ປະກາດຈົບຊັ້ນມັດທະຍົມຕອນຕົ້ນບໍາລຸງທົ່ວເມືອງວັງວຽງ

ໃນວັນທີ 20 ກັນຍາ 2018 ຜ່ານມານີ້ ເມືອງວັງວຽງ ໄດ້ຈັດພິທີປະກາດຈົບຊັ້ນມັດທະຍົມຕອນຕົ້ນບຳລຸງທົ່ວເມືອງຂື້ນຢູ່ທີ່ສະໂມສອນໃຫຍ່ຂອງເມືອງ, ໂດຍການໃຫ້ກຽດເຂົ້າຮ່ວມຂອງ ທ່ານ ຮອງສາດສະດາຈານ ປອ. ຄຳຜາຍ ສີສະຫວັນ ຄະນະປະຈຳພັກກະຊວງ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ນາງ ຈັນແພງ ວິພາວັນ ຄະນະປະຈຳພັກແຂວງ ຫົວພະແນກສຶກສາທິການ ແລະ ກິລາ ແຂວງວຽງຈັນ, ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີບັນດາທ່ານເຈົ້າເມືອງ ແລະ ຫົວໜ້າຫ້ອງການສຶກສາທິການ ແລະ ກິລາ ເມືອງອ້ອມຂ້າງ, ແຂກຖືກເຊີນທີ່ມາຈາກກະຊວງສຶກສາທິການ ແລະ ກິລາ ແລະ ພະແນກສຶກສາທິການ ແລະ ກິລາແຂວງວຽງຈັນ, ຫົວໜ້າຫ້ອງການຕ່າງໆພາຍໃນເມືອງ, ນັກທຸລະກິດຜູ້ປະກອບການ, ຜູ້ບໍລິຫານການສຶກສາຈາກໂຮງຮຽນຕ່າງໆ, ອຳນາດການປົກຄອງບ້ານຕະຫຼອດຮອດນັກຮຽນຜູ້ໄດ້ຮັບການບຳລຸງເຂົ້າຮ່ວມເປັນຈຳນວນຫຼວງຫຼາຍ.
ໃນພິທີ ທ່ານ ພູວົງ ບັນນະວົງ ຫົວໜ້າຫ້ອງການສຶກສາທິການ ແລະ ກິລາ ເມືອງວັງວຽງ ໄດ້ຂຶ້ນລາຍງານການຈັດຕັ້ງປະຕິບັດການຮຽນການສອນບຳລຸງຊັ້ນ ມ.ຕົ້ນໃຫ້ແກ່ປະຊາຊົນກຸ່ມເປົ້າໝາຍທີ່ມີອາຍຸແຕ່ 15-30 ປີ ຢູ່ພາຍໃນເມືອງທີ່ດ້ອຍໂອກາດບໍ່ມີເງື່ອນໄຂເຂົ້າຮຽນຕໍ່ຊັ້ນມັດທະຍົມ ຍ້ອນເງື່ອນໄຂສະພາບຂອງເສດຖະກິດຄອບຄົວໃນຜ່ານມາຕາມແຕ່ລະບາດກ້າວ ເຊີ່ງໄດ້ຈັດຕັ້ງປະຕິບັດມາແຕ່ປີ 2013 ຫາ 2018 ລວມທັງໝົດມີ 63 ບ້ານ, ມີຈຳນວນພົນທັງໝົດ 593 ຄົນ, ຍິງ 332 ຄົນ, ໂດຍຈັດແບ່ງອອກເປັນ 4 ສົກຮຽນ, ກຳນົດການຮຽນແມ່ນສົກຮຽນລະ 6 ເດືອນດັ່ງນີ້:
– ສົກຮຽນ 2013-2014 ມີ 15 ບ້ານ, ມີນັກຮຽນເຂົ້າຮຽນບຳລຸງ 77 ຄົນ, ຍິງ 45 ຄົນ. ທ້າຍສົກຮຽນມີໜ້າເຂົ້າສອບເສັງຕົວຈິງ 75 ຄົນ, ຍິງ 43 ຄົນ, ສອບເສັງໄດ້ 97,4 %.
– ສົກຮຽນ 2014-2015 ມີ 16 ບ້ານ, ມີນັກຮຽນທັງໝົດ 142 ຄົນ, ຍິງ 102 ຄົນ. ຮອດທ້າຍສົກຮຽນມີໜ້າເຂົ້າສອບເສັງຕົວຈິງ 138 ຄົນ, ຍິງ 100 ຄົນ, ສອບເສັງໄດ້ 97,18 %.
– ສົກຮຽນ 2015-2016 ມີ 23 ບ້ານ, ມີນັກຮຽນທັງໝົດ 268 ຄົນ, ຍິງ 139 ຄົນ. ທ້າຍສົກຮຽນມີໜ້າເຂົ້າຮ່ວມສອບເສັງຕົວຈິງ 260 ຄົນ, ຍິງ 136 ຄົນ, ສອບເສັງໄດ້ 97 %.
– ສົກຮຽນ 2017-2018 ມີ 9 ບ້ານ, ມີນັກຮຽນເຂົ້າຮຽນທັງໝົດ 106 ຄົນ, ຍິງ 46 ຄົນ. ທ້າຍສົກຮຽນມີໜ້າເຂົ້າສອບເສັງຕົວຈິງ 101 ຄົນ, ຍິງ 44 ຄົນ, ສອບເສັງໄດ້ 95,28 %.
ພາຍຫຼັງສຳເລັດການສອບເສັງແລ້ວ ກໍໄດ້ນຳສະເໜີຫາສາຍຕັ້ງພະແນກສຶກສາທິການ ແລະ ກິລາແຂວງຮ່ວມກັບກະຊວງສຶກສາທິການ ແລະ ກິລາ ລົງສົມທົບກັບທ້ອງຖິ່ນໃນການລົງກວດກາປະເມີນຜົນ ໂດຍຈັດຕັ້ງການປະເມີນອອກເປັນ 16 ສູນສອບເສັງ ລວມມີ 63 ບ້ານ, ຜ່ານການປະເມີນສາມາດປະຕິບັດໄດ້ 93,49% ຈຶ່ງເຫັນວ່າມີເງື່ອນໄຂໃນການປະກາດຮັບຮອງຈົບຊັ້ນມັດທະຍົມສຶກສາຕອນຕົ້ນບຳລຸງທົ່ວເມືອງວັງວຽງຂຶ້ນ. ສຳລັບແຜນການ ແລະ ທິດທາງໃນຕໍ່ໜ້າຍັງຈະໄດ້ສືບຕໍ່ບຳລຸງຊັ້ນມັດທະຍົມຕອນປາຍໃຫ້ແກ່ປະຊາຊົນໃນກຸ່ມເປົ້າໝາຍຕື່ມອີກ. ຈາກນັ້ນຕົວແທນຂອງອຳນາດການປົກຄອງບ້ານ, ຄູຜູ້ຮັບຜິດຊອບ ແລະ ນັກຮຽນຜູ້ເຂົ້າຮຽນບຳລຸງຕ່າງກໍໄດ້ພັດປ່ຽນກັນຂຶ້ນປະກອບຄຳເຫັນສະແດງຄວາມຮູ້ສຶກຂອງຕົນຕໍ່ຜົນສຳເລັດໃນຄັ້ງນີ້, ມີການມອບໃບຍ້ອງຍໍໃຫ້ແກ່ຜູ້ມີຄຸນງາມຄວາມດີໃນການປະກອບສ່ວນຊຸກຍູ້ວຽກງານການຮຽນການສອນພ້ອມທັງມອບໃບຢັ້ງຢືນໃຫ້ແກ່ເມືອງວັງວຽງເປັນເມືອງຈົບຊັ້ນມັດທະຍົມສຶກສາຕອນຕົ້ນບຳລຸງຢ່າງສົມກຽດ ເຊີ່ງຜູ້ຂຶ້ນມອບໄດ້ແກ່ທ່ານ ຮສ ປອ. ຄຳຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກິລາ ແລະ ຜູ້ຮັບແມ່ນ ທ່ານ ຄຳຜອງ ດວງວິໄລ ເຈົ້າເມືອງໆວັງວຽງ.
