ປາຖະກະຖາວັນສ້າງຕັ້ງສະຫະພັນແມ່ຍິງລາວ ແລະ ຮັບຮອງ 3 ໜ່ວຍກົມກອງ ແລະ 9 ບ້ານເປັນໜ່ວຍ 3 ດີ

ໃນ​ຕອນ​ເຊົ້າ​ ວັນ​ທີ 28 ກໍ​ລະ​ກົດ ນີ້​ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ ໄດ້​ຈັດ​ພິ​ທີ​ປາ​ຖະ​ກະ​ຖາ ວັນ​ສ້າງ​ຕັ້ງ​ສະ​ຫະ​ພັນ​ແມ່​ຍິງ​ລາວ​ຄົບ​ຮອບ 65 ປີ, ວັນ​ຄ້າຍ​ວັນ​ເກີດ​ປະ​ທານ ສຸ​ພາ​ນຸ​ວົງ ຄົບ​ຮອບ 111 ປີ ແລະ ຮັບ​ຮອງ​ເອົາ​ໜ່ວຍ​ສະ​ຫະ​ພັນ​ແມ່​ຍິງ 3 ໜ່ວຍ​ກົມ​ກອງ ແລະ 9 ບ້ານ ເປັນ​ໜ່ວຍ 3 ດີ.

ໂດຍ​ການ​ໃຫ້​ກຽດ​ເຂົ້າ​ຮ່ວມ​ເປັນ​ປະ​ທານ​ຂອງ​ທ່ານ ສຸ​ວຽງ​ທອງ ວົງ​ຈຳ​ປາ ຮອງ​ເລ​ຂາ​ພັກ​ເມືອງ ຮອງ​ເຈົ້າ​ເມືອງໆ​ວັງ​ວຽງ, ທ່ານ ນ. ປ້າ​ສຸມ ຈິດ​ຕະ​ວົງ ຕາງ​ໜ້າ​ແມ່​ຍິງ​ອາ​ວຸ​ໂສ ອາ​ດີດ​ຄະ​ນະ​ການ​ນຳ​ເມືອງວັງ​ວຽງ, ທ່ານ ນາງ ຕູ່ ນັນ​ທະ​ວົງ ຮອງ​ປະ​ທານ​ສະ​ຫະ​ພັນ​ແມ່​ຍິງ​ເມືອງ, ນອກ​ນີ້ ຍັງມີ​ບັນ​ດາ​ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ​ເມືອງ, ແຂກ​ຖືກ​ເຊີນ, ປະ​ທານ​ສະ​ຫະ​ພັນ​ແມ່​ຍິງ​ໜ່ວຍ​ຕ່າງໆ ອ້ອມ​ຂ້າງ​ເມືອງ ແລະ ສະ​ມາ​ຊິກ​ແມ່​ຍິງ​ຈາກ 3 ກົມ​ກອງ ແລະ 9 ບ້ານ​ເປົ້າ​ໝາຍ​ທີ່​ຖືກ​ຮັບ​ຮອງ​ເຂົ້າ​ຮ່ວມ.

ໃນ​ພິ​ທີ​ຕົວ​ແທນ​ຂອງ​ສະ​ຫະ​ພັນ​ແມ່​ຍິງ​ຈາກ​ 3 ກົມ​ກອງ ແລະ 9 ບ້ານໄດ້​ຂຶ້ນ​ຜ່ານ​ບົດ​ສະຫຼຸບ​ການ​ເຄື່ອນ​ໄຫວ​ຈັດ​ຕັ້ງ​ປະ​ຕິ​ບັດ​ຂໍ້​ແຂ່ງ​ຂັນ 3 ດີ​ຂອງ​ຕົນ​ໃນ​ໄລ​ຍະ​ຜ່ານ​ມາ ເຊີ່ງ​ຜ່ານ​ການ​ປະ​ເມີນ​ເຫັນ​ວ່າ​ບັນ​ດາ​ໜ່ວຍ​ສະ​ຫະ​ພັນ​ແມ່​ຍິງ​ເຫຼົ່າ​ນີ້​ໄດ້​ມີ​ເງື່ອນ​ໄຂ​ຄົບ​ຖ້ວນ​ໃນ​ການ​ຮັບ​ຮອງ​ສືບ​ຕໍ່​ເປັນ​ໜ່ວຍ 3 ດີ ປະ​ກອບ​ດ້ວຍ 3 ກົມ​ກອງ​ຄື: ໂຮງ​ຮຽ​ນ​ປະ​ຖົມ​ບ້ານ​ໂພນ​ຄຳ, ໂຮງ​ຮຽ​ນ ມ.ຕົ້ນ ວັງ​ວຽງ, ໂຮງ​ຮຽ​ນ​ປ​ະ​ຖົມ​ນາ​ທອງ ແລະ ອີກ 9 ບ້ານ ຄື: ບ້ານ​ວັງ​ໝ້ຽງ, ບ້ານ​ວຽງ​ໄຊ, ບ້ານ​ຜາ​ທອງ, ບ້ານ​ນາ​ທອງ, ບ້ານ​ປາກ​ເປາະ, ບ້ານ​ວຽງ​ແກ້ວ, ບ້ານ​ນາ​ດ້ວງ, ບ້ານ​ໂພ​ໄຊ ແລະ ບ້ານ​ຜາ​ຕັ້ງ.

