ວັງວຽງ ກັບ ຈຸດໝາຍແຫ່ງການພັດທະນາ

ເມືອງວັງ​ວຽງ​ ເປັນ​ເມືອງ​ໜຶ່ງ​ທີ່​ຕັ້ງ​ຢູ່​ທາງ​ທິດ​ເໜືອ​ຂອງ​ແຂວງວຽງ​ຈັນ, ເຊີ່ງ​ອຸ​ດົ​ມ​ສົມ​ບູນ​ຮັ່ງ​ມີ​ໄປ​ດ້ວຍ​ທຳ​ມະ​ຊາດ​ທີ່​ສວຍ​ສົດ​ງົດ​ງາມ ເຊັ່ນ: ພູ, ຜາ, ປ່າ​ດົງ, ສາຍ​ນ້ຳ ແລະ ມີ​ຖ້ຳ​ທີ່​ອັດ​ສະ​ຈັນຫຼາຍ​ບ່ອນ ເຊີ່ງ​ໄດ້​ສ້າງ​ຄວາມປະ​ທັບ​ໃຈ​ດຶງ​ດູດ​ເອົາ​ແຂກ​ຄົນ, ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ​ປະ​ເທດ​ໃນ​ທຸກ​ມູມ​ໂລກ​ໄດ້​ຢ່າງກວ້າງ​ຂວາງ. ທີ່​ຕັ້ງ​ຂອງ​ເມືອງ ເໝາະ​ສົມ ​ເປັນ​ທ່າ​ແຮງ​ອັນ​ໜຶ່ງ​ໃຫ້​ແກ່​ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ​ຂອງ​ເມືອງ​ໄດ້​ເປັນ​ຢ່າງ​ດີ ຈົນ​ກາຍ​ເປັນ​ເມືອງ​ທ່ອງ​ທ່ຽວ​ທີ່​ມີ​ສະ​ເໜ່​ໄດ້​ຮັ​ບ​ຄວາມ​ນິ​ຍົມ ​ຢື​ນ​ຢູ່​ໃນ​ລະ​ດັບແຖວ​ໜ້າ​ຂອງ ສ​ປ​ປ ລາວ ໃນ​ປະ​ຈຸ​ບັນ.

ຍ້ອນ​ເຫັນ​ໄດ້​ທ່າ​ແຮງ ແລະ ເງື່ອນ​ໄຂ​ຂອງ​ການ​ພັດ​ທະ​ນາ​ດັ່ງ​ກ່າວ ​ກາ​ນ​ນຳ​ພັກ-ລັດ​ຂັ້ນ​ເທິງ​ກໍ​ຄື​ທາງ​ແຂວງ ແລະ ລັດ​ຖະ​ບານ ຈຶ່ງ​ໄດ້​ຊອກ​ທຸກວິ​ທີ​ທາງ​ເພື່ອ​ສຸມ​ທຶນ​ຮອນ​ເຂົ້າ​ໃສ່​ການ​ພັດ​ທະ​ນາ​ຢູ່​ເມືອງວັງ​ວຽງ ເປັນ​ຕົ້ນ​ແມ່ນ​ການ​ກໍ່​ສ້າງ​ເສັ້ນ​ທາງ​ລົດ​ໄຟ​ລາວ-ຈີນຜ່ານ​ ເຊີ່ງ​ມີ​ສະ​ຖາ​ນີ​ໃຫຍ່​ຕັ້ງ​ຢູ່​ເມືອງວັງ​ວຽງ ເຊີ່ງ​ຈະ​ໃຫ້​ສຳ​ເລັດ​ການ​ກໍ່​ສ້າງ ແລະ ເປີດ​ນຳ​ໃຊ້​ໃນ​ທ້າຍ​ປີ 2021. ການ​ກໍ່​ສ້າງ​ເສັ້ນ​ທາງ​ດ່ວນ​ຈາກ​ນະ​ຄອນຫຼວງວຽງ​ຈັນ​ຫາ​ເມືອງວັງ​ວຽງ ຈະ​ໃຫ້​ສຳ​ເລັດ ແລະ ເປີດ​ນຳ​ໃຊ້​ໃນ​ທ້າຍ​ປີ 2020. ນອກ​ຈາກ​ນີ້​ທາງ​ເມືອງ​ຍັງ​ໄດ້​ຮັບ​ທຶນ​ຊ່ວຍ​ເຫຼືອ​ຈາກ​ລັດ​ຖະ​ບານ​ໃນ​ການ​ປັບ​ປຸງ​ພື້ນ​ຖານ​ໂຄງ​ລ່າງ​ການ​ກໍ່​ສ້າງ​ສ້ອມ​ແປງ​ເສັ້ນ​ທາງ​ສາຍ​ຕ່າງໆ ໃນ​ເທດ​ສະ​ບານ​ເມືອງ​ໃຫ້ໄດ້​ມາດ​ຖານ, ກໍ່​ສ້າງ​ຂົວ​ຂ້າມ​ນ້ຳ​ຊອງ​ແຫ່ງ​ໃໝ່ ແລະ ກໍ່​ສ້າງ​ທາງ​ປູ​ຢາງ​ລຽບ​ຕາມ​ແຄມ​ຝັ່ງ​ນ້ຳ​ຊອງ​ທິດ​ຕາ​ເວັນ​ຕົກ ເພື່ອ​ອຳ​ນວຍ​ຄວາມ​ສະ​ດວກ​ໃຫ້​ແກ່​ການ​ພັດ​ທະ​ນາ​ສະ​ຖານ​ທີ່​ແຫຼ່ງ​ທ່ອງ​ທ່ຽວ​ໃນ​ເຂດ​ລ້ອງກວາງ ເຊີ່ງ​ໄດ້​ຮັບ​ຄວາມ​ນິ​ຍົມ​ໃນ​ປະ​ຈຸ​ບັນໃຫ້​ດີ​ຂຶ້ນ​ອີກ.