ຕອນທ້າຍພິທີຍັງໄດ້ຮັບຟັງການໂອ້ລົມຂອງ ທ່ານ ຮສ ປອ. ຄຳຜາຍ ສີສະຫວັນ ຄະນະປະຈຳພັກກະຊວງ ຮອງລັດຖະມົນຕີກະຊວງສຶກສາທິການ ແລະ ກິລາ ເຊີ່ງທ່ານໄດ້ສະແດງຄວາມຍ້ອງຍໍຊົມເຊີຍມາຍັງການຈັດຕັ້ງອຳນາດການປົກຄອງທຸກຂັ້ນຢູ່ເມືອງວັງວຽງຕະຫຼອດຮອດຄູ-ອາຈານ ແລະ ຫ້ອງການທີ່ກ່ຽວຂ້ອງຂອງເມືອງທີ່ເຮັດໃຫ້ການຮຽນ-ການສອນໃນຄັ້ງນີ້ໄດ້ຮັບຜົນສຳເລັດ ເປັນການປະກອບສ່ວນອັນສຳຄັນໃຫ້ແກ່ຜົນປະໂຫຍດລວມຂອງຊາດ ໂດຍສະເພາະການກ້າວສູ່ເປົ້າໝາຍຂອງການພັດທະນາສະຫະສະຕະວັດຕາມແນວທາງນະໂຍບາຍຂອງພັກ-ລັດກໍຄືສາກົນໄດ້ກຳນົດອອກ.
  ນອກນີ້ ທ່ານຍັງໄດ້ຍົກໃຫ້ເຫັນເຖີງຄວາມສຳຄັນ ແລະ ຄວາມຈຳເປັນໃນການຍົກລະດັບຄວາມຮູ້ຄວາມສາມາດທາງດ້ານການສຶກສາໃຫ້ແກ່ປະຊາຊົນ ເພື່ອຍົກລະດັບທາງດ້ານຄວາມຮູ້ສະຕິປັນຍາຕິດພັນກັບການດຳລົງຊີວິດໃຫ້ແກ່ເຂົາເຈົ້າໃຫ້ດີຂຶ້ນ ເຊີ່ງປັດໃຈຫຼັກໃນການພັດທະນາປະເທດຊາດໃຫ້ມີຄວາມຍຶນຍົງແມ່ນການພັດທະນາທາງດ້ານຊັບພະຍາກອນມະນຸດໃຫ້ມີຄຸນນະພາບທີ່ແນ່ນອນ ແລະ ນອກຈາກນີ້ແລ້ວ ທ່ານຍັງໄດ້ມີຄຳເຫັນເພື່ອຊີ້ນຳຜູ້ບໍລິຫານການສຶກສາຢູ່ພາຍໃນເມືອງໃນການເຊີດຊູຄວາມຮັບຜິດຊອບຕໍ່ໜ້າທີ່ວຽກງານວິຊາການສະເພາະຂອງຕົນໃນການສິດສອນ ແລະ ສຶກສາອົບຮົມລູກຫຼານນັກຮຽນທີ່ເປັນອະນາຄົດຂອງປະເທດຊາດໃຫ້ເປັນຄົນຮູ້ຜູ້ດີຕາມ 5 ຫຼັກມູນຂອງການສຶກສາຂອງພັກໄດ້ກຳນົດອອກ.
  ຕອນທ້າຍ ທ່ານຍັງໄດ້ໃຫ້ກຽດປ່ອຍປູມເປົ້າ ແລະ ລັ່ນຄ້ອງ 9 ບາດ ເພື່ອນເປັນສັນຍາລັກໃຫ້ແກ່ພິທີປະກາດຈົບຊັ້ນມັດທະຍົມສຶກສາຕອນຕົ້ນບຳລຸງຢູ່ເມືອງວັງວຽງໃນຄັ້ງນີ້ຕື່ມອີກ ໂດຍສ່ອງໜ້າແຂກຄົນທີ່ເຂົ້າຮ່ວມງານດ້ວຍບັນຍາກາດອັນຟົດຟື້ນ.
error: Content is protected !!