ກອງ​ປະ​ຊຸມ​ໃຫຍ່​ຄັ້ງ​ທີ VII ຂອງ​ສະ​ຫະ​ພັນ​ແມ່​ຍິງ​ເມືອງວັງ​ວຽງ

​ກອງ​ປະ​ຊ​ຸມ​ໃຫຍ່​ຄັ້ງ​ທີ VII ສະ​ຫະ​ພັນ​ແມ່​ຍິງ​ເມືອງວັງ​ວຽງ ໄດ້​ເປີດ​ຂຶ້ນໃນ​ມື້​ວັນ​ທີ 18 ຕຸ​ລາ 2019 ຜ່ານ​ມາ​ນີ້ ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ. ໂດຍ​ການ​ເຂົ້າ​ຮ່ວມ​ເປັນ​ປະ​ທານຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ, ທ່ານ ນາງ ຈັນ​ທະ​ບູນ ໂພ​ສະ​ລາດ ກຳ​ມະ​ການ​ພັກ​ແຂວງ ປະ​ທານ​ສະ​ຫະ​ພັນ​ແມ່​ຍິງ ແຂວງວຽງ​ຈັນ, ມີ​ຜູ້​ຕາງ​ໜ້າ​ອົງ​ການ​ຈັດ​ຕັ້ງ​ມະ​ຫາ​ຊົນ​ຂັ້ນ​ເມືອງ, ອົງ​ການ​ຈັດ​ຕັ້ງ​ທີ່​ກ່ຽວ​ຂ້ອງ, ແຂກ​ຖືກ​ເຊີນ​ຈາກ​ຫ້ອງ​ການ​ຕ່າງໆ ອ້ອມ​ຂ້າງ​ເມືອງ ແລະ ຜູ້​ແທນ​ສົມ​ບູນ​ທີ່​ເປັນ​ຕົວ​ແທນ​ໃຫ້​ແກ່​ເອື້ອຍ​ນ້ອງ​ສະ​ຫະ​ພັນ​ແມ່​ຍິງ​ໜ່ວຍ​ຕ່າງໆ ໃນ​ທົ່ວ​ເມືອງ​ຈຳ​ນວນ 126 ສະ​ຫາຍ​ເຂົ້າ​ຮ່ວມ.

ກອງ​ປະ​ຊຸມ​ໄດ​້​ຮ​ັບ​ຟັງ​ການ​ຜ່ານ​ບົດ​ລາຍ​ງານ​ການ​ເມືອງ​ທີ່​ສະ​ເໜີ​ໂດຍ ທ່ານ ນາງ ຂັນ​ຄຳ ສີ​ທາ​ນີ ກຳ​ມະ​ການ​ພັກ​ເມືອງ ປະ​ທານ​ສ​ະ​ຫະ​ພັນ​ແມ່​ຍິງ​ເມືອງ​ໃນ​ໄລ​ຍະ 5 ປີ​ຜ່ານ​ມາ ເຫັນ​ວ່າ​: ວຽກ​ງານ​ຂອງ​ສະ​ຫະ​ພັນ​ແມ່​ຍິງ​ເມືອງວັງ​ວຽງ ໄດ້​ມີ​ອັນ​ພົ້ນ​ເດັ່ນຫຼາຍ​ດ້ານ. ທົ່ວ​ເມືອງ​ມີ​ສະ​ມາ​ຊິກ​ສະ​ຫະ​ພັນ​ແມ່​ຍິງ​ທັງ​ໝົດ 8,538 ຄົນ ກວມ​ເອົາ 49% ຂອງ​ແມ່​ຍິງ​ໃນ​ທົ່ວ​ເມືອງ ປະ​ກອບ​ມີ 59 ໜ່ວຍ​ຮາກ​ຖານ​ບ້ານ, 55 ໜ່ວຍ​ກົມ​ກອງ​ອ້ອມ​ຂ້າງ​ເມືອງ, ໄດ້​ຂະ​ຫຍາຍ​ການ​ຈັດ​ຕັ້ງ​ສະ​ຫະ​ພັນ​ແມ່​ຍິງ​ລົງ​ສູ່​ຫົວ​ໜ່ວຍ​ທຸ​ລະ​ກິດ​ຂອງ​ເອກ​ະ​ຊົນ​ໄດ້ 1 ຫົວ​ໜ່ວຍ ມີ​ສະ​ມາ​ຊິກ 804 