ກອງປະຊຸມວຽກງານກໍ່ສ້າງຮາກຖານພັດທະນາຊົນນະບົດຕິດພັນກັບວຽກ 3 ສ້າງ

ໃນຕອນເຊົ້າຂອງວັນທີ 11 ກໍລະກົດ 2018 ນີ້ ຢູ່ຫ້ອງປະຊຸມສະໂມສອນໃຫຍ່ ຊັ້ນ II ເມືອງວັງວຽງ ໄດ້ຈັດກອງປະຊຸມກ່ຽວກັບວຽກງານກໍ່ສ້າງຮາກຖານການເມືອງ ພັດທະນາຊົນນະບົດຕິດພັນກັບວຽກງານສາມສ້າງຂຶ້ນ.
ພາຍໃຕ້ການເປັນປະທານຂອງ ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີບັນດາສະຫາຍໃນຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການຕ່າງໆ ຂອງເມືອງ, ເລຂາຄະນະພັກຮາກຖານກຸ່ມບ້ານ ແລະ ອຳນາດການປົກຄອງບ້ານເປົ້າໝາຍຈັດຕັ້ງປະຕິບັດວຽກງານສາມສ້າງຢູ່ພາຍໃນເມືອງເຂົ້າຮ່ວມ.
ທີ່ປະຊຸມໄດ້ຮັບຟັງການຜ່ານເອກະສານກ່ຽວກັບຂໍ້ຕົກລົງຂອງ ທ່ານເຈົ້າເມືອງວ່າດ້ວຍ ການແຕ່ງຕັ້ງຄະນະກຳມະການໃສ່ແຕ່ລະກຸ່ມວຽກ, ຄຳແນະນຳຂອງທ່ານເຈົ້າແຂວງໆວຽງຈັນກ່ຽວກັບການຈັດຕັ້ງປະຕິບັດວຽກງານສາມສ້າງ, ວິທີເກັບກຳຂໍ້ມູນຢູ່ຂັ້ນເມືອງ ແລະ ຂັ້ນບ້ານ, ຜ່ານມະຕິຕົກລົງຂອງຄະນະປະຈຳພັກເມືອງ ວ່າດ້ວຍການຮັບຮອງເອົາ 5 ບ້ານເປົ້າໝາຍໃນການເຮັດວຽກງານສາມສ້າງແຕ່ນີ້ຫາປີ 2020 ຢູ່ພາຍໃນເມືອງ ຄື: ບ້ານສົມສະຫວາດ, ບ້ານວຽງສະໄໝ, ບ້ານໂພນສະຫວ່າງ, ບ້ານນາທອງ ແລະ ບ້ານນ້ຳພາວ, ພ້ອມທັງແຕ່ງຕັ້ງພະນັກງານກໍ່ສ້າງຮາກຖານໄປປະຈຳຢູ່ແຕ່ລະກຸ່ມບ້ານ.
ຈາກນັ້ນ ປະທານກອງປະຊຸມກໍໄດ້ເຈາະຈີ້ມໃຫ້ຜູ້ທີ່ເຂົ້າຮ່ວມກອງປະຊຸມໄດ້ປະກອບຄຳຄິດຄຳເຫັນແລກປ່ຽນກັນ ແນ່ໃສ່ຈັດຕັ້ງປະຕິບັດວຽກງານ ເພື່ອຄວາມເປັນເອກະພາບພ້ອມທັງແນະນຳທິດທາງ ແລະ ວິທີການໃນການຈັດຕັ້ງປະຕິບັດວຽກງານໃນສະເພາະໜ້າຕື່ມອີກ. ກອງປະຊຸມໄດ້ດຳເນີນໄປເປັນເວລາເຄີ່ງວັນ.
error: Content is protected !!