ການ​ນຳ​ຂອງ​ແຂວງວຽງ​ຈັນ ຕ້ອນ​ຮັບ​ຄະ​ນະ​ຜູ້​ແທນກອງ​ປະ​ຊຸມ​ສະ​ໄໝ​ສາ​ມັນ ເທື່ອ​ທີ 2 ສະ​ພາ​ແຫ່ງ​ຊາດ ຊຸດ​ທີ IX

ໃນຕອນແລງຂອງວັນທີ 17 ພະຈິກ 2021 ຢູ່ທີ່ສະຖານີລົດໄຟເມືອງວັງວຽງ ແຂວງວຽງຈັນ, ຄະນະຜູ້ແທນກອງປະ ຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ນຳໂດຍ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ເດີນທາງໄປຢ້ຽມຢາມໂຄງການລົດໄຟລາວ-ຈີນ.

ໃນໂອກາດນີ້, ຄະນະຜູ້ແທນດັ່ງກ່າວໄດ້ຢ້ຽມຢາມແລະ ທົດລອງຂີ່ລົດໄຟຂະບວນລ້ານຊ້າງ ຈາກສະຖານີນະຄອນຫລວງວຽງຈັນ ເຖິງສະຖານີວັງວຽງ ແຂວງວຽງຈັນ ໂດຍມີ ທ່ານ ຄໍາພັນ ສິດທິດໍາພາ ກຳມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ ພ້ອມດ້ວຍການນໍາຂອງແຂວງ, ທ່ານ ບຸນຈັນ ມາລາວົງ ກຳມະການພັກແຂວງ ເລຂາພັກເມືອງ ເຈົ້າເມືອງວັງວຽງ ພ້ອມດ້ວຍການນຳຂອງເມືອງວັງວຽງ ໃຫ້ການຕ້ອນຮັບ.

ສະຖານີລົດໄຟວັງວຽງຕັ້ງຢູ່ບ້ານພູດິນແດງ, ເມືອງວັງວຽງແຂວງວຽງຈັນ, ເນື້ອທີ່ກໍ່ສ້າງມີລວມທັງໝົດປະມານ 5.000 ຕາແມັດ, ສາມາດຮອງຮັບໄດ້ 600 ຄົນຫຼາຍທີ່ສຸດ. ປັດຈຸບັນ, ສະຖານີລົດໄຟແຫ່ງນີ້ ໄດ້ເລີ່ມກວດຮັບແລ້ວ ແລະພວມກະກຽມວຽກງານການທົດລອງແບບປະສານກັນຕາມພາຍຫຼັງ, ຄາດວ່າຈະເປີດການບໍລິການໃນເດືອນທັນວາປີນີ້.

ສໍາລັບທາງລົດໄຟລາວ-ຈີນແມ່ນໂຄງການເຊື່ອມຕໍ່ລະຫວ່າງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນ ກັບຍຸດທະສາດຫັນຈາກປະເທດທີ່ບໍ່ມີຊາຍແດນຕິດກັບທະເລເປັນປະເທດເຊື່ອມໂຍງເຊື່ອມຈອດຂອງລາວ ເຊິ່ງເລີ່ມຈາກນະຄອນຄຸນໝິງ ແຂວງຢຸນນານຂອງຈີນມາສິ້ນສຸດທາງຕອນໃຕ້ຢູ່ນະຄອນຫຼວງວຽງຈັນ, ມີຄວາມຍາວ ທັງໝົດ 422,6 ກິໂລແມັດ, ທາງລົດໄຟສາຍນີ້ສ້າງຕາມມາດຕະຖານການບໍລິຫານ ແລະມາດຕະຖານເຕັກນິກຂອງຈີນ, ຖືກອອກແບບໃຫ້ມີຄວາມໄວ 160 ກິໂລແມັດຕໍ່ຊົ່ວໂມງ, ສະເພາະໄລຍະເວລາການກວດກາເຕັກນິກເຄື່ອນທີ່ນັ້ນ, ລົດໄຟຈະເລີ່ມທົດລອງແລ່ນໃນຄວາມໄວ 80 ກິໂລ ແມັດຕໍ່ຊົ່ວໂມງ ແລະ ຄ່ອຍຍົກລະດັບຄວາມໄວຂຶ້ນຕາມການອອກແບບ ຈົນຮອດຄວາມໄວສູງສຸດ 176 ກິໂລ ແມັດຕໍ່ຊົ່ວໂມງ. ສະເພາະ ລົດໄຟຂະບວນລ້ານຊ້າງ, ມີທັງໝົດ 9 ຕູ້, ເຊິ່ງລວມມີ: ຕູ້ລົດ ໄຟທີ່ຂັບເຄືື່ອນໄດ້ເອງ 1 ຕູ້, ຕູ້ລົດໂດຍສານຊັ້ນ 1 ແລະ ຕູ້ຫ້ອງອາຫານ 1 ຕູ້, ຕູ້ລົດໂດຍສານຊັ້ນສອງ 6 ຕູ້, ທັງໝົດສາມາດບັນຈຸໄດ້ 720 ຄົນ ແລະ ມີສະຖານີລົດໄຟທັງໝົດ 33 ສະຖານີ ພ້ອມນີ້ສາມາດເຊື່ອມຕໍ່ສອງຂະບວນລົດໄຟໄດ້ໃນເວລາທີ່ຕ້ອງການ.

ຂໍ້​ມູນ​ຂ່າວ ແລະ ຮູບ​ພາບ​ຈາກ: ເມືອງວັງ​ວຽງ​ວັນ​ນີ້