ເປີດກອງປະຊຸມຄົບຄະນະບໍລິຫານງານພັກເມືອງຄັ້ງທີ 8 ສະໄໝທີ VI

ໃນວັນທີ 31 ສິງຫາ 2018 ຜ່ານມານີ້ ເມືອງວັງວຽງ ໄດ້ຈັດກອງປະຊຸມຄົບຄະນະບໍລິຫານງານພັກເມືອງຄັ້ງທີ 8 ສະໄໝທີ VI ຂຶ້ນຢູ່ທີ່ຫ້ອງປະຊຸມຊັ້ນ III ສຳນັກງານປົກຄອງເມືອງວັງວຽງ.
ໂດຍການເຂົ້າຮ່ວມເປັນປະທານຂອງທ່ານ ບຸນສອນ ເພັດລາວັນ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ, ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີບັນດາສະຫາຍໃນຄະນະບໍລິຫານງານພັກເມືອງ, ເລຂາຄະນະພັກຮາກຖານ ແລະ ເລຂາໜ່ວຍພັກຢູ່ພາຍໃນເມືອງເຂົ້າຮ່ວມ. ນອກນີ້, ຍັງມີແຂກຖືກເຊີນມາຈາກບັນດາລັດວິສາຫະກິດອ້ອມຂ້າງເມືອງ, ຄະນະພັກຄະນະບັນຊາກອງພົນທະຫານຮາບທີ 1 ໃຫ້ກຽດເຂົ້າຮ່ວມ.
ກອງປະຊຸມຄັ້ງນີ້ ສະຫາຍ ບຸນຈັນ ມາລາວົງ ຮອງເລຂາພັກເມືອງ ຮອງເຈົ້າເມືອງໆວັງວຽງ ໄດ້ຂຶ້ນຜ່ານບົດສະຫຼຸບການຊີ້ນຳ-ຈັດຕັ້ງປະຕິບັດວຽກງານຮອບດ້ານນັບແຕ່ກອງປະຊຸມຄົບຄະນະບໍລິຫານງານພັກເມືອງຄັ້ງທີ 7 ສະໄໝທີ VI ເຖີງປະຈຸບັນ ໂດຍຍົກໃຫ້ເຫັນເຖິງດ້ານດີ-ດ້ານຕັ້ງໜ້າ ແລະ ດ້ານອ່ອນຂໍ້ຄົງຄ້າງ ໃນການຈັດຕັ້ງປະຕິບັດວຽກງານແຕ່ລະດ້ານເປັນຕົ້ນ: ດ້ານການສຶກສາອົບຮົມການເມືອງແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານເສດຖະກິດ, ວຽກງານວັດທະນະທຳສັງຄົມ, ວຽກງານການຕ່າງປະເທດ, ວຽກງານກໍ່ສ້າງພັກ-ພະນັກງານ, ວຽກງານກໍ່ສ້າງຮາກຖານການເມືອງຕິດພັນວຽກງານ 3 ສ້າງ, ວຽກອົງການຈັດຕັ້ງມະຫາຊົນ, ຂົງເຂດບໍລິຫານລັດ ແລະ ວຽກງານກວດກາ ເພື່ອໃຫ້ທີ່ປະຊຸມໄດ້ປະກອບຄຳຄິດຄຳເຫັນໃສ່ຢ່າງກົງໄປກົງມາ ເພື່ອແນໃສ່ແກ້ໄຂຂໍ້ຄົງຄ້າງຕ່າງໆ ເພື່ອຖອດຖອນເປັນບົດຮຽນໃນຕໍ່ໜ້າ. ນອກນີ້ຍັງໄດ້ກຳນົດທິດທາງຈຸດສຸມໃນຕໍ່ໜ້າແນໃສ່ເຮັດໃຫ້ການຈັດຕັ້ງປະຕິບັດແຜນພັດທະນາເສດຖະກິດສັງຄົມ 6 ເດືອນທ້າຍປີຂອງເມືອງໃຫ້ໄດ້ບັນລຸຕາມຈຸດປະສົງທີ່ໄດ້ກຳນົດໄວ້.

ຕອນທ້າຍທີ່ປະຊຸມຍັງໄດ້ຮັບຟັງການໂອ້ລົມຂອງ ທ່ານ ບຸນສອນ ເພັດລາວັນ ຄະນະປະຈຳພັກແຂວງ ຮອງເຈົ້າແຂວງໆວຽງຈັນຕື່ມອີກ, ເຊີ່ງກ່ອນອື່ນທ່ານໄດ້ຊີ້ນຳການຈັດຕັ້ງປະຕິບັດກ່ຽວກັບການກະກຽມການດຳເນີນກອງປະຊຸມໃຫຍ່ຂອງພັກ 3 ຂັ້ນ ໂດຍຕິດພັນກັບການປັບປຸງການຈັດຕັ້ງ ແລະ ການແກ້ໄຂປະກົດການຫຍໍ້ທໍ້ຕ່າງໆ ຕາມຂະແໜງການສາຍຕັ້ງຂອງຕົນ, ເອົາໃຈໃສ່ສືບຕໍ່ແກ້ໄຂຄວາມທຸກຍາກຂອງປະຊາຊົນ, ຄວາມສະອາດ ແລະ ຄວາມເປັນລະບຽບຮຽບຮ້ອຍຂອງຕົວເມືອງ, ສືບຕໍ່ລົງກໍ່ສ້າງຮາກຖານການເມືອງ, ສຶກສາອົບຮົມວຽກງານການເມືອງແນວຄິດໃຫ້ແກ່ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າຢູ່ພາຍໃນເມືອງ, ເພີ່ມທະວີຄວາມສາມັກຄີພາຍໃນພັກພາຍໃນລັດ ແລະ ປະຊາຊົນຢູ່ພາຍໃນເມືອງໃຫ້ເປັນປຶກແຜ່ນແໜ້ນໜາ. ນອກນີ້ ຍັງໄດ້ແນະນຳກ່ຽວກັບ 5 ຫຼັກການ 3 ທິດນຳ 9 ຂໍ້ຫ້າມ ແລະ 7 ໜ້າວຽກຂອງຄະນະພັກ ແລະ ສະມາຊິກພັກຕໍ່ທີ່ປະຊຸມຕື່ມອີກ.
error: Content is protected !!