ມອບ​ໂອນ​ພະ​ນັກ​ງານ​ຫ້ອງ​ການ​ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ໄປ​ຂຶ້ນ​ກັບ​ຂະ​ແໜງ​ການ​ອື່ນ

ພິ​ທີ​ດັ່ງ​ກ່າວ​ໄດ້​ຈັດ​ຂຶ້ນ​ໃນ​ຕອນ​ເຊົ້າ​ຂອງວັນ​ທີ 19 ສິງ​ຫາ 2021 ຢູ່​ທີ່​ຫ້ອງ​ປະ​ຊຸມ​ຊັ້ນ I ສຳ​ນັກ​ປົກ​ຄອງ​ເມືອງວັງ​ວຽງ ໂດຍ​ການ​ເຂົ້າ​ຮ່ວມ​ຂອງ​ທ່ານ ບຸນ​ຈັນ ມາ​ລາ​ວົງ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ມີ​ບັນ​ດາ​ທ່ານ​ຫົວ​ໜ້າ​ຫ້ອງ​ການ, ຄະ​ນະ​ຫ້ອ​ງ​ການ​ຈາກ​ຫ້ອງ​ການ​ຕ່າງໆ ຢູ່​ພາຍ​ໃນ​ເມືອງ​ພ້ອມ​ດ້ວຍພະ​ນັກ​ງານ-ລັດ​ຖະ​ກອນ​ຈາກ​ຫ້ອງ​ການ​ທີ່​ກ່ຽວ​ຂ້ອງ​ຂອງ​ເມືອງ​ເຂົ້າ​ຮ່ວມ.

ໃນ​ພິ​ທີ ຄະ​ນະ​ຮັບ​ຜິດ​ຊອບ​ປັບ​ປຸງ​ກົງ​ຈັກ​ການ​ຈັດ​ຕັ້ງ​ຂອງ​ເມືອງ​ໄດ້​ຜ່ານ​ຂໍ້​ຕົກ​ລົງ​ຂອງ​ທ່ານ​ເຈົ້າ​ເມືອງໆ​ວັງ​ວຽງ ວ່າ​ດ້ວຍ: ການ​​ຫຍຸບ​ຫ້ອງ​ການ​ວິ​ທະ​ຍາ​ສາດ ແລ​ະ ເຕັກ​ໂນ​ໂລ​ຊ​ີ​ຂອງ​ເມືອງ ເພື່ອ​ໂຮມ​ພະ​ນັກ​ງານ ແລະ ໜ້າ​ທີ່​ວຽກ​ງານ​ໄປ​ຂຶ້ນ​ກັບ​ຂະ​ແໜງ​ການ​ອື່ນ ດັ່ງ​ນີ:

1. ໂອນ​ວຽກ​ງານ​ເຕັກ​ໂນ​ໂລ​ຊີ​ດີ​ຈີ​ຕອນ ແລະ ຄອມ​ພິວ​ເຕີ​ເອ​ເລັກ​ໂຕຼນິກ​ພ້ອມ​ດ້ວຍ​ພະ​ນັກ​ງານ 1 ສະ​ຫາຍ​ໄປ​​ໃຫ້ຫ້ອງ​ການ​ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ​ (ຫ້​ອງ​ການ​ເຕັກ​ໂນ​ໂລ​ຊ​ີ ແລະ ການ​ສື່​ສານ).

2. ໂອນ​ວຽກ​ງານ​ຊັບ​ສິນ​ທາງ​ປັນ​ຍາ, ມາດ​ຕະ​ຖານ ແລະ ວັດ​ແທກ ພ້ອມ​ດ້ວຍ​ພະ​ນັກ​ງານ 2 ສະ​ຫາຍ​ໄປ​ໃຫ້​ຫ້ອງ​ການ​ອຸດ​ສາ​ຫະ​ກຳ ແລະ ການ​ຄ້າ.

