ພິ​ທີ​ເຊັນ​ສັນ​ຍາ​ກໍ່​ສ້າງ​ຂົວ​ອູ່​ຂ້າມ​ນ້ຳ​ຊອງ ແລະ ລານ​ຈອດ​ລົດ ຢູ່​ສ​ະ​ຖານ​ທີ່​ທ່ອງ​ທ່ຽວ​ຖ້ຳ​ນອນ

ໃນຕອນ​ບ່າຍ​ຂອງວັນທີ 06 ພະ​ຈິກ 2018 ນີ້ ຢູ່ທີ່ຫ້ອງ​ການ​ແຜນ​ການ ແລະ ການ​ລົງ​ທຶນ ເມືອງວັງ​ວຽງ ໄດ້​ຈັດ​ໃຫ້​ມີ​ພິ​ທີ​ລົງ​ນາມ​ເຊັນ​ສັນຍາ​ກໍ່​ສ້າງ​ຂົວ​ອູ່​ຂ້າມ​ນ້ຳ​ຊອງ ແລະ ລານ​ຈອດ​ລົດ​ຢູ່​ສະ​ຖານ​ທີ່​ທ່ອງ​ທ່ຽວ​ຖ້ຳ​ນອນ ເຂດ​ບ້ານ​ຫ້ວຍ​ສະ​ເຫງົ້າ ​ເມືອງວັງ​ວຽງ ລະ​ຫວ່າງ ອ​ຳ​ນາດ​ການ​ປົກ​ຄອງ​ເມືອງວັງ​ວຽງ ກັບ ບໍ​ລິ​ສັດ​ທ່ອງ​ທ່ຽວ​ວັນ​ເດີ​ຟູນ ຈຳ​ກັດ ເຊີ່ງ​ເປັນ​ຜູ້​ສຳ​ປະ​ທານ​ເຂດ​ສະ​ຖານ​ທີ່​ທ່ອ​ງ​ທ່ຽວ​ຖ້ຳ​ນອນ, ໂດຍການເຂົ້າຮ່ວມເປັນ​ສັກ​ຂີ​ພິ​ຍານຂອງທ່ານ ​ຄຳ​ຜອງ ດວງວິ​ໄລ ກຳ​ມະ​ການພັກແຂວງ ​ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ມີບັນດາ​ທ່ານ​ໃນ​ຄະ​ນະ​ການ​ນຳ​ຂອງເມືອງ, ຫົວໜ້າຫ້ອງການ, ​ການ​ຈັດ​ຕັ້ງ​ອຳ​ນາດ​ການ​ປົກ​ຄອງ​ບ້ານ​ຫ້ວຍ​ສະ​ເຫງົ້າ ແລະ ​ຜູ້​ປະ​ກອບ​ການ​ພາກ​ທຸ​ລະ​ກິດ​ຈຳ​ນວນ​ໜຶ່ງ​ຢູ່​ພາຍ​ໃນ​ເມືອງ​ເຂົ້າ​ຮ່ວມ.
ຜູ້​ລົງ​ນາມ​ສັນ​ຍາ ​ຕາງ​ໜ້າ​ໃຫ້​ແກ່​ອຳ​ນາດ​ການ​ປົກ​ຄອງ​ເມືອງ​ໄດ້​ແກ່ ທ່ານ ບົວ​ທອງ ສຸ​ວົງ ຫົວ​ໜ້າ​ຫ້ອງ​ການ​ແຜນ​ການ ແລະ ການ​ລົງ​ທຶນ​ເມືອງ ສ່ວນ​ຝ່າຍ​ບໍ​ລິ​ສັດ​ໄດ້​ແກ່​ທ່ານ ບຸນ​ພັນ ວົງ​ສຳ​ພັນ ຫົວ​ໜ້າ​ບໍ​ລິ​ສັດ​ທ່ອງ​ທ່ຽວ​ວັນ​ເດີ​ຟູນ ຈຳ​ກັດ. ເຊີ່ງ​ໜ້າ​ວຽກ​ທີ່​ຈະ​ເຮັດ​ແມ່ນ​ການ​ກໍ່​ສ້າງ​ຂົວ​ອູ່​ຂ້າມ​ນ້ຳ​ຊອງ​ເຂົ້າ​ຫາ​ສະ​ຖານ​ທີ່​ແຫຼ່ງ​ທ່ອງ​ທ່ຽວ, ກໍ່​ສ້າງ​ລານ​ຈອດ​ລົດ, ກໍ່​ສ້າງ​ເສັ້ນ​ທາງ ແລະ ຕາ​ຂ່າຍ​ໄຟ​ຟ້າ ​ລວມ​ມູນຄ່າ​ການ​ລົງ​ທຶນ​ທັງ​ໝົດ 3,578,250,000 ກີບ ໂດຍ​ແມ່ນ​ບໍ​ລິ​ສັດ​ເປັນ​ຜູ້​ລົງ​ທຶນ 100%, ມີ​ອາ​ຍຸ​ການ​ສຳ​ປະ​ທານ​ເປັນ​ເວ​ລາ 15 ປີ.
ທັງ​ນີ້ ເພື່ອ​ແນ​ໃສ່​ພັດ​ທະ​ນາ​ສະ​ຖານ​ທີ່​ແຫຼ່ງ​ທ່ອງ​ທ່ຽວ​ຖ້ຳ​ນອນ​ໃຫ້​ມີ​ຄວາມ​ສວຍ​ສົດ​ງົດ​ງາມ​ໃນ​ການ​ຕ້ອນ​ຮັບ​ແຂກ​ຄົນ, ສ້າງ​ຄວາມ​ສົນ​ໃຈ​ດຶງ​ດູດ​ເອົາ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ​ປະ​ເທດ​ທີ່​ເດີ​ນ​ທາງ​ເຂົ້າ​ໄປ​ທ່ອງ​ທ່ຽວ​ໃຫ້​ມີ​ຄວາມ​ສະ​ດວກ​ສະ​ບາຍກວ່າ​ເກົ່າ.
error: Content is protected !!