ສຳ​ເລັດກອງ​ປະ​ຊຸມ​ໃຫຍ່ ຄັ້ງ​ທີ VII ອົງ​ຄະ​ນ​ະ​ພັກ​ເມືອງວັງ​ວຽງ

​ກອງ​ປະ​ຊຸມ​ໃຫຍ່ ຄັ້ງ​ທີ VII ອົງ​ຄະ​ນະ​ພັກ​ເມືອງວັງ​ວຽງ ໄດ້​ດຳ​ເນີນ​ໄປ​ເປັນ​ເວ​ລາ 2 ວັນ ຄື: ວັນ​ທີ 3-4 ກຸມ​ພາ 2020 ຢູ່​ທີ່​ສະ​ໂມ​ສອນ​ໃຫຍ່​ ສຳ​ນັກ​ງານ​ປົກ​ຄອງເມືອງວັງ​ວຽງ ໂດຍ​ການ​ໃຫ້​ກຽດ​ເຂົ້າ​ຮ່ວມ​ເປັນ​ປະ​ທານຂອງ ທ່ານ ຄຳ​ພັນ ສິດ​ທິ​ດຳ​ພາ ກຳ​ມະ​ການ​ສູນ​ກາງພັກ ເລ​ຂາ​ພັກ​ແຂວງ ເຈົ້າ​ແຂວງໆ​ວຽງ​ຈັນ, ທ່ານ ບຸນ​ຈັນ ມາ​ລາ​ວົງ ວ່າ​ການ​ເລ​ຂາ​ພັກ​ເມືອງ-ເຈົ້າ​ເມືອງ​ໆ​ວັງ​ວຽງ, ມີ​ບັນ​ດາ​ທ່ານ​ຄະ​ນະ​ປະ​ທານ, ແຂກ​ຖືກ​ເຊີນ, ການ​ນຳ​ເມືອງ​ອ້ອມ​ຂ​້າງ ແລະ ຜູ້​ແທນ​ສົມ​ບູນ​ທີ່​ເປັນ​ຕົວ​ແທນ​ໃຫ້​ແກ່​ສະ​ມາ​ຊິກ​ພັກ​ຈາກ​ຮາກ​ຖານ​ພັກ​ຕ່າງໆ ໃນ​ທົ່ວ​ເມືອງ​ຈຳ​ນວນ 149 ທ່ານ ເຂົ້າ​ຮ່ວມ.

​ສຳ​ລັບ​ມື້ທີ 1: ທີ່​ປະ​ຊຸມ​ໄດ້​ຮັບ​ຟັງ​ການ​ຜ່ານ​ບົດ​ລາຍ​ງານ​ການ​ເມືອງ ແລະ ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ 5 ປີ ຂອງ​ເມືອງ​ເພື່ອ​ໃຫ້​ຜູ້​ແທນ​ທີ່​ເຂົ້າ​ຮ່ວມກອງ​ປະ​ຊຸມ​ໄດ້​ກອບ​ຄຳ​ຄິດ​ຄຳ​ເຫັນ​ເຂົ້າ​ໃສ່, ເຊີ່ງ​ຕີ​ລ​າ​ຄາ​ແລ້ວ​ເຫັນ​ວ່າ​ຕະຫຼອດ​ໄລ​ຍະ 5 ປີ​ຜ່ານ​ມາ ເມືອງວັງ​ວຽງ​ໄດ້​ມີ​ຜົນ​ສຳ​ເລັດຫຼາຍ​ດ້ານ​ໃນ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ເມືອງ, ເສດ​ຖະ​ກິດ​ຂະ​ຫຍາຍ​ຕົວ​ສະ​ເລ່ຍ 10,88% ຕໍ່​ປີ, GDP ສະ​ເລ່ຍ 5 ປີ 7,88%, ລວມຍອດ GDP ໃນ​ປີ 2019 ສາ​ມາດ​ບັນ​ລຸ​ໄດ້ 1.489,2 ຕື້​ກີບ ສະ​ເລ່ຍ​ລາຍ​ຮັບ 23,9 ລ້ານ​ກີບ​ຕໍ່​ຄົນ ຫຼື (2.811,43$ຕໍ່​ຄົນ), ຂະ​ແໜງ​ກະ​ສິ​ກຳ​ປະ​ຕິ​ບັດ​ໄດ້ 7,3%, ຂະ​ແໜງ​ອຸດ​ສາ​ຫະ​ກຳ 