ປະ​ກາດ​ການ​ຈັດ​ຕັ້ງ​ຫ້ອງ​ການ-ການ​ເງິນ​ເມືອງວັງ​ວຽງ

ໃນ​ຕອນ​ເຊົ້າ​ຂອງວັນ​ທີ 1 ມີ​ນາ 2019 ນີ້​ຢູ່​ທີ່​ສະ​ໂມ​ສອນ​ເມືອງວັງ​ວຽງ ໄດ້​ຈັດ​ພິ​ທີ​ປະ​ກາດ​ການ​ຈັດ​ຕັ້ງ​ຂອງ​ຫ້ອງ​ການໆ​ເງິນ​ເມືອງວັງ​ວຽງຂຶ້ນ ໂດຍ​ການ​ເຂົ້າ​ຮ່ວມເປັນ​ປະ​ທານ​ຂອງ​ທ່ານ ປອ. ອາດ​ສະ​ພັງ​ທອງ ສີ​ພັນ​ດອນ ຄະ​ນະ​ປະ​ຈຳ​ພັກ​ກະ​ຊວງ ຮອງ​ລັດ​ຖະ​ມົນ​ຕີ​ກະ​ຊວງ​ການ​ເງິນ, ທ່ານ ດາວ​ເຮືອງ ນັນ​ທະ​ວົງ ຄະ​ນະ​ປະ​ຈຳ​ພັກ​ແຂວງ ຮອງ​ເຈົ້າ​ແຂວງໆ​ວຽງ​ຈັນ, ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆວັງ​ວຽງ, ມີ​ບັນ​ດາ​ທ່ານ​ຄະ​ນະ​ພະ​ແນກ​ການ​ເງິນ​ແຂວງ, ການ​ເງິນ​ເມືອງ, ຫົວ​ໜ້າ​ຫ້ອງ​ການ​ຕ່າງໆ ອ້ອມ​ຂ້າງ​ເມືອງ​ພ້ອມ​ດ້ວຍ​ພະ​ນັກ​ງານ-ລັດ​ຖະ​ກອນ​ຫ້ອງ​ການ-ການ​ເງິນ ແລະ ນັກ​ທຸ​ລະ​ກິດ​ຜູ້​ປະ​ກອບ​ການ​ພາຍ​ໃນ​ເມືອງ​ເຂົ້າ​ຮ່ວມ.

ພາຍຫຼັງ​ຄະ​ນະ​ພະ​ແນກ​ການ​ເງິນ​ແຂວງ​ໄດ້​ລາຍ​ງານ​ສະ​ພາບ​ການ​ເຄື່ອນ​ໄຫວ​ວຽກ​ງານ​ຂອງ​ຕົນ​ໂດຍ​ຫຍໍ້​ຕໍ່​ທ່ານ​ຮອງ​ລັດ​ຖະ​ມົນ​ຕີແລ້ວ, ທ່ານ ຄຳ​ຜອງ ດວງວິ​ໄລ ເຈົ້າ​ເມືອງໆ​ວັງ​ວຽງ ກໍ​ໄດ້​ລາຍ​ງານ​ສະ​ພາບ​ຂອງ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ເມືອງ. ຈາກ​ນັ້ນທ່ານ​ຮອງ​ຫົວ​ໜ້າ​ກົມ​ຈັດ​ຕັ້ງ​ກະ​ຊວງ​ການ​ເງິນ​ກໍ​ໄດ້​ຂຶ້ນ​ຜ່ານ​ຂໍ້​ຕົກ​ລົງ​ຂອງ​ທ່ານ​ລັດ​ຖະ​ມົນ​ຕີ​ກະ​ຊວງ​ການ​ເງິນ ວ່າ​ດ້ວຍ: ການ​ແຕ່ງ​ຕັ້ງ ແລະ ຍົກ​ຍ້າຍ​ພະ​ນັກ​ງານ​ສ່ວຍ​ສາ​ອາ​ກອນ​ເມືອງວັງວຽງ, ໂດຍ​ຍົກ​ຍ້າຍ​ທ່ານ ແສງ​ມະ​ນີ ອຸ​ໄທ ຫົວ​ໜ້າ​ສ່ວຍ​ສາ​ອາ​ກອນ​ເມືອງ ແລະ ທ່ານ ນາງ ວຽງ​ຄອນ ບັນ​ນາ​ວົງ ຮອງ​ຫົວ​ໜ້າ​ສ່ວຍ​ສາ​ອາ​ກອນ​ເມືອງ​ໄປ​ຮັບ​ໜ້າ​ທີ່ໃໝ່​ຢູ່​ທີ່​ຫ້ອງ​ການໆ​ເງິນ​ເມ​ືອງວັງ​ວຽງ.

