ເປີດກອງ​ປະ​ຊຸມ​ຄົບ​ຄະ​ນະ​ບໍ​ລິ​ຫານ​ງານ​ພ​ັກ​ເມືອງ​ຄັ້ງ​ທີ 5 ສະ​ໄໝ​ທີ VII

ກອງ​ປະ​ຊຸມ​ໄດ້​ເປີດ​ຂຶ້ນ​ໃນ​ວັນ​ທີ 21 ກໍ​ລະ​ກົດ 2021 ນີ້​ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ ໂດຍ​ການ​ເປັນ​ປະ​ທານ​ຂອງ ທ່ານ ບຸນ​ຈັນ ມາ​ລາ​ວົງ ​ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ມີ​ບັນ​ດາ​ສະ​ຫາຍ​ໃນ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ເລ​ຂາ​ຄະ​ນະ​ພັກ​ຮາກ​ຖານ ແລະ ເລ​ຂາ​ໜ່ວຍ​ພັກ​ຈາກ​ຫ້ອງ​ການ​ຕ່າງໆ ຂອງ​ເມືອງ ແລະ ບ້ານ​ເທດ​ສະ​ບານ​ເມືອງ​ເຂົ້າ​ຮ່ວມ. ທີ່​ປະ​ຊຸມ​ໄດ້​ຮັບ​ຟັງ​ການ​ຜ່ານ​ບົດ​ສະຫຼຸບ​ການ​ຊີ້​ນຳ-ນຳ​ພາ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ຮອບ​ດ້ານ 6 ເດືອນ​ຕົ້ນ​ປີ, ທິດ​ທາງ​ແຜນ​ການ 6 ເດືອນ​ທ້າຍ​ປີ ແລະ ທິດ​ທາງ​ຈຸດ​ສຸມ 3 ເດືອນ (7-9/2021) ໂດຍ​ແມ່ນ ທ່ານ ສຸ​ວຽງ​ທອງ ວົງ​ຈຳ​ປາ ຮອງ​ເລ​ຂາ​ພັກ​ເມືອງ ເປັນ​ຜູ້​ຂຶ້ນ​ຜ່ານ.