10,16%, ຂະ​ແໜງ​ບໍ​ລິ​ການ 13,64%. ການ​ຂະ​ຫຍາຍ​ຕົວ​ຂອງ​ພົນ​ລະ​ເມືອງ 2% ຕໍ່​ປີ. ໃນ 5 ປີ​ຜ່ານ​ມາ​ມີ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ຢູ່​ເມືອງ 1.107.525 ຄົນ ລື່ນ​ແຜນ​ການ​ທີ່​ວາງ​ໄວ້ 10,75%, ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ໄດ້​ຮັບ​ການ​ພັດ​ທະ​ນາ​ດີ​ຂຶ້ນ ສາ​ມາດ​ຮັບ​ຮອງ​ເປັນ​ເມ​ືອງ​ທີ່ຫຼຸດ​ພົ້ນ​ອອກ​ຈາກ​ຄວາມ​ທຸກ​ຍາກ, ສະ​ພາບ​ພາຍ​ໃນ​ເມືອງ​ໄດ້​ມີ​ຄວາມ​ສະ​ຫງົບ, ມີ​ສະ​ຖຽນ​ລະ​ພາບ​ທາງ​ດ້ານ​ການ​ເມືອງ​ຢ່າງ​ໜັກ​ແໜ້ນ. ຕໍ່​ກັບ​ດ້ານ​ອ່ອນ ແລະ ຂໍ້​ຄົງ​ຄ້າງ ທີ່​ປ​ະ​ຊຸມ​ໄດ້​ເປັນ​ເອ​ກະ​ພາບ​ກັນ​ເພື່ອ​ກຳ​ນົດ​ເຂົ້າ​ໃນ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ໄລ​ຍະ 5 ປີ ຕໍ່​ໜ້າ​ເພື່ອ​ສືບ​ຕໍ່​ສູ້​ຊົນ​ປັບ​ປຸງ​ແກ້​ໄຂ.

ສຳ​ລັບ​ມື້​ທີ 2 ຂອງ​ການ​ດຳ​ເນີນກອງ​ປະ​ຊຸມ: ຜູ້​ແທນກອງ​ປະ​ຊຸມ​ໄດ້​ຮັບ​ຟັງ​ການ​ຜ່ານ​ບົດ​ສຳ​ຫຼວດ​ການ​ນຳ​ພາ​ລວມ​ຂອງ​ຄະ​ນະ​ບໍ​ລິ​ຫານ​ງານ​ພັ​ກ​ເມືອງ​ສະ​ໄໝ​ທີ VI ເຊີ່ງ​ໄດ້​ຕີ​ລາ​ຄາ​ຜົນ​ໄດ້​ຮັບ​ໃນ​ການ​ຊີ້​ນຳໆ​ພາ​ຮອບ​ດ້ານ​ໄລ​ຍະ 5 ປີ​ຜ່ານ​ມາ ໂດຍ​ສະ​ເພາະ​ແມ່ນ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ, ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ, ວຽກ​ກໍ່​ສ້າງ​ພັກ-ພະ​ນັກ​ງານ, ຄວາມ​ຮັບ​ຜິດ​ຊອບ​ຕໍ່​ການດຳ​ເນີນ​ຊີ​ວິດ​ການ​ເມືອງ​ປັບ​ປ​ຸງ​ປົວ​ແປງ​ທົ່ວ​ພັກ ປີ 2017 ເປັນ​ຕົ້ນ​ມາ ແລະ ແບບ​ແຜນ​ວິ​ທີ​ເຮັດ​ວຽກ​ນຳ​ພາ​ຂອ​ງ​ຄະ​ນະ​ບໍ​ລິ​ຫານ​ງານ​ພັກ​ເມືອງ ໂດຍ​ຍົກ​ໃຫ້​ເຫັນ​ດ້ານ​ດີ, ດ້ານ​ອ່ອນ ແລະ ບົດ​ຮຽ​ນທີ່​ຖອດ​ຖອນ​ໄດ້.

