ໃນນັ້ນ: ທຶນປົກກະຕິ 9 ໂຄງການ ມູນຄ່າ 448,00 ລ້ານກີບ, ທຶນຈັດສັນພູມລຳເນົາ ແລະ ບ່ອນທຳມາຫາກິນຖາວອນ 4 ໂຄງການ ມູນຄ່າ 253,80 ລ້ານກີບ ແລະ ທຶນພັດທະນາຊົນນະບົດ ແລະ ລຶບລ້າງຄວາມທຸກຍາກ 3 ໂຄງການ ມູນຄ່າ 218,00 ລ້ານກີບ; ການລົງທຶນດ້ານຂົວ-ທາງ ມີ 5 ໂຄງການ, ມູນຄ່າ 30.961 ລ້ານກວ່າກີບ. ການລົງທຶນຂອງເອກະຊົນ:​ ມີ 3 ​ໂຄງການ/ກິດຈະການ ມູນ​ຄ່າ​ການ​ລົງທຶນ 1.235 ລ້ານ​ກວ່າກີບ, ໂຄງການລົງທຶນທົ່ວໄປຂອງປະຊາຊົນ 97 ໂຄງການ ມູນຄ່າການລົງທຶນທັງໝົດ 52,54 ຕື້ກີບ. ໄດ້ຮັບທຶນຊ່ວຍເຫຼືອລ້າຈາກທະນາຄານພັດທະນາອາຊີ ADB ຜ່ານໂຄງການພັດທະນາໂຄງລ່າງພື້ນຖານການທ່ອງທ່ຽວໄລຍະ 2 ມູນຄ່າສັນຍາ 11.985.867,8 ໂດລາ

ຕອນ​ທ້າຍ ທີ່​ປະ​ຊຸມ​ຍັງ​ໄດ້​ຮັບ​ຟັງ​ການ​ໂອ້​ລົມ​ຂອງ​ ທ່ານ ດາວ​ເຮືອງ ນັນ​ທະ​ວົງ ຄະ​ນະ​ປະ​ຈຳ​ພັກ​ແຂວງ ຮອງ​ເຈົ້າ​ແຂວງ​ຕື່ມ​ອີກ. ເຊີ່ງ​ກ່ອນ​ອື່ນ​ທ່ານ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ເຖິງ​ຜົນ​ງານ​ທີ່​ຍາດ​ມາ​ໄດ້​ໃນ​ໄລ​ຍະ​ຜ່ານ​ມາ ແລະ ຍັງໄດ້​ຊີ້​ນຳ​ໃຫ້​ບັນ​ດາ​ສະ​ຫາຍ​ໃນ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ເລ​ຂາ​ຄະ​ນະ​ພັກ​ຮາກ​ຖານ ແລະ ເລ​ຂາ​ໜ່ວຍ​ພັກ​ທີ່​ເຂົ້າ​ຮ່ວມ​ຈົ່ງ​ໄດ້​ເຊີດ​ຊູ​ຄວາມ​ຮັບ​ຜິດ​ຊອບ​ຂອງ​ຕົນ​ຂຶ້ນ ເພື່ອ​ນຳ​ເອົາ​ເນື້ອ​ໃນ​ຈິດ​ໃຈ​ຂອງກອງ​ປະ​ຊຸມ​ຄັ້ງ​ນີ້​ໄປ​ຈັດ​ຕັ້ງ​ຜັນ​ຂະ​ຫຍາຍ ​ໃຫ້​ເກີດ​ຜົນ​ຢູ່​ໃນ​ຂົງ​ເຂດ​ວຽກ​ງານ​ຂອງ​ຕົນ​ຮັບ​ຜິດ​ຊອບ. ກອງ​ປະ​ຊຸມ​ໄດ້​ດຳ​ເນີນ​ໄປ​ເປັ​ນ​ເວ​ລາ 1 ວັນ​ເຕັມ.

ຮູບ​ພາບ​ຈາກ: ເມືອງວັງ​ວຽງ​ວັນ​ນີ້