ເມືອງວັງ​ວຽງ ຈັດ​ຕັ້ງ​ການ​ເຊື່ອມ​ຊຶມ​ກົດ​ໝາຍ​ການ​ຈັດ​ສັນ​ພູມ​ລຳ​ເນົາ ແລະ ອາ​ຊີບ

​ກອງ​ປະ​ຊຸມ​ດັ່ງ​ກ່າວໄດ້​ຈັດ​ຂຶ້ນ​ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ບຸນ​ປັນ ພົມ​ມະ​ວົງ ຮອງ​ເລ​ຂາ​ພັກ​ເມືອງ ປ​ະ​ທານ​ແນວ​ລາວ​ສ້າງ​ຊາດ​ເມືອງ ຫົວ​ໜ້າ​ໜ່ວຍ​ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງວຽງ​ຈັນ ເຂດ​ເລືອກ​ຕັ້ງ​ເມືອງວັງ​ວຽງ, ທ່ານ ຊົງ​ໄຊ ລັດ​ຕະ​ນະ​ຄຳ​ເພັດ ກຳ​ມະ​ການ​ພັກ​ເມືອງ ຫົວ​ໜ້າ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ, ມີ​ບັນ​ດາ​ທ່ານ​ຫົວ​ໜ້າ​ຫ້ອງ​ການ, ຄະ​ນະ​ຫ້ອງ​ການ​ອ້ອມ​ຂ້າງ​ເມືອງ ແລະ ນາຍ​ບ້ານ​ແຕ່​ລະ​ບ້ານ​ໃນ​ທົ່ວ​ເມືອງ​ເຂົ້າ​ຮ່ວມ. ທີ່​ປະ​ຊຸມ​ທ່ານ ບຸນ​ປັນ ພົມ​ມະ​ວົງ ຮອງ​ເລ​ຂາ​ພັກ​ເມືອງ ໄດ້​ຂຶ້ນ​ຜ່ານ​ກົດ​ໝາຍ​ວ່າ​ດ້ວຍ ການ​ຈັດ​ສັນ​ພູມ​ລຳ​ເນົາ ແລະ ອາ​ຊີບ, ເຊີ່ງ​ກົດ​ໝາຍ​ດັ່ງ​ກ່າວປະ​ກອບ​ມີ XII ໝວດ, 85 ມາດ​ຕາ ໂດຍ​ມີ​ຈຸດ​ປະ​ສົງ​ເພື່ອ​ຮັບ​ປະ​ກັນ​ໃຫ້​ແກ່​ປະ​ຊາ​ຊົນ​ລາວ​ບັນ​ດາ​ເຜົ່າ​ມີ​ທີ່​ຢູ່​ອາ​ໃສ, ບ່ອນ​ທຳ​ມາ​ຫາ​ກິນ​ແໜ້ນ​ໜາ​ຖາ​ວອນ, ມີ​ອາ​ຊີບ​ຄົງ​ທີ່, ແກ້​ໄຂ​ການ​ເຄື່ອນ​ຍ້າຍ​ຂອງ​ພົນ​ລະ​ເມືອງ​ທີ່​ບໍ່​ຖືກ​ຕ້ອງ​ຕາມ​ລະ​ບຽບ​ກົດ​ໝາຍ ແນ​ໃສ່​ລຶບ​ລ້າງ​ຄວາມ​ທຸກ​ຍາກ​ຂອງ​ປະ​ຊາ​ຊົນ​ເຮັດ​ໃຫ້​ຊີ​ວິດ​ການ​ເປັນ​ຢູ່​ດີ​ຂຶ້ນ, ມີ​ຄວາມ​ສະ​ຫງົບ ແລະ ຄວາມ​ເປັນ​ລະ​ບຽບ​ຮຽບ​ຮ້ອຍ​ຢູ່​ໃນ​ສັງ​ຄົມ.

ນອກ​ນີ້ ທ່ານ ຊົງ​ໄຊ ລັດ​ຕະ​ນະ​ຄຳ​ເພັດ ຫົວ​ໜ້າ​ຫ້ອງ​ການ​ກະ​ສິ​ກຳ ແລະ ປ່າ​ໄມ້ເມືອງ ຍັງ​ໄດ້​ຜ່ານ​ຂໍ້​ຕົກ​ລົງ​ຂອ​ງ​ທ່ານ​ລັດ​ຖະ​ມົນ​ຕີ​ກະ​ຊວງ​ກະ​ສິ​ກຳ ແລະ ປ່າ​ໄມ້ ວ່າ​ດ້ວຍ​ມາດ​ຖານ​ຂອງ​ຄອບ​ຄົວ​ຕົວ​ແບບ​ດ້ານ​ກະ​ສິ​ກຳ, ບ້ານ​ແບບ​ຢ່າງ​ທາງ​ດ້ານ​ກະ​ສິ​ກຳ​-ປ່າ​ໄມ້ ແລະ ເມືອງ​ກະ​ສິ​ກຳ​ປ່າ​ໄມ້ ພັດ​ທະ​ນາ ເພື່ອ​ໃຫ້​ຜູ້​ເຂົ້​າ​ຮ່ວມ​ໄດ້​ຮັບ​ຮູ້​ເຊື່ອມ​ຊຶມ ເພື່ອ​ນຳ​ໄປ​ຈັດ​ຕັ້ງ​ຜັນ​ຂະ​ຫຍາຍ​ໃນ​ຕໍ່​ໜ້າ​ຕື່ມ​ອີກ.