ຄົນ. ສະ​ມາ​ຊິກ​ແມ່​ຍິງ​ໄດ້​ສັງ​ກັດ​ຢູ່​ອົງ​ການ​ຈັດ​ຕັ້ງ​ຂອງ​ລັດ​ກວມ​ເອົາ 50,19% ຂອງ​ຈຳ​ນວນ​ພະ​ນັກ​ງານ​ລັດ​ຖະ​ກອນ​ທົ່ວ​ເມືອງ, ໄດ້​ສ້າງ​ບ້ານ​ປະ​ຕິ​ບັດ​ສິດ​ສະ​ເໝີ​ພາບ​ຍິງ​ຊາຍ ປາ​ສະ​ຈາກ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກ​ນ້ອຍ​ໄດ້ 57 ບ້ານ ກວມ​ເອົາ 92,27% ຂອງ​ບ້ານ​ໃນ​ທົ່ວ​ເມືອງ, ໄດ້​ຮັບ​ຮອງ​ເອົາ​ສະ​ຫະ​ພັນ​ແມ່​ຍິງ​ບ້ານ 3 ດີ ໄດ້ 59 ບ້ານ, ໜ່ວຍ​ສະ​ຫະ​ພັນ​ແມ່​ຍິງ 3 ດີ ມີ 52 ໜ່ວຍ, ເປັນ​ເມືອງ​ສະ​ຫະ​ພັນ​ແມ່​ຍິງ 3 ດີ 2 ສະ​ໄໝ. ນອກ​ນີ້​ຍັງ​ໄດ້​ຍາດ​ແຍ່ງ​ເອົາ​ທຶນ​ຈາກ​ໂຄງ​ການ​ຕ່າງໆ ລວມ​ມີ 4 ໂຄງ​ການ ເພື່ອ​ເປັນ​ກອງ​ທຶນ​ໃຫ້​ສະ​ມາ​ຊິກ​ເອື້ອຍ​ນ້ອງ​ແມ່​ຍິງ​ໄດ້​ກູ້​ຢືມ​ໄປ​ພັດ​ທະ​ນາ​ເສດ​ຖະ​ກິດ​ແກ້​ໄຂ​ຄວາມ​ທຸກ​ຍາກ​ຂອງ​ຄອ​ບ​ຄົວ​ ລວມ​ທັງ​ໝົດ​ເປັນ​ເງິນ 772,000,000 ກີບ. ຈາກ​ນັ້ນ​ກໍ​ໄດ້​ຜ່ານ​ແຜນ​ພັດ​ທະ​ນາ​ແມ່​ຍິງ​ແຕ່​ປີ 2020-2024 ແລະ ບົດ​ສຳຫຼວດ​ການ​ນຳ​ພາ​ລວມ ເພື່ອ​ໃຫ້​ແຂກ ແລະ ຜູ້​ແທນ​ພາກ​ສ່ວນ​ຕ່າງໆ ໄດ້​ປະ​ກອບ​ຄຳ​ຄິດ​ຄຳ​ເຫັນ​ເຂົ້າ​ໃສ່. ຈາກ​ນັ້ນ ສະ​ຫາຍ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ​ກໍ​ໄດ້​ຂຶ້ນ​ໃຫ້​ກຽດ​ໂອ້​ລົມ ແລະ ຊີ້​ນຳ​ກອງ​ປະ​ຊຸມ​ໃນ​ຄັ້ງ​ນີ້. ກອງ​ປະ​ຊຸມ​ໄດ້​ປ່ອນ​ບັດ​ຄັດ​ເລືອກ​ເອົາ​ຄະ​ນະ​ບໍ​ລິຫານ​ງານ​ສະ​ຫະ​ພັນ​ແມ່​ຍິງ​ເມືອງ​ຊຸດ​ໃໝ່ ມີ​ບຸກ​ຄະ​ລາ​ກອນ​ເຂົ້​າ​ຮັບ​ສະ​ມັກ​ທັງ​ໝົດ 25 ສະ​ຫາຍ, ໄດ້​ເລືອກ​ເອົາ 21 ສະ​ຫາຍ. ທີ່​ປະ​ຊຸມ​ໄດ້​ຮັບ​ຮອງ​ເອົາ​:
ທ່ານ ນາງ​ ພອນ​ໄຊ ຫຼວງວິ​ລາດ ເປັນ​ປະ​ທານສະ​ຫະ​ພັນ​ແມ່​ຍິງ​ເມືອງ​ຄົນ​ໃໝ່.