ນອກ​ນີ້​ຍັງ​ສ້າງ​ເງື່ອນ​ໄຂ​ໃຫ້​ແກ່​ການ​ຜະ​ລິດ​ກະ​ສິ​ກຳ​ເປັນ​ສິນ​ຄ້າ​ຕິດ​ພັນ​ກັບ​ການ​ທ່ອງ​ທ່ຽວ, ການ​ຄ້າ ແລະ ການ​ບໍ​ລິ​ການ​ປ່ຽນ​ວິ​ຖີ​ຊີ​ວິດ​ຂອງ​ປະ​ຊາ​ຊົນ​ທີ່​ດຳ​ລົງ​ຊີ​ວິດ​ຢູ່​ຟາກ​ນ້ຳ​ຊອງ​ຈຳ​ນວນ 10 ໝູ່​ບ້ານ​ຈາກ​ອັນ​ເກົ່າ​ໄປ​ສູ່​ອັນ​ໃໝ່​ໃຫ້​ມີ​ຊີ​ວິດ​ການ​ເປັນ​ຢູ່​ທີ່​ດີ​ຂຶ້ນ​ຕາມ​ທິດ​ສີ​ຂຽວ ຍືນ​ຍົງ​ຕິດ​ພັນ​ກັບ​ການ​ອະ​ນຸ​ລັກ​ຮັກ​ສາ​ທຳ​ມະ​ຊາດ ແລະ ສິ່ງ​ແວດ​ລ້ອມ. ເຊີ່ງກອງ​ປະ​ຊຸມ​ໃຫຍ່​ຄັ້​ງ​ທີ VII ຂອງ​ອົງ​ຄະ​ນະ​ພັກ​ເມືອງວັງ​ວຽງ ຜູ້​ແທນກອງ​ປະ​ຊຸມ​ທີ່​ເປັນ​ຕົວ​ແທນ​ໃຫ້​ແກ່​ສະ​ມາ​ຊິກ​ພັກ ແລະ ປະ​ຊາ​ຊົນ​ບັນ​ດາ​ເຜົ່າ​ທົ່ວ​ເມືອງວັງ​ວຽງ ໄດ້​ເປັນ​ເອ​ກະ​ສັນ​ຮັບ​ຮອງ​ເອົາ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ເມືອງ ໃນ​ແຕ່​ລະ​ດ້ານ​ເພື່ອ​ສຸມ​ໃສ່​ພັດ​ທະ​ນາ​ເມືອງວັງ​ວຽງ​ໃຫ້​ເຕີບ​ໃຫຍ່​ຂະ​ຫຍາຍ​ຕົວ​ໄວ​ເພື່ອ​ຮອງ​ຮັບ​ໂຄງ​ການ​ກໍ່​ສ້ງ​ທາງ​ດ່ວນ ແລະ ທາງ​ລົດ​ໄຟ​ລາວ-ຈີນ​ສຳ​ເລັດ ແຂກ​ຄົນ​ຈະຫຼັ່ງ​ໄຫຼ​ເຂົ້າ​ສູ່​ເມືອງວັງ​ວຽງຫຼາຍ​ເທົ່າ​ທົບ ເພື່ອ​ສ້າງ​ຕົວ​ເມືອງ​ໃຫ້​ກາຍ​ເປັນເມືອງ​ທີ່​ໜ້າ​ຢູ່, ​ສະ​ຫງົບ​, ປອດ​ໄພ ແລະ ໄດ້​ຮັບ​ຄ່າ​ນິ​ຍົມ​ຈາກນັກ​ທ່ອງ​ທ່ຽວ​ສູງ​ຂຶ້ນ, ສ້າງ​ຄວາມ​ຮັ່ງ​ມີ​ເຂັ້ມ​ແຂງ​ໃຫ້​ແກ່​ປະ​ຊາ​ຊົນ​ດີ​ຂຶ້ນກວ່າ​ເກົ່າ.

