ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 5 ສພຊ ແລະ ສພຂ

ໃນວັນທີ 5 ກັນຍາ 2018 ຜ່ານມານີ້ ຢູ່ທີ່ສະໂມສອນໃຫຍ່ເມືອງວັງວຽງ ສະມາຊິກສະພາແຫ່ງຊາດເຂດ 10 ແຂວງວຽງຈັນ ຮ່ວມກັບສະມາຊິກສະພາປະຊາຊົນແຂວງວຽງຈັນເຂດເລືອກຕັ້ງເມືອງວັງວຽງ ໄດ້ຈັດຕັ້ງການເຜີ່ຍແແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 5 ສະພາແຫ່ງຊາດຊຸດທີ VIII ແລະ ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ I ຂຶ້ນ.
ໃຫ້ກຽດເຜີຍແຜ່ຂອງ ທ່ານ ສົມດີ ແກ້ວລາດາວິນ ກຳມະການພັກແຂວງ ສະມາຊິກສະພາແຫ່ງຊາດ ຮອງປະທານສະພາປະຊາຊົນແຂວງວຽງຈັນ ແລະ ທ່ານ ບຸນປັນ ພົມມະວົງ ຮອງເລຂາພັກເມືອງ ປະທານແນວລາວສ້າງຊາດເມືອງ ສະມາຊິກສະພາປະຊາຊົນແຂວງວຽງຈັນ. ໂດຍການເຂົ້າຮ່ວມຂອງທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ , ທ່ານ ກວຽນທອງ ເທບທິດາ ກຳມະການພັກເມືອງ ຫົວໜ້າຫ້ອງການໆເງິນເມືອງ ສະມາຊິກສະພາປະຊາຊົນແຂວງວຽງຈັນ ເຂດເລືອກຕັ້ງເມືອງວັງວຽງ. ນອກນີ້ ຍັງມີບັນດາທ່ານໃນຄະນະການນຳຂອງເມືອງ, ຫົວໜ້າຫ້ອງການ,​ ຄະນະຫ້ອງການ ແລະ ພະນັກງານຫຼັກແຫຼ່ງທົ່ວເມືອງເຂົ້າຮ່ວມຮັບຟັງ.
ພາຍຫຼັງທ່ານ ຄຳຜອງ ດວງວິໄລ ເຈົ້າເມືອງໆວັງວຽງ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງເມືອງຜ່ານມາໂດຍຫຍໍ້ຕໍ່ສະມາຊິກສະພາແຫ່ງຊາດ ແລະ ສະພາປະຊາຊົນແຂວງແລ້ວ ທ່ານ ສົມດີ ແກ້ວລາດາວິນ ສະມາຊິກສະພາແຫ່ງຊາດ ຮອງປະທານສະພາປະຊາຊົນແຂວງວຽງຈັນກໍໄດ້ຂຶ້ນມີຄຳເຫັນ ໂດຍທ່ານໄດ້ຍົກໃຫ້ເຫັນສະພາບທີ່ພົ້ນເດັ່ນຂອງໂລກ ແລະ ສາກົນ ຜ່ານມາ, ການພົວພັນຮ່ວມມືທີ່ດີລະຫວ່າງ ສປປ ລາວ ກັບ ສປ ຈີນ, ສປປ ລາວ ກັບ ສະຫະລັດອາເມລິກາ ແລະ ຍົກໃຫ້ເຫັນສະພາບຕໍ່ໜ້າທີ່ ສປປ ລາວ ຈະໄດ້ເອົາໃຈໃສ່, ນອກນີ້ທ່ານຍັງໄດ້ນຳເອົາເນື້ອໃນຈິດໃຈຜົນສຳເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ເຊີ່ງໄດ້ຮັບຮອງເອົາບັນຫາພື້ນຖານທີ່ສຳຄັນຂອງຊາດ ເປັນຕົ້ນ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນງົບປະມານແຫ່ງລັດປະຈຳ 4 ເດືອນ ແລະ ຄາດຄະເນການປະຕິບັດແຜນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018 ຂອງລັດຖະບານ, ການຊີ້ແຈງຂອງລັດຖະບານຕໍ່ການຊັກຖາມຂອງສະພາແຫ່ງຊາດ, ແຜນແມ່ບົດການຈັດສັນທີ່ດິນແຫ່ງຊາດແຕ່ນີ້ຮອດປີ 2030, ມະຕິຂອງສະພາແຫ່ງຊາດ ວ່າດ້ວຍ ການແຕ່ງຕັ້ງສະມາຊິກສະພາແຫ່ງຊາດຜູ້ພິພາກສາຂອງສານປະຊາຊົນສູງສູດ, ຟັງການລາຍງານຂອງລັດຖະບານໃນການຈັດຕັ້ງປະຕິບັດການອອກນິຕິກຳລຸ່ມກົດໝາຍ ແລະ ຜົນກະທົບການນຳໃຊ້ສານເຄມີເກີນຄ່າມາດຕະຖານຕໍ່ສິ່ງແວດລ້ອມສັງຄົມ ແລະ ທຳມະຊາດ, ຟັງການລາຍງານວຽກງານ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2018 ຂອງສະພາແຫ່ງຊາດ ແລະ ພິຈາລະນາຮັບຮອງເອົາກົດໝາຍສ້າງໃໝ່ 5 ສະບັບ ແລະ ປັບປຸງ 6 ສະບັບ.
