ຊີ້​ແຈງ​ກ່ຽວ​ກັບ​ຂ່າວ​ອະ​ກຸ​ສົນໂຄງ​ການ​ກໍ່​ສ້າງ​ບ້ານ​ພັກ​ຄົນ​ສະ​ລາ ຢູ່​ບ້ານ​ຫ້ວຍ​ງາມ ເມືອງວັງ​ວຽງ

​ໃນ​ວັນ​ທີ 28 ມັງ​ກອນ 2019 ຜ່ານ​ມາ​ໄດ້​ມີ​ຜູ້​ໃສ່​ຊື່​ເຟ​ສ​ບຸກວ່າ: Sangkhane Phachanthavong ໄດ້​ໂພ​ສ​ຂ່າວ​ລົງ​ທາງ​ເຟ​ສ​ບຸກ​ຂອງ​ຕົນ​ໂດຍ​ອ້າງວ່າ: ປະ​ຊາ​ຊົນ​ບ້ານ​ຫ້ວຍ​ງາມ ເມືອງວັງ​ວຽງ ໄດ້​ຝາກ​ມາ​ໃຫ້​ຊ່ວຍ​ເຫຼືອ ແຈ້ງ​ໃຫ້​ຫ້ອງ​ການ​ລັດ​ຖະ​ບານ ເພື່ອກວດ​ສອບ​ພື້ນ​ທີ່​ເຂດ​ບ້ານ​ຫ້ວຍ​ງາມ ເມືອງວັງ​ວຽງ ທີ່​ຖືກ​ໂຄງ​ການ​ກໍ່​ສ້າງ​ບ້ານ​ພັກ​ຄົນ​ສະ​ລາ ເຊີ່ງ​ທ່ານ​ເຈົ້າ​ເມືອງໆ​ວັງ​ວຽງ​ໄດ້​ອອກ​ແຈ້ງ​ການ​ບັງ​ຄັບ​ໃຫ້​ປະ​ຊາ​ຊົນ​ຮັບ​ເອົາ​ເງິນ​ຄ່າ​ຊົດ​ເຊີຍ​ທີ່​ດິນ 12,000 ກີບ/ຕາ​ແມັດ, ຖ້າ​ຜູ້​ໃດ​ບໍ່​ຮັບ​ເອົາ​ໃຫ້​ຖື​ວ່າ​ສະຫຼະ​ສິດ ເຮັດ​ໃຫ້ຫຼາຍ​ຄົນ​ໄດ້​ສະ​ແດງ​ຄວາມ​ຄິດ​ເຫັນ​ຕ່າງໆນາໆ ຢ່າງ​ສາ​ລະ​ພັດ​ຕໍ່​ການ​ນຳ​ຂອງ​ເມືອງວັງ​ວຽງ.

ນອກ​ນີ້ ທາງ​ເມືອງວັງ​ວຽງ​ຍັງ​ໄດ້​ຮັບ​ໜັງ​ສື​ທາງ​ລັດ​ຖະ​ການຈາກ​ຫ້ອງ​ວ່າການ​​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ ​ສະ​ບັບ​ເລກ​ທີ 58/ຫ​ສນຍ ລົງ​ວັນ​ທີ 7/2/2019 ຕໍ່​ກັບ​ຄຳ​ສະ​ເໜີ​ຂອງ​ປະ​ຊາ​ຊົນ​ຜ່ານ​ທາງ​ໂທ​ລະ​ສັບ​ສາຍ​ດ່ວນ 1516 ຂອງ​ລັດ​ຖະ​ບານ ເຊີ່ງ​ມີ​ເນື້ອ​ໃນ​ວ່າ: ປະ​ຊາ​ຊົນ​ບ້ານ​ຫ້ວຍ​ງາມ​ຖ​ືກ​ໂຄງ​ການ​ບ້ານ​ພັກ​ຄົນ​ສະ​ລາ ເຂດ​ທາງ​ນ້ຳ​ຊອງ ແລະ ທາງ​ໂຄງ​ການ​ຈະ​ຈ່າຍ​ຄ່າ​ຊົດ​ເຊີຍ​ທີ່​ດິນ​ໃຫ້​ປະ​ຊາ​ຊົນ​ຕາ​ແມັດ​ລະ 12,000 ກີບ ເຮັດ​ໃຫ້​ປະ​ຊາ​ຊົນ​ບໍ່​ເຫັນ​ດີ​ຕາມ​ແຈ້ງ​ການ​ຂອງ​ເຈົ້າ​ເມືອງ, ທາງ​ເມືອງ​ໄດ້​ບອກວ່າ: ລາ​ຄາ​ຊົດ​ເຊີຍ​ 12,000 ກີບນີ້ ຖ້າ​ຄອບ​ຄົວ​ໃດ​ບໍ່​ຕົກ​ລົງ​ເອົາ​ຖື​ວ່າ​ສະ​ຫຼະ​ສິດ ປະ​ຈຸ​ບັນ​ປະ​ຊ​າ​ຊົນ​ເດືອດ​ຮ້ອນຫຼາຍ, ຖ້າ​ຖືກ​ໂຄງ​ການ​ແທ້ ປະ​ຊາ​ຊົນ​ໄດ້​ຮັບ​ຜົນ​ກະ​ທົບ​ຢ່າງ​ໜັກ, ບໍ່​ມີ​ບ່ອນ​ທຳ​ມາ​ຫາ​ກິນ ແລະ ທາງ​ພາກ​ລັດ​ຈະ​ແກ້​ໄຂ​ແນວ​ໃດ, ອີກ​ດ້ານ​ໜຶ່ງ​ຢາກ​ຮູ້​ວ່າ​ເປັນ​ພັກ-ລັດ​ແທ້ຫຼື​ບໍ? ຫຼື​ເປັນ​ພຽງ​ແຜນ​ການ​ຂອງ​ກຸ່ມ​ບຸກ​ຄົນ​ໃດ​ໜຶ່ງ​ເທົ່າ​ນັ້ນ. ກະ​ລຸ​ນາ​ສົ່ງ​ຄຳ​ຕອບ​ໃຫ້​ຫ້ອງ​ການ​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ​ໃນ​ເວ​ລາ 10 ວັນ​ລັດ​ຖະ​ການ​ພາຍຫຼັງ​ໄດ້​ຮັບ​ໜັງ​ສື​ລັດ​ຖະ​ບານ.

ຕໍ່​ກັບ​ບັນ​ຫາ​ດັ່ງ​ກ່າວ​ມາ​ຮອດ​ວັນ​ທີ 20 ກຸມ​ພາ 2019 ນີ້ ຫ້ອງວ່າ​ການ​ປົກ​ຄອງ​ແຂວງວຽງ​ຈັນ ໄດ້​ສົ່ງ​ພະ​ນັກ​ງານ​ວິ​ຊາ​ການ​ຂອງ​ຕົນ​ລົງ​ມາ​ສົມ​ທົບ​ການ​ນຳ​ຂອງ​ເມືອງ ເພື່ອ​ເອົາ​ຂໍ້​ມູນ​ຕິດ​ຕາມກວດ​ກາ​ຫາ​ໂຄງ​ການ​ດັ່ງ​ກ່າວ​ຕາມ​ໜັງ​ສື​ທາງ​ລັດ​ຖະ​ການ​ຂອງ​ຫ້ອງ​ວາການ​​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ ເຊີ່ງ​ໄດ້​ຈັດ​ກອງ​ປະ​ຊຸມ​ຂຶ້ນ​ຢູ່​ທີ່​ຫ້ອງ​ການ​ເຈົ້າ​ເມືອງໆ​ວັງ​ວຽງ ໂດຍ​ມີ​ການ​ຈັດ​ຕັ້ງ​ອຳ​ນາດ​ການ​ປົກ​ຄອງ​ບ້ານ​ຫ້ວຍ​ງາມ​ເຂົ້າ​ຮ່ວມ.