ຈາກ​ນັ້ນ ທີ່​ປະ​ຊຸມ​ໄດ້​ເປັນ​ເອ​ກະ​ພາບ​ກັນ​ປ່ອນ​ບັດ​ຄັດ​ເລືອກ​ເອົາ​ຄະ​ນະ​ບໍ​ລິ​ຫານ​ງານ​ພັກ​ເມືອງ​ຊຸດ​ໃໝ່ ເຊີ່ງ​ມີ​ຜູ້​ເຂົ້າ​ສະ​ມັກ​ທັງ​ໝົດ 27 ທ່ານ, ເລືອກ​ເອົາ 23 ທ່ານ. ກອງ​ປະ​ຊຸມ​ຄັ້ງ​ປະ​ຖົມ​ມະ​ລຶກ​ຂອງ​ຄະ​ນະ​ບໍ​ລິ​ຫານ​ງານ​ພັ​ກ​ເມືອງ​ຄັ້ງ​ທີ VII ໄດ້​ເປັນ​ເອ​ກະ​ສັນ​ກັນ​ຮັບ​ຮອງ​ເອົາ ທ່ານ ບຸນ​ຈັນ ມາ​ລາ​ວົງ ເປັນ​ເລ​ຂາ​ຄະ​ນະ​ບໍ​ລິ​ຫານ​ງານ​ພັກ​ເມືອງ​ຄົນ​ໃໝ່, ທ່ານ ສຸ​ວຽງ​ທອງ ວົງ​ຈຳ​ປາ ເປັນ​ຮອງ​ເລ​ຂາ, ສະ​ຫາຍ ນາງ ຄຳ​ຮຸ່ງ ທິບ​ພະ​ວົງ ເປັນ​ຮອງ​ເລ​ຂາ ທັງ​ເປັນ​ປ​ະ​ທານກວດ​ກາ​ພັກ-ລັດ. ຄະ​ນະ​ບໍ​ລິ​ຫານ​ງານ​ພັກ​ເມືອງ​ຊຸດ​ທີ VII ປະ​ກອບ​ດ້ວຍ​ຄະ​ນະ​ປະ​ຈຳ​ພັກ​ເມືອງ 7 ທ່ານ, ກຳ​ມະ​ການ​ພັກ​ເມືອງ 16 ທ່ານ.

ຕອນ​ທ້າຍ​ຂອງກອງ​ປະ​ຊຸມ​ ທີ່​ປະ​ຊຸມ​ຍັງ​ໄດ້​ຮັບ​ກຽດ​ຟັງ​ການ​ໂອ້​ລົມ​ຂອງ​ ສະ​ຫາຍ ຄຳ​ພັນ ສິດ​ທິ​ດຳ​ພາ ກຳ​ມະ​ການ​ສູນ​ກາງ​ພັກ ເລ​ຂາ​ພັກ​ແຂວງ ເຈົ້າ​ແຂວງໆ​ວຽງ​ຈັນ ຕື່ມ​ອີກ. ເຊີ່ງ​ກ່ອນ​ອື່ນ​ທ່ານ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ມາ​ຍັງ​ຄະ​ນະ​ບໍ​ລິ​ຫານ​ງານ​ພັກ​ເມືອງ​ຊຸດ​ທີ VI, ການ​ຈັດ​ຕັ້ງທຸກ​ຂະ​ແໜງ​ການ, ອຳ​ນາດ​ການ​ປົກ​ຄອງ​ທຸກໆ ບ້ານ​ຕະຫຼອດ​ຮອດ​ສະ​ມາ​ຊິກ​ພັກ, ພະ​ນັ​ກງານ ແລະ ປະ​ຊາ​ຊົນ​ບັນ​ດາ​ເຜົ່າ​ໃນ​ທົ່ວ​ເມືອງ​ທີ່​ໄດ້​ພ້ອມ​ພຽງ​ເປັນ​ອັນ​ໜຶ່ງ​ອັນ​ດຽວ​ກັນ​ສູ້​ຊົນ​ຍາດ​ໄດ້​ຜົນ​ງານ​ໃນ​ການ​ສ້າງ​ສາ​ພັດ​ທະ​ນາ​ເມືອງວັງ​ວຽງ ໃຫ້​ເຂັ້ມ​ແຂງ​ກ້າວ​ໜ້າ​ຂະ​ຫຍາຍ​ຕົວ​ໃນ​ໄລ​ຍະ 5 ປີ ຜ່ານ​ມາ. ໄປ​ພ້ອມ​ກັນ​ນີ້​ທ່ານ​ຍັງ​ໄດ້​ຊີ້​ນຳ​ກ່ຽວກ​ັບ​ການ​ແກ້​ໄຂ​ດ້ານ​ອ່ອນ​ ແລະ ຂໍ້​ຄົງ​ຄ້າງ​ຕ່າງໆ ໃນ​ແຕ່​ລະ​ດ້ານ. ຕໍ່​ກັບ​ທິດ​ທາງ​ແຜນ​ການ​ໃນ​ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ 5 ປີ ຕໍ່​ໜ້າ ທ່ານ​ໄດ້​ເນັ້ນ​ໃຫ້​ຄະ​ນະ​ບໍ​ລິ​ຫານ​ງານ​ພັກ​ເມືອງ​ຊຸດ​ໃໝ່​ໄດ້​ເອົາ​ໃຈ​ໃສ່​ເປັນ​ເຈົ້າ​ການ​ໃນ​ການ​ນຳ​ພາ​ແກ້​ໄຂ ໂດຍ​ຊອກ​ໃຫ້​ເຫັນ​ເຖິງ​ສາຍ​ເຫດ, ບັນ​ດາ​ປັດ​ໃຈ​ໃໝ່​ທີ່​ເປັນ​ເງື່ອນ​ໄຂ ແລະ ທ່າ​ແຮງ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ເມືອງ, ເອົາ​ໃຈ​ໃສ່​ສຶກ​ສາ​ອົບ​ຮົມ​ການ​ເມືອງ​ແນວ​ຄິດ​ໃຫ້​ພະ​ນັກ​ງານ, ທະ​ຫານ, ຕຳຫຼວດ ແລະ ປະ​ຊາ​ຊົນ​ບັນ​ດາ​ເຜົ່າ​ໃນ​ທົ່ວ​ເມືອງ​ໃຫ້​ໜັກ​ແໜ້ນກວ່າ​ເກົ່າ ໃຫ້​ມີ​ການ​ຫັນ​ປ່ຽນ​ແນວ​ຄິດ​ອັນ​ເກົ່າ​ໄປ​ສ​ູ່​ອັນ​ໃໝ່ເພື່ອ​​ກຽມ​ຄວາມ​ພ້ອມ​ໃນ​ການ​ຮອງ​ຮັບ​ການ​ຂະ​ຫຍາຍ​ຕົວ​ທາງ​ດ້ານ​ເສດ​ຖະກິດ​ຂອງ​ເມືອງ​ໃນ​ຕ​ໍ່​ໜ້າ ພາຍຫຼັງ​ສຳ​ເລັດ​ການ​ກໍ່​ສ້າງ​ທາງ​ດ່ວນ ແລະ ທາງ​ລົດ​ໄຟ. ຈາກ​ນັ້ນ ທ່ານ​ຍັງ​ໄດ້​ຮຽກ​ຮ້ອງ​ມາ​ຍັງ​ຄະ​ນະ​ພັກ​ຊຸດ​ໃໝ່​ຈົ່ງ​​ເພີ່ມທະ​ວີ​ຄວາມ​ສາ​ມັກ​ຄີ​ພາຍ​ໃນ​ພັກ​ໃຫ້​ໜ​ັກ​ແໜ້ນ​ເປັນ​ອັນ​ໜຶ່ງ​ອັນ​ດຽວ​ກັນ ນຳ​ພາ​ເມືອງວັງ​ວຽງ​ກ້າວ​ຂຶ້ນ​ຢ່າງ​ບໍ່​ຢຸດ​ຢັ້ງ.