ເມືອງວັງວຽງ ສຳເລັດກອງປະຊຸມທາບທາມພະນັກງານນຳພາ-ຄຸ້ມຄອງ

ໃນວັນທີ 01 ຕຸລາ 2018 ຜ່ານມານີ້ ຢູ່ທີ່ສະໂມສອນໃຫຍ່ຂອງເມືອງວັງວຽງ ໄດ້ຈັດກອງປະຊຸມກຳນົດການສ້າງແຜນພະນັກງານນຳພາ-ຄຸ້ມຄອງຂັ້ນເມືອງຂື້ນ, ໂດຍການເຂົ້າຮ່ວມເປັນປະທານຂອງທ່ານ ອຸ່ນແສງ ແກ້ວດາວັນ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງວຽງຈັນ, ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີບັນດາສະຫາຍຄະນະປະຈຳພັກເມືອງ, ກຳມະການພັກເມືອງ, ເລຂາຄະນະພັກຮາກຖານ, ເລຂາໜ່ວຍພັກ, ຫົວໜ້າຫ້ອງການ, ຄະນະຫ້ອງການ ແລະ ນາຍບ້ານທົ່ວເມືອງເຂົ້າຮ່ວມ.
ທີ່ປະຊຸມໄດ້ຈັດຕັ້ງການເຜີຍແຜ່ເຊື່ອມຊຶມມະຕິຂອງກົມການເມືອງສູນກາງພັກ ເລກທີ 030/ກມສພ ແລະ ເລກທີ 032/ກມສພ ວ່າດ້ວຍມາດຖານຂອງພະນັກງານນຳພາຄຸ້ມຄອງ ແລະ ການສ້າງແຜນກຳນົດພະນັກງານນຳພາຄຸ້ມຄອງ ນອກນີ້ຍັງໄດ້ເຜີຍແຜ່ຄຳແນະນຳຂອງຄະນະຈັດຕັ້ງສູນກາງພັກ ເລກທີ 292/ຄຈສພ, ໃນການຈັດຕັ້ງປະຕິບັດມາດຖານຂອງພະນັກງານນຳພາຄຸ້ມຄອງ ແລະ ການສ້າງແຜນກຳນົດພະນັກງານນຳພາຄຸ້ມຄອງ.
ຈາກນັ້ນ ກໍໄດ້ມີການຢັ້ງຫາງສຽງ ເພື່ອທາບທາມເອົາບຸກຄະລາກອນຜູ້ທີ່ຈະກຳນົດເຂົ້າໃນແຜນການ ເພື່ອສ້າງເປັນພະນັກງານນຳພາ-ຄຸ້ມຄອງຂອງເມືອງໃນຕໍ່ໜ້າເຊັ່ນ: ກຳມະການພັກເມືອງ, ຮອງເຈົ້າເມືອງ, ຮອງເລຂາພັກເມືອງ, ຄະນະປະຈຳພັກເມືອງ ແລະ ເລຂາພັກເມືອງ-ເຈົ້າເມືອງ ຮອບທີ 1, ຮອບທີ 2 ແລະ ຮອບທີ 3 ເພື່ອກະກຽມໃຫ້ແກ່ກອງປະຊຸມໃຫຍ່ອົງຄະນະພັກເມືອງໃນຕໍ່ໜ້າ ດັ່ງນີ້:
– ຮອບທີ 1 ໂດຍແມ່ນຜູ້ທີ່ເຂົ້າຮ່ວມກອງປະຊຸມທັງໝົດຮ່ວມຢັ້ງຫາງສຽງ ເພື່ອສັງລວມປິດລັບ.
– ຮອບທີ 2 ແມ່ນບັນດາຄະນະບໍລິຫານງານພັກເມືອງ, ຫົວໜ້າຫ້ອງການ, ຄະນະຫ້ອງການ ແລະ ເລຂາໜ່ວຍພັກສຳນັກງານອົງການເປັນຜູ້ຮ່ວມຢັ້ງຫາງສຽງສັງລວມປິດລັບ
ແລະ ຮອບທີ 3 ແມ່ນບັນດາສະຫາຍໃນຄະນະບໍລິຫານງານພັກເມືອງເປັນຜູ້ຢ້ງຫາງສຽງເພື່ອສັງລວມປິດລັບ.