​ຜ່ານ​ກາ​ນ​ຄົ້ນ​ຄວ້າ​ຢູ່​ທີ່​ຫ້ອງ​ປະ​ຊຸມ​ຕໍ່​ກັບ​ໂຄງ​ການ​ທີ່​ໄດ້​ກ່າວ​ມາ​ນີ້​ລະ​ຫວ່າງ​ການ​ນຳ​ຂອງ​ເມືອງ ແລະ ການ​ຈັດ​ຕັ້ງ​ອຳ​ນາດ​ການ​ປົກ​ຄອງ​ບ້ານ​ຫ້ວຍ​ງາມ ແມ່ນ​ບໍ່​ມີ​ຜູ້​ໃດ​ຮັບ​ຮູ້​ກັບ​ໂຄງ​ການ​ດັ່ງ​ກ່າວ​ນີ້ ແລະ ໂຄງ​ການ​ດັ່ງ​ກ່າວ​ນີ້​ກໍ​ບໍ່​ມີ​ມູນ​ຄວາມ​ຈິງ​ຄື​ດັ່ງ​ບຸກ​ຄົນ​ທີ່​ໄດ້​ກ່າວ​ອ້າງ​ມາ​ຢູ່​ຂ້າງ​ເທິງ​ແຕ່​ຢ່າງ​ໃດ, ສະ​ນັ້ນ ການ​ນຳ​ຂອງ​ເມືອງວັງ​ວຽງ ແລະ ບ້ານ​ຫ້ວຍ​ງາມ ຈຶ່ງ​ໄດ້​ສ້າງ​ບົດ​ບັນ​ທຶກ​ຮ່ວມ​ກັນ​ໄວ້​ເປັນຫຼັກ​ຖານ ເຊີ່ງ​ການ​ກະ​ທຳ​ດັ່ງ​ກ່າວ​ແມ່ນ​ກຸ່ມ​ຄົນ​ທີ່​ບໍ່​ຫວັງ​ດີ​ໄດ້​ສ້າງ​ຂ່າວ​ຂຶ້ນ ເພື່ອ​ປັ່ນ​ປ​່ວນ​ສັງ​ຄົມ ໂຄ​ສະ​ນາ​ໃສ່​ຮ້າຍ​ປ້າຍ​ສີ​ການ​ນຳ​ຂອງ​ເມືອງ ໄປ​ໃນ​ທາງ​ທີ່​ບໍ່​ຖືກ​ຕ້ອງ ເຊີ່ງ​ຝຶນ​ຕໍ່​ລະ​ບຽບ​ກົດ​ໝາຍ​ບ້ານ​ເມືອງ ໂດຍ​ສະ​ເພາະ​ແມ່ນ​ກົດ​ໝາຍ​ວ່າ​ດ້ວຍ ການ​ຕ້ານ ແລະ ສະ​ກັດ​ກັ້ນ​ອາ​ຊະ​ຍາ​ກຳ​ທາງ​ລະ​ບົບ​ຄອມ​ພິວ​ເຕີ. ດັ່ງ​ນັ້ນ ຕໍ່​ກັບ​ບັນ​ຫາ​ດັ່ງ​ກ່າວ​ນີ້​ໄດ້​ເປັນ​ບົດ​ຮຽນ​ອັນ​ໜຶ່ງ​ໃຫ້​ແກ່​ຜູ້​ທີ່​ນຳ​ໃຊ້​ສື່​ສັງ​ຄົມ​ອອນ​ລາຍ​ທັງຫຼາຍ ກ່ອນ​ຈະ​ໂພ​ສ, ແຊ ແລະ ສະ​ແດງ​ຄວາມ​ຄິດ​ເຫັນ​ອັນ​ໃດ​ໜຶ່ງ ຜ່ານ​ທາງ​ສື່​ສັງ​ຄົມ​ອອນ​ລາຍ​ຕ້ອງ​ໄດ້​ຄົ້ນ​ຄິດ​ຕຶກ​ຕອງ ພິ​ຈາ​ລະ​ນາ​ໃຫ້​ຖີ່​ຖ້ວນ​ມີ​ເຫດ​ມີ​ຜົນ​ເສຍ​ກ່ອນ ບໍ່​ດັ່ງ​ນັ້ນ ​ທ່ານຈະ​ກິນ​ແໜງ​ໃຈ​ຕາມ​ທີ່ຫຼັງ.