ເມືອງວັງ​ວຽງ ຈັດ​ພ​ິ​ທີ​ປ່ອຍ​ປາ​ຄືນ​ສູ່​ທຳ​ມະ​ຊາດ

​ເນື່ອງ​ໃນ​ໂອ​ກາດ​ວັນ​ອະ​ນຸ​ລັກ​ສັດ​ນ້ຳ-ສັດ​ປ່າ​ແຫ່ງ​ຊາດ ວັນ​ທີ 13 ກໍ​ລະ​ກົດ ໄດ້​ໝູນ​ວຽນ​ມາ​ເຖິງ. ໃນ​ຕອນ​ເຊົ້າ​ຂອງວັນ​ທີ 14 ກໍ​ລະ​ກົດ 2020 ນີ້ ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງວັງ​ວຽງ ຮ່ວມ​ກັບ​ບໍ​ລິ​ສັດ​ດວງ​ພະ​ຈັນ ບໍ​ລິ​ການ​ເອ​ກະ​ສານ​ຕ່າງໆ ແລະ ຈັດ​ຫາ​ງານ​ໄປ​ຕ່າງ​ປະ​ເທດ ຈຳ​ກັດ ຜູ້​ດຽວ​ໄດ້​ຈັດ​ພິ​ທີ​ປ່ອຍ​ປາ​ຄືນ​ສູ່​ທຳ​ມະ​ຊາດ​ຂຶ້ນ​ຢູ່​ທີ່​ນ້ຳ​ຊອງ​ທ່າ​ລັ່ງ​ເມົ່າ ບ້ານ​ໂພ​ໄຊ ເມືອງວັງ​ວຽງ. ໂດຍ​ການ​ເຂົ້າ​ຮ່ວມ​ຂອງ​ທ່ານ ບຸນ​ຈັນ ມາ​ລາ​ວົງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ທ່ານ ພູ​ວົງ ບຸນ​ຊູ ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້ ແຂວງວຽງ​ຈັນ, ທ່ານ ພົວ ສຸດ​ໃຈ ກົມ​ມະ​ສິດ ຄະ​ນະ​ພັກ ຄະ​ນະ​ບັນ​ຊາ​ກອງ​ພົນ​ທະ​ຫານ​ຮາບ ທີ 1, ບັນ​ດາ​ຫົວ​ໜ້າ​ຫ້ອງ​ການ, ຄະ​ນະ​ຫ້ອງ​ການ​ຕ່າງໆ ອ້ອມ​ຂ້າງ​ເມືອງ, ວິ​ສາ​ຫະ​ກິດ, ນັກ​ທຸ​ລະ​ກິດ​ຜູ້​ປະ​ກອບ​ການ, ອຳ​ນາດ​ການ​ປົກ​ຄອງ​ບ້ານ​ໂພ​ໄຊ​ພ້ອມ​ດ້ວຍ​ພໍ່​ແມ່ປະ​ຊາ​ຊົນ ແລະ ພະ​ນັກ​ງານ​ຫ້ອງ​ການ​ກະ​ສິ​ກຳ ແລະ ປ່າ​ໄມ້ເມືອງ​ທັງ​ໝົດ​ເຂົ້າ​ຮ່ວມ​.

ປາ​ທີ່​ໄດ້​ນຳ​ມາ​ປ່ອຍ​ຄັ້ງ​ນີ້​ມີ​ທັງ​ໝົດ 25.000 ກວ່າ​ໂຕ ມີ​ປາ​ນິນ, ປາ​ໃນ, ປາ​ປາກ ແລະ ປາ​ເກັດ​ແລ້ວ. ເຊີ່ງ​ໄດ້​ຮັບ​ຈາກ​ການ​ສະ​ໜັບ​ສະ​ໜູນ​ຈາກຫຼາຍ​ພາກ​ສ່ວນ​ການ​ຈັດ​ຕັ້ງ, ວິ​ສາ​ຫະ​ກິດ ແລະ ນັກ​ທຸ​ລະ​ກິດ​ຢູ່​ພາຍ​ໃນ​ເມືອງ​ໄດ້​ໃຫ້​ການ​ປະ​ກອບ​ສ່ວນ. ທັງ​ນີ້​ກໍ​ເພື່ອ​ເປັນ​ການ​ສ້າງ​ຄວາມ​ອຸ​ດົມ​ສົມ​ບູນ​ໃຫ້​ແກ່​ແມ່​ນ້ຳ​ຊອງ​ໃນ​ອະ​ນາ​ຄົດ.