ທ່ານ ນາງ ຕູ່ ນັນ​ທະ​ວົງ ເປັນ​ຮອງ.
ທ່ານ ນາງ ສຳ​ລວຍ ສຸ​ຂະ​ວົງ ເປັນ​ຄະ​ນະ​ ຮັບ​ຜິດ​ຊອບ​ວຽກ​ງານກວດ​ກາ ແລະ ທ່ານ ນາງ ສຸ​ພາ​ພອນ ເປັນ​ຮອງ​ປ​ະ​ທານກວດ​ກາ.

ຕອນ​ທ້າຍ ກອງ​ປະ​ຊຸມ​ຍັງ​ໄດ້​ຮັບ​ຟັງ​ການ​ໂອ້​ລົມ​ຂອງ​ທ່ານ ນາງ ຈັນ​ທະ​ບູນ ໂພ​ສະ​ລາດ ກຳ​ມະ​ການ​ພັກ​ແຂວງ ປ​ະ​ທານ​ສະ​ຫະ​ພັນ​ແມ່​ຍິງ​ແຂວງວຽງ​ຈັນ ເຊີ່ງ​ກ່ອນ​ອື່ນ​ທ່ານ​ໄດ້​ສະ​ແດງ​ຄວາມ​ຍ້ອງຍ​ໍ​ຊົມ​ເຊີຍ​ຕໍ່​ຜົນ​ງານ ແລະ ຜົນ​ສຳ​ເລັດ​ທີ່​ເອື້ອຍ​ນ້ອງ​ສະ​ຫະ​ພັນ​ແມ່​ຍິງ​ເມືອງວັງ​ວຽງ​ຍາດ​ມາ​ໄດ້​ຕະຫຼອດ​ໄລ​ຍະ 5 ປີ​ຜ່ານ​ມາ ພ້ອ​ມ​ທັງ​ແນະ​ນຳ​ເນັ້ນ​ໃຫ້​ເອົາ​ໃຈ​ໃສ່​ໃນ​ການ​ປະ​ຕິ​ບັດ​ຄຳ​ຂວັນ 3 ດີ​ຂອງ​ແມ່​ຍິງ​ໃຫ້​ມີ​ຄຸນ​ນະ​ພາບ ມີ​ການ​ລົງ​ຕິດ​ຕ​າມກວດ​ກາ​ຊີ້​ນຳ​ໃຫ້​ເປັນ​ປົກກະ​ຕິ, ສືບ​ຕໍ່​ສ້າງ​ຂະ​ບວນ​ການ​ຕ້ອນ​ຮັບ​ກອງ​ປະ​ຊຸມ​ໃຫຍ່​ຂອງ​ສະ​ຫະ​ພັນ​ແມ່​ຍິງ​ແຂວງ, ກອງ​ປະ​ຊຸມ​ໃຫຍ່​ອົງ​ຄະ​ນະ​ພັກ​ເມືອງ​ດ້ວຍ​ຂະ​ບວນ​ການ​ດ້ານ​ຕ່າງໆ ໃຫ້​ເປັນ​ຂະ​ບວນ​ຟົດ​ຟື້ນ, ພ້ອມ​ກັນ​ນີ້​ກໍ​ຕ້ອງ​ໄດ້​ເອົາ​ໃຈ​ໃສ່​ສຶກ​ສາ​ອົບ​ຮົມ​ກາ​ນ​ເມືອງ​ແນວ​ຄິດ​ໃຫ້​ເອື້ອຍ​ນ້ອງ​ແມ່​ຍິງ​ໃຫ້​ມີ​ຄຸນ​ທາດ​ການ​ເມືອງ​ໜັກ​ແໜ້ນ, ຮູ້​ປົກ​ປັກ​ຮັກ​ສາ​ວັດ​ທະ​ນະ​ທຳ ແລະ ກຽດ​ສັກ​ສີ​ຂອງ​ເອື້ອຍ​ນ້ອງ​ແມ່​ຍິງ, ປະ​ຕິ​ບັດ​ສິດ​ສະ​ເໝີ​ພາບ​ຍິງ​ຊາຍ ແລະ ຊຸກ​ຍູ້​ການ​ຈັດ​ຕັ້ງ​ແມ່​ຍິງ​ຢູ່​ຮາກ​ຖານ​ໃຫ້​ເຂ​ັ້ມ​ແຂງ​ເຄື່ອນ​ໄຫວ​ວຽກ​ງານ​ເປັນ​ປົກ​ກະ​ຕິ.