ເມືອງວັງ​ວຽງ ຈັດ​ງານ​ບຸນ​ຊ່ວງ​ເຮືອ​ອອກ​ພັນ​ສາ​ປະ​ວໍ​ລະ​ນາ​ ປະ​ຈຳ​ປີ ພ​ສ 2562

ເພື່ອ​ເປັນ​ການ​ອະ​ນຸ​ລັກ​ຮັກ​ສາ​ຮີດ​ຄອງ​ປະ​ເພ​ນີ​ວັດ​ທະ​ນະ​ທຳ​ອັນ​ດີ​ງາມ​ຂອງ​ຊາດ ກ​ໍ​ຄື​ຂອງ​ເມື​ອ​ວັງ​ວຽງ ທີ່​ໄດ້​ຈັດ​ຕັ້ງ​ປະ​ຕິ​ບັດ​ກັນ​ມາ​ໃນ​ແຕ່​ລະ​ປີ. ບຸນ​ຊ່ວງ​ເຮືອ​ອອກ​ພັນ​ສາ​ປະ​ວໍ​ລະ​ນາ​ປະ​ຈຳ​ປີ ພ​ສ 2562 ເມືອງວັງ​ວຽງ ໄດ້​ຈັດ​ຂຶ້ນ​ໃນ​ມື້​ວັນ​ທີ 13 ຕຸ​ລາ 2019 ກົງ​ກັບ​ມື້​ຂຶ້ນ 15 ຄ່ຳ​ເດືອນ 11 ເພັງ ຢູ່​ທີ່​ນ້ຳ​ຊອງ​ເຂດ​ບ້ານ​ສະ​ຫວ່າງ​ ເມືອງວັງ​ວຽງ. ເຊີ່ງ​ມີ​ມວນ​ຊົນ​ຊາວ​ເມືອງວັງ​ວຽງ ຕະຫຼອດ​ຮອດ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ​ປະ​ເທດ​ເຂົ້າ​ຮ່ວມ​ຮັບ​ຊົມ​ເປັນ​ຈຳ​ນວນຫຼວງຫຼາຍ.

ການ​ແຂ່ງ​ຂັນ​ມີ​ເຮືອ​ປະ​ເພດ 12-15 ສີ​ພາຍ​ເຂົ້າ​ຮ່ວມ​ທັງ​ໝົດ 29 ຄະ​ນະ, ໃນ​ນີ້​ມີ​ເຮືອ​ເພດ​ຊາຍ 20 ຄະ​ນະ, ຍິງ 9 ຄະ​ນະ. ຜົນ​ການ​ແຂ່ງ​ຂັນ ມີ​ດັ່ງ​ນີ້:
ເຮືອ​ປະ​ເພດ​ຊາຍ: ທີ 1 ໄດ້​ແກ່​ເຮືອ​ອົງ​ສາ​ຟາມ (ບ້ານ​ນາ​ມ່ວງ) ໄດ້​ຮັບ​ຂັນ​ຊ​ະ​ນະ​ເລີດ 1 ໜ່ວຍ​ພ້ອມ​ທັງ​ເງິນ​ລາງວັນ 2,000,000 ກີບ.
– ຮອງ​ຊະ​ນ​ະ​ເລີດ​ໄດ້​ແກ່​ເຮືອກອງ​ພົນ​ທະ​ຫານ​ຮາບ​ທີ 1 ໄດ້​ຮັບ​ຂັນ 1 ໜ່ວຍ​ພ້ອມ​ເງິນ​ລາງວັນ 1,800,000 ກີບ.
– ທີ 3 ໄດ້ແກ່​ເຮືອ​ບ້ານ​ທ່າ​ເຮືອ ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາງວັນ 1,500,000 ກີບ.
ສຳ​ລັບ​ເຮືອ​ປະ​ເພດ​ຍິງ: ທີ 1 ໄດ້​ແກ່​ບ້ານ​ເມືອງ​ຊອງ 1, ທີ 2 ໄດ້​ແກ່​ບ້ານ​ທ່າ​ເຮືອ, ທີ 3 ໄດ້​ແກ່​ເຮືອ​ບ້ານ​ເມືອງ​ຊອງ 2. ສ່ວນ​ລາງວັນ​ແຕ່​ລະ​ປະ​ເພດ​ແມ່ນ​ໄດ້​ຄື​ກັນ​ກັບ​ເຮືອ​ປະ​ເພດ​ຊາຍ.
ການ​ແຂ່ງ​ຂັນ​ໄດ້​ດຳ​ເນີນ​ໄປ​ເປັນ​ເວ​ລາ 1 ວັນ ເຊີ່ງເຕັມ​ໄປ​ດ້ວຍ​ຄວາມ​ເບີກ​ບານ​ມ່ວນ​ຊື່ນ ແລະ ໄດ້​ຮັບ​ຜົນ​ສຳ​ເລັດ​ເປັນ​ຢ່າງ​ດີ.