ເມືອງວັງວຽງ ເປີດຂະບວນການສ້າງຄອບຄົວ ແລະ ບ້ານສາມັກຄີປອງດອງ

ໃນຕອນເຊົ້າຂອງວັນທີ 23 ສິງຫາ 2018 ຜ່ານມານີ້ ຢູ່ທີ່ຫ້ອງປະຊຸມຊັ້ນ III ສຳນັກງານປົກຄອງເມືອງວັງວຽງ ໄດ້ຈັດກອງປະຊຸມເປີດຂະບວນການສ້າງຄອບຄົວ ແລະ ບ້ານສາມັກຄີປອງດອງທົ່ວເມືອງວັງວຽງຂຶ້ນ.
ໂດຍການເຂົ້າຮ່ວມເປັນປະທານຂອງທ່ານ ທອງສະຫວັນ ວົງສຳພັນ ຄະນະປະຈຳພັກແຂວງ ປະທານແນວລາວສ້າງຊາດແຂວງວຽງຈັນ, ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ທ່ານ ບຸນປັນ ພົມມະວົງ ຮອງເລຂາພັກເມືອງ ປະທານແນວລາວສ້າງຊາດເມືອງວັງວຽງ ສະມາຊິກສະພາປະຊາຊົນແຂວງວຽງຈັນ ປະຈຳເມືອງວັງວຽງ. ນອກນີ້ຍັງມີບັນດາທ່ານໃນຄະນະການນຳຂອງເມືອງ, ຫົວໜ້າຫ້ອງການຕ່າງໆ ອ້ອມຂ້າງເມືອງ, ອຳນາດການປົກຄອງບ້ານ ແລະ ປະທານແນວລາວສ້າງຊາດປະຈຳແຕ່ລະບ້ານຢູ່ພາຍໃນເມືອງເຂົ້າຮ່ວມ.
ພາຍຫຼັງຄະນະຈັດຕັ້ງກອງປະຊຸມໄດ້ຜ່ານຂໍ້ຕົກລົງຂອງທ່ານເຈົ້າເມືອງໆວັງວຽງ ວ່າດ້ວຍ: ການແຕ່ງຕັ້ງຄະນະຮັບຜິດຊອບສ້າງຄອບຄົວ ແລະ ບ້ານສາມັກຄີປອງດອງຂັ້ນເມືອງ ແລະ ຂັ້ນບ້ານແລ້ວ, ທ່ານ ຄຳຜອງ ດວງວິໄລ ເຈົ້າເມືອງໆວັງວຽງ ໄດ້ຂຶ້ນມີຄຳເຫັນ ແລະ ເຜີຍແຜ່ພາລະບົດບາດຂອງອົງການແນວລາວສ້າງຊາດຕໍ່ທີ່ປະຊຸມ. ຈາກນັ້ນ ທ່ານ ບຸນປັນ ພົມມະວົງ ປະທານແນວລາວສ້າງຊາດເມືອງກໍໄດ້ຂຶ້ນຜ່ານເງື່ອນໄຂ, ມາດຖານຂອງຄອບຄົວ ແລະ ບ້ານສາມັກຄີປອງດີ ແລະ ຕາງໜ້າໃຫ້ອົງການແນວລາວສ້າງຊາດແຕ່ລະບ້ານໄດ້ຂຶ້ນຈັບມືກັນປະກາດແຂ່ງຂັນການສ້າງຄອບຄົວ ແລະ ບ້ານສາມັກຄີປອງດີຂຶ້ນ ໂດຍໄດ້ເລັ່ງໃສ່ບ້ານທີ່ຮັບຮອງເປັນບ້ານພັດທະນາແລ້ວ ເຊີ່ງທົ່ວເມືອງວັງວຽງໃນປະຈຸບັນມີ 26 ບ້ານ.
ຕອນທ້າຍຂອງພິທີຍັງໄດ້ຮັບຟັງການໂອ້ລົມຂອງທ່ານ ທອງສະຫວັນ ວົງສຳພັນ ຄະນະປະຈຳພັກແຂວງ ປະທານແນວລາວສ້າງຊາດແຂວງວຽງຈັນຕື່ມອີກ. ເຊີ່ງທ່ານໄດ້ຍົກໃຫ້ເຫັນເຖິງຄວາມໝາຍຄວາມສຳຄັນຂອງການສ້າງຄອບຄົວ ແລະ ບ້ານສາມັກຄີປອງດອງ, ວິທີຈັດຕັ້ງປະຕິບັດຕາມແຕ່ລະບາດກ້າວ, ນອກນີ້ ຍັງໄດ້ຍົກໃຫ້ເຫັນເຖິງກົນອຸບາຍຫັນປ່ຽນໂດຍສັນຕິຂອງສັດຕູທີ່ຫວັງທຳລາຍຄວາມສາມັກຄີປອງດອງຂອງປະຊາຊົນບັນດາເຜົ່າໃນທີ່ຜ່ານມາດ້ວຍຮູບແບບຕ່າງໆ ພ້ອມທັງຮຽກຮ້ອງມາຍັງການຈັດຕັ້ງພັກ-ລັດ ແລະ ອົງການຈັດຕັ້ງມະຫາຊົນທຸກຂັ້ນຈົ່ງໄດ້ເຊີດຊູຄວາມຮັບຜິດຊອບຂອງຕົນໃຫ້ສູງຂຶ້ນ ພ້ອມກັນຊຸກຍູ້ການສ້າງຄອບຄົວ ແລະ ບ້ານສາມັກຄີປອງດອງຢູ່ເມືອງວັງວຽງໃຫ້ໄດ້ຕາມຄາດໝາຍທີ່ກຳນົດໄວ້ທຸກປະການ.