ກອງ​ປະ​ຊຸມ​ເຜີຍ​ແຜ່​ເຊື່ອມ​ຊຶມ​ນິ​ຕິ​ກຳ​ການ​ປະ​ເມີນ​ຜົນ​ວຽກ​ງານ​ຂອງ​ພະ​ນັກ​ງານ-ລັດ​ຖະ​ກອນ ທົ່ວ​ເມືອງວັງ​ວຽງ

​ໃນວັນ​ທີ 8 ພະ​ຈິກ 2019 ຜ່ານ​ມາ​ນີ້ ຢູ່​ທີ່​ຫ້ອງ​ປະ​ຊຸມ​ຊັ້ນ III ສຳ​ນັກ​ງານ​ປົກ​ຄອງ​ເມືອງວັງ​ວຽງ ໄດ້​ຈັດ​ໃຫ້​ມີ​ກອງ​ປະ​ຊຸມ​ເຜີຍ​ແຜ່​ເຊື່ອມ​ຊຶມ​ນິ​ຕິ​ກຳ​ກ່ຽວກ​ັບ​ການ​ປະ​ເມີນ​ຜົນ​ວຽກ​ງານ​ຂອງ​ພະ​ນັກ​ງານ-ລັດ​ຖະ​ກອນ​ທົ່ວ​ເມືອງວັງ​ວຽງ ປະ​ຈຳ​ປີ 2019 ຂຶ້ນ. ໂດຍ​ການ​ເຂົ້າ​ຮ່ວມ​ເປັນ​ປະ​ທານຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ມີ​ບັນ​ດາ​ຫົວ​ໜ້າ​ຫ້ອງ​ການ, ຄະ​ນະ​ຫ້ອງ​ການ ແລະ ຜູ້​ຮັບ​ຜິດ​ຊອບ​ວຽກ​ງານ​ຈັດ​ຕັ້ງ​ພະ​ນັກ​ງ​ານ ມາ​ຈາກ​ຫ້ອ​ງ​ການ​ຕ່າງໆ ຢູ່​ພາຍ​ໃນ​ເມືອງ​ເຂົ້າ​ຮ່ວມ.

ພາຍຫຼັງຄະ​ນະ​ຈັດ​ຕັ້ງ​ພິ​ທີ ໄດ້​ຜ່ານ​ຂໍ້​ຕົກ​ລົງ​ຂອງ​ທ່ານ​ເຈົ້າ​ເມືອງໆ​ວັງ​ວຽງ​ວ່າ​ດ້ວຍ​ການ​ແຕ່ງ​ຕັ້ງ​ຄະ​ນະ​ຊີ້​ນຳ​ ແລະ ວິ​ຊາ​ການ​ປະ​ເມີນ​ຜົນ​ພະ​ນັກ​ງານ​-ລັດ​ຖະ​ກອນ​ທົ່ວ​ເມືອງ​ປະ​ຈຳ​ປີ 2019 ແລ້ວ. ທ່ານ ເຈົ້າ​ເມືອງໆ​ວັງ​ວຽງ ປ​ະ​ທານກອງ​ປະ​ຊຸມກ​ໍ​ໄດ້​ເຜີ​ຍ​ແຜ່​ເຊື່ອມ​ຊຶມ​ເອ​ກະ​ສານ​ໃຫ້​ແກ່​ຜູ້​ເຂົ້າ​ຮ່ວມກອງ​ປະ​ຊຸມ ເຊີ່ງ​ປະ​ກອບ​ດ້ວຍ: ດຳ​ລັດ​ເລກ​ທີ 300/ລບ ວ່າ​ດ້ວຍ​ການ​ປະ​ເມີນ​ຜົນ​ການ​ປະ​ຕິ​ບັດ​ວຽກ​ງານ​ຂອງ​ພະ​ນັກ​ງານ-ລັດ​ຖະ​ກອນ, ຄຳ​ແນະ​ນຳ ເລກ​ທີ 06/ພນ ຂອງ​ທ່ານ​ລັດ​ຖະ​ມົນ​ຕີ​ກະ​ຊວງ​ພາຍ​ໃນ ໃນ​ການ​ຈັດ​ຕັ້ງ​ປະ​ຕິ​ບັດ​ກ່ຽວ​ກັບ​ການ​ປະ​ເມີນ​ຜົນ​ການ​ປະ​ຕິ​ບັດ​ວຽກ​ງານ​ຂອງ​ພະ​ນັກ​ງານ-ລັດ​ຖະ​ກອນ.

ຈາກ​ນັ້ນ ທາງວິ​ຊາ​ການ​ຈາກ​ຫ້ອ​ງ​ການ​ພາຍ​ໃນ​ເມືອງ ກ​ໍ​ໄດ້​ຂຶ້ນ​ແນະ​ນຳ​ກ່ຽວກ​ັບ​ຕາ​ຕະ​ລາງ​ໃນ​ພາກ​ປະ​ຕິ​ບັດ​ຕົວ​ຈິງ​ຕາມ​ປື້ມ​ຄູ່ ເລກ​ທີ 01/ປ​ພ​ລ, ລົງ​ວັນ​ທີ 29 ສິງ​ຫາ 2018 ເພື່ອ​ໃຫ້​ທີ່​ປະ​ຊຸມ​ໄດ້​ປຶກ​ສາ ແລກ​ປ່ຽນ​ຄຳ​ຄິດ​ຄຳ​ເຫັນ​ຮ່ວມ​ກັນ ເພື່ອ​ສ້າງ​ຄວາມ​ເປັນ​ເອ​ກະ​ພາບ​ໃນ​ການ​ຈັດ​ຕັ້ງ​ປະ​ຕິ​ບັດ.
ກອງ​ປະ​ຊຸມ​ໄດ້​ດຳ​ເນີນ​ໄປ​ເປັນ​ເວ​ລາ 1 ວັນ ເຕັມ​ຈຶ່ງ​ໄດ້​ປິດ​ລົງ.