ຈາກ​ນັ້ນ ກໍ​ໄດ້​ມອບ​ໃບ​ຢັ້ງ​ຢືນ​ຮັບ​ຮອງ​ເປັນ​ໜ່ວຍ​ສະ​ຫະ​ພັນ​ແມ່​ຍິງ 3 ດີ ຄັ້ງ​ທີ 4 ສະ​ໄໝ​ທີ VII ໂດຍ​ການ​ໃຫ້​ກຽດ​ມອບ​ຂອງ​ທ່ານ ສຸ​ວຽງ​ທອງ ວົງ​ຈຳ​ປາ ຮອງ​ເລ​ຂາ​ພັກ​ເມືອງ. ພ້ອມ​ນີ້​ຕົວ​ແທນ​ແຕ່​ລະ​ໜ່ວຍ​ກໍ​ຍັງ​ໄດ້​ຂຶ້ນ​ຈັບ​ມື​ສຶບ​ຕໍ່​ປະ​ຕິ​ບັດ​ຂໍ້​ແຂ່ງ​ຂັນ 3 ດີ ໃນ​ຮອບ​ຕໍ່​ໄປ​ຕື່ມ​ອີກ.

ພາຍຫຼັງ​ສຳ​ເລັດ​ການມອບ​ໃບ​ຢັ້ງ​ຢືນ​ຮັ​ບ​ຮ​ອງ​ແລ້ວ ໃນ​ພິ​ທີ​ຍັງ​ໄດ້​ຮັບ​ຟັງ​ການ​ປາ​ຖະ​ກະ​ຖາ​ວັນ​ສ້າງ​ຕັ້ງ​ສະ​ຫະ​ພັນ​ແມ່​ຍິງ​ລາວ​ຄົບ​ຮອບ 65 ປີ ແລະ ວັນ​ຄ້າຍ​ວັນ​ເກີດ​ຂອງ​ທ່ານ​ປ​ະ​ທານ ສຸ​ພາ​ນຸ​ວົງ ຄົບ​ຮອບ 111 ປີ​ຕື່ມ​ອີກ ໂດຍ​ແມ່ນ​ທ່ານ ສຸ​ວຽງ​ທອງ ວົງ​ຈຳ​ປາ ຮອງ​ເລ​ຂາ​ພັກ​ເມືອງ ຮອງ​ເຈົ້າ​ເມືອງ ເປັນ​ຜູ້​ປາ​ຖະ​ກະ​ຖາ ເຊີ່ງ​ທ່ານ​ໄດ້​ຍົກ​ໃຫ້​ເຫັນ​ເຖິງ​ມູນ​ເຊື້ອ ແລະ ຜົນ​ງານ​ແຕ່​ລະ​ດ້ານ​ທີ່​ສູນ​ກາ​ງ​ສະ​ຫະ​ພັນ​ແມ່​ຍິງ​ລາວ​ຍາດ​ມາ​ໄດ້​ໃນ​ແຕ່​ລະ​ໄລ​ຍະ​ຜ່ານ​ມາ​ຈົນ​ເຖິງ​ປະ​ຈຸ​ບັນ. ນອກ​ນີ້​ຍັງ​ໄດ້​ເລົ່າ​ຄືນ​ປະ​ຫວັດ​ຄວາມ​ເປັນ​ມາ​ຂອງ​ທ່ານ ສຸ​ພາ​ນຸ​ວົງ ວິ​ລະ​ບູ​ລຸດ​ແຫ່ງ​ຊາດ ອະ​ດີດ​ປະ​ທານ​ປະ​ເທດ​ຜູ້​ທຳ​ອິດ​ຂອງ ສ ປ ປ ລາວ. ຊີ​ວິດ​ການ​ເຄື່ອນ​ໄຫວ ແລະ ພາ​ລະ​ກິດ​ປະຕິ​ວັດ​ຂອງ​ເພິ່ນ​ໃນ​ການ​ເຂົ້າ​ຮ່ວມ​ການ​ປະ​ຕິ​ວັດ​ຊາດ​ປະ​ຊາ​ທິ​ປະ​ໄຕ​ຕໍ່​ສູ້​ກັບ​ພວກ​ລ່າ​ເມືອງ​ຂຶ້ນ​ແບບ​ເກົ່າ, ແບບ​ໃໝ່​ທີ່​ມາ​ຮຸກ​ຮານ ໂດຍ​ຍົກ​ໃຫ້​ເຫັນ​ຜົນ​ງານ, ຄຸນ​ສົມ​ບັດ​ສິນ​ທຳ​ປະ​ຕິ​ວັດ ແລະ ຄຸນ​ງາມ​ຄວາມ​ດີ​ຂອງ​ເພິ່ນ​ທີ່​ໄດ້​ອຸ​ທິດ​ໃຫ້​ແກ່​ປະ​ເທດ​ຊາດ ເພື່ອ​ສຶກ​ສາ​ໃຫ້​ຄົນ​ລຸ້ນ​ໃໝ່​ກໍ​ຄື​ເອື້ອຍ​ນ້ອງ​ແມ່​ຍິງ​ທຸກ​ຄົນ​ໄດ້​ນຳ​ໄ​ປ​ສຶກ​ສາຮ່​ຳ​ຮຽນ ເພື່ອ​ພັດ​ທະ​ນາ​ຕົນ​ເອງ.