ກອງ​ປະ​ຊຸມ​ຄົບ​ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ​ເມືອງວັງ​ວຽງ​ຄັ້ງ​ທີ 2 ສະ​ໄໝ​ທີ VII

ໃນ​ຕອນ​ເຊົ້າ​ຂອງວ​ັນ​ທີ 16 ມີ​ຖ​ຸ​ນາ 2021 ນີ້​ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ ສະ​ຫະ​ພ​ັນ​ແມ່​ຍິງ​ເມືອງວັງ​ວຽງ​ໄດ້​ເປີດກອງ​ປະ​ຊຸມ​ຄົບ​ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ​ເມືອງວັງ​ວຽງ​ຄັ້ງ​ທີ 2 ສະ​ໄໝ​ທີ VII ຂື້ນ. ໃຫ້​ກຽດ​ເຂົ້າ​ຮ່ວມ​ໃນ​ກອງ​ປະ​ຊຸມ​ດັ່ງ​ກ່າວ​ມີ ທ່ານ ບຸນ​ຈັນ ມາ​ລາ​ວົງ ກຳ​ມະ​ການ​ພັ​ກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ທ່ານ ນາງ ສົມ​ພອນ ສຸ​ທຳ​ມະ​ວົງ ຮອງ​ປະ​ທານ​ສະ​ຫະ​ພັນ​ແມ່​ຍິງ​ແຂວງວຽງ​ຈັນ, ມີ​ບັນ​ດາ​ຫົວ​ໜ້າ​ຫ້ອງ​ການ​ຕ່າງໆ ອ້ອມ​ຂ້າງ​ເມືອງ, ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ​ເມືອງ ແລະ ປ​ະ​ທານ​ສະ​ຫະ​ພັນ​ແມ່​ຍິງ​ໜ່ວຍ​ກົມ​ກອງ ແລະ ຮາກ​ຖານ​ບ້ານ​ອ້ອມ​ຂ້າງ​ເມືອງ​ເຂົ້າ​ຮ່ວມ. ໃນ​ພິ​ທີ ທ່ານ ນາງ ພອນ​ໄຊ ຫຼວງວິ​ລາດ ກຳ​ມະ​ການ​ພັກ​ເມືອງ ປະ​ທານ​ສະ​ຫະ​ພັນ​ແມ່​ຍິງ​ເມືອງ​ໄດ້​ຂຶ້ນ​ຜ່ານ​ບົດ​ສະ​ຫຼຸບ​ການ​ເຄື່ອນ​ໄຫວ​ວຽກ​ງານ​ຂອງ​ສະ​ຫະ​ພັນ​ແມ່​ຍິງ​ເມືອງ​ໄລ​ຍະ​ໜຶ່ງ​ປີ​ຜ່ານ​ມາ​ ໂດຍ​ຍົກ​ໃຫ້​ເຫັນ​ຜົນ​ງານ​ທີ່​ພົ້ນ​ເດັ່ນ​ທີ່​ສະ​ຫະ​ພັນ​ແມ່​ຍິງ​ເມືອງວັງ​ວຽງ​ຍາດ​ມາ​ໄດ້​ໃນ​ການ​ປັບ​ປຸງ​ລະ​ບົບ​ການ​ຈັດ​ຕັ້ງ​ຂອງ​ຕົນ​ຢູ່​ຮາກ​ຖານ ສາ​ມາດ​ປະ​ເມີນ​ ແລະ ຮັບ​ຮອງ​ໜ່ວຍ​ສະ​ຫະ​ພັນ​ແມ່​ຍິງ 3 ດີ ຮອບ​ທີ 3 