ທາບ​ທາມ​ບຸກ​ຄະ​ລາ​ກອນ​ເຂົ້າ​ຄັດ​ເລືອກ​ຄະ​ນະ​ບໍ​ລິ​ຫານ​ງານ​ພັກ​ແຂວງວຽງ​ຈັນ ຮອບ​ທີ I

ໃນ​ຕອນ​ເຊົ້າ​ຂອງວັນ​ທີ 24 ກໍ​ລະ​ກົດ 2020 ນີ້ ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ ໄດ້​ຈັດ​ກອງ​ປະ​ຊຸມ​ທາບ​ທາມ​ບຸກ​ຄະ​ລາ​ກອນ​ເຂົ້າ​ຄັດ​ເລືອກ​ເຂົ້າ​ໃນ​ຄະ​ນະ​ບໍ​ລິ​ຫານ​ງານ​ພັກ​ແຂວງວຽງ​ຈັນ ຮອບ​ທີ I ຂຶ້ນ. ໂດຍ​ການ​ເປັນ ປະ​ທານຂອງ ທ່ານ ບຸນ​ເພັງ ສາຍ​ນໍ​ລະ​ດີ ຮອງ​ເລ​ຂາ​ພັກ​ແຂວງ ປະ​ທານ​ສະ​ພາ​ປະ​ຊາ​ຊົນ​ແຂວງວຽງ​ຈັນ, ໂດຍ​ການ​ເຂົ້າ​ຮ່ວມ​ຂອງ​ທ່ານ ບຸນ​ຈັນ ມາ​ລາ​ວົງ ເລ​ຂາ​ພັກ​ເມືອງ ເຈົ້າ​ເມືອງໆ​ວ​ັງ​ວຽງ, ມີ​ບັນ​ດາ​ທ່ານ​ໃນ​ຄະ​ນະ​ປະ​ຈຳ​ພັກ​ເມືອງ, ກຳ​ມະ​ການ​ພັກ​ເມືອງ, ພະ​ນັກ​ງານ​ອາ​ວຸ​ໂສ​ບຳ​ນານ​ອະ​ດີດ​ການ​ນຳ​ຂອງ​ແຂວງ, ຫົວ​ໜ້າ​ຫ້ອງ​ການ, ຄະ​ນະ​ຫ້ອງ​ການ ແລະ ຫົວ​ໜ້າ​ໜ່ວຍ​ງານ​ຕ່າງໆ ທີ່​ສັງ​ກ​ັດ​ຢູ່​ໃນ​ແຕ່​ລະ​ຫ້ອງ​ການ​ຢູ່​ພາຍ​ໃນ​ເມືອງ​ເຂົ້າ​ຮ່ວມ.

ທ່ານ ບຸນເພັງ ສາຍ​ນໍ​ລະ​ດີ ຮອ​ງ​ເລ​ຂາ​ພັກ​ແຂວງ ໄດ້​ຂຶ້ນ​ຜ່ານ​ເງື່ອນ​ໄຂ​ມາດ​ຖານ​ຂອງ​ຜູ້​ຈະ​ສະ​ມັກ​ເຂົ້າ​ເປັນ​ຄະ​ນະ​ບໍ​ລິ​ຫານ​ງານ​ພັກ​ແຂວງ​ຊຸດ​ໃໝ່​ຕໍ່​ທີ່​ປະ​ຊຸມ, ຈາກ​ນັ້ນ ກໍ​ມີ​ການ​ທາບ​ທາມ​ລົງ​ຄະ​ແນນ​ສຽງ​ແບບ​ປິດ​ລັບ​ຂອງ​ຜູ້​ເຂົ້າ​ຮ່ວມ ເຊີ່ງ​ບຸກ​ຄະ​ລາ​ກອນ​ທີ່​ນຳ​ມາ​ທາບ​ທາມ​ຄັ້ງ​ນີ້​ປະ​ກອບ​ດ້ວຍ​ຄະ​ນະ​ບໍ​ລິ​ຫານ​ງານ​ພັກ​ແຂວງ​ຊຸດ​ເກົ່າ, ເຈົ້າ​ເມືອງ, ຮອງ​ເລ​ຂາ​ພັກ​ເມືອງ, ຮອງ​ເຈົ້າ​ເມືອງ​ຈາກ 11 ເມືອງ​ຂອງ​ແຂວງວຽງ​ຈັນ ນອກ​ນີ້​ກໍ​ແມ່ນ​ບັນ​ດາ​ຫົວ​ໜ້າ​ພະ​ແນກ, ຮອງ​ພະ​ແນກ​ຈາກ​ບັນ​ດາ​ພະ​ແນກ​ການ​ຕ່າງໆ ຂອງ​ແຂວງ. ການ​ທາບ​ທາມ​ຄັ້ງ​ນີ້​ຜູ້​ເຂົ້າ​ຮ່ວມ​ຜູ້​ໜຶ່ງໆ​ຈະ​ມີ​ສິດ​ເລືອກ​ເອົາ 3 ທ່ານ ເພື່ອ​ສະ​ເໜີ​ເປັນ​ຜູ້​ສະ​ມັກ​ຄະ​ນະ​ບໍ​ລິ​ຫານ​ງານ​ພ​ັກ​ແຂວງ​ຜູ້​ໃໝ່, ສ່ວນ​ຄະ​ນະ​ຊຸດ​ເກົ່າ ຖ້າ​ບໍ່​ເຫັນ​ດີ​ທ່ານ​ໃດ​ໃຫ້​ຂີດ​ຂ້າ​ຊື່​ອອກ​ພ້ອມ​ດ້ວຍ​ເຫດ​ຜົນ. ທັງ​ໝົດ​ນີ້ ກໍ​ເພື່ອ​ເປັນ​ການ​ກະ​ກຽມ​ບຸກ​ຄະ​ລາ​ກອນ​ໃຫ້​ແກ່​ການ​ເລືອກ​ຕັ້ງ​ກອງ​ປະ​ຊຸມ​ໃຫຍ່​ຄັ້ງ​ທີ VI ອົງ​ຄະ​ນະ​ພັກ​ແຂວງວຽງ​ຈັນ ທີ່​ຈະ​ເປີດ​ຂຶ້ນ​ໃນ​ຕໍ່​ໜ້າ​ນີ້.