3. ໂອນ​ວຽກ​ງານ​ພະ​ລັງ​ງານ ທົດ​ແທນ ແລະ ວັດ​ສະ​ດຸ​ໃໝ່​ພ້ອມ​ດ້ວ​ຍ​ພະ​ນັກ​ງານ 1 ສະ​ຫາຍ​ໄປ​ໃຫ້​ຫ້ອງ​ການ​ພະ​ລັງ​ງານ ແລະ ບໍ່​ແຮ່.

4. ໂອນ​ວຽກ​ງານ​ນິ​ເວດ​ວິ​ທະ​ຍາ ແລະ ເຕັກ​ໂນ​ໂລ​ຊີ​ຊີ​ວະ​ພາບ​ໄປ​ໃຫ້​ຫ້ອ​ງ​ການ​ກະ​ສິ​ກຳ ແລະ ປ່າ​ໄມ້.

5. ໂອນ​ວຽກ​ງານ​ວິ​ທະ​ຍາ​ສາດ​ເຕັກ​ໂນ​ໂລ​ຊີ ແລະ ນະ​ວັດ​ຕະ​ກຳ​ໄປ​ໃຫ້​ຫ້ອງ​ການ​ສຶກ​ສາ​ທິ​ການ ແລະ ກິ​ລາ.

ໄປ​ພ້ອມ​ກັນ​ນີ້​ຍັງ​ໄດ້​ຜ່ານ​ຂໍ້​ຕົກ​ລົງ​ຂອ​ງ​ທ່ານ​ເຈົ້າ​ເມືອງໆ​ວັງ​ວຽງ ວ່າ​ດ້ວຍ: ການ​ແຕ່ງ​ຕັ້ງ​ຮອງ​ຫົວ​ໜ້າ​ຫ້ອງ​ການ​ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ (ຫ້ອງ​ການ​ເຕັກ​ໂນ​ໂລ​ຊີ ແລະ ການ​ສື່​ສານ) ໂດຍ​ແຕ່ງ​ຕັ້ງ ທ່ານ ຫົມ​ເງິນ ພະ​ກະ​ຊຸມ ຫົວ​ໜ້າ​ຫ້ອງ​ການ​ວິ​ທະ​ຍາ​ສ​າດ ແລະ ເຕັກ​ໂນ​ໂລ​ຊີ​ໄປ​ເປັນ​ຮອງ​ຫົວ​ໜ້າ​ຫ້ອງ​ການ​ເຕັກ​ໂນ​ໂລ​ຊີ ແລະ ການ​ສື່​ສານ ເມືອງວັງ​ວຽງ ແລະ ມີ​ການ​ເຊັນ​ບົດ​ບັນ​ທຶກ​ການມອບ​ໂອນ​ພະ​ນັກ​ງານ ແລະ ວຽກ​ງານ​ແຕ່​ລະ​ໜ້າ​ວຽກ​ຂອງ​ຫ້ອງ​ການ​ວິ​ທ​ະ​ຍາ​ສາດ ແລະ ເຕັກ​ໂນ​ໂລ​ຊີ​ໃຫ້​ຫ້ອງ​ການ​ທີ່​ກ່ຽວ​ຂ້ອງ​ຂອງ​ເມືອງ. ໂດຍ​ຜູ້​ເຊັນ​ມອບ​ແມ່ນ ທ່ານ ຫົມ​ເງິນ ພະ​ກະ​ຊຸມ ອາ​ດີດ​ຫົວ​ໜ້າ​ຫ້ອງ​ການ​ວິ​ທະ​ຍາ​ສາດ ແລະ ເຕັກ​ໂນ​ໂລ​​ຊີ ແລະ ຜູ້​ເຊັນ​ຮັບ​ແມ່ນ​ບັນ​ດາ​ຫົວ​ໜ້າ​ຫ້ອງ​ການ 5 ຫ້ອງ​ການ​ທີ່​ກ່ຽວ​ຂ້ອງ​ຂອງ​ເມືອງ ໂດຍ​ຊ່ອງ​ໜ້າ​ຂອງ​ທ່ານ ເຈົ້າ​ເມືອງໆ​ວັງ​ວຽງ ແລະ ບັນ​ດາ​ຫົວ​ໜ້າ​ຫ້ອງ​ການ​ຕ່າງໆ ຂອງ​ເມືອງ​ທີ່​ເຂົ້າ​ຮ່ວມ​ເປັນ​ສັກ​ຂີ​ພິ​ຍານ.

