ສະ​ພາບ​ນ້ຳ​ຖ້ວມ​ຢູ່​ເມືອງວັງ​ວຽງ

ຝົນ​ຕົກ​ລິນ​ຕິດ​ຕໍ່​ກັນ​ເປັນ​ເວ​ລາຫຼາຍ​ວັນ ເລີ່ມ​ແຕ່​ວັນ​ທີ 10 ມີ​ຖຸ​ນາ ເປັນ​ຕົ້ນ​ມາ, ໄດ້​ເຮັດ​ໃຫ້​ນ້ຳ​ຊອງ​ເພີ່ມ​ຂຶ້ນ​ຢ່າງ​ໄວ​ວາ ນ້ຳ​ລົ້ນ​ຝັ່ງ​ຖ້ວມ​ບ້ານ​ເຮືອນ​ຂອງ​ປະ​ຊາ​ຊົນ​ທີ່​ອາ​ໄສ​ຢູ່​ຕາມ​ແຄມ​ຝັ່ງ​ນ້ຳ ແລະ ສະ​ຖານ​ທີ່​ບ່ອນ​ຕ່ຳ​ເຊີ່ງ​ເປັນ​ສະ​ຖານ​ທີ່​ແຫຼ່ງ​ທ່ອງ​ທ່ຽວ​ຂອງ​ເມືອງ​ເຮັດ​ໃຫ້​ບ້ານ​ເຮືອນ ແລະ ຊັບ​ສິນ​ຂອງ​ປ​ະ​ຊ​າ​ຊົນ​ຖືກ​ເສຍ​ຫາຍກວມ​ເອົາ 7 ບ້ານ ຄື: ບ້ານ​ສະ​ຫວ່າງ, ບ້ານ​ວຽງ​ແກ້ວ, ບ້ານ​ເມືອງ​ຊອງ, ບ້ານ​ວັງ​ຊອງ, ບ້ານ​ວຽງ​ໄຊ, ບ້ານ​ຫ້ວຍ​ສະ​ເຫງົ້າ ແລະ ບ້ານ​ຂັນ​ໝາກ.

ໃນ​ນີ້​ຂົວ​ສີ​ສົ້ມ​ຂ້າມ​ຜ່ານ​ນ້ຳ​ຊອງ​ຢູ່​ສະ​ຖານ​ທີ່​ທ່ອງ​ທ່ຽວ​ຖ້ຳ​ຈັງ​ວັງ​ວຽງ​ໄດ້​ຖືກ​ນ້ຳ​ພັດຫຼຸດ​ໂຊມ​ລົງ​ກາງ​ນ້ຳ ແລະ ມີ​ຮ້ານ​ອາ​ຫານ​ຈຳ​ນວນ​ໜຶ່ງ​ທີ່​ປຸກ​ຢູ່​ແຄມ​ຝັ່ງ​ນ້ຳ​ຊອງ​ໄດ້​ຖືກ​ນ້ຳ​ເຊາະ​ເຈື່ອນ​ພັງ​ລົງ​ກາງ​ນ້ຳ. ສ່ວນ​ຢູ່​ເສັ້ນ​ທາງ​ເລກ​ທີ 13 ເຂດ​ບ້ານ​ຂັນ​ໝາກ (ໂຮງ​ງານ​ຊີ​ມັງ) ລົດ​ນ້ອຍ​ບໍ່​ສາ​ມາດ​ຜ່ານ​ໄປ​ໄດ້​ເພາະ​ນ້ຳ​ຖ້ວ​ມ​ເປັນ​ບໍ​ລິ​ເວນກວ້າງ. ມາ​ຮອດ​ວັນ​ທີ 15 ມີ​ຖຸ​ນາ ນ້ຳ​ຊອງ​ຈຶ່ງ​ໄດ້​ເລີ່ມ​ບົກ​ແຫ້ງ​ຫຼຸດ​ລົງ. ສ່ວນ​ມູນ​ຄ່າ​ການ​ເສຍ​ຫາຍ​ໃນ​ຄັ້ງ​ນີ້ ພາກ​ສ່ວນ​ທີ່​ກ່ຽວ​ຂ້ອງ​ຂອງ​ເມືອງ​ຍັງ​ຢູ່​ໃນ​ໄລ​ຍະ​ການ​ລົງ​ປະ​ເມີນ.