ເປີດກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 2 ສະໄໝທີ VII

ໃນ​ຕອນ​ເຊົ້າ​ຂອງວັນ​ທີ 21 ພຶດ​ສະ​ພາ​ 2020 ນີ້ ຢູ່​ທີ່​ສະ​ໂມ​ສອນ​ໃຫຍ່​​ສຳ​ນັກ​ງານ​ປົກ​ຄອງເມືອງວັງ​ວຽງ​ໄດ້​ເປີດກອງ​ປະ​ຊຸມ​ຄົບ​ຄະ​ນະ​ບໍ​ລິ​ຫານ​ງານ​ພັກ​ເມືອງ​ຄັ້ງ​ທີ 2 ສະ​ໄໝ​ທີ VII ຂື້ນ. ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ຄຳ​ພັນ ສິດ​ທິ​ດຳ​ພາ ກຳ​ມະ​ການ​ສູນ​ກາງ​ພັກ ເລ​ຂາ​ພັກ​ແຂວງ ເຈົ້າ​ແຂວງໆ​ວຽງ​ຈັນ, ທ່ານ ບຸນ​ເພັງ ສາຍ​ນໍ​ລະ​ດີ ຮອງ​ເລ​ຂາ​ພັກ​ແຂວງ ປະ​ທານ​ສະ​ພາ​ປະ​ຊາ​ຊົນ​ແຂວງວຽງ​ຈັນ, ທ່ານ ບຸນ​ຈັນ ມາ​ລາ​ວົງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ. ມີ​ບັນ​ດາ​ສະ​ຫາຍ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ຄະ​ນະ​ພັກ​ຮາກ​ຖານ, ເລ​ຂາ​ໜ່ວຍ​ພັກ​ຕ່າງໆ ອ້ອມ​ຂ້າງ​ເມືອງ​ເຂົ້າ​ຮ່ວມ ຈຳ​ນວນ 158 ສະ​ຫາຍ, ຍິງ 22 ສະ​ຫາຍ.

ກອງ​ປະ​ຊຸມຄັ້ງ​ນີ້​ໄດ້​ມີ​ການ​ສະຫຼຸບ​ທົບ​ທວນ​ຄືນ​ການ​ເຄື່ອນ​ໄຫວ​ວຽກ​ງານ​ແຕ່ກອງ​ປະ​ຊຸມ​ໃຫຍ່​ຄັ້ງ​ທີ VII ຂອງ​ອົງ​ຄະ​ນະ​ພັກ​ເມືອງ​ມາ​ເຖິງ​ປະ​ຈຸ​ບັນ, ຜ່ານ​ຂໍ້​ຕົກ​ລົງ​ຂອງ​ຄະ​ນະ​ປະ​ຈຳ​ພັກ​ແຂວງ ວ່າ​ດ້ວຍ​ການ​ຮັບ​ຮອງ​ເອົາ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ເລ​ຂາ​ພັກ​ເມືອງ, ຮອງ​ເລ​ຂາ, ຄະ​ນະ​ປະ​ຈຳ​ພັກ, ປະ​ທານກວດ​ກາ, ຄະ​ນະ​ກວດ​ກາ ແລະ ແບ່ງ​ຄວາມ​ຮັບ​ຜິດ​ຊອບ​ໃຫ້​ແກ່​ຄະ​ນະ​ບໍ​ລິ​ການ​ງານ​ພັກ​ເມືອງ​ແຕ່​ລະ​ສະ​ຫາຍ, ນອກ​ນີ້​ຍັງ​ໄດ້​ຜ່ານ​ບົດ​ຈຳ​ແນກ​ທ່າ​ແຂງ-ທ່າ​ອ່ອນ ຂອງ​ຄະ​ນະ​ບໍ​ລິ​ຫານ​ງານ​ພັກ​ເມືອງ ຄັ້ງ​ທີ VII, ຜ່ານ​ແຜນ​ໂຄງ​ການ​ດຳ​ເນີນ​ງານ​ຂອງ​ຄະ​ນະ​ບໍ​ລິ​ຫານ​ງານ​ພັກ​ເມືອງ ສະ​ໄໝ​ທີ VII ແຕ່​ປີ 2020 – 2024, ຜ່ານ​ພາ​ລະ​ບົດ​ບາດ ແລະ ລະ​ບອບ​ແບບ​ແຜນ​ວິ​ທີ​ເຮັດ​ວຽກ​ຂອງ​ຄະ​ນະ​ບໍ​ລິ​ຫານ​ງານ​ພັກ​ເມືອງ ເພື່ອ​ໃຫ້​ທຸກ​ຄົນ​ໄດ້​ປະ​ກອບ​ຄຳ​ຄິດ​ຄຳ​ເຫັນ​ເຂົ້າ​ໃສ່ ເພື່ອ​ສ້າງ​ຄວາມ​ເປັນ​ເອ​ກະ​ພາບ.