ຈາກ​ນັ້ນ ຜູ້​ເຂົ້າ​ຮ່ວມກອງ​ປະ​ຊຸມ​ໄດ້​ພັດ​ປ່ຽນ​ກັນ​ປະ​ກອບ​ຄຳ​ເຫັນ​ເຂົ້າ​ໃສ່​ເພື່ອ​ສ້າງ​ຄວາມ​ເປັນ​ເອ​ກະ​ພາບ​ໃນ​ການ​ຮັບ​ຮອງ​ເອົາ ແລະ ການ​ນຳ​ໄປ​ຈັດ​ຕັ້ງ​ຜັນ​ຂະ​ຫຍາຍ​ໃນ​ຕໍ່​ໜ້າ, ເຊີ່ງ​ສັງ​ລວມ​ແລ້ວ​ເຫັນ​ວ່າ​ສະ​ພາບ​ທົ່ວ​ໄປ​ຂອງ​ເມືອງວັງ​ວຽງ ໃນ​ໄລ​ຍະ​ຜ່ານ​ມາ​ຍັງ​ສາ​ມາດ​ຮັກ​ສາ​ໄດ້​ສະ​ຖຽນ​ລະ​ພາບ​ທາງ​ດ້ານ​ການ​ເມືອງ, ສັງ​ຄົມ​ມີ​ຄວາ​ມ​ສະ​ຫງົບ ມີ​ຄວາມ​ເປັນ​ລະ​ບຽບ​ຮຽບ​ຮ້ອຍ​ໂດຍ​ພື້ນ​ຖານ, ເສດ​ຖະ​ກິດ​ຍັງ​ສືບ​ຕໍ່​ຂະ​ຫຍາຍ​ຕົວ​ເຖິງ​ແມ່ນ​ຢູ່​ໃນ​ລະ​ດັບ​ທີ່​ຕ່ຳ ຍ້ອນ​ຜົນ​ກະ​ທົບ​ຈາກ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ 19 ແຕ່​ລະ​ດັບ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ບັນ​ດາ​ເຜົ່າ​ໄດ້​ຮັບ​ການ​ເອົາ​ໃຈ​ໃສ່​ປັບ​ປຸງ​ໃຫ້​ດີ​ຂຶ້ນ, ຕົວ​ເລກ​ອັດ​ຕາ​ການ​ຂະ​ຫຍາຍ​ຕົວ​ທາງ​ດ້ານ​ເສດ​ຖະ​ກິດ​ຈາກ 11,5% ຫຼຸດ​ລົງ​ມາ​ເປັນ 6,5%, ມູນ​ຄ່າ​ລວມຍອດ​ລາຍ​ຮັບ​ພາຍ​ໃນ​ເມືອງ​ຈາກ 2.578,48 ຕື້​ກີບ​ລົງ​ມາ​ເປັນ 1.765,24 ຕື້​ກີບ. ຕໍ່​ກັບ​ບັນ​ຫາ​ຂໍ້​ຄົງ​ຄ້າງ: ທີ່​ປະ​ຊຸມ​ກໍ​ໄດ້​ມີ​ຄວາມ​ເປັນ​ເອ​ກະ​ພາບ​ໃນ​ການ​ສືບ​ຕໍ່​ປັບ​ປຸງ​ແກ້​ໄຂ​ໃນ​ຕໍ່​ໜ້າ ໂດຍ​ກຳ​ນົດ​ເຂົ້າ​ຢູ່​ໃນ​ແຜນຄາດ​ໝາຍ​ສູ້​ຊົນ ໃນ 6 ເດືອນ​ທ້າຍ​ປີ 2021 ໂດຍ​ຈະ​ໄດ້​ສຸມ​ໃສ່​ຊຸກ​ຍູ້​ຟື້ນ​ຟູ​ບັນ​ດາ​ຫົວ​ໜ່ວຍ​ທຸ​ລະ​ກິດ​ຕ່າງໆ ທີ່​ໄດ້​ຮັບ​ຜົນ​ກະ​ທົບ​ຈາ​ກ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ 19 ໃຫ້​ມາ​ສູ່​ສະ​ພາບ​ປົກ​ກະ​ຕິ, ສຸມ​ໃສ່​ການ​ບົວ​ລະ​ບັດ​ຮັກ​ສາ ແລະ ເກັບ​ກູ້​ຜົນ​ຜະ​ລິດ​ເຂົ້າ​ນາ​ປີ, ກຽມ​ແຜນ​ຜະ​ລິດ​ລະ​ດູ​ແລ້ງ ສົ່ງ​ເສີມ​ການ​ຜະ​ລິດ​ໃຫ້​ເປັນ​ສິນ​ຄ້າ​ໃຫ້​ກວ້າງ​ຂວາງ, ກະ​ກຽມ​ຄວາມ​ພ້ອມ​ທຸກ​ດ້ານ​ເພື່ອ​ຮອງ​ຮັບ​ໃຫ້​ແກ່​ການ​ເປີດ​ທາງ​ລົດ​ໄຟ​ເຊີ່ງ​ມີ​ສະ​ຖາ​ນີ​ໃຫຍ່​ຢູ່​ເມືອງວັງ​ວຽງ ໃນ​ທ້າຍ​ປີ​ນີ້, ສືບ​ຕໍ່​ການ​ໂຄ​ສະ​ນາ​ສຶກ​ສາ​ອົບ​ຮົມ​ໃຫ້​ປະ​ຊາ​ຊົນ​ບັນ​ດາ​ເຜົ່າ​ໃນ​ທົ່ວ​ເມືອງ​ເປັນ​ເຈົ້າ​ການ​ໃນ​ການ​ຕ້ານ ແລະ ສະ​ກັດ​ກັ້ນ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ 19 ຢູ່​ພາຍ​ໃນ​ເມືອງ ເພື່ອ​ເຮັດ​ໃຫ້​ສະ​ພາບ​ຄືນ​ສູ່​ປົກ​ກະ​ຕິ​ເປັນ​ກ້າວໆ.

ຕອນ​ທ້າຍ ທີ່​ປະ​ຊຸມ​ຍັງ​ໄດ້​ຮັບ​ຟັງ​ການ​ໂອ້​ລົມ​ຂອງ​ ທ່ານ ບຸນ​ຈັນ ມາ​ລາ​ວົງ ເລ​ຂາ​ພັກ​ເມືອງ ເຈົ້າ​ເມືອງ​ຕື່ມ​ອີກ. ເຊີ່ງ​ທ່ານ​ໄດ້​ຊີ້​ນຳ​ໃຫ້​ບັນ​ດາ​ສະ​ຫາຍ​ໃນ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ເລ​ຂາ​ຄະ​ນະ​ພັກ​ຮາກ​ຖານ ແລະ ເລ​ຂາ​ໜ່ວຍ​ພັກ​ທີ່​ເຂົ້າ​ຮ່ວມ​ຈົ່ງ​ໄດ້​ເຊີດ​ຊູ​ຄວາມ​ຮັບ​ຜິດ​ຊອບ​ຂອງ​ຕົນ​ຂຶ້ນ ເພື່ອ​ນຳ​ເອົາ​ເນື້ອ​ໃນ​ຈິດ​ໃຈ​ຂອງກອງ​ປະ​ຊຸມ​ຄັ້ງ​ນີ້​ໄປ​ຈັດ​ຕັ້ງ​ຜັນ​ຂະ​ຫຍາຍ ​ໃຫ້​ເກີດ​ຜົນ​ຢູ່​ໃນ​ຂົງ​ເຂດ​ວຽກ​ງານ​ຂອງ​ຕົນ​ຮັບ​ຜິດ​ຊອບ. ກອງ​ປະ​ຊຸມ​ໄດ້​ດຳ​ເນີນ​ໄປ​ເປັ​ນ​ເວ​ລາ 1 ວັນ​ເຕັມ.