ກອງ​ປະ​ຊຸມ​ທາບ​ທາມ​ບຸກ​ຄະ​ລາ​ກອນ​ຮອບ 2 ເພື່ອ​ກະ​ກຽມ​ໃຫ້​ແກ່ກອງ​ປະ​ຊຸມ​ໃຫຍ່​ອົງ​ຄະ​ນະ​ພັກ​ເມືອງ

ກອງ​ປະ​ຊຸມ​ໄດ້​ເປີດ​ຂຶ້ນ​ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ ໃນ​ມື້​ວັນ​ທີ 22 ຕຸ​ລາ 2019, ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ບຸນ​ເພັງ ສາຍ​ນໍ​ລະ​ດີ ຮອງ​ເລ​ຂາ​ພັກ​ແຂວງ ປ​ະ​ທານ​ສະ​ພາ​ປະ​ຊາ​ຊົນ​ແຂວງວຽງ​ຈັນ. ໂດຍ​ການ​ເຂົ້າ​ຮ່ວມ​ຂອງ ທ່ານ ຄຳ​ຜອງ ດວງວິ​ໄລ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງ​ໆວັງ​ວຽງ, ມີ​ບັນ​ດາ​ສະ​ຫາຍ​ໃນ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ເລ​ຂາ​ຄະ​ນະ​ພັກ​ຮາກ​ຖານ, ເລ​ຂາ​ໜ່ວຍ​ພັກ, ຫົວ​ໜ້າ​ຫ້ອງ​ການ, ຄະ​ນະ​ຫ້ອງ​ການ​ຕ່າງໆ ຢູ່​ພາຍ​ໃນ​ເມືອງ​ເຂົ້າ​ຮ່ວມ.

ກອງ​ປະ​ຊຸມ​ໄດ້​ຮັບ​ຟັງ​ການ​ຜ່ານ​ຮ່າງ​ບົດ​ລາຍ​ງານ​ການ​ເມືອງ, ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ 5 ປີ ຄັ້ງ​ທີ III ແຕ່​ປີ 2020-2024 ແລະ ຜ່ານ​ຮ່າງ​ບົດ​ສຳ​ຫຼວດ​ການ​ນຳ​ພາ​ລວມ ໂດ​ຍ​ແມ່ນ​ສະ​ຫາຍ ເລ​ຂາ​ພັກ​ເມືອງ, ສະ​ຫາຍ​ຮອງ​ເຈົ້າ​ເມືອງ ແລະ ສະ​ຫາຍ​ຮອງ​ເລ​ຂາ​ພັກ​ເມືອງ​ເປັນ​ຜູ້​ນຳ​ສະ​ເໜີ ເພື່ອ​ໃຫ້​ຜູ້​ເຂົ້າ​ຮ່ວມ​ໄດ້​ປະ​ກອບ​ຄຳ​ຄິດ​ຄຳ​ເຫັນ​ເຂົ້າ​ໃສ່​ແຕ່​ລະ​ຂົງ​ເຂດ​ວຽກ​ງານ ເພື່ອ​ປັບ​ປຸງ ແລະ ແກ້​ໄຂ​ຄືນ​ໃຫ້​ແທດ​ເໝາະ​ກັບ​ສະ​ພາບ​ຄວາມ​ເປັນ​ຈິງ, ສ້າງ​ຄວາມ​ເປັນ​ເອ​ກະ​ພາບ​ທາງ​ດ້ານ​ເນື້ອ​ໃນ​ໃຫ້​ແກ່ກອງ​ປະ​ຊຸມ​ໃຫຍ່​ຄັ້ງ​ທີ VII ອົງ​ຄະ​ນະ​ພັກ​ເມືອງວັງ​ວຽງ​ທີ່​ຈະ​ເປີດ​ຂຶ້ນ​ໃນ​ມໍ່ໆ​ນີ້. ໄປ​ພ້ອມ​ກັນ​ນີ້​ຍັງ​ໄດ້​ມີ​ການ​ທາບ​ທາມ​ຫາງ​ສຽງ​ບຸກ​ຄະ​ລາ​ກອນ​ທີ່​ມີ​ເງື່ອນ​ໄຂ​ເຂົ້າ​ສະ​ມັກ​ຮັບ​ເລືອກ​ຕັ້ງ​ເຂົ້າ​ໃນ​ຄະ​ນະ​ບໍ​ລິ​ຫານ​ງານ​ພັກ​ເມືອງ, ຄະ​ນະ​ປະ​ຈຳ​ພັ​ກ​ເມືອງ, ປ​ະ​ທານກວດ​ກາ​ພັກ-ລັດ ແລະ ຮອງ​ປະ​ທານ​ຕື່ມ​ອີກ.