ແລະ ຮອບ​ທີ 4, ໃນ​ນີ້​ມີ​ໜ່ວຍ​ກົມ​ກອງ 17 ໜ່ວຍ, ໜ່ວຍ​ຮາກ​ຖານ​ບ້ານ 32 ໜ່ວຍ, ເອື້ອຍ​ນ້ອງ​ແມ່​ຍິງ​ໄດ້​ປະ​ກອບ​ສ່ວນ​ເຂົ້າ​ໃນ​ກິດ​ຈະ​ກຳ​ການ​ເຄື່ອນ​ໄຫວ​ວຽກ​ງານ​ຕ​່າງໆ​ ຂອງ​ສັງ​ຄົມ​ຢຸ່​ທັງ​ຮາກ​ຖານ​ບ້ານ ແລະ ສຳ​ນັກ​ງານ​ອົງ​ການ​ຕ່າງໆ ໄດ້​ເປັນ​ຢ່າງ​ດີ, ສາ​ມາດ​ສ້າງ​ໄດ້​ບຸກ​ຄະ​ລາ​ກອນ​ເຂົ້າ​ສັງ​ກັດ​ຢູ່​ໃນ​ການ​ນຳ​ໃນ​ຂັ້ນ​ຕ່າງ​ໆ ໃນ​ແຕ່​ລະ​ປີ​ເພີ່ມ​ຂຶ້ນ. ສຳ​ລັບ​ທິດ​ທາງ​ແຜນ​ການ​ໃນ​ຕໍ່​ໜ້າ​ແມ່ນ​ຈະ​ໄດ້​ສຸມ​ໃສ່​ການ​ສຶກ​ສາ​ອົບ​ຮົມ​ການ​ເມືອງ​ແນວ​ຄິດ​ໃຫ້​ເອື້ອຍ​ນ້ອງ​ແມ່​ຍິງ​ຢູ່​ໃນ​ແຕ່​ລະ​ໜ່ວຍ​ກົມ​ກອງ​ຮາກ​ຖານ​ໃຫ້​ມີ​ຄວາມ​ຮັບ​ຮູ້​ເຂົ້າ​ໃຈ​ຢ່າງ​ເລິກ​ເຊີງ​ຕໍ່​ແນວ​ທາງ​ນະ​ໂຍ​ບາຍ​ຂອງ​ພັກ-ລັດ ລະ​ບຽບ​ກົດໝາຍ​ບ້ານ​ເມືອງ ແລະ ເປັນ​ເຈົ້າ​ການ​ເຂົ້າ​ຮ່ວມ​ໃນ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ ແລະ ເສດ​ຖະ​ກິດ​ຄອບ​ຄົວ​ໃຫ້​ເຂັ້ມ​ແຂງ, ຮັກ​ສາ​ມູນ​ເຊີ້ອ​ອັນ​ດີ​ງາມ​ຂອງ​ຊາດ​ຂອງ​ແມ່​ຍິງ​ລາວ​ໃຫ້​ດີ​ຂຶ້ນ, ເຕົ້າ​ໂຮມ​ຄວາມ​ສາ​ມັກ​ຄີ​ເອື້ອຍ​ນ້ອງ​ແມ່​ຍິງ​ທຸກ​ເຜົ່າ​ຊົນ​ໃຫ້​ເປັນ​ປຶກ​ແຜ່ນ​ແໜ້ນ​ໜາ​ໃນ​ການ​ຊ່ວຍ​ເຫຼືອ​ເຊີ່ງກັນ ແລະ ກັນ, ຄຸ້ມ​ຄອງ​ປົກ​ປ້ອງ​ສິດ​ຜົນ​ປະ​ໂຫຍດ​ຂອງ​ແມ່​ຍິງ ແລະ ເດັກ​ນ້ອຍ, ເອົາ​ໃຈ​ໃສ່​ສຶກ​ສາ​ອົບ​ຮົມ​ລູກ​ເຕົ້າ​ຄອບ​ຄົວ​ຂອງ​ຕົນ​ໃຫ້​ເປັນ​ຄົນ​ຮູ້​ຜູ້​ດີ​ຂອງ​ສັງ​ຄົມ, ສືບ​ຕໍ່​ປັບ​ປຸງ​ລະ​ບົບ​ການ​ຈັດ​ຕັ້ງ​ໃຫ້​ເຂັ້ມ​ແຂງ, ປັບ​ປຸງ​ແບບ​ແຜນ​ວິ​ທີ​ເຮັດ​ວຽກ​ໃຫ້​ດີ​ຂຶ້ນກວ່າ​ເກົ່າ.