ແຕ່ງ​ຕັ້ງ: 1. ທ່ານ ຍົມ​ມາ​ລາ ວໍ​ລະ​ຈິດ ຮອງ​ຫົວ​ໜ້າ​ພະ​ແນກ​ແຜນ​ການໆ​ຮ່ວມ​ມື​ສາ​ກົນ ກົມ​ສ່ວຍ​ສາ​ອາ​ກອນ ເປັນ​ຫົວ​ໜ້າ​ສ່ວຍ​ສາ​ອາ​ກອນ​ປະ​ຈຳ​ເມືອງວັງ​ວຽງ.
2. ທ່ານ ນາງ ລາ​ຕີ ໄຊ​ຍະ​ວົງ ຮອງ​ຫົວ​ໜ້າ​ພະ​ແນກ​ນິ​ຕິ​ກຳ​ ກົມ​ສ່ວຍ​ສາ​ອາ​ກອນ ເປັນ​ຮອງ​ຫົວ​ໜ້າ​ສ່ວຍ​ສາ​ອາ​ກອນ​ປະ​ຈຳ​ເມືອງວັງ​ວຽງ.
3. ທ່ານ ຄຳ​ເສັງ ເອ​ກະ​ພັນ ຮອງ​ຂະ​ແໜງ​ແຜນ​ການ ແລະ ບໍ​ລິ​ຫານລາຍ​ຮັບ​ສ່ວຍ​ສາ​ອາ​ກອນ​ປະ​ຈຳ​ແຂວງວຽງ​ຈັນ ເປັນ​ຮອງ​ຫົວ​ໜ້າ​ສ່ວຍ​ສາ​ອາ​ກອນ​ເມືອງວັງ​ວຽງ.
ຈາກ​ນັ້ນ ທ່ານ ບຸນ​ສີ ລັດ​ດາ​ວົງ ຫົວ​ໜ້າ​ຄະ​ນະ​ຈັດ​ຕັ້ງ​ເມືອງວັງ​ວຽງ ກໍ​ໄດ້​ຜ່ານ​ຂໍ້​ຕົກ​ລົງຂອງ​ທ່ານ​ເຈົ້າ​ເມືອງໆວັງ​ວຽງ ວ່າ​ດ້ວຍ​ການ​ແຕ່ງ​ຕັ້ງຮອງ​ຫົວ​ໜ້າ​ຫ້ອງ​ການໆ​ເງິນ​ເມືອງວັງ​ວຽງ ເຊີ່ງ​ປະ​ກອບ​ດ້ວຍ: 1. ທ່ານ ແສງ​ມະ​ນີ ອຸ​ໄທ ຫົວ​ໜ້າ​ສ່ວ​ຍ​ສາ​ອາ​ກອນ​ເມືອງວັງ​ວຽງ ເປັນ​ຮອງ​ຫົວ​ໜ້າ​ຫ້ອງ​ການໆ​ເງິນ​ເມືອງ ແລະ ແຕ່ງ​ຕັ້ງ​ທ່ານ ນາງ ວຽງ​ຄອນ ບັນ​ນາ​ວົງ ເປັນ​ຮອງ​ຫົວ​ໜ້າ​ຄຸ້ມ​ຄອງ​ຊັບ​ສິນ​ຂອງ​ລັດ​ປະ​ຈຳ​ເມືອງວັງ​ວຽງ.