ຈາກນັ້ນ ທ່ານ ບຸນປັນ ພົມມະວົງ ຮອງເລຂາພັກເມືອງ ສະມາຊິກສະພາປະຊາຊົນແຂວງວຽງຈັນ ກໍໄດ້ຂຶ້ນເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ I ເປັນຕົ້ນ: ແມ່ນການຮັບຮອງເອົາບັນຫາທີ່ສຳຄັນຂອງແຂວງ ເຊັ່ນ: ແຜນພັດທະນາເສດຖະກິດສັງຄົມ ແລະ ແຜນງົບປະມານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018 ຂອງແຂວງ, ບັນຫາທີ່ດິນການເຊົ່າ-ສຳປະທານ ແລະ ການນຳໃຊ້ທີ່ດິນຢູ່ແຂວງວຽງຈັນ, ເນື້ອໃນໂທລະສັບສາຍດ່ວນຂອງປະຊາຊົນຕໍ່ກັບແຂວງວຽງຈັນ, ວຽກງານ 6 ເດືອນຕົ້ນປີ ແລະ ແຜນການ 6 ເດືອນທ້າຍປີຂອງອົງການໄອຍາການແຂວງວຽງຈັນ, ການຄວບຄຸມ ແລະ ແກ້ໄຂຢາເສບຕິດ ແລະ ອຸປະຕິເຫດຕາມທ້ອງຖະໜົນຢູ່ແຂວງວຽງຈັນ. ນອກນີ້ ຍັງໄດ້ຮັບຟັງ ແລະ ປະກອບຄຳເຫັນໃສ່ນິຕິກຳໃຕ້ກົດໝາຍວ່າດ້ວຍການກຳນົດຫົວໜ່ວຍລາຄາທີ່ດິນຢູ່ແຂວງວຽງຈັນ ແລະ ກອງປະຊຸມຍັງໄດ້ຮັບຮອງເອົາບົດສະຫຼຸບວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018 ຂອງສະພາປະຊາຊົນແຂວງວຽງຈັນຕື່ມອີກ.
ນອກຈາກຮັບຟັງການເຜີຍແຜ່ຜົນສຳເລັດຂອງກອງປະຊຸມສະພາແຫ່ງຊາດຊຸດທີ VIII ສະໄໝສາມັນເທື່ອທີ 5 ແລະ ກອງປະຊຸມສະພາປະຊາຊົນແຂວງວຽງຈັນຊຸດທີ I ສະໄໝສາມັນເທື່ອທີ 5 ແລ້ວ. ທີ່ປະຊຸມຍັງໄດ້ຈັດໃຫ້ມີການຟັງປາຖະກະຖາເລົ່າຄືນມູນເຊື້ອວັນຍຶດອຳນາດທົ່ວປະເທດ, ວັນທີ 23 ສິງຫາ ຄົບຮອບ 43 ປີ ຈາກທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງຕື່ມອີກ.
error: Content is protected !!