ຈາກ​ນັ້ນ, ທ່ານ ນາງ ສຳ​ລວຍ ສຸກ​ຂະ​ວົງ ຮອງ​ປະ​ທານ​ສະ​ຫະ​ພັນ​ແມ່​ຍິງ​ເມືອງ ກໍ​ໄດ້​ຜ່ານ​ບົດ​ສຳຫຼວດ​ການ​ນຳ​ພາ​ລວມ​ໂດຍ​ໄດ້​ຕີ​ລາ​ຄາ​ຄືນ​ການ​ຈັດ​ຕັ້ງ​ປະ​ຕິ​ບັດ​ແຜນ​ງານ ແລະ ໂຄງ​ການ​ຕ່າງໆ ເຊີ່ງ​ມີ 6 ແຜນ​ງານ 16 ໂຄງ​ການ ທີ່​ສະ​ຫະ​ພັນ​ແມ່​ຍິງ​ລາວ​ໄດ້​ກຳ​ນົດ​ອອກ​ໃນ​ໄລ​ຍະ​ຜ່ານ​ມາ. ໂດຍ​ຍົກ​ໃຫ້​ເຫັນ​ດ້ານ​ດີ, ດ້ານ​ອ່ອນ​, ຂໍ້​ຄົງ​ຄ້າງ ແລະ ບົດ​ຮຽນ​ທີ່​ຖອດ​ຖອນ​ໄດ້ ເພື່ອ​ນຳ​ໄປ​ປັບ​ປຸງ​ແກ້​ໄຂ​ໃນ​ຕໍ່​ໜ້າ​ເພື່ອ​ໃຫ້​ທີ່​ປະ​ຊຸມ​ໄດ້​ປະ​ກອບ​ຄຳ​ຄິດ​ຄຳ​ເຫັນ​ເຂົ້າ​ໃສ່.

ຕອນ​ທ້າຍ ທີ່​ປະ​ຊຸມ​ຍັງ​ໄດ້​ຮັບ​ຟັງ​ການ​ປະ​ກອບ​ຄຳ​ຄິດ​ຄຳ​ເຫັນ​ຊີ້​ນຳ​ຂອງ​ທ່ານ ນາງ ສົມ​ພອນ ສຸ​ທຳ​ມະ​ວົງ ຮອງ​ປະ​ທານ​ສະ​ຫະ​ພັນ​ແມ່​ຍິງແຂວງວຽງ​ຈັນ ແລະ ທ່ານ ບຸນ​ຈັນ ມາ​ລາ​ວົງ ເຈົ້າ​ເມືອງ​ໆ​ວັງ​ວຽງ​ຕໍ່​ທີ່​ປະ​ຊຸມ​ຕື່ມ​ອີກ. ເຊີ່ງ​ແຕ່​ລະ​ທ່ານ​ສ່ວນຫຼາຍ​ກໍ​ໄດ້​ເນັ່ງ​ໃຫ້​ການ​ຈັດ​ຕັ້ງ​ສະ​ຫະ​ພ​ັນ​ແມ່​ຍິງ​ເມືອງ​ເອົາ​ໃຈ​ໃສ່​ໃນ​ການ​ສືບ​ຕໍ່​ປັບ​ປຸງ​ການ​ຈັດ​ຕັ້ງ​ຂອງ​ຕົນ​ໃຫ້​ເຂັ້ມ​ແຂງ​ເພ​ື່ອ​ປັບ​ຕົວ​ໃຫ້​ແທດ​ເໝາະ​ກັບ​ສະ​ພາບ​ຈຸດ​ພິ​ເສດ​ຂອງ​ເມືອງ, ສືບ​ຕໍ່​ແກ້​ໄຂ​ຂໍ້​ຄົງ​ຄ້າງ​ຕ່າງໆ ໃຫ້​ສຳ​ເລັດ, ເອົາ​ໃຈ​ໃສ່​ສຶກ​ສາ​ອົບ​ຮົມ​ລູກ​ເຕົ້າ​ຄອບ​ຄົວ​ໃນ​ການ​ຕ້ານ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ 19 ຢູ່​ພາຍ​ໃນ​ເມືອງ​ໃຫ້​ໄດ້​ຮັບ​ຜົນ​ດີ.