ຂົວ​ຂ້າມ​ນ້ຳ​ຊອງ​ແຫ່ງ​ໃໝ່ຂອງ ເມືອງວັງ​ວຽງ

ປະ​ຈຸ​ບັນ​ເມືອງວັງ​ວຽງ ໄດ້​ກາຍ​ເປັນ​ດິນ​ແດນ​ທີ່​ມີ​ມົນ​ສະ​ເໜ່​ເນື້ອ​ຫອມ​ແຫ່ງ​ໜຶ່ງ​ເຊີ່ງ​ໄດ້​ຮັບ​ຄວາມ​ສົນ​ໃຈ​ຢ່າງກວ້າງ​ຂວາງ​ຈາກ​ນັກ​ລົງ​ທຶນ​ທັງ​ພາຍ​ໃນ ແລະ ຕ່າງ​ປະ​ເທດ. ມີຫຼາຍ​ພາກ​ສ່ວນ​ໄດ້​ຂໍ​ອະ​ນຸ​ຍາດ​ຈາກ​ແຂວງ ແລະ ລັດ​ຖະ​ບານ ເພື່ອ​ເຂົ້າ​ໄປ​ສຳ​ຫຼວດ​ສຶກ​ສາ​ຂໍ້​ມູນ​ຄວາມ​ເປັນ​ໄປ​ໄດ້​ໃນ​ການ​ລົງ​ທຶນ​ດ້ານ​ຕ່າງໆ ຢູ່​ພາຍ​ໃນ​ເມືອງ​ເຊັ່ນ: ໂຄງ​ການ​ພັດ​ທະ​ນາ​ຕົວ​ເມືອງ​ວັງ​ວຽງໃໝ່, ໂຄງ​ການ​ພັດ​ທະ​ນາ​ເດີ່ນ​ບິນ​ເກົ່າ​ຂອງ​ເມືອງ​ໃຫ້​ເປັນ​ສະ​ຖານ​ທີ່​ການ​ທ່ອງ​ທ່ຽວ, ໂຄງ​ການ​ພັດ​ທະ​ນາ​ກະ​ສິ​ກຳ​ປູກ​ພືດ​ປອດ​ສານ​ຜິດ​ຕິ​ດ​ພັນ​​ກັບການ​ທ່ອງ​ທ່ຽວ, ໂຄງ​ການ​ພັດ​ທະ​ນາ​ສະ​ຖານ​ທີ່​ແຫຼ່ງ​ທ່ອງ​ທ່ຽວ​ຕ່າງໆ ແລະ ອື່ນໆ… ມີຫຼາຍ​ໂຄງ​ການ​. ຖ້າ​ວ່າ​ບັນ​ດາ​ໂຄງ​ການ​ເຫຼົ່າ​ນີ້​ຫາກ​ໄດ້​ຮັບ​ການ​ອະ​ນຸ​ມັດໃຫ້​ຈັດ​ຕັ້ງ​ປະ​ຕິ​ບັດ ຫຼື ໄດ້​ຮັບ​ຜົນ​ສຳ​ເລັດ​ເມື່ອ​ໃດ​ຈະ​ເຮັດ​ໃຫ້ໂສມ​ໜ້າ​ໃໝ່​ຂອງ​ເມືອງວັງ​ວຽງ ມີ​ການ​ປ່ຽນ​ແປງ​ຈາກ​ສະ​ພາບ​ໃນ​ປະ​ຈຸ​ບັນ​ໄປ​ສູ່​ອັນ​ໃໝ່​ທີ່​ມີ​ຄວາມ​ສີ​ວິ​ໄລ​ດີຂຶ້ນກວ່າ​ເກົ່າ​ຢ່າງ​ບໍ່​ເຄີຍ​ມີ​ມາ​ກ່ອນ​ໃນ​ປະ​ຫວັດ​ສາດ​ຂອງ​ເມືອງ.