ໃນ​ຕອນ​ທ້າຍ​ຂອງກອງ​ປະ​ຊຸມ​ຍັງ​ໄດ້​ຮັບ​ຟັງ​ການ​ໂອ້​ລົມ​ຂອງ​ທ່ານ ຄຳ​ພັນ ສິດ​ທິ​ດຳ​ພາ ກຳ​ມະ​ການ​ສູນ​ກາງ​ພັກ ເລ​ຂາ​ພັກ​ແຂວງ ເຈົ້າ​ແຂວງໆ​ວຽງ​ຈັນ ຕື່ມ​ອີກ, ເຊີ່ງ​ກ່ອນ​ອື່ນ ທ່ານ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ຕໍ່​ຜົນ​ງານ ແລະ ຜົນ​ສຳ​ເລັດຫຼາຍ​ດ້ານ​ທີ່​ເມືອງວັງ​ວຽງ ໃຕ້​ການ​ຊີ້​ນຳ​ໆ​ພາ​ຂອງ​ຄະ​ນະ​ບໍ​ລິ​ຫານ​ງານ​ພັກ​ເມືອງ​ຄັ້ງ​ທີ VII ຍາດ​ມາ​ໄດ້​ຜ່ານ​ມາ ໂດຍ​ສະ​ເພາະ​ແມ່ນ​ການ​ຈັດ​ຕັ້ງ​ປະ​ຕິ​ບັດ​ຄຳ​ສັ່ງ​ຂອງ​ການ​ນຳ​ຂັ້ນ​ເທິງ​ໃນ​ການ​ຕ້ານ ແລະ ສະ​ກັດ​ກັ້ນ​ການ​ແຜ່​ລະ​ບາດພະ​ຍາດ ໂຄວິດ-19 ຢູ່​ພາຍ​ໃນ​ເມືອງ, ການ​ພັດ​ທະ​ນາ​ເສດ​ຖະ​ກິດ-ສ​ັງ​ຄົມ ແລະ ການ​ປົກ​ປັກ​ຮັກ​ສາ​ຄວາມ​ສະ​ຫງົບ, ຄວາມ​ເປັນ​ລະ​ບຽບ​ຮຽບ​ຮ້ອຍ​ຂອງ​ສັງ​ຄົມ. ຈາກ​ນັ້ນ ທ່ານ​ຍັງ​ໄດ້​ຊີ້​ນຳ​ເປັນ​ທິດ​ທາງ​ໃຫ້​ແກ່​ຄະ​ນະ​ບໍ​ລິ​ຫານ​ງານ​ພັກ​ເມືອງ​ຄັ້ງ​ທີ VII ຕໍ່​ກັບ​ແບບ​ແຜນ​ວິ​ທີ​ເຮັດ​ວຽກ​ນຳ​ພາ, ການ​ຫັນ​ລົງ​ສູ່​ຮາກ​ຖານ​ຮັບ​ໃຊ້​ປ​ະ​ຊາ​ຊົນ ເພື່ອ​ປະ​ຊາ​ຊົນ, ການ​ຝຶກ​ຝົນຫຼໍ່ຫຼອມ​ຕົນ​ເອງ​ທາງ​ດ້ານ​ຄຸນ​ທາດ​ການ​ເມືອງ, ຄຸນ​ສົມ​ບັດ​ສິນ​ທຳ​ປະ​ຕິ​ວັດ​ໃຫ້​ມັນ​ຖືກ​ຕ້ອງ​ສອດ​ຄ່ອງ​ກັບ​ສິດ​ໜ້າ​ທີ່​ ແລະ ພາ​ລະ​ບົດ​ບາດ ເພື່ອ​ພັດ​ທະ​ນາ​ຕົນ​ເອງ​ໃຫ້​ກາຍ​ເປັນ​ການ​ນຳ​ທີ່​ດີ ໄດ້​ຮັບ​ຄວາມ​ເຊື່ອ​ໝັ້ນ​ໄວ້​ວາງ​ໃຈ​ຈາກ​ພະ​ນັກ​ງານ ສະ​ມາ​ຊິກ​ພັກ ແລະ ປະ​ຊາ​ຊົນ​ຢູ່​ພາຍ​ໃນ​ເມືອງ​ເປັນ​ຢ່າງ​ດີ.