ຕອນ​ທ້າຍ​ຂອງ​ພິ​ທີ ທ່ານ ບຸນ​ຈັນ ມາ​ລາ​ວົງ ເຈົ້າ​ເມືອງໆ​ວັງ​ວຽງ ໄດ້​ມີ​ຄຳ​ຄິດ​ຄຳ​ເຫັນ​ເພື່ອ​ໂອ້​ລົມ. ກ່ອນ​ອື່ນ​ທ່ານ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ຕໍ່​ຜົນ​ງານ​ຂອງ​ຫ້ອງ​ການ​ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ​ຜ່ານ​ມາ ທີ່​ໄດ້​ປະ​ກອບ​ສ່ວນ​ວຽກ​ງານ​ອັນ​ສຳ​ຄັນ​ໃຫ້​ແກ່​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ເມືອງ, ການ​ຫຍຸບ​ຫ້ອງ​ການ​ວິ​ທ​ະ​ຍາ​ສາດ ແລະ ເຕັກ​ໂນ​ໂລ​ຊີ ແມ່ນ​ປະ​ຕິ​ບັດ​ຕາມ​ມະ​ຕິ​ຕົກ​ລົງ​ຂອງ​ກົມ​ການ​ເມືອງ​ສູນ​ກາງ​ພັກ ວ່າ​ດ້ວຍ: ການ​ຫຍຸບ​ກະ​ຊວງວິ​ທ​ະ​ຍາ​ສາດ ແລະ ເຕັກ​ໂນ​ໂລ​ຊີ ແລະ ການ​ປັບ​ປຸງ​ກົງ​ຈັກ​ການ​ຈັດ​ຕັ້ງ​ຂອງ​ລັດ​ຖະ​ບານ​ໃຫ້​ກະ​ທັດ​ຮັດ​ມີ​ປະ​ສິດ​ທິ​ຜົນ​ສູງກວ່າ​ເກົ່າ. ນອກ​ນີ້​ທ່ານ​ຍັງ​ໄດ້​ຊີ້​ນຳ​ໃຫ້​ແຕ່​ລະ​ຫ້ອງ​ການ​ຂອງ​ເມືອງ​ທີ່​ໄດ້​ມອບ​ໂອນ​ວຽກ​ງານ​ໃຫ້​ນັ້ນ​ຈົ່ງ​ໄດ້​ສືບ​ຕໍ່​ຜັນ​ຂະ​ຫຍາຍ​ວຽກ​ງານ​ໃຫ້​ມີ​ປະ​ສິດ​​ທິ​ຜົນ​ສູງກວ່າ​ເກົ່າ. ຕໍ່​ພະ​ນັກ​ງານ​ຜູ້​ທີ່​ຖືກ​ຊັບ​ຊ້ອນ​ແມ່ນ​ໃຫ້​ເອົາ​ໃຈ​ໃສ່​ສີບ​ຕໍ່​ປະ​ຕິ​ບັດ​ໜ້າ​ທີ່​ວຽກ​ງານ​ຂອງ​ຕົນ​ຕາມ​ການມອບ​ໝາຍ​ໃຫ້​ສຳ​ເລັດ​ໜ້າ​ທີ່, ຕັ້ງ​ໜ້າ​ຝຶກ​ຝົນ​ຫຼໍ່ຫຼອມ​ຕົນ​ເອງ ຮັກ​ສາ​ຄຸນ​ນະ​ພາບ​ການ​ເມືອງ​ຂອງ​ຕົນ​ໃຫ້​ເປັນ​ພະ​ນັກ​ງານ​ສືບ​ຖອດ​ທີ່​ດີ​ຂອງ​ພັກ-ລັດ​ຕະຫຼອດ​ໄປ.