ມອບ​-ຮັບໜ້າ​ທີ່​ປະ​ທານ​ສະ​ຫະ​ພັນ​ແມ່​ຍິງ​ເມືອງ​ຜູ້​ເກົ່າ-ຜູ້​ໃໝ່

​ໃນ​ຕອນ​ເຊົ້າ​ຂອງວັນ​ທີ 3 ທັນ​ວາ 2019 ນີ້​ຢູ່​ທີ່​ຫ້ອງ​ປະ​ຊຸມ​ຊັ້ນ I ສຳ​ນັກ​ງານ​ປົກ​ຄອງ​ເມືອງວັງ​ວຽງ ໄດ້​ຈັດ​ພິ​ທີ​ມອບ-ຮັບ​ໜ້າ​ທີ່​ປະ​ທານ​ສະ​ຫະ​ພັນ​ແມ່​ຍິງ​ເມືອງວັງ​ວຽງ ຜູ້​ເກົ່າ​ ແລະ ຜູ້​ໃໝ່​ຂຶ້ນ, ໂດຍ​ການ​ເຂົ້າ​ຮ່ວມ​ຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວ​ັງ​ວຽງ, ມີ​ບັນ​ດາ​ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ​ເມືອງ, ຫົວ​ໜ້າ​ຫ້ອ​ງ​ການ​ອ້ອມ​ຂ້າງ​ເມືອງ​ພ້ອມ​ດ້ວຍ​ພະ​ນັກ​ງານ​ຫ້ອງ​ການ​ສະ​ຫະ​ພັນ​ແມ່​ຍິງ​ເມືອງ​ເຂົ້າ​ຮ່ວມ.

ໃນ​ພິ​ທີ ທ່ານ ນາງ ຂັນ​ຄຳ ສີ​ທາ​ນີ ປະ​ທານ​ສະ​ຫະ​ພັນ​ແມ່​ຍິງ​ເມືອງ​ຜູ້​ເກົ່າ​ໄດ້​ສະຫຼຸບ​ການ​ເຄື່ອນ​ໄຫວ​ຊີ້​ນຳໆ​ພາ​ວຽກ​ງານ​ຂອງ​ສະ​ຫະ​ພັນ​ແມ່​ຍິງ​ເມືອງວັງ​ວຽງ ໃນ​ໄລ​ຍະ​ທີ່​ຜ່ານ​ມາ ໂດຍ​ໄດ້​ຍົກ​ໃຫ້​ເຫັນ​ດ້ານ​ດີ, ດ້ານ​ອ່ອນ, ຂໍ້​ຄົງ​ຄ້າງ ແລະ ບາງ​ບົດ​ຮຽນ​ທີ່​ຖອດ​ຖອນ​ໄດ້ ເພື່ອ​ໃຫ້​ຄະ​ນະ​ຜູ້​ໃໝ່​ໄດ້​ສືບ​ຕໍ່​ຜ​ັນ​ຂະ​ຫຍາຍ. ຈາກ​ນັ້ນ ກໍ່​ໄດ້​ມີ​ການ​ເຊັນ​ບົດ​ບັນ​ທຶກມອບ-ຮັບ​ໜ້າ​ທີ່​ວຽກ​ງານ​ກັນ​ລະ​ຫວ່າງ ທ່ານ ນ. ຂັນ​ຄຳ ສີ​ທາ​ນີ ປ​ະ​ທານ​ສະ​ຫະ​ພັນ​ແມ່ຍ​ິງ​ເມືອງ​ທີ່​ຖືກ​ຊັບ​ຊ້ອນ​ໄປ​ຮັບ​ໜ້າ​ທີ່​ວຽກ​ງານໃໝ່ຢູ່​ຫ້ອງວ່າ​ການ​ປົກ​ຄອງ​ເມືອງ ກັບ ທ່ານ ນ. ພອນ​ໄຊ ຫຼວງວິ​ລາດ ປ​ະ​ທານ​ສະ​ຫະ​ພັນ​ແມ່​ຍິງ​ເມືອງຜູ້​ໃໝ່.

ຕອນ​ທ້າຍ​ຂອງ​ພິ​ທີ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆວັງ​ວຽງ ກ​ໍ​ໄດ້​ມີ​ຄຳ​ຄິດ​ຄຳ​ເຫັນ​ໂອ້​ລົມ​ຕໍ່​ພິ​ທີ. ກ່ອນ​ອື່ນ​ທ່ານ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ຕໍ່​ປະ​ທານ​ສະ​ຫະ​ພັນ​ແມ່​ຍິງ​ເມືອງ​ຜູ້​ເກົ່າ​ທີ່​ໄດ້​ຊີ້​ນຳໆ​ພາ​ວຽກ​ງານ​ສະ​ຫະ​ພັນ​ແມ່​ຍິງວັງ​ວຽງ​ໄລ​ຍະ​ຜ່ານ​ມາ ເຊີ່ງ​ເຫັນ​ວ່າ​ມີ​ຜົນ​ງານ​ດີຫຼາຍ​ດ້ານ. ການມອບ​-ຮັບ​ໜ້າ​ທີ່​ວຽກ​ງານ​ຄັ້ງ​ນີ້​ແມ່ນ​ອີງ​ຕາມ​ຄວາມ​ຮຽກ​ຮ້ອງ​ຕ້ອງ​ການ​ຂອງ​ໜ້າ​ທີ່​ວຽກ​ງານ ເພື່ອ​ແນ​ໃສ່​ປັບ​ປຸງ​ລະ​ບົບ​ການ​ຈັດ​ຕັ້ງ​ຂອງ​ລັດ​ໃຫ້​ເຂັ້ມ​ແຂງ, ເປັນ​ການ​ຈັດ​ວາງ​ບຸກ​ຄະ​ລາ​ກອນ​ໃຫ້​ແທດ​ເໝາະ​ກັບ​ຄວາມ​ຮູ້​ຄວາມ​ສາ​ມາດ​ທາງ​ດ້ານ​ວິ​ຊາ​ສະ​ເພາະ, ພ້ອມ​ທັງ​ຮຽກ​ຮ້ອງ​ມາ​ຍັງ​ຜູ້​ເກົ່າ​ທີ່​ຖືກ​ຍົກ​ຍ້າຍ​ໄດ້​ຮັບ​ຜິດ​ຊອບ​ໜ້າ​ທີ່​ໃໝ່ ແລະ ຜູ້​ໃໝ່​ທີ່​ຈະ​ເຂົ້າ​ຮັບ​ໜ້າ​ທີ່ ຈົ່ງ​ໄດ້​ເຊີດ​ຊູ​ຄວາມ​ຮັບ​ຜິດ​ຊອບ​ຂອງ​ຕົນ​ໃຫ້​ສູງ​ຂຶ້ນ ເພື່ອ​ເຮັດ​ສຳ​ເລັດ​ໜ້າ​ທີ່​ວຽກ​ງານ​ທີ່​ການ​ຈັດ​ຕັ້ງ​ຂັ້ນ​ເທິງມອບ​ໝາຍ​ໃຫ້​ທຸກ​ປະ​ການ.