ຈາກ​ນັ້ນ ທ່ານ ດາວ​ເຮືອງ ນັນ​ທະ​ວົງ ຄະ​ນະ​ປະ​ຈຳ​ພັກ​ແຂວງ ຮອງ​ເຈົ້າ​ແຂວງໆ​ວຽງ​ຈັນ ໄດ້​ຂຶ້ນ​ມີ​ຄຳ​ເຫັນ​ຕໍ່​ທີ່​ປະ​ຊຸມ ໃນ​ນີ້​ທ່ານ​ໄດ້​ເນັ້ນ​ຄືນ​ກ່ຽວ​ກັບ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ເມືອງ ເພື່ອ​ກຽມ​ຄວາມ​ພ້ອມ​ໃຫ້​ແກ່​ການ​ຄຸ້ມ​ຄອງ​ການ​ເກັບ​ລາຍ​ຮັບ ສ້າງ​ເມືອງວັງ​ວຽງ​ໃຫ້​ເປັນ​ເມືອງ​ກຸ້ມ​ຕົນ​ເອງ​ທາງ​​ນ​ດ້ານ​ງົບ​ປະ​ມານ​ໃນ​ຕໍ່​ໜ້າ​ ພ້ອມ​ທັງ​ຮຽກ​ຮ້ອງ​ໃຫ້​ຜູ້​ທີ່​ຖືກ​ຊັບ​ຊ້ອນ​ແຕ່ງ​ຕັ້ງຈົ່ງ​ໄດ້​ເຊີດ​ຊູ​ຄວາມ​ຮັບ​ຜິດ​ຊອບ​ຕໍ່​ໜ້າ​ທີ່​ວຽກ​ງານ​ຂອງ​ຕົນ​ໃຫ້​ສູງ​ຂຶ້ນ​ຕື່ມ. ຈາກ​ນັ້ນ ທ່ານ​ຮອງ​ລັດ​ຖະ​ມົນ​ຕີ​ກະ​ຊວງ​ການ​ເງິນ ກໍ​ໄດ້​ມີ​ຄຳ​ຄິດ​ຄຳ​ເຫັນ ເພື່ອ​ໂອ້​ລົມ​ຕໍ່​ພິ​ທີ, ກ່ອນ​ອື່ນ​ທ່ານ​ໄດ້​ຊີ້​ນຳ​ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດ​ການ​ເກັບ​ລາຍ​ຮັບ ​ການ​ຄຸ້ມ​ຄອງ​ລາຍ​ຈ່າຍ​ໃຫ້​ຖືກ​ຕ້ອງ, ບັນ​ຫາ​ຊັບ​ສິນ​ຂອງ​ລັດ​ທີ່​ຂະ​ຫຍາຍ​ຕົວ​ໄປ​ຕາມ​ການ​ພັດ​ທະ​ນາ​ການ​ທ່ອງ​ທ່ຽວ​ຢູ່​ພາຍ​ໃນ​ເມືອງ​ຕ້ອງ​ໄດ້​ຄຸ້ມ​ຄອງ​ໃຫ້​ລະ​ອຽດ, ເອົາ​ໃຈ​ໃສ່​ຫັນ​ພະ​ນັກ​ງານ​ລົງ​ສູ່​ຮາກ​ຖານ​ຕາມ​ຂະ​ແໜງ​ການ​ຂອງ​ສາຍ​ຕັ້ງ​ ເພື່ອ​ຊຸກ​ຍູ້​ການ​ເກັບ​ອ​າ​ກອນ​ຢູ່​ໃນ​ທ້ອງ​ຖິ່ນ​ໃຫ້​ເຂັ້ມ​ແຂງ​ທາງ​ດ້ານ​ງົບ​ປະ​ມານ​ຂຶ້ນ ນອກ​ນັ້ນ​ທ່ານ​ຍັງ​ໄດ້​ຊີ້​ນຳ​ກ່ຽວ​ກັບ​ທັດ​ສະ​ນະ​ຂອງ​ພັກ​ຕໍ່​ການ​ຄຸ້ມ​ຄອງ​ພະ​ນັກ​ງານ-ລັດ​ພະ​ກອນ​ຂອງ​ຫ້ອງ​ການໆ​ເງິນ ໂດຍ​ສະ​ເພາະ​ແມ່ນ​ທາງ​ດ້ານ​ທັດ​ສະ​ນະ​ຄຸນ​ສົມ​ບັດ​ສິນ​ທຳ​ປະ​ຕິ​ວັດ, ມີ​ຄວາມ​ຊື່​ສັດ​ບໍ​ລິ​ສຸດ​ຕໍ່​ໜ້າ​ທີ່​ວຽກ​ງານ​ຂອງ​ຕົນ ຕ້ານ​ທຸກ​ປະ​ກົດ​ການ​ຫຍໍ້​ທໍ້​ທີ່​ຈະ​ເກີດ​ຂຶ້ນ ເຊີ່ງ​ເປັນ​ຕົ້ນ​ເຫດ​ໃຫ້​ເສຍ​ພະ​ນັກ​ງານ ແລະ ຖືກ​ປະ​ຕິ​ບັດ​ວິ​ໄນ.